Ngaihtuahna

August 29th, 2012 9:00 am by vakul

French Philosopher Rene Descartes chuan, “ka ngaihtuah a, tichuan ka lo awm ta a”(I think therefore i exist/am) tih thu lar tak mai hi a lo sawi a, hrethiam lo leh deusawhtute chuan ama hming nena hmehbelin sakawr hmaah tawlailir a awm ngai em ni(Des Cart before des Horse) tiin an an sawi fiam thin a, a tum ber chu a awm a ni tih tichiangtu leh finfiahtu ber chu a awm tih a ngaihtuahna tak kha a ni. Thil nung dangte pawh hian hriatna an nei vek a, mihring danglam bikna chu kan hria tih kan hriatna lai tak hi a ni awm e.

Thil nung lo(non living) aia thil nung danglamna chu kan thil tawn kan dawnsawn let dan hi a ni a, mihring kan chungnun lehna chu kan thil tawn kan ngaihtuah let leh hi a ni a, mi fingte an ropuina chu ngaihtuahna an seng peih em em mai hi a ni. Ngaihtuahna hian mihringah mahni inhriatchianna a pe a, chu chuan nun a thunun thin; Greek Philosopher Socrates-a chuan mahni inhriatchianna hi finna bul ang hialin a chhal a, keimahni inhrechiang tur chuan kan ngaihtuahna ka sen a tul a ni. Tunge ka nih a, miten tuah nge min ngaih, tih ngaihtuahna hian nun dan mawi a paw chhuak thin.

Pathian thuah chuan, “Ka mite chuan ngaihtuah rawh se” “hawh teh u i ngaihtuah tlang teh ang u” tih thute kan hmu a, kan rin hi kan ngaihtuah a tul a, kan hriat hi kan ngaihtuah zui a tul bawk thin. Mahni mum muma mum a, hmuh chin chiah ngaihtuah ni ila, naupang chhia kan ni dawn a, ransa aia kan chungnunna chu kan ngaihtuahna hi a ni. Isaac Newton-a hun hma lamah khan theirah hi vawi duai lo a lo tla tawh a, ngaihtuahna hmanga theirah tla chhawr ber a lo ni hlauh zawk a.

Thil engkim hre vek tura din kan ni lo va, ngaihtuahna nei thei tura din erawh kan ni, chu ngaihtuahna chuan kan rinna pawh fiah kan phal tur a ni bawk. Khawvel hi a buarchuar tawh hle a, ngaihdan hrang hrangin min tuam vel a ngaihtuahna seng mite ngaihdan, a chhia a tha zuiin ngaihtuahna seng ngai reng reng lo mite chu an then vel a. A ni, luang thli chhem ang maiin a ni an thlek tawn vel ni. Mi rin dan leh ngaihdana kal satliah tur kan ni lo; kan duh tha kan tih leh belhfakawm nia kan hriat avanga kal tur erawh kan ni. Mite thawmhnaw hak ang ha satliah tur ka ni em? An sam tih dan anga ti ve ngawt tur ka ni em? An chin dang phung zawm ve ngawt tur ka ni em? Enge ka tana ka tha ber tura ka ngaihtuah chhuah ve chu?

Party ruihchilh, zirtirna dik loina a chhem len, kawng hrang hranga a sawi hnuhnung thu apiang pawm, hnam dang leh mi dangte nun dan leh inchei dan pawngpaw lak ve vatte hi ngaihtuahna sen loh vang a ni a, Plato-a Beisei Ram(Ideal state)-ah chuan a hma berah ngaihtuahna sengtu pawl an thu a, ngaihtuahna seng tak taktu tan lo chuan ram kaihhruai theih a ni lo; ngaihtuahna hmangtute thutna tura ngaihtuahna seng peih hauh lote an thut hian thil a buai zo thin a, thil nih bak a thar han puak chhuah tur an neih chuan loh avangin hmasawn thei lovin kan awm thin. Chhungkua chuan ngaihtuahna sengtu a neih loh chuan a ke a bai thin a, khawtlang tana pen chhuaka inngai ngaihtuahna seng peih si lote hian khawtlang pawh a ngai rengin min thuttir thin.

