Sul leh a hmanna thenkhat te !

March 13th, 2011 7:00 am by lushai_er

Sul chu kan hriat angin hnim sawina mai a ni a. Hnim chi hrang hrang, kawngsira kan pal thin heng Builukham, Arngeng, luang,Buar thlengin a huam kan ti thei ang chu. Ti ti tlanglawn a kan hmanna thumal thenkhat lo tarlang ila, hla-thu nen kan hriat hran a awlsam nan…

Lo sul haw : Feh haw.
Lo sul haw hun : Feh haw hun (Ram atangin).
Lo sul thlen hun : Fehin in an thlen hun.
Sul : In pel, insul pel, kalna hnu, etc.

Sulhnu : Kal tawhna hnu, hnuhma, awm fo tawhna hnu, kut chhuak hlui tawh, khawsakna hnu, kutkawih hnu, etc.,
Sul su : Hma tawng, hmahruai, kal hmasa, kawng zawng, etc..
Sul sutu : Hma hruaitu, bul tan tu, kawng zawngtu.,etc.,
Sul-rul : Tlumpi, rannung chikhat fanghmir aia lian deuh.

Hla thu lama kan hmanna thenkhat phawk chhuak turin Lengzem hla lar then khat lo tarlang ila :-

1. Sul ang kan inzuina tlang zawng kha Parte,

Tu nge haider ang le nunhlui?

[A tha partin Lawri by Lalzova]

2……Kan sul i hnu khuarei an chang zo ta,

Hring leh thar hnahnemte’n lo bawm.

[Ka rawn fang leh by Vankhama/Lalzova]

3. Sulhnu chhui leh nunhlui ngaih zawng,

Awmkhua a va har lua em!

[Nghilh bik suh aw Rinpui by Lallianmawia Pachuau]

Heng hla hrang pathum atang hian Sul hmanna thenkhat kan suangtuah thiam maiin ka ring a. Hmanlai chang tawh kan hnuhma te, kan feh kawng hlui, etc. sawinan a hmang a.

4. Sul ang min tum lo, ka hai lo che,

Mahse maw, Ngaihzual, i zunzamin;

[Ka ngai ber che by Vankhama]

5. Sul ang min tum lo, Parte ka hai lo che,

…….Parting ang ka tan vul leh rawh aw.

[Chatuantawii by H.Lalringa]

6……An lal zawk em ni thaleng dang i tan hian?

Sul ang min tum lo ka hai lo,

[Lung i her leh si by Lalruatfela Pachuau]

Heta sul a hmanna thung hi chu a dang leh ta deuh a, min duh ve tak tak lo na a…a tihna daih a ni.

7. ……..Chun an haw, Zua haw, Zaleng an haw,

Sultum chalngeng hnutianga’n sul a haw.

[ Pi pu chhuahtlang hlui by Liandala]

Sultum chalngneng hi Sial pachal, a rual zinga hnuhnungber, hnung daltu a sawina daih a ni leh si.

8. Sul ang tung e Biahte lam pheiah,

An luk tak e Sairawt vungi u.

He hla hi kan thupui ber tura ka thlan chu a ni. Sul (hnim-hnah) hi mihring tiat velin an tum a (tum-tel), daiah kal/haw lam hmuh turin an tung thin. A awmzia chu an chapo-uanna chikhat a ni a, in khaw nula tu emaw ber kan thei e tih entirna a ni.

“Hmanlaiin tlangvalte mi khuaah an va kal a, an zinnaah an khaw nula kha an va ngaih a, an tlawm thei ngei a ni tih hriat nan leh entirnan, an haw kawtchhuahah mihring lem angin SUL AN TUM a, an dah ta thin a, ‘In khaw nula kan ngai thei’ tihna a ni.â€

Pa 8-na hla hi upa deuhte’n an sawi dan chuan Tlungvel lal fapa tan Biate lal fanu an bia a, palai atan an khawnbawl upa min leh pasaltha, Leburh-a an tir ta a. Leburh-a hian sul a tung a, an han inzawh khan Biate nula chhuanvawr, Â hmeltha Lalrochhingi kha a lo ni reng mai si a…..Tlangval-ho thinrimin an phuah elna a ni awm e.

