mi(sual).com

Thuhma:

Mi(sual)-ah hian article post ve tur a ni ka tih chhungin thla engemaw zat a liam leh ta der mai! Mahse zanin chu ka ha hawlh zawk mai post thar, William Ralte ziak “Rinthu nge Thutak” tih ka hmu a. Thu mai mai thei niin ka inhre ta lo va, Mi(sual)-a ka post hmasa ber tur ka’n buaipui ve ta chuk chuk a ni. Comments ho pawh a ngaihnawmin a bengvarthlak hlawm hle mai. Mi(Sual) ho zingah Pathian lam tang in tam tih a hriat a, kei mi(sual) pawh hi ka lawm hle mai!!!

Ka ngaihtuah ve fo thin chu…

Mizote hi Pathian thu buaipui nasa, sawi tam leh ngaithla tam hnam kan ni a. Mahse kan Pathian thusawi thin dan, hun rei tak kan evangelist te’n an lo kalpui thin tawh hi tunlai mil deuha her thiam a tulin ka hria a. Mizo thangthar zingah lehkhathiam leh ngaihtuahna chik taka hmang peih ‘intellectual’ an lo chhuak tam ve ta a, heng ho hian kan Pathian thu ngaihthlak tam tak hi an tawngkhawp ta meuh lo niin a lang a ni.

An spiritual need phuhru thei tur Pathian thusawi thei leh thiam kan mamawh ta a ni. Zawlnei Isaia’n “Come, let us reason together” a tih ang deuh hian engkim mai hi, Pathian thu pawh telin, chik taka ngaihtuah hi a tul tawh tak meuh a ni. Chuvangin  Mizo zingah Christian Apologist tha tak kan mamawh ve ta hle a nih hi ka ti a ni. II Petera 3:15 ah chuan tihian kan hmu a, “amaherawhchu in thinlungah Krista chu Lalah ruat rawh u; nangmahnia awm in beisei chhan zawt apiang che u chhang turin inpeih sa fo ang che u, nimahsela thuhnuairawlh leh tih dek chungin;” Khawnge tawite talin Apologetics lam i’n hrut dawn teh ang. A thiam zawkin in la rawn chhunzawm ang chu……

Enge i worldview le…?

Theologian ka ni lo va, apologist pawh ka ni hek lo. Mahse apologetics lam engemaw chen ka tuipui ve tawh avangin inthlahrung tak chungin heng thu tlem hi ka rawn chhawp chhuak ve dawn a ni. Mihringte hian khawvel thlir dan kan nei theuh mai a, kan sakhaw vawn lai hmangin kan thlir tlangpui bawk. Nang enge I worldview ve le? Heng a hnuaia zawhnate hi sakhaw hrang hrangin chhan an tum vek a, christian worldview hmangin tawi te tein chhan i’n tum dawn teh ang.

Origin – Universe hi engtin nge a lo awm tan a, nun hi engtia lo awm tan nge maw ni le?

He universe hi Pathian siam a ni a, kan chenna khawvel ngei pawh hi A kutchhuak a ni. Nunna (life) chi tinreng pawh hi Pathian atanga chhuak a ni. Keimah ngei pawh hi Pathian siam ka ni.

He thu ring lo ho chuan Universe hi engtin tin emaw, matter, time and chance-in a siam a ni an ti. He nunna ngei pawh hi thil nung lo atangin engtin tin emaw lo zi chhuak (evolve) niin an ring. Siamtu Pathian awm an ring miah lo. Chumiin a hrin chu hei hi a ni: Siamtu Pathian a awm loh chuan kan chunga roreltu tur tumah an awm lo. Duh duhin a nun theih. Tha leh dik tak tak pawh a awm lo va, tha lo leh dik lo tak tak pawh a awm chuang lo. A tehna tur bulfuk engmah a awm hran chuang lo. Chuvangin mahni duh zawng leh nuam tih zawng apiangah a tlan theih. “It’s my Life” a ni ringawt.

William, enge I origin le? Siamtu Pathian a awm lo, ka duh dan danin ka nung thei i ti ve ringawt a nih chuan, “William, You must be joking?” ka ti a ni.

Identity – Tunge ka nih? Enge ka nih? Tunge I nih? Enge I nih le?

Pathianin Ama anpui ngeia duh taka a siam kan ni. Eden bawhchhiatna avangin kan nihna dik tak kan hloh a. Mahse Pathianin  a fapa Isua hmangin kawng min hawn sak leh ta. Ka nun hi ka ta a ni lova, man to ber Isua thisena lei tawh a ni. Chuvangin ka duh leh chak zawng apianga khawsak ve ringawt hi a rem tawh lo, min leitu duh zawnga nun a tul tawh zawk.

