Zirna siam thar kan State-in kan mamawhzia veitu zîngah mithiam pui pui leh keini ang mi narante pawh kan han tel ve hi a lawmawm hranpa ve reng reng. Mi(sual)ho hriat leh ngaihtuah hnu pawh ni se ka rilru han share ve hrim hrim che u ka châk tlat. Hei ka muhil thei lo bawk nen. Chhun lama mut a tam deuh atin ni! Kaihlek hla phuah leh mai tur ka hre rih lo bawk a…
Mizoramah hian Sâp tawng kan ngaisâng hle mai a, thil tha tak pawh a ni e. Kan High School kal ve laiin kan teacher saptawng thiam bîk vak lo, Burma lam Graduate a ni tain ka hria.. chuan, “English-in thlaah an inkâp kai lo, thiam loh a pawi lo!” a ti thîn ni tain ka hria. A sawi dik famkim lo deuhvin ka hria a. Zir thiamna nei tur chuan lehkhabu zirtlâk kan neiha kan zir a ngai phawt. Lehkhabu chu ti ang chu kan mother tongue-in awm mai thîn se chuan a zia deuh tûr. English tawnga ziak a nih deuh zel avang hian kan subject zir tum kan zir hma hauh / ruala ngai tel chu a zirna hmanrua “English tawng” thiam hi a ni tlat.
Tawng thiam a va pawimawh êm.. Mahse kan zir dân hi, i han ti ve teh ang aw! Sâptawng hman thiam hlutna hre tak vek kan nih avangin kan State-ah India rama tel reng chung pawha kan Hindustani hleihtheih loh lai mêk hian English medium school chu a zirtirtute zirtir thiam dan leh kan tu leh fate mahni in lama kan kaihhruai zui theih / theih loh dan hre chang map lo niawm taka a rethei leh mimâwl ber thleng maia English Medium School kan bawh ruih ruih lutuk hian pawina neiin ka hre ve tlai khawhnu a. A solution ka hria azeng phei chu a ni lo.
Hman deuh khân khaw danga awm kan naute ka tlawh a, an rawlthar chu Class-VIII a zir mêk niin ka hria. Exam an hnaih tawh avangin zingkârah Science subject Note a lo zir lauh lauh mai a. Solid, Liquid, Gas tih vel a chhiar lai chuan, “Solid, Liquid leh Gas tihte kha a awmzia i hria em?” ka ti a. Ani chuan, “Hre lo,” tiin mi lo chhâng a, mak ka tiin ka ngaihtuah zui neuh neuh va. Tun thleng hian ka la hre chhuak fo thrin. Kan nauva chu KG atangin Class VIII thleng English medium school-ah hlîr a kal a, School-te pawh a compound chhunga English hman ngaihna deuh vek an ni nghe nghe a. Chuti chung chuan sawi tâk ang kha a ni mauh mai chu ama thiam loh nge ni ang an zirtirtu tih zawhna hian tun thleng hian min la luah fo thîn.
A ni rêng a, Mizo tawng hmanna State-ah English chauhva inbiak phalna school kan ngahin, hetih kawnga strict apiangte hi zirna in tha-ah kan ngai em maw ni, School pâwn lama an zir zuina tur hun leh hmun remchâng nei lo ve lehchhâwng, chhungkuaa English thiam pakhat mah awm lohna atang pawhin Sâp sikulah deuh ngat kan tu leh fate admit kan tum ta hlawm a. Sâptawng thiam se, thiamna nghet tak nei leh chhawr tlâkin lo zi chhuak se kan tihna thahnemngaihna hi chu a tha thlâwt. Mahse, Sikul lama an lo inzirtir dan tur âwm vel hi ka lo hisâp tel lo thei lo.
Naupang, mahni pianpui tawng ni lo tawng dang reng reng kan la hmanpui loh chu Sâp tawng chauh hmanna sikula kan luhtîr hian – a Sâptawng mai bâkah subject dang, tlêma inhrilh fiah tûl zualte thlengin an thiam chian mang loh Sâptawng bawkin an lo inzirtîr leh a. A ngawng zual phei chuan pawl riatah pawh a awmze hre map lovin solid / liquid / gas tihte chu rang tak takin an chhiar lâwng lâwng mai zawng a lo ni. Hei vang hian a niang a sum nei deuh te’n nilênga fate’n an zir hnu tho hrilhfiah zui turin sum tam tak sêngin Tuition an lâk thin ni! An zirtirtu te ngei zahna châng hre lova mahni zirlaite Tutor-a tang zui leh ta pawh an awm thei awm e.