A hla chang hi 12 vel a awmin ka hria a, ka chiang ta lo hle mai a, a chiang zawk inawm chuan phawrhchhuak ila. Tin, sul tung hi hmuphak la dam an awm chuan fiah deuh zawka zawt chiang thei awm ila a duhawm khawp ang. Khaw hrang tih dan hi a lo dang hle thei bawk a nia. I thawhkhawm ang u hmiang.

Source :

1. Pu K.L.Berema, Bawngkawn.

2.â€SULTUMâ€ by Pu C.Ruma, Ratu — MUP Tlangau AugustÂ 2010.

58 Responses to “Sul leh a hmanna thenkhat te !”

1
shailendra Says:
March 13th, 2011 at 7:19 am
Sulrul hi eng chiah hi nge tih hi ka la chiang lo tlat. ‘ Sulrul leh tuiek in an eichhiat theih lohna hmunah…’ tih a sulrul hi.

Report this comment
2
AmiGo VLR Hnamte Says:
March 13th, 2011 at 7:30 am
Kan pi leh pute hun laia Sul an tung hian Sex-a an ngaihdan ati lang a, he ngaihdan hian thui takin Mizo mipate hi a la influence niin ka ngai. Kristian inIrtirna nen chuan a inkalh ta fek fawk hle mai.

Report this comment
3
caribou Says:
March 13th, 2011 at 7:48 am
A va bengvar thlak ve le.

Report this comment
4
mate ainawn Says:
March 13th, 2011 at 7:49 am
@ Post tupa, a va ngaihnawmin a va bengvarthlak ve le…

Misual hi karkhat tep ka chhiar thei lova, nuam lo duh lutuk.

Report this comment
5
H.Vangchhia Says:
March 13th, 2011 at 7:52 am
Kalo hriat ve dan chuan sul tih hi Mizo tawng upa, kawng/ke kalkawng ni ngeiin kalo hre thin. Hei hi Lai tawng pawha tun thlenga kalkawng tihna ala ni.

shai #1 Mathaia 6:20″…. where moth and rust can not destroy,” tih kha Mizo tawng chuan, “Sulrul leh tuiek in an eichhiat theih lohna hmunah..” tiin an letling daih mai. Moth chu Lungphur a ni si a, mak deuh a ni!!

Report this comment
6
TuaiSialA Says:
March 13th, 2011 at 7:53 am
‘Sûl a lam’ tih pawh a awm kha mawle..

Report this comment
7
ChhawnBura Says:
March 13th, 2011 at 7:59 am
Post hlu tak a ni

Report this comment
8
Mapuia Says:
March 13th, 2011 at 8:08 am
‘Súl’ tih hi kalna

Report this comment
9
bucko Says:
March 13th, 2011 at 8:09 am
Sul tum an lo tung thin tih pawh ka vawikhat hriatna… bengvar thlak hle ami……. sul sul sul….

Report this comment
10
H.Vangchhia Says:
March 13th, 2011 at 8:09 am
Mapuia YESH

Report this comment
11
shailendra Says:
March 13th, 2011 at 8:15 am
@HV #5, ni e ti raw. Moth-ah pawh a eng species ber nge tih ka hre chak. Hehehe… Tak takah, Bible-ah hi chuan Moth ‘Lungphur’ lampang chi ho, ‘general’ taka a zu sawina turah ka ngai. Lungphur a tui a, pangang a lo piang a, chu pangang chu a buhchium a, lungphur a rawn piang leh a, chutiang zel in.

