mi(sual).com

Amah chu tleirâwl kum 19 mi vêl niin a taksa insiam mêk, insiam hlawhtling hlim a ni a, a thatna ai maha a taimâkna leh a mizia duhawmnaten min hneha min hnêm hi amah hrechiang apiang chuan mak an ti hauh lo vang.

A hâng lo va, a ngo hluak lo; a ngo sen chak mai a, damdawi hming hriat a nei mang lo chu a hrisêlzia nemnghettu a ni a, chu chu a taksain a nemnghet lehzual a ni. A thau lutuk lo va, mahse, cher lam ai chuan thau lam hret zâwk mah a ni a, amah chuan thau a inti hle thung.

Meng zim san mai a ni a, engtik lai pawha nui reng mai chî niin a nuih reng vânga awm ta nge tih chu hriat loh, a biang vei lamah hmangaihna chhûn luhna atana tha fahranin biangsum a khuar kâk a, chu chu a duh emaw, duh lo emaw, amah ka hmuh apianga ka hmuh hmaih theih loh leh hmuh loh theih loh a ni.

He’ng a pianhmang ai maha min hneh zâwktu chu a mize duhawm tak kha a ni. A taima êm êm a, ina a awm ve pawhin mawng a hûng hman meuh lo. A tawng duh a, chu chuan nêlawm takah a siam a ni. Tu pawh thian anga a kâwm thei leh thian kawm a thiam lutuk hi tûn thlenga pawi ka tih ber a ni. Amah chu Jenny a ni.

A û nen khawi lai emaw thiltihna hmun pakhata inhriain kan inkâwm chho va, an inahte kal zauh zauhvin chuta tanga inhria kan ni nghe nghe a. Chu’ng hunah chuan û angin nge min ena thian angin tih pawh hre hrang thei lo khawpin kei, tlangvâl thankin zet tawh hi min lo dawngsawng thiam zu nia! Chu tak chu a ni a hnua min tinaa he article rawn piantîrtu ni tâ chu.

College kal a châkzia te, kan college-a a rawn luh ngei tur thu te min hrilh thîn a, chuta ka lo biakthat duh loh a hlauh thu pawh min hrilh bâng lo. Kei pawhin chu hun ka nghahhlelhzia te ka theih ang tâwkin ka hrilh ve a; a ni, ka nghâkhlel tak zet. A bula awm ka thlâkhlelh avâng ringawt pawhin chu chu thleng thuai thuai se ka ti a, pâwl sawmpahnih a pass tum pawha a pain hmun danga luhtîr a tum thu min hrilh pawhin a pa hnênah kan college-a luhtîr hrâm tura tiin, kancollege nawmzia leh lecturer leh zirlaite inpawhna thatzia te chu ka theih ang tâwkin ka hrilh ta rèng a ni. Kan college chu Gov’t Aizawl College a ni.

Chutianga inhmua inkâwm ngeih tâ chu ka ngaina chho ta tial tial a, min ngaina ve em tih erawh ka hre chiah lo. A hnu deuhvah phei chuan ngainatna mai ni lovin hmangaihna a lo piang chhuak ta a, vâl hi ka buai ta!

Thingtlânga awm ka nih avângin Krismas chu kan khuaah ka hmang thîn. Amah nena kan inhriat kum pawh hian kan khuaah Krismas hmang tura haw ka tum a ni. Ka haw dâwnah ka tlawh a, chutah chuan ama phiar ngat, muffler (ngawnga veh chî puan lum) min pe nghe nghe a. Kei pawhin a tân liau liauva ka lei, hmeichhe incheina dahna, a bawm love sign-a insiam kual raih ka pe ve bawk a, keima tâwkin ka hlim a ni.