Mipui an thuhmun vek thei lo angin, kan nauva ang kher hi chu an tam lo pawh a ni thei e. Mahse a ang deuh hi chu an tamin ka hria. Hriat loh pathian tâna thil hlan ang mai khân, hriat chian loh tawngin an hriat loh subject an inzirtîr a, hre chiang lovin an by-heart bur bur thei hle dawn a lo ni.
Kan naupan lai chuan… (upat tawh hmêl lo maw!) sikul dangdai tak (Junior Basic School tih ni ta maiin ka hria) ah Class-I ka kal ve zawk a. A kum leha kan veng atanga hla deuhvah an insawn tâk daih avangin ka lut chhunzawm thei ta lo va. Chu sikulah chuan Class-I ah Basic English – ABC / I am a boy etc. kan zir a. Kan zirtirtute chuan kan pianpui tawng ngeiin Sâptawng thumal leh grammar mâwl tê tê te chu a awmzia min hrilh fiah zêl a. Mizo sikul pângngaia ka kal leh hnua Class-V atanga English subject kan zir tan leh hnu pawhin pawl khata ka lo hriat sil tawhna chuan min pui hlein ka hria. Tin, kha sikulah khan pawl khat maiah pawh Mathematics-a LCM leh HCF-te hi a hming lam pum/sei hre lem lo chung khân kan chawk kan chawk ve tawh tlat. Pathian zarah chûngte hlei hlei chu Middle sikul kan rah hnu pawha min puitu a ni.
Kha sikul kha eng medium sikul-ah nge ka han puh ang aw!? English medium ni si lo, Mizo sikul chu a ni chiah bawk si lo. Eng pawh ni se, kha tiang sikul kha tun lai Mizoram State-ah hian kan mamawh ber chu ni ve tlatin ka hria. Lut chhunzawm ta zel ila tun ai hian ka lêm chuang ang em? tih lam chu thu dang ni se. Zirtirtute’n min zirtir dan kha tun lai hian uar a tul ta ni berin ka hria: Zirlaite hriatthiam loh reng reng hi tawng thiam chian loh tupuirâl tawnga inhrilh fiah phêt tum tawh lo hian mahni pianpui tawng ngeiin inhrilh fiah zel ila, English ngei pawh hi a tense, voice, leh a grammar zawng zawng hi English mai ni lovin mahni pianpui tawng ngeiin inhrilh fiah hmasa tê tê thîn ila chuan tun ai hian kan ziaawm ngeiin ka ring a ni. He mi ah hian kan State Education Policy duangtute lo bengvar thei in awm chuan a lawmawm ngawt ang.
Sikul hrim hrim hi thiam lote thiam tura inzirtirna hmun a nih avang leh, chu ber chu a din chhan tur pawh a nih miau avangin a zirtirtute pawhin (duhsak uchuak avanga unqualified ngawih ngawih chhawr leh trained leh trained lo tih lam chu sawi rih lo ila) chu mi hlen chhuak tur chu mi dang ni lovin anmahni ngei an ni tih an inhriat chian hle a ngai.
An sikul chauhvin exam an conduct lai zawnga fimkhur em em lo, Mark pawh ren lêm lo, mahse Board Exam hmachhawn tur e.g Matric / HSSLC exam turte erawh chu buaipui khu chûk leh si, Selection Test angreng strict zeta neihpuia, a thiam lote zirtir thiam hram hram tum aia Passed % sang duh vang niawm hrima thlitfîm uar leh hle si sikul te pawh an tam theih hle thin kha! Admission leh Board exam-a thlit fîm uar lutuk sikulte ai kha chuan kan sikul kal ve laia Govt. High School (Aizawl) te ang kha ka ngaisâng thîn – a duh apiang tih theih mai tur kha an admit thei a, an lo zir thiamtir a, admission-a indan an uar loh ang ai khan Board exam kha result an nei tha in ka hria. Sikul, quality duh strict tak aiin Matric chhuak an ngah zâwk thrîn tlat. Pass % lam chu a actual number hre tel chunga sikul that dan tehna tur chauhvah ka ngai.