Report this comment
12
H.Vangchhia Says:
March 13th, 2011 at 8:19 am
shai, chiang takin, “… moth and rust…” a ti sia, a life cycle a sawi tum hmel lem loh te ka tia hairehai

Report this comment
13
shailendra Says:
March 13th, 2011 at 8:27 am
HV, tumkhat, mi pakhatin ‘sulrul’ hi engnge ? tiin min zawt thut a, ka lo hre lo nasa mai mai khawp a, chuvang chuan sulrul tih hian ka beng a verh ta riau a…

Report this comment
14
H.Vangchhia Says:
March 13th, 2011 at 8:29 am
shai, Ka hriat sual loh chuan Lai tawngin sulrul hi patek tihna niin ka hria. Mahse, moth atanga lehlin a ni kher sia, a dangdai riau asin hairehai

Report this comment
15
he pa Says:
March 13th, 2011 at 8:39 am
OT loks… Fiamthu thiam, zaithiam, hlaphuahthiam, evangelist pu F. Laltuaia a boral tukin zing khan!

Report this comment
16
he pa Says:
March 13th, 2011 at 8:40 am
OT loks… Fiamthu thiam, zaithiam, hlaphuahthiam, evangelist pu F. Laltuaia chu Lungleiah a boral tukin zing khan Cancer vangin! Tin Zirtirtu hlun Ex Principal GHSS Upa H Rothanga, Lunglawn, Lunglei pawh nimin khan a boral

Report this comment
17
shailendra Says:
March 13th, 2011 at 8:40 am
Thlaler Tuivalawng… RIP

Report this comment
18
H.Vangchhia Says:
March 13th, 2011 at 8:44 am
Pu Laltuaia a boral nge a thi? Ka van ui vele…. aw tham chhal mai a azai ngaithlak avan khat dawn ta vele RIP

Report this comment
19
H.Vangchhia Says:
March 13th, 2011 at 8:45 am
Pu Laltuaia

https://www.youtube.com/watch?v=1anWQpCkXqk

Report this comment
20
aduhi Says:
March 13th, 2011 at 9:05 am
ziak tha khawp mai. Hetiang thil hi hriat atan a tha, lo ziak zel rawh

Report this comment
21
Lersia Says:
March 13th, 2011 at 9:35 am
Jail veng ah. . . tih kha ama sak nita in ka hria a.

@Pu lusiai_er, i rawh ti tha khawp mai, tawng upa kan tawng ti hausa tu kan vui liam mek laia, tia thangthar te thinlunga i rawn tharthawh leh hi a lawmawm khawpmai. Kei phei chuan hriat a lawi reng ka lo neilo a nih hi mawle. Ka’n zir ange. Gut paws.

Report this comment
22
Terema Chhakchhuak Says:
March 13th, 2011 at 11:03 am
Pu F.Laltuaia chu ka va ui tak em! ka piang tlai lutuk hi ka thin a rim thin.. ..ani kha ka mi kawm chak tak a ni asin le.. ka pu(JF Laldailova) thian te hi ka kawm chak hlawm em em thin a,pu James Lianmawia lah kha a dam lai hmel vawi khat tal chu ka hmu ve hman ang ka tih rauh rauh laiin a thih thu chanchinbu atangin ka lo hmu ve chauh a,James Dokhuma lah ka kawm hma hmain a lo liam hman a, a pawi lungrun vel vek a ni ber e..
@Pu lushai_er i post tha khawp mai.. mizo tawng hi chu a thiam te hian a thiam ve lo te hriat tur hian han post zel teuh u khai…

Report this comment
23
TuaiSialA Says:
March 13th, 2011 at 11:30 am
Pu F. Laltuaia chu ka va ui tehlul em!

Report this comment
24
covenanter Says:
March 13th, 2011 at 11:35 am
SUL tih hi chu lai tawng atang a kan lak ni ngei in zirtirtu hre deuh ho chuan an sawi thin.An sawidan inanglo mahse a kawh tum erawh a inhnaih hlawmhle ani.Hetiang hian KAL,KAL TAWHNA etc heng ti chiang tur hian entirna pawh min pe nghe nghe a….INSULPEL=INKALPEL,LOSUL HAW=LO A KAL HAW LEH(hetah hian sul a nih chuan lo feh an kalna kalkawng ngai ah bawk khan an let leh tihna a ni ang),SULHNU CHHUI=MI/RAMSA EMAW KAL TAWH NA A KAL LEH etc.