Ka thinlung hmun kil khatmah âwl awm lova a luahkhah vek avângin bei nge sei rûn dung tiin Krismas hmanga kan khuaa ka awm laiin beiseina sáng tak nen ka hmangaih thu chu phone-in ka hrilh ta râwt mai a. Chuta min chhânna chu pângngai ka ti – “Ngaihzâwng neih ka la duh lo,” a ti. A duh emaw, duh lo emaw, keiman ka duh miau si a! Chuta tang chuan ka hmangaih thu chu ka hrilh chàmchí a. A hlawhtling lêm hlei lo va! Chuti chung pawhin thian angin tha takin kan inkâwm reng tho va.

Hmangaih biahthu ka hlan vânga a hlim sawt leh a nunkhaw hman a nawm thut ka ring lo va, ka beisei pha hek lo. Kei erawh chu ka rilru a tilài a, a chânga hrehawma awma hlimna min petu a ni a, hei hi nuam ka tih lai ber a ni ta.

Zan khat chu a ngai têin ka phone leh a, chutah pawh chuan chhânna ngai bâk ka dawng lo. Ngaihzâwng a neih leh neih loh ka zawh lahin a neih loh thuin min chhâng bawk si a. A rilru tak hriat ka duh avâng a rilru dik tak min hrilh turin ka ngên a. Chutah chu min hmangaih loh thu min hrilh ta..

“Tlang takin ka hrilh mai ang che. Ka hmangaih thei lo che a ni..”

Chuta min chhânna chuan min va dêng na tehrèng êm! Ka mittui a parawl kuang a, ka tawng chhunzawm thei lawk lo va. Chutah chuan ka la tâwp mai lo va, kum thum kum li, kum nga thleng pawha ka nghah theih tur thu ka hrilh tâwk tâwk a. Ka va han hmangaih tehrèng êm aw..

Chuta tang chuan an inah pawh ka kal khât ta raih a, kan inhmuh pawhin a hma ang thovin min biain min kâwm reng mah se, keimah zâwk hi ka rilru a nat zêl avângin ka be tam duh lo va. A hnuah phei chuan an ina kal ka serh ta hial emaw tih mai turin ka reh ta vang vang a.

Kum khat a liam ta..

Nikhat chu message a rawn thleng a, phone number a thlâk thu chu a number thara min hrilhna a ni reng mai a. Kan inkâwm zui hlek a. Tezpur-a thil zira a awm thu min hrilh ta a. A hmaa ka suangtuah ang kha a thleng lo chiang hle. Kan college-ah a lo lût lo tih ka hre dím diam tawh a, chuta chhapah Mizoram-ah a la awm lo zui. A lo haw hun tur ka zawh lahin a thil zir a zawh hmaa a lo haw a rin loh thu min hrilh a. Chu chen chen a hmêl hmuh loh chu ka zuam lo kher mai.

A mak a ni. Hmangaih takte hi hnartu an nih pawhin an hmêl tal hi chu kan ngaihlu a, kan thlahlel ngawih ngawih tho a ni. Hmangaih ve lotu chu huat hlur awm tak a nih laiin a ni teuh si lo, hmangaihte hmêl han hmuh hi chuan huatna tam tak kârah hlimna tê chu a lo awm ve thîn zu nia!

Chuta tang chuan message-in kan inkâwm chho ta zauh zauh a. Keimahah amah beiseina a tlêm ta hle a, mahse, amah hmangaihna chuan beiseina nei lo thei lovin min siam miau si a le.. Sawi tama hlawhtlin mai theih chu ni sela chuan ka va hlawhtling dâwn chiang tak êm!

Kum hnih a liam ta..

He kum hnih chhûngin mi pângngai ni ve ta nafam chu ngaihzâwng ka nei ve nual hman a. Lerh erawh ka inti lo! Hmangaih loh ngaihzâwng ka nei ngai hauh si lo va. Chu’ngte chu han hmangaih dâwn viau chuan min tlânsan leh thîn a, hei hi a ni mak ka tih chu. Hmangaihte kan ûm mêk laia hmangaihtu kan tlânsan dâwr dâwr tho si hi. Min hmangaiha min lo duh ngawih ngawihtu chu ka tawng tho va, mahse, ka hmangaih hauh si lo. Hmangaih lo mah ila, ka dinhmuna ding an ni tih erawh ka hriatpui chiang teh e.