Hei hi i pawm zawng a ni lo a nih chuan, tunge, enge I nih tak le?

Meaning – Nun hian awmzia a nei em le? Nge ‘Life is meaningless’?

Pathian neitu tan chuan nun hian awmzia a nei a nia. Pathian hrelo te chuan erawh chuan nun  awmzia an man tak tak ngai lovang. Natna, tuarna leh hrehawmnate pawh hian Pathian hriatna leh rinna nen chuan awmze thuk leh ril tak an nei si a.

Purpose – Eng atan nge khawvelah hian kan awm ve ngawt? Eng atana siam nge kan nih?

Pathianin chhan awm lovin he khawvelah hian min dah ngawt lovang tih ka ring. Chhan awm lovin min siam ngawt lo bawk ang. Amah pawl turin, Amah tihlima tilawm turin, A duhzawng ti turin, A ropui nan min siam a ni.

Pathian ringlo tan chuan nun hian ‘ultimate purpose’ a nei tak tak lova, meaning tak tak pawh a nei lo a ni. Tuipui zauva “rudderless ship” ang maiin tuifawn leh thli tleh dan zawng zawngin an  che ve ringawt mai ni. Damchhan tak tak a awm lova, thihna pawhin awmzia a nei hek lo.

Destiny – Khawi lam nge kan pan mek le? Enge kan tawpna tur chu le?

Ringtute chu vanram panin kan kal mek a, chu chu kan thlen tawpna tur chu a ni. Pathianin nunna neia min siamin he kan biological life bakah chatuana thi ve thei lo tur thlarau neiin min siam a. Chuvangin khawvela thihna hi chu kan tawp hlenna a ni lo, chatuana Pathian hnena kan chenna tura bul tanna chauh a ni. He lei hi chu kan khualzinna ram mai a ni, Isuan vanah awmna tur hmun min buatsaih sak a, chu chu kan thlen tur chu a ni.

Chu rinna chu kan neih loh chuan  kan tawpna tur chu, kan duh emaw duh lo emaw, chatuan hremnaah a ni ngei ang. Amah Isua ngeiin chiang takin a sawi si a.

William, khawvel par i tlan laia zilhtu leh hautu che chu nangmah hmangaihtu an ni ngei ang. I khawngaih let aia nasa fe khan an khawngaih chein ka ring. Chutianga zilhtu leh hautu i la neih avang chuan ka lawmpui che. Engtikah emaw chuan awmzia a la nei ngei ang. Kei chuan ka origin ka hre chiang a, khawvel par tlana nawmchenna um tur ka ni lo tih ka hria. Min Siamtu duhzawnga nun hman mai hi ka tih theih tlawmte a ni e. Chu chu thil hreawm a ni reng reng lo. Miten khawvel par an tlan laia an hlimna aia sang leh thuk zawk hi kan nei ve zawk asin. He khawvel hi chuan rei tak daih hlimna a pe thei em ni? Keini chuan chatuan daih hlimna kan kawl asin. Tin, vanram kai loh hlauh vangin kan inkhawm a ni hlei nem, Amah chibai buk (worship) tur leh Amah nena inpawl tur leh kan ringtupuite nen inpawlkhawm turin kan inkhawm zawk alawm..Vanrama kan kalna tur leh chhandam kan nihna hi chu Isua rinna avanga khawngaihnaa chhandamna chauh a ni e, thil tiha hlawh chhuah chi a ni lo ve.

William, i ngaihdan huaisen tak leh tlang taka i puang chhuak ngam hi i fakawm ka ti a. I ti mai mai nge i rawn fiamthu mai mai ka hre hauh lo. I ti tak zet a nih si chuan “You are taking a big gamble on your future” ka ti che a ni. A nih loh chuan, nakinah vanram leh hremhmun a tak ngeia i hmuh hunah chuan a tlai tawh dawn si a. Uluk leh zualin I ngaihtuahna kha han hmang zel teh. All the best……

Similar Posts:

• Rinna mak
• Prince William leh Catherine Middleton an in hual ta
• Meidil Most Wanted List ah hian I tel ve em?
• Suicide ah pawm ve dawn lo
• Hun hnuhnung;

Recent Posts:

• School zirtirtu hmeichhia ten karkhatah ni hnih puan bih a ngai tawh dawn…
• Sawmna – Dah mai a!
• Leitlangpui
• MIZORAM CHU AIZAWL (Aizawl Khawpui zauh a tul kher em?)
• Comedian Search 2012 Top 10-ah mi 12!

This entry was posted on Wednesday, October 20th, 2010 at 8:30 am and is filed under Religion. You can follow any responses to this entry through the RSS 2.0 feed. You can leave a response, or trackback from your own site.