He tawngkam tho a hmanna dang a hman ho te hi a chhuahna hriat theih ani lo in ka hria,hmanlai khan awze ho an awm ve nual a, chung ho chuan Mizo tawng nilo deuh hlek hi an hmang thin ani.Ka ngaihdan mai mai chuan khang hunlai khan khawkhatah an inchen pawlh tho si a,awze ho tawngkam tamtak kha lakluh an nei ni ngeiin kei chuan ka ring.Tunah hriattheih tur in an tawng dahthat in a awm lo a chhuifiah a harsa ani.Heihi ka rinthu ania hnial duh chuan hnial theih ani e…….

Report this comment
25
ZerO Says:
March 13th, 2011 at 11:44 am
Adverb angin “A ri sul sul” tiin kan hmang bawk a.

Report this comment
26
covenanter Says:
March 13th, 2011 at 12:45 pm
@25 hmandan tlanglawnah chuan a ri sur sur tih a niin ka lo hria a……….

Report this comment
27
Maya Says:
March 13th, 2011 at 1:41 pm
A bengvar thlak hle mai . .sulrul, moth a tang a lehlin ni mahse .a greek leh hebrai ten hre ve lo mah ila . Thil dah that ei chhe thei rannung ho ka lo huam tir ve ngawt a . .chuan Pu lushai er . .Thingsulthliah khaw hming hi . ‘sul tum’ i rawn sawi nen hian in zawm na a nei ve em le .

Report this comment
28
Mawia Pachuau Says:
March 13th, 2011 at 3:15 pm
khawnge Tlungvel tlangval nimah ila thil thui tak ka hre lo nain tlem a zawng:- Tlungvel lal fapa nupui an biaksak hi Lalluauva a ni a, an palai tirh hi Lehburha a ni. Biate lal fanu hi Lalnguri a ni. Lehburha hi nula mi(tunlai tawngin ‘zei’) tak a ni awm e. Hla thu tlar hnih an sawi lar ka hriat thin chu ‘Lehburha chu cham rei na se; Lalchhingpuii a rai ngei ang’. A bak chu ka hre thui hran lem lo.

Report this comment
29
Mawia Pachuau Says:
March 13th, 2011 at 3:22 pm
sorry, Lalchhingpuii ni lo in Lalrochhingi zawk a ni e.

Report this comment
30
vakul Says:
March 13th, 2011 at 3:29 pm
Kumpuisul i telh lova, hla thu lung ti leng berte zinga mi nih khaaaaaa.

Report this comment
31
lushai_er Says:
March 13th, 2011 at 5:32 pm
Chawlhni kher kherah a chhuah chu le……Sunday Sikul zirlai nen ava inhal duh awm ve aw :))

@ku_shai : Sulrul chu Tlumpichikhat hi anni mai. Fanghmir ai chuan an lian.

Pu F.Laltuaia chu engtia thi nge aw…? Ka va ui em !!

@H.V : Sul hi kawng tihna chu ni love, kawng sira hnim zawk hi a ni. Sulhnu an chhui hian sul hawina lam hi a kawk tlangpui thin. Sulin khawi lam nge a hawi an ti thin.

Report this comment
32
lushai_er Says:
March 13th, 2011 at 5:37 pm
@vakul i rawn telh a a that hi, ka ziah lai hian krismas hla lam ka lo ngaihtuah tel loh bakah sul tung hi kan thupui ber leh rilru a lian ber a nia. Thawhkhawm liam liam ang u.

Report this comment
33
lushai_er Says:
March 13th, 2011 at 5:58 pm
@mawia pachuau : Tlungvel hranghlui deuh i rawn zawt chiang thei mial em? Tlar 3-zai kan tih ang chi khan an rem thinin ka hria a.

Lehburha nge Leburha pawh hi ka chiang tawh chiah lo a nia !

He hla hi hria kan tam vak lo a ni mai awm e ka ti deuh va???

Sul an tung e Biahte lam pheiah,
An luk tak e Sairutvungi U!

Leburha chu cham rei na sela,
Lalrochhingi a rai ngei ang a !

Biahte lam pheiah zang thukru ila,
Lalrochhingi’n a chhar ngei ang a !