Thalaite rilru leh kan zir / inzirtir dan pawh hi belh chian a dawl lo hlein ka hre ve hnuhnawh bawk. Hman kum deuh tawhah khan hna lâk tur atan interview board-ah ka tel ve mial a. Chutah chuan candidate zingah a hna sân loh ngaihtuahin Degree sâng tak tak neite pawh an lo lang nawlh nawlh a. Mahse an degree lakna subject zâwn ngeiah pawh kan ram, kan hnam leh nunphung kaihhnawih lam chu thlîr zau hleithei lo an tam leh hle bawk. Interview dang lehah pawh mahni khua ngeia BDO Office a awm tih pawh hre lo, mahni khawvel hman mêk thlîr khûma Travel & Living TV channel en tui fû fû, inla changkâng viau si te pawh ka hmu a ni! Mark sheet leh certificate en chuan beisei sânpui ngei tur chi ni si, real life issue lama hniam leh ruai si an thahnem hlein a lang. Eng vang nge ni ang?
Mahni zirlai subject leh GK hriat viau ringawt hi a tâwk zo ta lo. Kan thiam leh hriatte hi kan ram leh hnam, khawtlâng leh chhungkuain harsatna kan tawh mêk te su kiang thei tura kan hmanrua tur chauhte an ni tih hriat leh, chutiang taka hmang thei tura kan ngaihtuahna te pawh kaihhruai a nih theih nan kan zirna sikulahte ngei hian kan inzirtir a hun ta hle mai. Chu ti zawnga kan kal thuai loh chuan ‘mi mawl’ ni chiah si lo “mi thiam” ni bawk si lo, pawl sâng tak tak kan ngah ringawt ang a. Kan ram chhunga thil pui tham deuh hma lâkna turah, thu tak hla tak vei pha chinte thawh tur hnaah reng reng hnam dang mi kan ruai leh lo thei si lo vang a. Min chîm ral dawn tiin kan tê chhe leh nasa mai dawn a ni. Rêl Lu kan hlau hle reng mai dawn tihna a nih chu!
Kan sawi sêng dâwn lo ve… tih vanga ngaihtuah loh mai theih lah a ni si lo. A hmâwr bâwk rih phawt mai ang:
1. Kan State chhûnga eng medium sikulah pawh, eng subject-ah pawh zirlaite thiam loh inhrilh fiah nan mahni pianpui trawng ngei hman i uar zel ang u.
2. Zirlaite hian an zir lai zawng hian, zirna in an pelh huna hring nun tak tak an hman leh an hmachhawn huna an ralthuam tur an la khawm chauh a ni tih hriain, chûng hmanrua te chu taima taka lâk khâwm tur a nihzia leh, hman tlâk loh an pawm tel teuh loh nana fimkhur chungin, an hmanraw lâk khâwm ang theuhte hmang thiam ngei turin an thil zirte chu an Real Life Situation theuh nen hmeh bel zel thîn se.
3. Zirlaite zir thiamte chu nunphung hmasawnna atana an hmanrua tur a nih ang ngeiin, chu mi hre tur leh a taka hman thiamtir ngei tura an rilru puthmang kaihruai turin Zirtirtute inbuatsaih sela.
4. Zirna Inte hi mihringa theihna awma a sâng ber hai chhuah leh mihring hman tlâk ni tura zirlaite chherna hmun a nih angin, Zirtirtute’n a chhertu an nih leh, Zirlaite pawhin chher mêk an ni tih hi inhre reng thîn bawk se.
5. A pawimawh ber – Pathian tih that zia hre turin inzirtir bawk ila (Hei hi chu subject hranin hun remchangah la sawiho ang)
Kan ziaawm mahna… tiin hriat tawh hnu kan sawi nawn leh pek a nih hi. Mi(sual) hote’n han rawt chhunzawm ve teh u.
Similar Posts:
- Education Reform
- Zirna sikul hi
- Higher science zirtirna atan hian english nge mizo???
