Mizotawng chungchâng bawk! lamah khân tlém azâwng chu ka ziak tawh a. Ka vei leh ngaihmawh, tlém azâwng (sei phian si) bawk ka’n ziak leh ang e.
1. Lamrîk anga ziah
A lamrîk ang anga ziah hi thenkhat chuan kan chîng viau mai. Kan admin-te zîngah ngei pawh hmang thîn an awm; sim a tha khawp mai. Entîrna:- ‘ang e’ tih tura ‘a nge/ange’ tih te, ‘em mai’ tih tura ‘e mai/emai’ tih te, ‘ang em’ tih tura ‘a ngem/angem’ tih te, ‘em ni’ tih tura ‘ami/a mi’ tih te, ‘mang e’ tih tura ‘ma nge/mange’ tih leh a dangte pawh. A dikna ang anga lam hi a harsa deuh va, kei ngei paw’n harsa ka ti. Mahse, thuziakah erawh chuan a lamrîk dân ngau ngau lova a dik dâna ziah a tha khawp mai.
2. SMS tawng
A remchâng êm a, SMS tawng ka ti mai. Naupang tawng a ni deuh zâwk mah ang. Mizotawng chungchâng bawk! lamah khân tlém kan ziak tawh a, entîrna hmangin tlém bawk ziak leh ila. Entîrna:- ‘deuh roh’ tih tura ‘deuh rauh’ tih te, ‘lo’ tih tura ‘lau’ tih te, ‘ngeih’ tih tura ‘ngaih’ tih te, ‘peih’ tih tura ‘paih’ tih daih maite hmuh tur a tam thîn. Hetianga ziak ka hmuh châng chuan awmhmunah ka lo ngaimawh ve êm êm thîn.
3. Thu inzawm leh zawm lo
Hei hi thil harsa a ni! A harsa. Mi{sual} post tam takah phei chu thuziak chhiar tihar khawpin a mumal lo thîn (Ka post pawh a bà ng bîk lo). Hriat loh vâng leh uluk loh vâng a ni thei ang. Suffix (‘thuhnungbet’ ti mai ila..) leh prefix (‘thuhmabet’ ti leh mai ila!)-ah bul han tan ila.
Prefix chu thumal hmaa dah thîn a ni a, ‘Ti’ tih leh ‘in’ tih hi a pawimawh leh lâr zual a ni à wm e. Verb (thiltih) ti-verb-tu a ni. Suffix ai chuan kei chuan pawimawh ka ti zâwk. A dahna tura dah loh chuan kan thusawi khân awmzia a nei lo. Entîrna:- ‘I tidanglam em ni?’ tihah hian prefix chu ‘ti’ tih hi a ni a, a awm loh chuan thil dang sawina a ni. ‘In’ tih pawh hi ‘insual, insiam, infiam etc.
Suffix hi prefix aiin a tam zâwk niin a hriat. Thumal hnunga beb chî a ni. A lâr zualte chu ‘tu’ tih te, ‘te’ tih te, ‘tîr’ tih te, ‘na’ tih te etc. a ni. Entîrna:- ‘Khawngaihtu/hriattîr/zualte/khawngaihna’ etc. te an ni.
Pu Muantea te’n a hmasa lam comment-naah an ziak tawh nâ a, ka’n thual ang e. ‘Lo’ tih hian thumal zawm leh zawm loh tur bîk a nei. Entîrna:- ‘Mathei’ tih hian amah mai chuan awmzia a nei lo va, chuvângin ‘lo’ tia zawm tur. ‘Nei’ tih hian amah chauh pawhin awmzia a nei a, chuvângin ‘lo’ kan telh dâwn chuan zawm loh tur. Chutiang zêlin a dang pawh.
‘Te’ tih pawh hian ‘lo’ ang bawkin zawm leh zawm loh tur a nei. Ka sawifiah thiam loh avângin entîrna pe mai ila, kan hrethiam tho à wm e. Entîrna:- A zawmna tur chu ‘A lâr zualte chu..’ tih angah hian a ni a. Zawm lohna tur chu ‘lalmi5ualpa te, kawlhawk te, VaiVa te..’ tih angah hian a ni.
‘Enge’=dik lo; ‘eng nge’=dik. ‘Alo’=dik lo; ‘a lo’= dik. (Entîrna:- A lo kal).