Dan leh hraiin a phuar phak loh, zalenna famkima inthuam, mi sual leh awkhrawlten an chhaihbuai phak loa leng chu ngaihtuahna hi a ni a, kawng thui/hla leh hmun ralti hi ngaihtuahnavangin a nuam thei, lungngaihna leh lawmna, harsatna leh manganna ching fel tur hian ngaihtuahna hi a pawimawh lo thei lo. Thil nihna an sawi ang pawm duakna hian hlutna nei ve mahse pawm dawn rau raua ngaihtuah fe hnua pawm hi a nghet bik a, a tlo nge nge.

Amaherawhchu, Kan ngaihtuah duh zawng erawh chuan kan nihna a tarlang thung thin. Aizawl tlangval zana Bike-a khawlaia chak tak taka intlansiak a, thawm bengchheng tak tak chhuah thintute ngaihtuahnaah chuan tlan chak fua fua kha a hlu em em a, chu chu an ngaihtuah ber a ni. Kan ngaihtuahnain a ngaihhlut hi hringnun kawng dik(morality) sahal khai atanga tehin a dik em tih hi kan en tur ber chu a ni bawk. Mihring rilruah hian tha leh tha lo inangkhat veka kan pawm a awm a, hei hi Pathian a awm ngei tih lanna pakhat a ni(Moral argument), kan ngaihhlut leh kan lungkham, kan ngaihtuahna bel chhunga riak reng hian chu nunphung dik chu a zawh lo a nih ngat erawh chuan, ngaihtuahna hrisel lo tak a ni ang.

Ngaihtuahna hi a hrisel loh emaw a fim lo emaw a nih chuan keimahni chhungril lam sual hian min lo hnuk fe tawh tihna a lo ni a, chumi hmu fiah leh tur chuan kan dinna kan ngaihtuah chhuak ngam tur a ni ang. Ngaihtuahna hian taksa a nghawng a, ngaihtuahna thianghlim tak chuan taksa a tihrisel thin…

“Ka mite chuan ngaihtuah rawh se”

Similar Posts:

Recent Posts:

53 Responses to “Ngaihtuahna”

Pages: « 1 [2] Show All

  1. 51
    Charice_mizo Says:

    Pu Vakul, kei aia hre ril leh hrechiang zawkin i han sawi meuh chuan ka thaw huai mai, zep loh chuan Ignatia hian a concept defend ah a chiang lo lutuk leh ka argument awmzia a man lo lutuk hi ka inhnialpui thiam vak loa ka sawi buai zo vek a ni ber..lolz

    Ignatia, min nuihsawh viau naa thil pakhat ka hrilh ang che, truth chungchang kher hi chu mathematics leh physics ang a ni lova, a concept hi formula leh method hmanga chawhchhuah theih a ni ve hek lo. Subjective awmzia i hreloa, i sawifiah theilo bawk, subjective leh relative hi thil thuhmun a ni hek lo, relative chu vakul comment khi en la, subjectivity awmzia chu…thil a nihdan leh thlendan ang thlap, belh leh paih awm miah lova sawi emaw ziak theilo tura kan emotions, sentiments, ideological inclinations etc in min thununna hi a ni. entirna, i best fren houdini’n ruk lo ru ta se, court hmaah an hrem nat dawn em avangin a ru ngei a ni tih i phatsak thei, i khawngaih vangin (thudik chu a ru ngei tih kha a ni).
    Objectivity chu hemi letling chiah hi..entirnan Zingah ni a chhuak..,a chhuak lo ti mah la a chhuak tho, ka U, :-) 2 leh 2 belh pali, panga a ni lo, chiang em?

    Truth chu thil awmsa leh pangai reng a ni tih hi pawm lo mah la a ni miau si a ni, Aristotle a chuan truth kan hmuh/hriat theih nan thil panga a ngai a ti a, science, arts, prudence, judgment leh intuition..heng hi mihringah a dang theuh, but truth chu a ngai reng! Pathian thu kaihluh hi ka duh lova, a tir atang ka avoid a , inhnialna a tam avangin, mahse Bible chang i rawn quote miau si a, chu chu truth awmzia (according to you) defend nan i hmanga, a insufficient loh na ka rawn sawi mai a ni. ‘Analogy’ tih ngawr ngawr ah lo buai suh, term pakhat ve mai a ni e.

