mi(sual).com

Ka mawng mawlh mai kha :

Khawihli nge panchhe pangngai tih pawh hriat hran loh. A zun ni ve awm tak a hnaiin nikhat dana a rawn thoh kawh luah thin, a rawn thoh apianga hnai ngei ngei ziah. A in mun chhung pawh kar thum (3) lai a ni tawh a, mahse a dam chuanglo. Dam lam aiin zual lam a pan zel a.

Nawmsip bawl nan ka thutna, ka mawng dinglam ngei mai chu a rawn hmang a, a neitu chan mi chantir te te a, a duh angin ka mawng chu a rawn rawk leh si a ni ber. Ka ta a ni a, ata ka lo ni der mai! Tih vak ngaihna a awm lova, ‘Zo mawnghlui an sawi zawng zawngah chuan ka mawng hi a hlui ber awm e!!’ tih a ni ringawt. Silchar bazar lun laia biri pet kawh chung leh puan veng chunga vaipa nghathu zuar mawng pawh ka tan chuan rangkachak aiin a thlanawm fe tawh zawk.

Thlamuantu duhawm chu :

Zan mut nana kan hman thin khum hi a awitlei thintute chu nau ni la vui zo lo leh pitar putar emaw ka tih thin kha, Mat vuaka Tuichang dap an sawi chu nepte a ni ringawt. A thlawhbo hlau ni awm hrima delhbet tlat thintu leh, a ngaihzawng, a bialnu duhlai ni awm hrim a, nghenga si reng thintu chu kei, keimah ngei ka lo ni reng mai.

Class-X kan zir laia kan headmaster-in a sawi, “Ka tin hmawr leh ka taksa chhung zawng zawnga natna hrik awm hi rawn vak chho vekin ka lu ah hian an bawrkhawm a ni ang” tia a lu nat zia a sawi ang kha, ka taksa ah hian rawn irhchhuak ve ni awm hrimin, ka ngaihtuahna leh suangtuahna bawm ber chu dawn lem nei hlei theilo hian a siam ziah lehnghal a.

Thisen min laksak tunu thisen lak result lah chu, tunlaia pawl hrang hrang-in an do leh awareness campaign an neih tlut tlut phah, AIDS natna ang thova do ngai leh kan ram rawn runtu dik tak zawka ka ngaih Malaria natna hrik chuan ka taksa leh thisen zungzamah bu alo khuar ngei chu lo niin.

Africa hnam mawl zinga piang leh seilian chu ni ila, ka chhungte leh thenrual thate pawn min ning tawh ngei anga, an sa pelna fei kibar zum tak mai chu ka thinlung zingmup maiah chuan an chuktuah tawh ngei ang le. Mahse a nilo, Hmangaihtu ka la nei.

Pastor leh evangelist tellovin :

Nufa maia awm kan ni a, hmuntin hmun tanga pathian rawngbawl leh tawngtaia teichhuak thin kan nilo. Mahse, khami zana kan nufa-a hriattham mang loh a, kan rin pathian kan auhna kha chuan pastor leh evangelist-te auhna aiin a hawl hniam biklo tih leh mitin tan belhtlak a nih zia chawp leh chilhin a rawn lantir nghal a.

Zan dar 8:30 a ri a, kan in leh a vel chu a reh ruih mai a. Sona chek ri leh mahni lungphu ri pawh muthilh har phah na khawp a reh a ni. Ka na nei ngaihtuahna buai vakvel chuan tuifinriat laili-a lawngleng tetakte chunga chuang ang mai te hian ka inhria a.

Ka khawsik chu a sang chho zel a, ka mawng lah chu nep lam aiin zuallam a pan chho zel si. Lazara ang ema bawm khah chu nilo mah ila, Hmun khat chauha ka neih pan chhia (Khawihli) chu ka voh tuk tawh mai a.

Chulai tak chuan kan in atanga hla vak  lovah hian ri dangdai tak, darthlalang vuak keh ri leh thinrim aurawl hi a ri ta tlat. Tunhnu-a ka ngaihtuah let leh hian kha mi hunlaia ka thinlung thlabarna khan Indopui pahnihna a Japan khawpui Hiroshima leh Nagasaki mipui, atom bomb tuartute manganna leh thlabarna kha a tawmpui ngeiin ka hria.

Mahse, mak tak a ni, chunglam en theihna mit min pe tu, ngaihtuahna leh innghahna min pe tu, auh theihna aw min petu chuan keini nufa damlo inthutpui, thinrim au rawl leh darthlalang vuak keh thawm avanga khum kila lo kimki chawih chawih leh khur zawih zawih chu, Buaina siamtute tawngtai sak tuah chuan min rawn hmang ta zawk a nih chu. A va’n ropui tak em.