4. Chhinchhiahna
A va pawimawh tak êm! (‘A va pawimawh tak êm!’ tih sentence tâwpah hian makna chhinchhiahna hi dah lo ta ila chuan a ho ngawt ang!) Thil sawi uarna emawa sentence tâwpa ‘êm’ tih a awm chuan zawhna a ni ngawt loh chuan makna chhinchhiahna (!=exclamatory mark) hi dah a tha khawp mai. Tin, zawhna zawng zawng tâwpah hian zawhna chhinchhiahna n(?=question mark) dah vek loh tur. A dah lohna tur chî chu entîrna hmangin pe ila. Entîrna:- CyberThug hminglem dang pathum han sawi teh. (Zawhna a ni a, thupêk rawng a kai deuh. Hetiangah chuan ‘?’ hi dah loh tur).
‘Ah’ tih pawh hi.. ‘Atan’ tih aia kan hman dâwn chuan ‘ah’ hmaah khân hyphen (rîn khamphei) dah hrâm hrâm a tha. Entîrna:- Liani hi nupui-ah neih ka duh. (Heta ‘ah’ hi ‘atan’ aia hman a nih vângin a hmaah hyphen dah a ni).
Rîn khamphei (- = hyphen) pawh hi saptawng thumal hnung leh hmaa prefix/suffix dah dâwn chuan hman tur a ni. Entîrna:- Ka comment–te hian ka hminglem a ti-common). Tin, noun-ah pawh hmanna tur chî a awm nual. Entîrna:- Pu VaiVa-a’n serthlum-in min vawm. (Min vawm tak tak lo tih erawh a chiang!) A chiang turah ngai ang.
Single inverted comma (‘) pawh hi a pawimawh khawp mai. A hmanna chi khat chauh, pawimawh lehzuala ka ngaih chu thumal pakhata dahah hian a ni. A chunga entîrna bawk khi hmang ang. Entîrna:- Pu VaiVa’n/VaiVa-a’n serthlum-in min vawm. (‘a’ leh ‘n’ inkârah hian single inverted comma dah loh chuan ‘Pu VaiVa-a chuan serthlum…’ tih duah a ngai). He chhinchhiahna hi thuziak tihtawi nan a tha hle. Pakhat leh chu entîrna hmang bawkin a chiang âwm e. Entîrna:- lalmi5ualpa-in min bâwl; ‘tianga a tih avângin hrehawm ka ti hle. (He sentence-a‘tianga’ tih hmaah inverted comma dah lo ta ila chuan, ‘chutianga/hetianga/khatianga’ tih a ngai dâwn a ni).
Tin, sentence bultanna (entîrna:- ‘tin/mahse/amaherawhchu’ etc.) tâwpah comma (,) dah hrâm hrâm a tha. Entîrna: Tin, comma hi a pawimawh khawp mai; mahse, dahna tur a tam lutuk a. Amaherawhchu/ama’rawhchu, a pawimawh êm a ni.
Thil pakhat, ‘khawngaihthlakawm’ tih chîng ho hi an ‘khawngaihthlâk’ ka ti! Mitthi (‘mithi’ ti an awm a, mahse, ‘mi’ tih hian minung a kawh deuh avângin ‘mitthi’ tih tur a nih zâwk hmêl) hi i khawngaih tawh lo vang u! ‘Khawngaih’ chu thil nung/minungah chauh hman tur a ni.
He thuziak hi ‘aw’ aiah ‘w,’ ‘ng’ aiah ‘g,’ ‘ch’ aiah ‘c’ hmang ta ila chuan, heti êm êm hian a sei lo vang! Ka sawifiah thiam vak loh avângin ka târ lan ho hi a theih chin chin chu he thuziakah hian ka zâwm a ni.
Ka duh aiin a sei (‘thui’ ni lovin) tlat. Tih dik loh lai leh helh deuh lai kan nei a nih chuan comment lamah kan inhriattîr mai dâwn nia. Vei ka ngah; a remchà n dân azirin kan la chhunzawm dâwn a nia.
Ka lâwm êm êm e.
Similar Posts:
- Mizo á¹awnga ziah zawm leh zawm loh tur te
- Mizo tawng zir ang. Then 1-na
- Mizotawng chungchâng bawk!!!
- Mizo á¹awnga ziah zawm leh zawm loh tur te-II
- Mizo á¹awnga ziah zawm leh zawm loh tur te-III
September 16th, 2010 at 9:25 am
Mizo tawng hi chu Mizote tan hian a pawimawh hmasa ber (first) reng a ni!