- Selection test hi ka hua
- Kan lehkhazir dan hi
October 18th, 2010 at 1:57 pm
Va ziak tha tak em :lol:
Report this comment
October 18th, 2010 at 1:58 pm
A tha khawp mai. A thupuia hawrrawp tul lo awm zeuh khi paih mai theih ni se..
Report this comment
October 18th, 2010 at 2:01 pm
va ziak tha em, titu khian a chhiar lo hrim2
a theih loh 
Report this comment
October 18th, 2010 at 2:11 pm
a thui ang reng. . .
Report this comment
October 18th, 2010 at 2:11 pm
@posttupa, i post chu a that viau rualin ka ngaihdan nilo tlem a awm, kei pawh English Medium ah tho ka thawk a. Zirlaite hi an zirlaibu ami zawng zawng hi classroom ah an thiamvek hmanlo tih hi lo hre mai mai teh. Classroom chu a tihdan tur inzirtir leh inkawhhmuhna hmun ani a, a tih tak tak chu tutor/anmahni kutah a innghat tawh. Zirtirtu ah tangve la i hrethiam mai ang. A bak chu school ban hunah ni mai teh se
Report this comment
October 18th, 2010 at 2:11 pm
Eng subject pawh sawi ula, sakhaw lam in sawi tel ngei ngei mai hi a mak(“A pawimawh ber – Pathian tih that zia hre turin inzirtir bawk ila”). Mizoram ah education that ngaihna a awm lo. Education policy a thuneihna nei reng reng an rorelte school ah an fate kal hlawm hek lo. Qualified lo zirtirtu an tam si. Hetiang corrupt society ah hian education system effective tak a awm thei lo. Kan corruption zawngchhang rah chhuah anih hi.
Report this comment
October 18th, 2010 at 2:12 pm
ziak tha hle mai a. .
Report this comment
October 18th, 2010 at 2:17 pm
ziak tha sei khawp mai…..
nia lehkhabu tha hi mahni tawng hian nei zel ila chu duhthusam a ni…chutiang tur chuan a thiamte khan hma han la teh un…
Report this comment
October 18th, 2010 at 2:18 pm
kan education system a tha lo deuh mai chu zirlai by heart tluk tluk hi a ni. a awmzia hre em em lo in kan byheart vak vak a,hei hian mahni a ngaihtuah chhuah thiamlohna a hring chhuak. Eng subject pawh ni se,zirtirtu te’n note min pek ang ni lo, mahni irawm chhuaka ziah chhuah thiam hi a pawimawh khawp mai.
English subject ah te hian zirlai te’n examna-ah an thiam ang tawkin ziak se, grammar dik lo pawh ni se, a level ang zelin mark hi pe ta thin ila. Grammar dik taka note inpek sa ziah chhuah dup ai chuan a hlu fe zawkin ka ring.
Report this comment
October 18th, 2010 at 2:24 pm
Kan OT lawk,,,vawina thil thleng em ni Thakthing a naupang kum 5 mi pawngsual a an that zui ih kha,,hre chiang in awm mial em
Report this comment
October 18th, 2010 at 2:27 pm
Chhiar laklawh laiin kan comment teh ang: English hi kan tawng zinga pakhatah i pawm thiam ang u, Sap(mingo) ho ta a kan dah tlatna hian english min ti trih zo vek niin a lang, kan sikul kal ve lai te khan zotawng pawh chhep sual chhep sual e ti lovin english chheh sual te kha zahah kan la tlat pek a… ……….. chhiar zawm ang…
Report this comment
October 18th, 2010 at 2:36 pm
OT ve lawk: Naupang pawngsual an chharna kha kan in bul chiah a nia, naupang hi zing dar 6 vel atang khan a bo a. A pawngsualtu/thattu hian thil lei sak tum ni awm takin a hruai a ni awm a, hmu pawh an awm a mahse an chhungte emaw tiin an lo ngaihsak lem lo. Hei zawng hi ka hriat chin. A khawngaihthlak reuh lutuk an ti, garage kha a thim sia. In neitu te bike lachhuak turin a ruang hi an hmu.
