mi(sual).com

Zing ni chhuak eng mawi tak, a mawina zawng zawng nena thlang kawla a liam thin ang hian he kan hringnun zinkawng pawh hi a la tawp dawn a, chumi hun kan thlen hma ngeia kan lunglenna kan sawi chhuak thei hi a va hlu tak em!

Sik leh sa inthlak danglam zel chuan keini pawh min thlak ve zel a, thlasik khaw nuam tak kan hman zawh hnuin nipui khawlum chuan min rawn nangching leh ta. He hun hi hrehawm tiin ning thin hle mahila, kan tana Khuanu ruat a ni tih kan hre reng thin dawn nia. Tu emawin thiam taka a rawn ziak hun ka lo nghak reng thin a, tunah a lum huam huam tawh si. Ziak tum an awm awma ka hriat loh avangin ka rawn ziak ve ta mai a ni e.

A her liai e thangvanzawlah
Chung mu vanlai pawn a khuh zo lo kan Turni
Sirva leng ten par an chhuang e, sang thinglerah
Tuangtuah par leh Tuahpui par ten an mawi an lo chhuah a
Kawldai leh tlangsam par ten hnah an hneh nem nen
An mawi e kan kan Turnipui chu

April thla chauh kan la thleng a, khua a lum leh ta hle mai, kan hlawhfa rawihho pawhin anmahni pisaah theuh, thlan tla phungin an hna an thawk ang a, chutin kan sumdawngmite pawhin an ti ve ang. Zirlai tam tak, phai lama lehkha zir chuan hrehawm tih avangin an ngawih bopui ang a, Zawlkhawpui pawh a ngui ruai hian ka ring bang lo. Hetiang hunah hi chuan mahni ina awm a, thli lem hmanga inchhem ngawt mai hi a ninawm thei em em a, hmun dang kalna tur a awm mai loh thin avangin kan ti lo thei si lo. Tun tum chu kan feh ang a, Khuanun a duan kan Zoram mawina hi ka han hmuh ang che u aw.

Tuna kan awmna hi kan khaw kawtchhuah a ni a, kan kim tawh chuan kan kal mai thei angVawiin chu ni sa hle mahse ka mi(sual)pui in nih miau avang leh ka lawmte in nih miau avangin ka thu in awi viau a ngai ang. Nula te khan in hmaiah khan eng eng emaw hnawih u la, chuti lo chuan in mawi lo palh ang e. Tumah chawfun theih nghilh in awm lo maw? A tha e. Iptepui in ah loh pawhin chem tal chu in ken vek ka ring a, mahse hrui zam leh thing hnawk reng reng pawh kha dimdawi hle ang che u. Khuanun mawi taka a duan, duat taka a enkawl an nih kha

. He lai hmun hi Forest Reserved chhung a ni a, thingbuk hlima kal chu a hahdam a sin, chu inhria em? Zothlifimin mau hnah leh thing hnah a chhem rik seng seng chu, hmanlai chuan heng lai hmunah hi chuan ramsate pawh an awm ve thin a, hei tunah chuan sava hram ri chiah in hriat tawh chu, mahse an la mawi reng tho ti rawh u?

Hmanhmawh lovin kan kal zel ang a, tlangvalte khan kan nulate kha han chhawmdawl zel ula, in infiam, in nui ri har har hriat ringawt pawh hi keini kum lama upa deuh tan chuan a nuam ve mai mai a nia. Saw lai tlang saw in hmu em? Lawma pa zau a nih saw, sawng lai kan neih kum chu kan la tlangval ve lai a ni a, kan inchhai ve nasa a sin. Mahse chu lam chu ka sawipui lo ang che u. Saw, tlang kara kawrte saw, Sakhi sih awmna a nih saw, a tui saw a hik danglam em em a, sakhi hian an tlan thin a, mahse kan ramvachal ve lai khan kan that mang zo tawh a, a pawi ngawt mai.

Khu lai kawi kan pelh chuan kan lo chu a hmuh theih tawh ang. Muang changin i pan zel ang aw. Pu HV-a te, Vaiva te kha in chau tawh em? Chau bik lovang ti rawh u, kan nula Aduhi te, Rempy te pawh an la chauh loh hi.