Sawi tha hle mai… zir theuh ang u
[Report abuse]
September 16th, 2010 at 9:35 am
Ngaimwh wm tak ani. Mipat hmeixiatna leh hmeixiat mipatna te pwh a hran ania. Swi teuhlo teng. Mi in minrwn post khalh palh ag.
[Report abuse]
September 16th, 2010 at 9:38 am
A Bengvar thlak thei ngei mai.Ka chhiar nawn leh dawn.TSa chu i la nautet aiin i hre teuh zel a.
[Report abuse]
September 16th, 2010 at 9:43 am
Kan tihsual fo thin pakhat – ‘a ni’ tih turah ‘ani’ tih hi kan hmang thin.
[Report abuse]
September 16th, 2010 at 9:45 am
Mr TSA, i rawn thawh tha khawp mai. Misual(misual fel si!) literature huangah i rawn pawt fân leh thin a. Nopui dawm âwm tak i ni.
Tawng dik a awm a, ziak dik a awm bawk a; a dik chin ramri khamna erawh phe ruaiin a awm thin. A fiah lo.
‘Mizotawng’ tih thupui-ah i rawn hmang a, ‘Mizo’ tih hi hetah hian adjective niin ‘tawng’ chu noun a ni leh lawi si a. Mahse i ziah(k) zawm tho si a. ‘Mizolanguage’ tih nên a inang deuh roh lo maw?
Tin, Mizo Tawngah hian adverb aiin verb dah hmasak thin a ni a; mi tam takin verb leh adverb hi ziah zawm kan chîng.
Entir nân: ‘hrechhuak’ — hre(hria) hi modified verb niin ‘chhuak’ hi adverb a ni a, a hrana ziah tur ni âwm tak a ni.
[Report abuse]
September 16th, 2010 at 9:46 am
Zir tham Post tha a va ni chiang em !!!! Save keuh te’ng..
[Report abuse]
September 16th, 2010 at 9:51 am
Ka tih dikloh thin tamtak ka hriat phah a; ka lawm em em e.
[Report abuse]
September 16th, 2010 at 9:53 am
Mahni tawng hi chu literature ah sang lemlo tan pawh ziah dik hram tum leh, sawi rik dik hi a zahawm bik a nia.Tunlai thangthar inlak No tum ho tawngte hi ngaihthlak a zahthlak lek lekin ka hria.Tlangval zawnglai chu ni ila, tawngkam fel deuh fak hi Nupui-ah ka nei ang.TSA- i post tha thei khawp mai.
[Report abuse]
September 16th, 2010 at 9:54 am
Mr TSA: Post tha tak a ni. Mahse, Mapuia sawi pawh khi dikna chen a awm ka ti tlat…
[Report abuse]
September 16th, 2010 at 10:00 am
A tha lutuk! Mr. TSA thahnemngaihna a fakawm e. Inzir nan i hmang theuh ang u.
[Report abuse]
September 16th, 2010 at 10:19 am
A dang pawh han belh leh teh u, inzirna tha tak a ni e.
Amaherawhchu i comment leh post apianga ‘ka lawm em em e’ tih i dah ziah erawh hi chu a ho ka ti khawp mai. A chang hi chuan i lawmna hi a ho thei mah mah.
Tuna i post avang hian ka lawm em em e. hahaha
[Report abuse]
September 16th, 2010 at 10:26 am
Ka blind riau a ziah dik lampangah hian. A sawi hi chuan ka sawi dik ve thlup thin. Hetiang post hi kartin chhiar tur awm sela ka ti. Ka hlawkpui thei tak tak a ni. Ka keu let chhen zel.
(Zawhna thing tawk)-
Double adverb ah ‘lo lo’ tih hi kan hmang nasa em em a, eg- “A kal lo lo chu…” etc. Chuan awmze dangah eg- “ka duh lo lo” tih hi “Ka duh” tih nan mi thenkhat hian (an tawngkam tih ngeiawm nan ka ti mai) an hmang thova, hetiang chi ang hi engtia tih tur nge. Awmze ngaihpawlh theihna sentence te hi a awm lo maw!
I post avang hian…
Ka lawm em em e!
[Report abuse]
September 16th, 2010 at 10:42 am
Tha hle mai. Mizotawng tih hi ziak zawm an awm a, ziak zawm lo an awm bawk. Kei pawhin (nagmah ang hian) Mizotawng hi noun-ah ka ngai a, ka zawm thin.’Mizoram’ pawh kan ziak zawm ang hian.