Report this comment
October 18th, 2010 at 2:40 pm
a thui hle mai a,chhiarchhuak ve thlap.
sawi zawm ngaihna hre hauh lo thung..hahay(lehpek a)
Report this comment
October 18th, 2010 at 2:43 pm
@ aduh,,,engtik hun vela thleng nge le
Report this comment
October 18th, 2010 at 2:45 pm
OT zawm ve lawkzz..pawngsualtu ‘khawvel thil’ chu tansak ngei chi.saaala
Report this comment
October 18th, 2010 at 2:46 pm
Pu century_child leh pu pangtichawr, pi aduhi chuan post thar a rawn siam mek a ni awm e, hemi topic hi…
Report this comment
October 18th, 2010 at 3:02 pm
Ka lehkha zir ve naa min zirtir dan chu eg: vawiin a kan zir kha class leh ah kan test ziah, test zawhah chapter tharah kan lut thin. Kan zir bak chapter kha in lamah chhiar/lo bih lawk tura beisei kan ni bawk. VERY GOOD.
Tawng thiam hnem hi a lo pawimawh khawp mai. Kei hi ka risk huai thin bawk a ka thiam chak ve angreng viau mai. Shillong a ka awm chhung (sikul kal lai) atang ngawt pawh khan, Nagamese/Assamese, English, Hindi, Nepali ( kan awmpuinu te chhungkua vangin) leh Mandarin (tlem) ka thiam hman, Khasi erawh an huat tawk, invuak tir hrep na khawp chiah ka thiam thung.
Report this comment
October 18th, 2010 at 4:00 pm
Post tupa , i post tha hle mai, i tawng-kau-chheh pawh a puitling dap dap khawp mai. A lawm awm e.
Nia, mahni pianpui tawng ngei hmanga lehkha kan zir theih ve hun hi a nghahhlelhawm khawp mai. Ram changkang hote chuan an mahni tawng ngeiin lehkha an inzirtira, Ramdang hmuh chhuah hmasawnna thil engemaw a lo awm anih pawhin an mahni tawngin an letling leh hlauh maia; duhtawkin mahni kawtkai leh tap lumah thuthluangin an zir melh melh tawh mai ani.
Report this comment
October 18th, 2010 at 5:20 pm
Middle School vel a, mathematics saptawnga an hrilhfiah thin vang hi lawm ka thiam loh tak em em ni..ka saptawng thiam khan a daih ta thin si lo a. English Medium pawh ni se, mizo tawng ngei hian i hrilhfiah thin ang u.. ka rn ti ve ani..
Report this comment
October 18th, 2010 at 5:44 pm
@19 thlanrawkpa, mathematics saptawnga hrilhfiah te chu a har vak emni. Kan College kal laia kan hotupa pawhin ‘ this equal to this, and this….’ ati tluan thak zel mai a, blackboarda ziah pahin.
Report this comment
October 18th, 2010 at 5:50 pm
Zirna cc chu sawitur a tam thrin,keini engmahlo pawh hian rawtna kannei kur dup zel
Mithiam tak2 in zirlaibu hi ansiam ngei awmsi a, period awmtur zz kumkhat chhung chhut a period tin a inhrilhfiah vek hmantur a anduan chu a ni ngei awmsia,MAHSE keini tan chuan a tam ltk in ka hre thrin,note etc by heart ngai miahlo a,a tak2 a hriatthiam a mahni irawm chhuak a engzawhna pawh lo chhang thei tur chuan kan saptrawng thiam khan a pha leh deuh silo hi a ni,
Mizo trawng vekin inzirtir ta ila,classas zotrawng ngeiin chiang kekkawkin zirtirtu mi motivate thiam takin min han zirtirse a tawpah oral pawn a duh2 zawhna han siam tase naupang attentive deuh chuan anchhang thei thrup ang mahse saptrawng kher a ziak tur chuan anthiam silo,english medium skul kal phei chu mizotrawng pawn anziak thra thiam chuang bok silo…
Report this comment
October 18th, 2010 at 6:44 pm
Post tha tak a ni.
Keipoh reilo te chhung chu ka graduate tirh khan school ah ka thawk ve a.Mathematics ka zirtir a,Mizo in min explain tir thin a.Hnamdang lut ve tan English in ka explain leh bawk.Naupang chuan an chhawr khawp mai.PT meeting ah nu leh paten an faten home assignment an neih reng rengin a hma chuan tih pui an ngai vek thin a,mahse ka thawh ve atang khan tihpui an ngaih takloh thu leh anmahnia an tih zung zung mai thin thu an rawn sawi a.A lawmawm ve duh khawp mai.