Aw, sawi lai saw kan lo chu a nih saw, a lu ber saw Pu Muanteate lo a nia, a sir lama mi Sangpuipate lo, a mawng lam lui hnaih ber saw kan lo chu a ni a, he lui tui hi hikin chakawm viau mahse tumah tuiah chen loh tur aw, tui thiam a bar in awm si lo.

Vawiin chu a nuam dawn hle mai, kan nu hruai ve a chakawm tehlul nen kan inthen lai a ni hlauh mai a, a chan nasa ve ngawt mai. Kal zel ila, khang sakawr ek te kha in hmu lo ang e. Caribou, hawi vak vak suh aw, kha Keimah Thingtlangpa kha, i chem kha vilik vuai vuai lo teh, mit men i tinuam lo.

Hei kan thleng ta reng mai, buh parte kha mawi inti em? Mi(sual)-a dah tura thla in lak duh chuan ka phal a nia. Aduh, thlai kha dim deuh ta che le. Hawp khawp ka thar loh chuan tlang sawi nih ka hlau ve tho a nia, fanghmate kha ei ula, in dai sawng sawng mai ang. Kha, kawmchar lama zamzo leh chuailopar te kha in hmu maw? Ramhuai hlauh a kan phun a nih kha.

Aw, Digimalt, engatinge kha mai kha i lo sah, a chi a tana ka dah that a nih kha! Thlam kawngka kha nawr hawng u la, han lut teh u, rap chunga balhlate kha in tan liau liau a Pu Chawnghilha rama ka tuh a nih kha, aw..sazu in min lo chuh pui leh tawh a ni maw.

Namthlak kha hawng u la, thlifim inchhem daih tir i la kan bung tan mawi dawn nia, kan nulate khan eirawng lo bawl se, Tluanga leh Mamuantea_U khan kawra tui zuk chawi se, mahse sanghate kha zuk man suh u aw, an mawi a nia, Chhana, nangpawh eirawngbawl lamah aw. Pu HV, keini chu i bung tan tawh mai ang u. Nula zingah lo kal ve duh in awm chuan in rawn kal ve ang. Hlo thlawh pawh a kal duak duak phah mahna.

A mawng lam atang khuan kan bung tan ang a, vawiin chu kan vawi khatna a ni bawk a, hma takah kan haw dawn nia. Kan tlangvalte chu in chak buan buan hle mai maw, vanglai min ti hrechhuak rum rum mai. Kan vanglai chuan kan duhtakte nen kan han inlawm a, hna hi a kal duak duak mai thin, hlimna hi kan ta a ni bik hliah hliah thin. Kha, helai danfawh hi ei rawh u, sawi kher ngai lovin in duh duh kha in ei thei a nia. Roseparvuli chu a va fel ve, khawi luite tui hik chu kan lo khiat khelh khelh ang e, dang a hnawn hle mai a. Kha in ve rawh u.

Chawchhun fak hun a lo ni reng tawh mai, vawiin chu a nuam bawk a ni ang, a kal duak duak mai. Thlamah chho i la, chaw kan fak tawh dawn nia. Zero kha, changel hnah chaw fakna tur zuk la lawk mai rawh aw, changel hnah ngeia ei te hi a tui danglam riau a sin. Pu HV, i faifuk thiam em?

Namthlaka thu chungin thlifim i ko mai dawn em ni? Aw, i la thiam hle mai, hetiang chhun nisat lai a thlifim hi chu a hlu bik asin. Ti khan chaw kan fak zawhah, kan vaiin kan bung leh ang a, tlailamah luiah kan inbual ang a, kan haw mai dawn nia.

Nuam inti viauin ka hria, kum tawp lamah chul ram kan la fang ho leh dawn nia.

Similar Posts:

• Turnipui lenkawl
• Khampat-ah Khampat Bung
• Favang/Fall Season
• Theihchang se
• Sikni Eng

Recent Posts:

• Thlarau Mak Tak
• Hostel Rules
• Kolasib ah Photographic Workshop
• A kin ta – Part 1 (Good Friday Pual)
• Krista Thihna leh a hlutna.(Good Friday pual)

This entry was posted on Tuesday, April 26th, 2011 at 6:00 pm and is filed under Nature. You can follow any responses to this entry through the RSS 2.0 feed. You can leave a response, or trackback from your own site.