Hmangaih tam tak a neih theih tih ka pawm a, hmangaih ber erawh pakhat bâk a awm thei lo tih pawh ka pawm. Mahse, Jenny-i’n min hmangaih thei lo chu ka pawm thei ngang lo a ni.

Zankhat chu message-in kan inkâwm leh a (Hmun danga a awm hnuin tawngkain kan inbe ngai ta lo). Chutah chuan hmangaihna lam thu sawi kai dâwn chuan a message hi a tawi tak mai thîn a, a chhan ka hrechiang khawp mai. Min la hmangaih ta chuang lo tih chu.

Ngaihzâwng dang han nei lâwp lâwp thîn mah ila, amah anga hmangaih theih tumah ka neih theih loh avângin amah chu ka hmangaih ber a ni tih ka chiang a. Min hmangaih lotu chunga rilru ka pêk angin min hmangaihtu chungah erawh rilru ka pe tlat thei lo hi eng nge a chhan erawh ka chiang lo. Hei hian hmangaihtu tâna hmangaihte an hlutzia a tilang chiang hle âwm e.

Kum thum a liam ta..

A hma angin message kan la inthawn zauh zauh va. Chutah chuan hmangaihna hi mak ka tihzia te, hmangaihtu kalsana hmangaihte kan ûm zui chawn chawn thîn chu mak ka tih thu pawh ka theih leh thiam ang tâwkin ka hrilh bawk a. Chu’ng hunah chuan, “Ka hrethiam bîk lo,” tih chiah hi chhânna ka dawn thin a ni. Min la hmangaih ta chuang lo.

Chutih hunah chuan a hma ang bawkin beidawnna thinlung chuan lungngaihna leh hrehawmna a rawn thlen a, ka thinlung chu hmangaihna zûnzámin a rawn bawh nghâl tiam tiam thîn. Chutah chuan beiseina tlêm nen khumah ka tlu leh hnawk thîn a ni.

Hmangaih nei thei tura mihringte duan kan ni hi buaithlâk leh hrehawm tih châng ka nei thîn. Hmangaih tawn chuan hlim zâwk âwm tak kan nih laiin, hlimna aiin hrehawmna kan tawng tam zâwk zu nia! A châng chuan hmangaihna avânga nun hlimna tak tak neia temtu chu mi tlêmtê an nih ka ring hial thîn a ni.

Kum thum kal tâa a Krismas present min pêk chu ka kawl tha khiau va, tumah khawih leh hman ka phal ngai lo. Khua a vawt emaw, nipui lai a ni emaw, amah min hriatchhuahtîrtu chu hlut takin ka vêt thîn. Chu a muffler senno (pink) min pêkah chuan a tharin a hmêl ka hmu thîn a, chu ngawt pawh chuan a hlutna a belhchhah a ni.

Kum li a liam ta..

Ka thinlungah mei angin a nung reng a, beiseina êng pawh engthilmahin a tithi thei hek lo.

Mi pângngai tân chuan beidawnna hun a tling ve ta..!

A thil zir a la zawh loh vângin Tezpur-ah a la awm reng a. Zankhat chu message ka thawn leh a. Pasal a neih huna min hrilh hrâm tur leh chu chu phu ka intih ve thu chu. Chutah chuan pasal a la neih mai loh tur thu leh hmu zo ni sela, engmah a zir tawh loh thu min hrilh a. Zawnpui tura min tihna thu pawh ka dawng tak e.

Chu mai ni lovin, a pasal neih ni-ah chuan nupui fanaute nena ka kal duah a rin thute min la hrilh tâk deuh deuh va. A beidawnthlâk vawng vawng teh e maw! Amah nena chutianga awm chu ka duhthusàm ber a nih tehlul nen. A hmangaihna thu ka dawng chatuan tawh dâwn lo a ni ta ber mai. Pasal a neih hma chu nupui neih ka tum loh thu ka hrilh tâk kha.