Ni e,naupangte hi zirtirtute hian inneltir thiam ila(inzahlohtir nilovin),class a kan zirtir mai piah lamah hian a concept an hrechiang tha tawk em?hrethiam lo ta se zawhna zawt hreh miah lo turin kan siam em? tihte hi zirtirtute hian ngaihtuah thin ila.
Class test mai piahlamah hian group a thenin competition angreng deuhin blackboard ah ka ineltir thin a.Chuta thiamlo ho chu an thiamlohna lai ka zawt a,ka hrilhfiah tha leh thin.Heng bakah hian ka theih anga nasa in an thiamlohnaah ka pui thin a.Zirtirtu tha ber chu ka inti lo mahse keimaha ka theihtawpa ka va puih ve na khan hlimna min pe thin a ni.
Hetianga zirtirtuten kan thiamlohnaah dawhthei taka min zirtir thin avang hian ka subject tui lemloh pawh nuam ti takin ka lo zir theih phah tawh thin a.Chuvangin school a ka thawh chhung hun reilote mah nise zirlaiten zirtirtute min mamawhna ka hriatchian phah em a.A tawp berah chuan dawhthei taka ka thiamlohnate hre reng chunga ka hriatthiam loh hlau taka duhsak tak chunga]a min lo zirtir thintu ZIRTIRTU te kha ka theihnghilh thei ngai dawn lo a ni…
Report this comment
October 18th, 2010 at 7:06 pm
Nia, zirna chungchangah hi chuan ngaihdan hi a tam thin khop mai. Mahni hun tawn a zir zel te pawh hi a nihna chin a awm ve bawkin ka hria.
Middle school ka kal thlengin ka by heart thlap thlap zel, a hahthlak lutuk, ka aw a chhang vek zel. High school ah chuan ka zir dan ka thlak a, hriatthiam tum takin ka chhiar thin, a lo hahdam zawk daih. Tin, class test nilai ni apiangin kan nei ziah ka tangkai pui khawp mai.
A post tu pa ngaihdan pawh hi ka pawm khawp mai, zirtirtu te hian naupangte hriatthiam ngei tur hian zirtir se, note in vawn tir tlut tlut ai chuan an hriatthiam khan an theihnghilh har zawk ang.
Report this comment
October 18th, 2010 at 7:07 pm
Ziak tha khawp mai.Ka ngaihdan kan sawi ve a nge, Mizote hian mahni tawng hian B.A., M.A., te hi kan zir ve thei lo a, hmandang ngaihtuah chuan kan vanduai nge kan vannei zawk.India ram ah kan awm chung chuan tawng pahnih tal thiam a ngai si a, a that na lai a awm a, a that lawhna lai a awm a(ngaihtuah peihte tan). Mahni tawnga kan zir ta lo raw raw a nih chuan kan lehkhathiam hmasa J.F.Dailova Dictionary te kha hmang tangkai se, a ziaawm deuh lo maw te ka ti.
Tin,Doctorate degree nei an tam ta ve viau a, kan sawiselna ni lovin University dangah hian lecture te hi an pe ngam a ngem? literacy rate san ringawt a, educated kan tlem si chuan, hmabak a ko lutuk lo mo te ka te ve mai mai a..
Report this comment
October 18th, 2010 at 7:41 pm
Ngaihdan mawlmang tak ka neih ve ṭhin chu, zirlai naupangte hian school hi (a bikin Primary chin) nuam an ti hmasa phawt tur a ni, tih te mai hi.
Report this comment
October 18th, 2010 at 7:54 pm
Mahni tawng ngei a inzirtir hi thil thaber ni turah ka ngai ta deuh e. English a inzirtir hi naupang hruai bona chikhat niin ka hria.
English erawh chu kan zir tho ang chu, a duh in talking, a duhin main subject ah..mahse hei hi duhthusam mai phei chu a ni e..a tak chu kumza nufate han liam se, kan thleng thei mahna..