‘V’ chungchang va rawn sawi lo ve. A rik ang angin kan ziak mai thin hi keipawhin tha ka ti lo. A uang lo a, a che mawi lo lo a, mahni hma a sial lo a, tih tur ni awm tak— A uang lo va, a che mawi lo lo va, mahni hma a sial lo va, han tih tlat mai thin hi a dik lo in ti ve lo maw?
@12 ‘lo lo’ double adverb hi an hman ka hre ngai meuh lo, a che mawi lo lo a, tih ang deuh khian double adjective(?) anga hman khi chu a awm fo mai.
Post tha tak a ni e.
[Report abuse]
September 16th, 2010 at 10:47 am
#13, ‘Chaweikhawm a awm dawn a, a kal lo lo chu lenlai chan an ni mai’ tih ang chi hi…
)
Double Adverb a ni em!
(Adverb a ni lo hrim hrim zawk em ni! Ka linguistic lo teh a nia.
‘A che mawi lo lo a’ tiha ‘lo lo’ kan hman nen chuan a awmzia a dang daih tih erawh a chiang hle si…
[Report abuse]
September 16th, 2010 at 11:01 am
lalmi5ualpa@14 kei pawh ‘lo lo’ han tih hi parts of speech-a zuk dah luh dan chu ka hre chiah chuang lo. Mahse i sawi ang chi khi’ (A kal lo lo chu…)tih ang chi khi double adverb kantih ang chi kha ni chiah in ka hre lo deuh mai mai. A kal zan zan mai, a kal vut vut mai, a kal pup pup mai, a kal terh terh mai, tihte hi double adverb-a kan ngaih deuh chu a ni a, a kal dan bakah a kala (mihring ni ta se) kha eng emaw chen a sawi fiah ve avangin.
‘A kal lo lo chu’ han tih chu ‘a kal chu’ tihna chu a ni miah lo tak a!! A kal kal chu… tihna phei chu a ni lo leh zual ang. Saptawnga whoever emaw whosoever tih ang deuh hi a nih hmel a(?) ngaihtuah zui ngai tak chu a ni.
[Report abuse]
September 16th, 2010 at 11:47 am
Zorama piang lo seilian lo om lo A Aw B Ch zirmiah lova class 9 atanga MIL zirve chawt keini ang tan chuan hetiang hi alom kan mamawh tak zet.
A dang pawh rawn ziah belh zel teh u.
Save pop nghal e……
[Report abuse]
September 16th, 2010 at 12:08 pm
Mr.TS i ril reuh hle mai,i post tha lutuk ka lawm em em e.
[Report abuse]
September 16th, 2010 at 12:26 pm
Post tha tak a ni. Zo tawng (Mizo tawng pawh ka ti phal lo!) hi kan suasam nasa ta lutuk a, thuziak chhiar hrehawm, ngaihruata lunglen hril chang chang a tam ta lutuk. A bîkin thalaite kan ni zual. Mahni tawng pawh ziak dik thiam lo nih hi a hnam ang zawng pawha thil zahthlakah i ngai ang u.
Ka ngaimawh pakhat-
Single inverted comma (‘) hi tawng (hawrawp) bà nna atan kan hmang thin a, hawrawp kan bà n avangin thumal inzawm lo pawh ziah zawm a ni thin. ‘Lo vang’ tih pawh hi single inverted comma hmanga hawrawp bà na kan ziah zawm chuan ‘lo’ng’ tih mai tur a ni a; ‘lawng’ ti tlat hi mi thiam inti tam takte zingah pawh an thahnem hle.
[Report abuse]
September 16th, 2010 at 1:23 pm
Mr. TS-A, i post tha khawp mai. Amaherawhchu, kawng hnih chauhin ka’n sawi ve teh ang.
1. ‘ah’ hmaa hyphen (-) dah chungchangah hian ka hmin lo deuh tlat. ‘ah’ hi ‘atan’ chuan kan hmang meuh lo lo maw? A hmaa hyphen dah a nih vanga rawn ‘atan’ ngawt chu a dik hlel deuhin ka hria. Proper noun dawta ‘ah’ kan ziak dawnin hyphen-a kar dan mai a tha, suffix a hman a ni bawk thin sia. Eg. Aizawl-ah, India-ah ti a kan hman hian ‘atan’ kan tihna a ni lo. Tin, thumal tawpna vowel a nih hian suffix hma-ah hyphen dah hi a remchang hle bawk.
