mi(sual).com

‘Isua lo kal leh a hnai ta, van chhûm chunga chuangin a lo kal mai dâwn. Mi sualte hlauin an khûr ang…’ tia thusawi lauh lauh, harh riai ruaia ka hriat chu Hmunhmêltha khuaa kan thuhriat upa ber a ni mai awm e…

Kum 1923 thlasik lai a ni a, kan vûr dawh en ka châk avangin ka thangharh hma pawh a ni thei e. Tlai lamah mau phel te, tumbu kâwr te tuikhur ruamah kan keng a, tui kan chhûng a. Khawvâwtin a lo hmet khal a, chu chu vûr tla kan ti mai a ni. Mawngtam khuh chi chi tualkawr kan nei a, a bân ding lam chu hnap hrûk nân kan hmang mai thin a, a khâk khawng tlar thin. Chu chauh chu kan kawr neih a ni a, mau phela vûr chu kan pawm haw a, tumbu kâwra mi chu noah kan dah khâwm a, tapchhakah khûr hlawk hlawk chungin mei lum kan ai a, vûr tlang chu kan khel thin…

…‘Khasi ramah leilet zir turin Bawrhsapin min tîr a, ka lo haw chu bâwng hal khat min pe a, leilet ka siam tan ta a ni’ a ti. Khasi khuan lei hi tlang lian tak takin an chêk khawk a, an let thawk thin, chuvang chuan keini pawhin ‘leilet’ kan ti ta a ni awm e. Leilet neiho chuan bâwngin lei kan ‘rit’ kan ti a, bâwng nei loin bâwngtuthlawhin kan ‘chêk’ kan ti a. Leilet nei ve loho chuan ‘Kan rît, kan chêk’ kan tih hi ‘leilet’ min tihsak ta vek mai zawng a nih hi.

(more…)