Report this comment
October 18th, 2010 at 7:55 pm
lario petlier: eng subject pawh nise doctorate te chuan an topic chu an duh chen chen lecture an pe thei ang chu ka ti ve mai asin.
Report this comment
October 18th, 2010 at 9:08 pm
@lrpa,27#. Dik chiah. Doctorate chin chu chutiang tura ngaih an ni ka ti ve thruais.
Report this comment
October 18th, 2010 at 9:16 pm
School-ah hian engnge kan ngaih pawimawh ber tih hi kan chhut chian hmasak a ngai. English pawimawhna kan hria, kan hnualsuat ngawt thei lo.
Tawng nge pawimawh a bulhruma thiamna – a pawimawh ve ve tiin ka han in chhang zui mai teh ang. A khawi zawk zawk pawh hi kan dahsang bik thei lova kan dah hniam bik thei chuang lo. A rualin intibuai si lovin an kal dun tur a ni. A parallel a a kal loh chuan thiamna chu a khingbai thei tlat.
Thiamna kan neih nan chuan tawng a pawimawh a, thiam san zelna kawngah eng tawng nge pawimawh tih kan chhut tel a ngai ang. Chtih lai chuan tawng kan ngaih pawimawh luata a bulthut (concept) kan theihnghilh a, tawng leh result tha ringawtin min kaihhruai chuan zirlai piangsual tam tak kan chhuah thei tlat a ni. Chuvangin zirtirtute kan fimkhur a tul takset a ni.
English hi a pawimawh thlawt, mahse, english thiamtir kan tum luatah zirlaite thiamna kan tithuanawp thei tho si a ni. Mahni hnam tawng dah vul hle ila zirna sang zawk an zir hun thleng kan ngaihtuahpui si loh chuan kan tifuh chuang lovang.
Report this comment
October 18th, 2010 at 10:49 pm
A tha khawp mai,english thiam pawh atha,mahse,kan tawng ngei hian matric thleng tal pawh zir ila chuan school bang pawh kan tlem sawtin a rinawm.English hi chu subj pakhat atan chauh hmang thung ila.
Report this comment
October 19th, 2010 at 12:29 am
A sei bawk a tawite in comment ve teh ang.
Mahni hnam/pianpui tawng (mother tongue tih chungchangah rawn hnialzawm loh hram ni se), ziak leh chhiar hi i thiam ngei ngei ang u.
Kan ramah vek hna kan thawk in zirna tluangtling (doctoral, post doctoral) kan neih theih hma chuan Saptawng hi thiam ngei ngei tur.
India rama kan awm chhung hi chuan Vai (hindi/devanagiri) tawng hi thiam ngei ngei bawk tur. Kan awmna region a zirin hnamdang tawng kan thiam bawk tur a ni
Chu tawng chi li chu kan thiam sa phawt.
Zirna; sikul tin ten first language leh second language in a tum te tih hlawhtlin tum sela, sumdawnna ringawt ngaihtuah suh se.
Tichuan a zawng a za a fel lo a nih pawhin a then a zar chu a ziaawm ngei ang lems.
Report this comment
October 19th, 2010 at 7:11 am
Ka zirna sikul-te ai chuan min zirtirtute kha ka hlawkpui zawk, an chungah ka la lawm thar zel. Engemaw riau min zirtir, chu chu special vet vet tak a ni!
Min zirtirtute thlan pawh ka la zah vek! Chung zingah chuan ka nu leh pa, a mawl ber pawlte hi ka chhuang lo thei bawk lo. Ka ngaihzawngten thil ka inchhirna tur lesson tam tak practical-in minz irtir hlawhtling bawk.
Report this comment
October 19th, 2010 at 9:03 am
Kan tawnga engkim kan zirtheih hma chu mi tawng (English etc..) kan thiam a tul a ni mai.
International level ah pawh, changkan zel tum chuan English thiam hi tihmakmawh a ni. (A thiamlo te an changkang lo ve tihna lam ni lovin, English thiam hian kawng zau tak a in hawng a ni..keini Mizo, India rama chengte tan hian..) Chuvangin English hi a tawng, a ziah leh a pronounciation thlengin kan zir uluk a ngai e.
Mahni tawng thiam em em tur, chumi piahah kan theih ang apiang tawng dang pawh zir zel a pawi lo..
Report this comment