mi(sual).com

“Mual hla kar dan a i liam ta a” tih hla hi tun  hma lam deuh khan Radio lamah thiam takin an sak  ka lo ngaithla tawh a, hla ngaihnawm leh lungkuai tak niin ka lo hre thin a. Chung hun lai chuan (a hnu deuh pawh a ni mai thei) he hla hi hre thin mah ila inhmel bel dan erawh ka thiam chiah lo thin a.

Mahse, tun hnaia (Mizo Idol-ah) an rawn sak lar thar leh hnu hian  lunga ti leng thar in, mahni a thawnthu hlui lo neih ve te  min rawn phawrh chhuah sak teh mial a. Ka lunglen pui dan hian a phuahtu phuah dan nen chuan a in ang hauh lovang tih chu ka hria,  mahse a hla tih chingpenna lamah min lo ngaihsak lo se la, ka lung a ti len dan kan tarlang ve ang e.

Mual hla kar ‘D’ ka neih hi ka ngaihzawn ni chiah lova, tun lai tawngkam takin ka arsi (star) a nih ber chu. Ka thiante tawngkam chuan kha nula kha “paitawih theih loh nula” a ni ber ang chu, Hmun danga lehkha zir turin a kal ta daih a, min ngai ve hauh lo ang tih hre reng mah ila rilruah a cham reng a, tun hnu a he hla han ngaithlak leh hian khang hun lai kha mitthla mi hmuh tir ve thin a……

Chang khatna :

“Mual hla kar danah i liam ta a. Aw ka van ngai thin che em” A hla chang leh tlar hmasa berah hi  chuan a hla phuahtu hi ka tawm ve thei a, he thuah na na na  hi chuan lungrualna tlangah kan leng dun thei tlat. Kha nula, oh…tleirawl chhuak hlim te kha hmun dang a zirna chhunzawm tura kal dawn khan ka lung a leng in, ka ngai ve tak meuh a. A nihna takah chuan kei lo pawh ngaitu a nei ngei ang a, ngaih pawh tam tak a nei ngei ang. A ngaitu thenkhat zingah tel mah ila, a ngaih zingah chuan ka tel ve kher lo mai thei lai tak hi a  buaithlak in a run thlak ta ber chu a ni awm e.

“Nang nen a kan lenlai ni kha, thinlai a’n lo thar leh thin” Kha nula (nula ti tawh mai ang) te nen khan tual  khatah  chuan kan leng ngei a. Mahse, zep nak emaw, a ni nen a kan hlimlai ni kha sawi tur ka nei tam lo kher mai. Han  sawi dawn ila, Good Friday bawr vel a,lehkhawm bana Biak in hall bul step a ring deuha ka tawng laia a lo nui te kha ka mitthlaah chuan a cham  reng a,  chung hun te chu kei chuan ka hlim pui viau a, mahse a ni kha chuan a hlim nui aiin min nuih (mak ti a nui) ni ber in ka hria mahse ka haw lo, nuam ka ti zawk fe. Tin, a exam dawn a KTP hnatlanga an in a  thil zuara kan kal bak kha chu sawi vak chi pawh ni lo.

A liam hnu khan thinlaiah chuan kan lenlaini ai mahin  a lenna, lenna  khuaa a awm dan tur kha rilru suangtuahna nen a lo lang thin zawk mah a. Tin, ka hlimlai ni te a ni ber zawk ang chu hi kha chu ka mittla atang hian a nawh reh thei tawh biklo a ni. Hmun dang a lehkha zir tur hian ka kal ve tawh ngei a, mahse ka kal ve tum hian he hla duh deuh a lo sa hi awm ve ang maw ?.

“Mahten i awm khawhar chang ni hian, I dawn ve hian ka ring thin e” Khawhar tih lai tak hi chu a khawhar ve thin ngei ang, vai ramah vai ho zingah khan lunglen khat zawnga nei ve ngei ang maw le, mahse a zui tu chiah lai hi chu kei atan chuan a buaithlak leh tlat.  He lai chang hi chu ka sa thei hauh lo mai. A liam hnu khan min vei zui kher lo ang a, ka awm ve a ni tih pawh hi a hre zui kher  ang em mawle ? I dawn lo hian ka ring thin e ti ila a dik mah zawk dawn a nih chu.  Min vei ve a nih vaih chuan a veng pum pui, a kohhran mi leh sa nihna ang in a vei a ni chuan ka tel ve hram ang chu.

Chang hnihna :

Ngui ten tuan zai i rel ni khan, Aw ka thinlai a van zing em” He lai hi a dik deuh a, ka sa ve thei mai chuan ka hria. A ngaih chu ka ngai reuh khawp mai a, amaherawhchu, a dik famkim thei hauh lo. Ka arsite khan a tum ram a pan dawn khan a ngui leh ngui poh chu ka hre hauh lova. Hre tur pawh in ka va bel chiang tlat lova. A kal dawn ni chuan ka pute inah hna kan thawka, tlai chaw kan ei tih zawng ka chiang ngang mai a. A thiante leh a chhungte a ngaih avang erawh kha chuan a lung chu a leng ve ngei ang. A ngui te pawh a ngui ve hial mahna le, mahse kei mah a vanga ngui a ni miau silo va. Mahse, Aw ka thinlai a van zing em tih tak hi chu ka zawm ve thei a. Thinlai chu a zing ru deuh chu a ni. Lung a leng lawk ve veng veng a ni….