Hmangaihna avânga hlim taka awmte ka awt a, hmangaih tel lêm lova hlim taka nula leh tlangvâl kut insuih riala lêng dûn ka hmuhin hmangaihna nena a hlut turzia ka hrechhuak nawn awn awn thîn. Hmangaihna tel lo hlimna ka la hre ngai lo va, hlimna tel lo hmangaihna erawh ka hrechiang ta hle mai.

Ka tâna Khuanu ruat chu ni sela, hetiang ang harsatna ka tâwk hauh lo vang. Mahse, Khuanu ruat ni lo tura han puhthlûk mai chu dî then lunglèn tawrh nêp tum tluk zetin harsa ka ti a; lungawi taka hmangaihtu tâng belh mai loh chu tih tur dang ka nei tawh lo tih hre mah ila, keimaha keimah hian pawm harsa a ti ém a ni.

Kum nga a liam ta…

Nikhat chu a phone number hmasa zâwk atangin message ni lo phone call ka dawng teh tlat a. Phûr zeta ka han lâk chuan…

“…Thla thar ni 26-ah pasal ka nei dâwn a, i lo tel loh chuan…”

Ka ‘aw’ tain ka hria.

Mak ka ti lo va, ka dem lo bawk. Mak ka inti a, ka indem thung. Mi pasal neih dâwn avânga lo phili chiam mai chu a mak rêng a. Mahse, amah ka hmangaih zia hretu leh a taka lo tawngtu an awm a nih chuan anni mak tih erawh ka hlawh hauh lo vang le.

Jenny-i vânga ka hlimna chu Jenny-i vânga lungngaihnain a rawn thlen ta reng mai. Jenny-i vânga Jenny-i ka beiseina chu Jenny-i vânga Jenny-i laka beidawnna chuan a rawn thlâk ta a ni. Aw.. Jenny..!

Ka theih leh neih ang tâwka nalhin ka inthuam a, bâwm chhûngah present dang leh a Krismas dâwn muffler min present tawha chu ka thun tel a. Biak In lam ka pan ta chhat chhat a.

Monu inthuamna mawi tak hmuh hmaihin moneitu vânneihzia ka chhût neuh neuh a. Kum nga lai beiseina nena ka nghah tithlâwntu chu ka hmu bawk a. Keimah avângin amahah hlim lohna a neih ka ring lo va, a hmêlah a lang chhuak hek lo.

An inneih thutiam chu zawi hle mah se, ka bengah têk tla ri tluk zetin a ring a, zungbun an inbuntîr rual rualin Jenny-i ka beiseina zawng zawng chu a tâwp a, ka duhthusàm zawng zawngte nen romei angin a zâmral ta a ni.

Hmangaihtu leh hmangaihte inneihna ni chu a ropui a, a mawi a, lawmpuina leh duhsakna hlan nawn awn awn tlaka ni duhawm hmang thei an nih laiin hmangaihtu dang tân erawh ni râpthlâk a ni si a.

Ka present bâwm ken chu ka dah a, “Kei aia hmangaihtu i tawng a ni mai thei; mahse, nang aia hmangaih ka tawng tawh dâwn si lo..” tiin ka phun sap a. Ka chhuak ta a.

Similar Posts:

• Tu hmangaihna nge thuk ber ang?
• Mipa leh Hmeichhia
• Min hmangaihtu vs Kan hmangaih
• Ka Nu
• Min Hmangaihtu

Recent Posts:

• School zirtirtu hmeichhia ten karkhatah ni hnih puan bih a ngai tawh dawn…
• Sawmna – Dah mai a!
• Leitlangpui
• MIZORAM CHU AIZAWL (Aizawl Khawpui zauh a tul kher em?)
• Comedian Search 2012 Top 10-ah mi 12!

This entry was posted on Wednesday, October 13th, 2010 at 3:30 pm and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.