Biahte zang zathum zingah,
Leburha zang kher maw i thlan!

A bak hi ka ngaihtuah chhuak thei mai tawh lo e…….

Report this comment
34
lushai_er Says:
March 13th, 2011 at 6:06 pm
Sul hi kawng a nih lohna chhan H.V tan kan tarlang leh lawk a nge.

Sul-su : Hmahruai sawina daihah kan hmang. Sul-su-tu kan tih hian pioneer a kawk daih thei ang. Tin, mi tlawmngai hnathawh-ho nikhua a hmala-hmasatu, bultantu sawinan kan hmang bawk.

Report this comment
35
lushai_er Says:
March 13th, 2011 at 6:08 pm
Sunhlu hi Sul-hlu ti an awm bawk !

Report this comment
36
shailendra Says:
March 13th, 2011 at 6:15 pm
#35, Sin-hlu ti pawh

Report this comment
37
lushai_er Says:
March 13th, 2011 at 6:17 pm
@covenanter : Zero sawi hi a dik lohna ka hre lo. Hmuh mai theih loh hian hnim hi a ri sul sul fo mai. Hnim a ri siau siau bawk a, a ri suau suau thei bawk ang chu……….

Ka chhuak leh lawk dawn….lo comment zel rawh u !

Report this comment
38
shailendra Says:
March 13th, 2011 at 6:24 pm
Zero a sawi, ‘ri sul sul’ chu ka hre fo mai. ‘Hnim an pal ri sul sul a’. ‘Ri sur sur’ chu, ‘Chawhmeh a kang ri sur sur a’ tiin ka hria…

lushai_er #31, @ku_shai : Sulrul chu Tlumpichikhat hi anni mai. Fanghmir ai chuan an lian. HV a Bible rawn quote nen chuan ava inpersan si ve. ie, Sulrul = moth

Report this comment
39
muantea Says:
March 13th, 2011 at 8:35 pm
Lushai, i thil post chu a va tha kher ve!!!

Lehburha chu cham rei na se la
Lalrochhingi a rai ngei ang (a rai ngei ang)

tih hla hi Gospel Centenary feature film kan siam khan kan sa nasa thei khawp mai, lung i tileng mang e.

Report this comment
40
hlatekhua Says:
March 13th, 2011 at 8:56 pm
Post ngaihnawm tak a ni. Posttupa hi hetiang lamah pawh hian a lo ril viau a nih hi.

Ka rilrua sul tih hmanna lo lang ve chu “kawngka sula mak” tih hi a ni teh daih a, eng tihna nge ni ta ber ang le?

Report this comment
41
H.Vangchhia Says:
March 13th, 2011 at 9:23 pm
lushai_er #34 Sul-su tu: Hmasial tu – hmasial tu = kalkawng/kalna tura hmalo hruai tawh tu / hmalatu sawina a ni mai lo maw hairehai

Report this comment
42
muantea Says:
March 13th, 2011 at 9:34 pm
@hlatekhua: ‘Kawngka sula mak’ chu Mizo dana nupa inthen chungchang a ni. Nupui dang a duh zawk avangin a nupui a thena, nupui dang a hruai luh lehnghal hi a ni mai e.

Report this comment
43
hlatekhua Says:
March 13th, 2011 at 9:39 pm
#42 muantea, i sawi hi ka hre ve riai ruai a, mahse sul (=hnim) tih nen hian ka hmet rem thiam chiah lo a ni.

Report this comment
44
muantea Says:
March 13th, 2011 at 9:50 pm
@hlatekhua: ‘Sul’ tih zawng zawng hi hnim lam sawina a ni vek kher hleinem, post-ah pawh a in ziak reng alawm

Report this comment
45
hlatekhua Says:
March 13th, 2011 at 9:57 pm
#44 muantea, min vin hrep kher a, nang chu…ka lo hre lo a ni ve mai a!

Report this comment
46
Terema Chhakchhuak Says:
March 13th, 2011 at 10:01 pm
‘kawngka sula mak’, tih hi ka hriat ve dan chuan mi in a nupui kha a hmaa ma chuang lovin midang a hruai luh ve leh chawpchilh deuhin ma se la, chutiang chu ‘kawngsa sula ma’ an ti thinin ka hria..

