mi(sual).com

Lehkhabu rawn :  Sub. Pakunga Chanchin by P.S.Chawngthu [L]

Sub. Pakunga chanchin kan sawi nual tawh a, a sipai ban hnu a Lal a nih dan te, a khua leh tui a ngaihsak zia kan sawi nual tawh a. Zoram Upa Pawl (ZUP) lo din tan nan a a sulsutu a nihna hi han sawi kai leh lawk teh ang.

Lal ban anih tak hnu khan Sub. Pakunga lal ram chu Village Council paruk [6] ah then darh a ni a, chungte chu Hriphaw, Borai, Momcherra, Kanhmun, Lushaicherra leh Kolalian Village Council-te hi an ni. Hriphaw V/C hotute’n Dt. 4.3.1964 a an thil ziak hi lo ngaithla lawk ila.

“………Kan lal hian tarte hi a khawngaih em em thin a, kum tinin hlimna ni a siamsak thin a. Hlimna ni ah chuan upa kum 50 chin chunglam an tel kim vek thin a. Pathian hnena lawmthute an sawi bakah an vanglai hunte sawiin an inkawm khawm a, thingpuite in a ar sawhchiarte ei hovin an hlim em em thin a ni. Kum 1954-55 a lalte ban an lo nih tak avangin Pu Pakunga hian 1958-ah khan Aizawl lamah min chhoh san ta a. Min kalsan hnu pawh hian upa inkhawm chu neih zui zel a niin an ti ropui tawlh tawlh a.

An inkhawm apiangin Pu Pakunga hming hi an lam hmasa ziah thin a ni. A ni pawhin a han awm takna Aizawlah chuan Hriphaw khua-a a tih ang bawkin upate inkawm khawmna a neih pui zel a. Aizawl upate chuan lo tuipuiin an ngaihtuahnate pawh a lo changkang a, tichuan, Pu Pakunga hian Zoram upa pawl hi a rawn din  chhuahpui ta a ni.” tiin.

Tun hma lam chuan Mizo khawsak leh nun innghahna bulpui ber chu thlawhhma a ni a. Miin rim taka ram hna thawk chunga kum 40 te an kai chuan an tha a lo thum tawh a, thawh theih leh tih theih nei ve tawh lova in ngaiin hnawksak mai nia in hriatnate an nei a. Chuti chung chuan kan la tih ve theih tawk tiin tar lam kawng kham leh khup vawt tawh chungin nau awmte an la chuh ve hram hram a. Chungte lah chu an rilru leh an dinhmun ngaihtuahpui ai chuan ‘Tar hi chu an naupang tha leh e’ tihsakah kan duhtawk mai a. An tangkai theihna tur kan la ngaihtuahpui thiam loh avangin kan ‘rula raw neih‘ ngawt tawh mai thin a ni.

Pu Pakunga hian an vanglaia pa fing, nu fing chhuangkua leh khawtlang tana mi tangkai lo ni thinte dinhmun lainatawm tak a hmuhin a lungkham hle a. A ngaituah dan lar zualte chu :

1. Hnuchhawn leh thlauhthlaka awm ainkiltawih taka nung tawhte tan Tar Chawmna (Old age pension) leh Tar Enkawlna (Old age home) neihsak ve theih dan.
2. Upa-ho fin leh varna chu mual an liam hmaa thangtharte tana hman tangkai dan a ngaihtuah a ni.
3. Thangtharte an inrem lohna leh Sawrkar an kalpui dan dik lo laiah aia upate zah thiam leh an thu ngaichang thin kan nih avangin zilhna thurawnte pe turin upate chu a ngai a.

Mission Veng upate chauh an inkawm khawm ta lo, Pu Pakunga thiante veng dang atangin an rawn tawiawm vet a zel a. Aizawl chhim lam atangin Brig. Sapliana (SA), Pu Vaia, Ex-Chief, Sub. Bawngtea, Pu S.Lianbuka, Pu Dengthuam (Zolawra pa); Aizawl chhuah lam atangin Pu Chhuanvawra, Ex Chief, Pu Suakpuilala, Ex-Chief, Sub.Lianruma; Aizawl hmar atangin Hon. Capt. Samsher Gurung (!), Pu P.S.Dahrawka, Pu Kaichhunga, Pu Zawngauva, Pu K.Buana, Pu Chhunga Ex-Compounder: Aizawl tlak lam atangin Sub. Thangruala, Sub. Ujir Singh Thapa, Hav. Hrangchhuma, Pu Khawdina(Maubawk), Jem. Babudhan(Srimantilla) te ho an ni hlawm.