Awm dan pawh ka thiam dawn nem maw, Lenrual zaleng zawng zingah hian tih em hi chu ka sa ngam bik lo. Awm dan thiam lohna em em tur chuan ka tuar  hran lo va, ka ngai hran lo. A nihna tak chuan a lenrual zinga a tel ve thin ta lo erawh chuan engemaw ti tak chuan mi a ti khing bai hu hian a hriat a. A tel ve tuma thil tih phuisui leh nuam ta riau a ka hriat na hi eng rau nge maw ni ta ang le? A mah kha hmeltha lar leh hausa hmingthang a ni bawk silo, Mizoram chu sawi loh Aizawlah pawh veng thla bir lama veng khat tlangval sawi hat pawh ni hlei lo kha tleirawlte kha eng ti tak hian nge maw a zunah ka lo uai tlat mai le. Kohhran lam  thleng thleng hian a awm hian nuam ta riau leh kim ta riaua ka in hriatna hi thlarau lam thil pek chu nise zawng sawt puina mual mual  chu a awm ngei ang le?

“Tlai ni eng mawi tuan zai i relna, aw ka thinlai  a’n a cham reng” Khang hun lai khan vai ramah a tlai ni eng a mawi loh dan tur kha ka ngaihruat thiam lo. Tun hnu hian vai ramah hian  thlasik lai lo hian ni eng a mawi tak tak thei lo tih ka hre chiang ve ta. Tin, a mawi ai mahin thlasik hi chuan a uihawm zawk mahin ka hria. Nipui lai chuan ni pawh lang lo mahse a lum huam huam a, ni a lan lek phei chuan a mawi ti a han sawi chhuah chi teh vak a ni emaw ni dawn le? He hla phuahtu hi chuan tlai ni tla turin a lung a ti leng in a mawi a ti a ni ngei ang. Mizoram ni tla tur lungleng thlak dan nen han khaikhin chuan a mak love, mahse kei ka arsi lenna vai ramah hian ni tla tur a mawi ve ngai lo.

Ka thawnthu hluiah hian ka thinlai a cham reng thil pathum erawh a awm a, vawk chaw zawn, thlawhna tlawk leh a mah te kha. Ka rem khawm thiam chiah tawh lova, ka vawk chaw zawn lai in thlawhna a lo thawk vu vu a, a amah te kha ka hre chhuak a, a ni thlawhna a thlawk (a kal hmasak ni ber ani lo a niang) tura suangtuah a vawk chaw lo zawn kurh kurh kha erawh chu a nuam bik fahran lo. Vawk chaw zawn thu lah hi hla phuahtu hian a tarlang tel tawh der silo. Mahse he thil pathum hi ka hriatrengna hian chiang takin a lo chhinchiah ve miau si a.

Chang thumna :

Chawlh tui ning zu ka han dawn thin a, Kar a  ngaih reh nan tiin. Hla phuahtu hian  kar hla a ‘D’ ngaih reh nan khan chawlh tui ning zu a dawn  ni ngei tur a ni. Kei zawng chawlh tui ning zu ka dawn hauh lo mai le. Tuisik leh thingpui bak chu Kawlthei zu tak ngial pawh ka in lo. Tun lai anga Grape Wine vel lar ve hek lo, zu lam chi reng reng chu lunglen reh nan ka in aih lo a ni. Mahse, kar hla ‘D’ ngai reh nan chuan ka awm mai mai bik hauh lo.  TV ka en thin a. Ka arsi te ang deuha ka hriat channa (star actress a nihna) hi Star Plus-ah hian film pakhatah hian  lo chhuak thin a. Chu film chu a hmuhnawm ka tih avang a en pawh ka ni lo, ka arsi te ang a awm ve vang a ni reng si a. Hla phuahtu hian lunglen hnem nan TV en ve tak maw ?

“Mahse a rei lo a lo zual zel thin, chhun nileng mahten hman chang hian” TV en khan a mah ngaihna lunglen  kha a reh lo, a dik tak chuan reh se pawh ka ti phal meuh lo.  Khang hun lai ka chuan tu min hrilh leh min sawi pui ni hlei lo hian rilruah a lo lang leh zut zut thin. Mahni a awm chang leh mal deuh tum phei chuan suangtuahna mit in a thlir thin a, beiseina deidawn tlak tak bak erawh kawm tur ka nei hran lo.“Lenna tlang dang tang hian i  maw, tawn leh ni awm leh tak ang maw” A her leh ngei a, a her fo thin a.

A lo haw tur thawm ka hriat ve te khan eng vang kher nge ka lo hlim ve em em thin a. An zirna an chawlh tum a lo chhuah chang te hian a chhungte leh midang mai ni lo hian  kei ve te pawh hi ka hlim thin a sin.  Zorama a lo chuanchhuah tum a, Krismas lai a lenkhawmna a a kawr hak te kha ka la hre vek a sin. Vai ramah kal leh dawn tum, Kum thar tiak tir te a Biak in bula ka hmuh thut laia  ka awm dan te kha ka thinlung hian eng tikah tak nawt reh ang maw?

Similar Posts:

• Hun kha leh chen ka tawng lo che kha
• C. Lalrinmawia – D Chambawihpui
• Sikni Eng
• Phengphe nunnem
• Kumsul liam hnu

Recent Posts:

• PÂWL LAL HRAWTNA AIZÂWL???
• MIZO HNAM SAKHAW DIK PHOCHHUAHNA- IVby. Rorelliana
• Hriat chian lehzual
• Sunglass man to chhan!
• Tawng tih hausak a pawimawh!

This entry was posted on Friday, September 3rd, 2010 at 7:53 am and is filed under Music and lyrics. You can follow any responses to this entry through the RSS 2.0 feed. You can leave a response, or trackback from your own site.