Report this comment
47
Terema Chhakchhuak Says:
March 13th, 2011 at 10:07 pm
kawngka ah an a nupui mak leh a nupui thar kha insulpel e tihna ang vel a ni ta ber awm e..

Report this comment
48
muantea Says:
March 13th, 2011 at 10:15 pm
hlatekhua, ka hau lo che, dam dam..kha theitui in daih rawh thingpui i duh zawk em?

Terem, nia i tidik khawp mai. Mahse Kawngka sula mak a nih avanga kawngka a insulpel tak tak kherin an ma chuang hleinem. Nuipui dang duh zawk vangin an nupui neih lai an mak khan aa zanah emaw tukah pawh midang lalut se kawngka sula makah an puh tho thin ngai e.

Report this comment
49
Terema Chhakchhuak Says:
March 13th, 2011 at 10:40 pm
Pu muantea(muantea han intih bawl bawl mai chu a kamtlawmthlak deuh e), sul tih hi insulpel tihna ka tih chhan zawk tak chu hlatekhua khan hnim sawina emaw a tih vang zawk a nia..

Report this comment
50
muantea Says:
March 13th, 2011 at 10:52 pm
Terem, a tha alawm…hlatekhua hi chu a awmna a hla lutuka engmah hi a hmuchiang hlei thei lo a ni

Report this comment
51
Benny Says:
March 13th, 2011 at 11:01 pm
Chuan, muante, ‘nuipui dang’ khi engtihna nge ni ve ta ang! sprite nokhat kengin…

Report this comment
52
muantea Says:
March 13th, 2011 at 11:08 pm
Benny, ‘nupui’ tih tur ni reng mahse patlingin ka chhu sual laklawh tawh a, man takin ka edit duh lo lui vel a nih khi

Report this comment
53
hlatekhua Says:
March 14th, 2011 at 12:00 am
Hey, min rel suh uuuu…ka cc-pui ve ve lehnghal. Post chhiar khian a sentence hmasa berah “Sul chu kan hriat angin hnim sawina mai a ni a” a ti kuau a, chu chu ka changchawi a nih kha!

Khatia min rel in chin chuan theitui leh thingpui khi ka in duh lo ve ve ang! …titau, tum vuau vuau!

Report this comment
54
Benny Says:
March 14th, 2011 at 6:56 am
Zahngai zahngai, nem te’n ka tuar mai na’nge, in hram in hram!
Good morning!

Report this comment
55
H.Vangchhia Says:
March 14th, 2011 at 7:08 am
‘Ning

Report this comment
56
Mawia Pachuau Says:
March 14th, 2011 at 12:40 pm
#33 Ka gprs a chak lo deuh a nizan leh tukin ka online thei lo a. Ni e, post ka hmuh veleh khan hriatchian tumin kan khaw upa pakhat chu pen leh lehkhapuan nen ka pan a, vanduai thlaktakin alo awm lo hlauh mai a. Ka hriat duh ang pawh ka hre thei ta lo.

Report this comment
57
lushai_er Says:
March 14th, 2011 at 5:44 pm
#38, ku_shai : “Sulrul = moth” hi pawm harsa ka va ti ve !

moth chu lungphur tiin ka lo hre thin zawk a.

Pu Buanga Dictionary ka keu a :
“sûl-rûl, n. anything which infests and eats root-crops, or the roots of plants, such as wire-worms, white ants, grubs, etc.” tiin a lo inziak a. Hei a link aw……

https://dsal.uchicago.edu/cgi-b.....ain.304676

@Hlatekhua : Ril vang ni lo e….Zu hmunah upa ho bulah hian ka tal tam ve hrep a, funny-a te ho hi misual kal tlang hian ka’n share ve duh a nia!

Report this comment
58
lushai_er Says:
March 14th, 2011 at 5:47 pm
@mawia pachuau : I beidawng mai dawn em ni? I rawn zawt chhuak hram ang chu maw le !

Report this comment