A rawl ring ringah mawle :

Ni e, mi ka an lohna lam chu tu te emaw thlarau thianghlim pawlna chang inti ang deuha hirha chhuahpui ka tum lemlo. Amaherawhchu, pa ka neih tawhloh avanga ka chan tur ka chan zawng zawng chu ka dawnlet lo theilo. Ka chan tur zawng zawng ka chanloh erawh chan ngei tumin keimah leh keimah ka infuih thin.  Mahse, ka neih takloh leh ka chan tak ka pa kha engang mi nge a  nih tih ka ngaihtuah chang hi chuan ka ngaih a zual a, “ka pa kha chu la dam sela chuan aw…” tiin ka ngaihtuah thin.

Kawlthei kunga inuisalehlin leh a letlinga inkhai kan chin hunlaia a nep ber ka ni thin chung pawh a, thiante zinga mawng pawhruah chung leh chawtlang keng chunga, ‘Thereng aw mawngtawlh mawngtawlh…..’ tia a rawl ring ber bera ka tan ngam na chhan kha… eng dang a nilo, mi fa ten an neih ang, PA ka neih vang a lo ni.

Dawn zawng a tawi thin ngei e :

Bumna rah  ka ei man tel seng lova ka zawr hnuang tum pawh a, thenmawn khawvengte ka chunga an rilru put dan (ka thiante pa nei te nen) thliarhran a awlzia te leh, ka hma ngaitu tak tak an hriat thin ziate hian ka neihloh leh ka chan tak ka pa min hriattir leh thin. Nghate hrut vanglai hun kan han pelchho a,mahni ta bilin ball pet tur neizo ve heklo le, ser rah zawng zawngah sermam rah pet a nawm thu chu sawi kher ngai lovin, school-a nitin break laia intihhlim nana kan pai thin chu a ni a. Hmeichhe thenkhat te’n, “A tha reuh e” tia min han fiam vel pawh khan kan tlanchhe daih zel kha a ni a.

Kan zahzum vang pawh chu lo ni the reng se, a nihna takah chuan a awmzia kan la man thlawt lo. Mahse, nun khawharna awm miahlo leh naupang inkhawm leh sunday school kalloh chu  sawiloh, tih ngei ngei tura kan ngaih tlatna  chhante, nu leh pa pawisa ip a ruah thak pawha papawr leina kan ngen tlat thinte kha.. Kan lungkham neihloh chhan kha maw… Sum lam a nilo, retheih leh hausak lam pawh a nilo, nu leh pa kan neihna khan min tithlamuang a lo ni.

Kan thianpa pakhat tho-a (thosualin) in zan dar 10:00 velah a thianpa zing tlan tura a sawm ka ngaihtuah let leh changte hian, khang hun laia khan lungkham leh rilru kap tu kan ngahloh zia min hriatchhuah tir leh thin.

Ka tihloh tur leh ka chhar thar :

Tunah erawh ka neih tak loh leh ka chan tak, ka pa avang hian… mite khawvel chen ang hian chen vet a zel ila, mi pawi ka sawi hma bik anga, mite’n ka chungah mit an leh hma bik ang. Thenrual awmkhawmnaah ka tihsual palh pawh an vawlian anga, a nilo thleng thlengin an sawibelh chiam ang. Chung zawng zawng thlen tu leh lo la thlen leh zel tura ka ngaih leh min kap tu awmchhun ‘Pa neilo’ ka nihna chuan min hmuhchhuah tir ‘chatuan pa’ chu.

‘Kei anga PA nei tawhlo leh nu leh PA hlutna hre chin Misual zawng zawng tan ka hlan e.’

Similar Posts:

• Mawng chhuichianna
• Thanksgiving heroes
• Tunge hlauhawm zawk?
• Fiamthu (in refresh nan)
• Kohhran leh politics

Recent Posts:

• PÂWL LAL HRAWTNA AIZÂWL???
• MIZO HNAM SAKHAW DIK PHOCHHUAHNA- IVby. Rorelliana
• Hriat chian lehzual
• Sunglass man to chhan!
• Tawng tih hausak a pawimawh!

This entry was posted on Friday, May 27th, 2011 at 11:27 am and is filed under Advice, Luangliam. You can follow any responses to this entry through the RSS 2.0 feed. You can leave a response, or trackback from your own site.