mi(sual).com

Thufing leh zirtir nei em em lovin thenkhat ho tih tling thei ni mahse ka mumang kan share ve teh ang. Mumang hi mak tak tak sawi tur a awm ve nawk thin. Kei pawh hi mumang ka nei mak duh bik emaw tih mai tur a ni. Ka mumang hi sawi chak tak tak hriat theihloh te pawh ka nei; ka hriat pawh hi a then chu a chhumbung deuh. Mumang detail tak neih a har tih kan hriat theuh kha.

Ka mumang hriat hlui tawh berin kan tan ang e.. Naupang kindergarten ka zirlai a ni a,kan thenawmah hian Assam oil phur truck a dinna thin a awm a kawngpui an ni mahse tlem chhoh a ngai a,chumi kawngah chuan minlo chil hlum a,ka ruangah chuan ka la awm a,ka nu hian a thiannu nen hian kawng laiah hian minlo pawm a,tah chuan vanah chhum hi donut shape(a bial) hian alo awm a,a lai vanpawl ah chuan vantirhkoh pahnih a kual deuh rial a awm ka hmu a. Thleng dik se ka ti ngang mai.

Ka mumang dang leh chumi hunlai vela ka hmuh chu mumang chhawng nge a tak ka hre thei tawhlo. Chu mumang ka hmuh hnu thla 3 vel chu thim,etc..hlauh ka neih apiangin mithhla ngai reng ka hmu thin-Sakeibaknei nui hmel pu deuh thle tawn chhen. Ka Pa bulah ka mu a,common room chu khum-lu lam parda keuvin a lang thei. Ka mumang a intan a,khumah tho ka lo mu a,chhun alo ni a..

Varandah atang hian ka nu-aw in minlo ko a,ka va tlan phei a,ka nu pian tho hmel rapthlak lutuk mai hi ka va hmu a,ka hlau lutuk inchhungah ka tlanluh chiah chuan ka muthmunah ka harh a,a thim ruih a,a reh ruih bawk (hei hi mumang chhawng nge a tak ka hre theilo). Ka muthmun atanga ka harh chu,parda keuvin common room chu ka han en a,hmel rapthlak tak(ka nu lem) chu ka va hmu leh ta mai a,ka mur chuai chuai a,mahse ngawi rengin ka inkhuh char char a,ka hrechiang zui ta lo.

Hei hi kum 7-9 vel a ka hmuh a ni. Ka U chiah nen kan mu a,kan in tiat tep a. Zing dar 4 vel ah ka harh a(mumang tho nge ka hrelova mumangah ka chhiar mai). Kan dawr leh room kalpawh theihna kawngkhar atanga rawn lut,mi pakhat keima tiat vel ka hmu a,a thim avangin ruang-am chiah ka hmu thei. Kawngkhar bula ka thingrem chungah chuan a rawn thu chat a,ka lam a rawn hawi a. Chupa chu ka mutpui ka U emaw tiin zawite hian ka au a,min chhang si lo. Tichuan ka leh-hawi a,ka U chu alo la mu reng sia,ngawirengin tha khur zawih zawihin ka inkhuh leh a..ka hre zui tawhlo.

Hei ve hi kum 6-12 inkar vel thova ka hmuh a ni. Kan kawmchhak-kawngpui chhak chiah ah hian step (zig-zag shape) a awm a,ka mumangah chuan chu step chu a ngil vek hian ka hmu a,hmuh phakloh atanga indawh thla in ka hmu. Chu step hmuh phakloh atang chuan kan inhnuai tlangval (drug addict,in neitu fapa) lu-bung rawn lumthla ka hmu. Hei hi ka mumangah chuan mak na deuh a nei. A hnu karkhat (a hun tak ka hre chianglo, a reilo) aia rei lovah kan inhnaui tlangval chu a thi.

Hei pawh hi a chung ami nen ka hmuh dan a in ang tep. Ka mumangah chuan kan varandah chhak-lam lungrem bang chu kawng thui em em,mit tlin phakloh ah hian alo tan tlang a,chu kawng zir chu van ang hian a ruak vek bawk a. Chu kawng sir tawnah chuan angel ang hi dinglam leh vei lamah anlo ding tlar phei vek bawk a,ka U hi an dinna theuh atang chuan an banin lo anlo nawr phei zel a,hla takah chuan a ngawng anlo fik bung ka hmu.

He mumang hian min ti hlau hle a,mahse tun thlengin eng em a thleng hran lova. Kum 2 kalta a ka mumangah chuan sava dum lian angreng tak hi tukverh ah alo thlawk lut a,min rawn sut rualin a thim vek a,thi tur ang hian ka inhria a,talchhuah ka lo tum vak vak a,mumang atanga harh ka tum niin ka hria. Ka thianpa hian minlo kaitho ta a,”I rum nasa lutuk a ka kaitho che a lo ti a. Maimizial a nithei angem tiin ka ngaihtuah nauh nauhva..

Nachin lawkah ka tlai mut a,mumang mak ve deuh ka nei a,mahse ka hlauh ka hre chhuak zo tawhlova telh ngaihna a awm ta lo.  Mumangah hian kan harh lai a suangtuah phakloh tak tak te pawh a hmuh theih tlat nia,ka mumang hmasa ber pahnih te khi a hun laiin khitiang kaihhnawih awm thlahrang film emaw ka la en ngai si lo. Ka post hmasa ber a ni e. Zirtir a nei hranlo maithei..

Similar Posts:

• Mang nung
• Mumang mai mai…
• Welcome to Reality
• Ka mumang…
• Puithuna (Superstition)

Recent Posts:

• Kut hnathawh leh Khawtlang Nun
• Ngaihtuah chhunzawm atan
• Ka chhun mumang…………..
• Skin cell atangin lungphu!
• Kan nun hlui

This entry was posted on Monday, October 4th, 2010 at 10:24 am and is filed under More than words. You can follow any responses to this entry through the RSS 2.0 feed. You can leave a response, or trackback from your own site.