2. Aw aiah W tih vel hi chu ka pawm thei ngang rih lo a ni.
Sawi belhna :
Mizotawng alphabet-a ‘ch’ ‘aw’ ‘ng’ hi hawrawppuia kan ziak dawn hian Sap ho ziak angin ‘Ch’ ‘Aw’ ‘Ng’ kan ti mai thin a, kan alphabet-ah hian an inkawp tlat si avang hian ‘CH’ ‘AW’ ‘NG’ tih tur ni zawk awm tak ka ti ve ngawt.
[Report abuse]
September 16th, 2010 at 1:57 pm
Lam rik anga ziak chungchang hi sawi leh zuai: ziak leh tawng hi 100% in a kal dun tur a ni ka ti lo nain a tlangpuiin lamrik anga ziak hi a him zawk em aw ka ti deuh. Eg. ‘Ramzaua’ ni lovin ‘Ramzauva’, ‘loa’ ni lovin ‘lova’ etc.
[Report abuse]
September 16th, 2010 at 2:01 pm
@20 muantea, ‘lam rik anga ziak chungchang’ ti lovin ‘lam rik anga ziah chungchang’ tihzawk tur
[Report abuse]
September 16th, 2010 at 2:11 pm
Cyber: ziak/ziah chungchangah hian kan pahnihin single-in debate kan nei dawn em niang? Post hran ka rawn siam dawn em ni?
[Report abuse]
September 16th, 2010 at 2:13 pm
@22 muante, hawh, ti ang hmiang…
[Report abuse]
September 16th, 2010 at 2:44 pm
Mr. TSA hi ka hre ve lo a, mahse comment thenkhata a lan dan hian a la upa lo a nih ka’n ring ve ngawt a. A thu chhuah hi a tha thei fe mai. Sawi lah a sawi chiang thiam narawh. Tan la sauh sauh zel turin ka duh ngawt mai.
#22&23, muantea leh CyberThug, ziah leh ziak tih hi hman pawlh ila a pawi lutuk dawn em ni? A hman pawlh theih deuh vek tho lo’m ni? (‘zawngtah ziah sa’ tih ang chi-ah lo hi chuan?!!).
[Report abuse]
September 16th, 2010 at 2:48 pm
Ziak tha khawp mai, mahse kei chu ka thiamthei thlawt lo ani, mahse SMS tawng hi hi min rawn thawn tu call let a’enge a awmzia’ tih chang ka nei fo mai,,
[Report abuse]
September 16th, 2010 at 2:54 pm
EDIT…Ziak tha khawp mai, mahse kei chu ka thiamthei thlawt lo ani, SMS tawng phei hi chu min rawn thawn tu call let a’enge a awmzia’ tih chang ka nei fo mai, a awmzia ka hre lo mai pawh ni lovin ka chhiar thiam thlawt lo fo.
[Report abuse]
September 16th, 2010 at 2:54 pm
Bengvar thlak thin khawp mai….
[Report abuse]
September 16th, 2010 at 3:22 pm
Ngaihnawm muah muah e… Post tha leh tangkai tak a ni.
Point No. 3 – Thu inzawm leh zawm lo:
Heta ‘te’ chungchang hi sawi hlek ang. ‘te’ hi a hmaa thu ti-plural-tu atana kan hman chuan a hmaa thu nen zawm tur, eg. “Naupangte u, Lalpaah chuan…” Chutih laiin conjuction atana kan hman chuan a hmaa thu nen zawm loh tur, eg. “Muantea te, Pu Luaia te ngaihdan anga ziak tih vek mai hi dik ka ti lo.”
Kan la sawibelh zel ang.
[Report abuse]
September 16th, 2010 at 3:31 pm
#28 Ku Muanga sawi, ‘te’ tih chungchang khi a dik chiah a ni!
[Report abuse]
September 16th, 2010 at 3:43 pm
@muantea & CyberThug: Ka rin leh ka rin!! In pual liau liau in debate post siam ila, in 2 bik khan han inchhang ula, a kar lakah midangin lo comment thei bawk ila a nawm(nuam) phian ka ring.