    Pathian frame leh mihring frame khi kan argument nen a inkungkaihna i rawn tarlan loh avangin ( a relevant loa) ka man lo ka ti a ni, i theory phuahchawp te alo nih takah. Rela mihring chuang chungchang example hmana i pek pawh kha ka la hrereng, engpawh chu lo nise truth defend nan engtinnge i hman dawn le? i sawifiah ringawt khi a tawklo, hmang tangkai rawh.

    Hre ril tak ni awm takin law hrang hrang i rawn chhawpchhuaka, truth chungchanga kan issue chinfelnan i hmang dawn emaw ka tia, i hmang leh chuang si lova, i standpoint a chiang lo ta em em a ni. See my comment 46. Intellectual discussion ah mahni dinhmun/tan hmun defend pah reng chungin an thlak lawr zut ngailo,(objective leh subjective chungchangah).

    ka 2nd last paragraph (comment 46) khi argument a ni lova, explanation a ni zawk e(ilo hriathran loh takah), truth concept ka rawn chhawpchhuah awmzia ka sawifiahna mai a ni e, ila man ta chuanglo anih hmel, tin Pu Vakula’n moral core atanga lo chhuak a ni lo… a tih pawh khi kei chuan Pathian truth ni lo mihring truth (as a moral virtue) chungchang ka rawn sawi vang a ni a, mihringah hian chhia leh tha hriatna leh thil tha hriat/tih duhna a awma, chu chuan thudik keimahnia awm chu sawichhuak/tilang turin min ti thin, mahse kan mihring mihrinna quality a inan loh vangin thudk tan ngam leh tan ngamlo kan awm thin. Chumi ka sawina zawk chu a ni.

    Kristiante ngaihdan atang chuan Pathian thu hi absolute truth, danglam theilo a ni a. Mahse prove/test theih annih vek loh avangin rinna(belief/faith) alo inrawlh ta thin a ni(comment 49 2nd last para (Y) ), rinna hi concept hrang hlak a ni a, ngaihtuahna ang bawka thil diverse em em mai, huang zau tak anih vangin truth chungchang sawi kan ni bawka, pet lawr dun lo mai teh ang,a complex lutuk dawn!

    A tawp berah chuan Ignatia, miin an claim vang leh tanhmun tha tak an neih vang emaw criteria rintlak thawkhat tak an neih avangin DAWT hi thudik alo nih phah lova, an finna, hmanrua leh thiamnain a phak loh avanga lei hi a phek a ni an tih lai khan mi zawng zawngin awih mahse thudik anih phah lova, thudik tak chu maw ‘lei hi alo mum reng alawm mawle’ haha…Pu Vakula nen lo sawidun tawh teh u.

    Report this comment

  2. 52
    vakul Says:

    comment kan va duhthawh hlawm ve…

    charice moral core tih ka duh lohna chhan chu humanismah hian hei hi an chang thlan ve tlat. Pathian tih hi a him a, cosmological argument which says everything has a reason..hian a nemnghet hmiah…Pathian chu source of moral and truth a ni bawk si a…tunlai contemporary christian philosopherten…all truth are Gods truth …an tih kha maw…

    i thu hlawm tawp khi a dik khawp mai.

    Report this comment

  3. 53
    Kosmovision Says:

    Rene Descartes te ang mi turu ‘Father of modern philosophy’ an tih mai leh rationalism atanga thil thlir thin tan chuan an epistemology pawh a dang thei awm e. Tin, ‘cogito ergo sum’ (I think, therefore I am) ang te pawh hi ‘reasoning’, deductive emaw inductive reasoning a eng ber behchhan pawh nise an sawi awihawm thei hle thin. Amaherawhchu, father of modern philosophy a nih vang ringawtin sawisel bo chu a ni miah lovang le. John Locke phei chuan ngaihdan thar hlak a neih phah a nih kha.

    Keima argument-ah chuan, he cogito ergo sum hian reasoning a dah hmasa a existence erawh a dah hnuhnung tlat a ni. Jeorge Berkley-an ‘esse est percipi’ a tih tak pawh hi achang chuan ka hnialpui chak rum rum thin. Ka proposition ah chuan existence hi prior neccesity a ni a, reasoning chu aposterior neccisity zawkah ka ngai. Kan exist avangin reasoning kan nei a ni si a.

    Report this comment

Pages: « 1 [2] Show All

Leave a Reply

You must be logged in to post a comment.