Standardized loh thumal hi kan chingchhuak leh nawlh thin a, Debate neihte pawh a that ka ring. Naga Alphabet nei thei lo an sawi te pawh min ti hrechhuak rum rum e. Naga hnam khian Alphabet tun thleng in anla nei lova, a chhan ber ni a lang pawh tu emaw siam/proposed kha anmahni hnam peng a mi a nih loh chuan an pawm sak duh lo an ti. Alphabet nei nual si, standardized loh khian an duh dan dan in an hmang vel mai mai ni tur a ni.
[Report abuse]
September 16th, 2010 at 6:20 pm
Hetiang post hi ka tangkaipui a, ka inzirna a ni bawk a, rawn ti zeuh zeuh teh u. In fakawm thin e.
[Report abuse]
September 16th, 2010 at 8:11 pm
Mr.TSA, i zarah hma ka sawn leh ta e. Hetiang lampang hre deuh khan han thawh khawm zel teh u. Ka lo zir zel ang e.
[Report abuse]
September 16th, 2010 at 9:38 pm
E khai a ngaihnawm hle mai. A pawimawh ka tih ve pakhat chu (MAL hming te kan lam ri hlawm a), ka lo hriat ve dan chuan thlukna hrim hrim hi chhiarsual theih a nihin hman uar ni se an tiin ka hria a, a chhiartuin a chhiar sual phah lem loh chuan thlukna dah kim tum lutuk hi a tha lem lo. Tun hnai maia chhuak lehkhabu pakhatah chuan, “ani hi chu a ril asin aw,” tih a awm a, ‘ril’ tiha ‘i’-ah hian thlukna a dah a. A dik lo. A dik loh dan chu, miril(thu thiam) sawi a tum tih lang siin thlukna a dah avangin a thlukna dah anga kan chhiar dawn chuan mihring kawchhunga ‘ril’ hi kan sawi a ngai daih thung a ni. Tihdik kan tum lutukna lamah hian kan tidiklo teuh thin a, fimkhur a tha.
‘Te’ hi suffix-ah chuan hmansual awl tak a ni. A hriatfiah awlsam nan chuan plural-ah zawm tur a ni a, singular-ah chuan zawm loh tur. A mi/ami hi chu common usage-ah a lut tawhin ka hria, kan pawm mai a tulin a lang. ‘Tianga tih khi chu a chiang chuang miah lo. Khatiang tih a nih theih avangin a sawi tum a buai daih thei a ni. hei hi chu a tawi tho bawka ziah tel hram a tha zawk lo maw. SMS tawng hi kan tawng tichhetu a ni a, i hmang lo ngam ang u. Ziak leh ziah hi a hman pawlh theih.
Mizotawng tih leh mizo tawng tih hi ngaihdan a inang meuh lovin ka lo hria a, zawm duh an awm laiin a hranga ziah duh an awm bawk. Mizotawng a nih hian noun a lo nih tawh avangin zawm pawh ni ila a pawi vak dawn em ni.
[Report abuse]
September 16th, 2010 at 10:49 pm
Post thra hle mai, mahse a har a ni. Mizo trawng ziak hi a harsa a ni. Thu ziak zawm tur leh zawm loh tur te, Tin, ‘Apostrophy'(Dik em aw??) hi hmanna tur hmun a hmna a thra khawp mai. Tin, Typing lamah hian harsatna kan nei deuh threuh in ka ring a, chuvangin thu zawm leh zawm loh chungchang hi chu a buai thlak zual.
SMS hian kan trawng hi chu a run nasa ngei mai!!!!
Thu ziak reng2 a awlsam theih dan tur berin ziak a ni thrin a, diklo taka thuziak pawh hi a dik emaw ti hi kan awm leh tlat thrin a nih hi…!!!!
[Report abuse]
September 17th, 2010 at 1:21 pm
Ka lawm hle mai. Mizotawng hi a har ngang a ni.
@Pu Muantea: Nia, a dik khawp mai. ‘Atan’ tih hman rem si lo, mahse, ‘ah’ tia hman rem si a awm nual asin. Tin, ‘ziah’ leh ‘ziak’ hi a khel tham kawp mai a. A enga mah mah hi thlahthlak theih niin ka hre lo.
@lalmiualpa: ‘lo lo’ tih hi double adverb niin ka hre lo.
@Pu Mapuia: Ni e, ‘Mizotawng’ tih hi post hmasa lamah khan ‘Mizo tawng’ tih ka tum zet a, mhse, funny khan a inzawm tur a rawn ti tlat mai a; ka han ngaihtuah chian chuan dik viauvin ka’n hria a, ka zawm ta mai a ni.
Ka lawm em em e.
[Report abuse]