Anmahni hip khawm thintu Pu Pakunga chuan kum 1960-ah khan upa kum 60 chin chunglam inkhawm Aizawl Theatre Hall-ah (Vanapa Hall) a ko ta a. Chu inkhawmna-ah chuan thangthar, hranghlui la rawn chang chho turte tana pawl pawimawh tak mai tur chu an din ta a ni. A hming atan pawh Vaite (Gorkhali) nena dinho an nih avangin ZORAM UPA PAWL (ZUP) an sa a.

Chuta kalkhawmte chuan an pawl kaihruai tur chuan sawrkar dawr dan hre ber tura ngaih Pu R.Buchhawna, Ex ADC chu tlawmngaih chhuah tura sawm nise an ti a. A bul atanga an mahni lo kilkawi thintu Pu Pakunga chu General Secretary-ah an dah a. Pu P.S.Dahrawk leh Pu S.Lianbuka te chu Vice President leh Treasurer-ah an dah nghal bawk a. Pu Buchhawna pawhin tlawmngaih chhuah tura an ngenna chu a lo pawmsak ve ta bawk a.

He pawl lo ding chhuak tan tir chu ding ve awm pawha mite rin ngai loh ‘Upa Pawl’ a nih avangin thalai pawlte angina a lar chho ve nghal mai lova. A hlutna leh a pawimawhna mipuiin an la hriat loh avangin a bul tumtu Pu Pakunga chuan thalaite chu, “Pathian zara dam taka in awm chuan he pawla lo la tel ve vek tur hi in ni a, in tan he pawl hi kan lo din a ni,” tiin a hrilh thin a.

Zawi zawiin kal an siam chho zel a, hmalak awlsam zawk nan pawl lo ding tawhte tih angin unit-te khaw hrang hrangah an din chho ve a. Sawrkar pawhin lo hlutsakin pawmpuina a nei thuai a. Kal an siam chhoh ve bek bek lai chuan  kum 1966 Mizoram buai khan rawn tlakbuakin harsatna namen lo Mizoramin a tawk ta a. Ram a buai vanga hmun him lam pana insingsakte a lo ngaih tak avangin Zoram Upa Pawl (ZUP) hian President leh Gen. Secy. Siam thatna an nei a.  President-ah Pu Pakunga, Gen Secy-ah Brig. Sapliana (SA) an dah ta bawk a. Rambuai runpui lai khan anni pahnih hi an pawl hnarkaiah an tang a. Ram buaina-a  remna siam tur pawhin huaisen takin tan an la ve a. Mahse lo inrawlh buai ve lo tura an tih tak avangin , an zai an ngai ta a ni.

Kum 1969 Krismas dawn khan Assam CM, Pu MM Choudhury Aizawla a lo zin khan ZUP president , Pu Pakunga chuan lo kawmin an lungkham Tar Chawmna chungchang a lo sawipui a, CM chuan, “In thil dil hi tih chakawm tak a ni a. Mahse Mizo Dist. Chhunga mite kan tihsak che u chuan Dist. Dangte’n an thik ve che u anga, Assam sawrkawr dinhmun hian a la tlin rih lo a ni. Nakin, dinhmun sang zawka in din hunah in ram hruaitute’n an la tihsak thei ang che u,” tiin a lo chhang a.

UT-a hlankai kan nih veleh  khan Pu Pakunga chuan Chief Commissioner, Pu A.J. Das chu hmuin a sawipui ve leh a. Ani chuan scheme fel tak siama a hnena theh lut turin a lo tit a a. A tih ang chuan an theh lut thuai a. A ni chuan tar chawmtu nei lote fel taka an enfiah hnuah thla khata Rs. 30.00 theuh pek phawta, a hnu-ah Five Year plan scheme-a la ruahman chhoh zel turin a lo tita a ni.

Kum 1992-ah ‘Zoram Upa Pawl’ hi ‘Mizoram Upa pawl’ tiin a hming an thlak ta niin ka hria. Kum 50 chin chung lam tupawh Mizoram mi leh sa chu a zo a vaiin sakhua thlei bik pawh a awm lo, a duh apiang tan a zawm theih reng a ni. Kei phei chuan an monthly magazine ‘MUP Tlangau’ hi a chhuah hlan ka nghakhlel thei khawp mai, hmanlai chanchin ka lak ve na ber pakhat a ni bawk. Lunglei lama MUP ve tho (Mizo Upa Pawl) nen hian hriatpawlh a awl ang reng a, mahse an inzawm lo tih hriat a tha! Saiha, Lawngtlai MUP saw chu Mizoram Upa Pawl nen an inzawm. Misual.com tlawh thinte pawh hi kan lo upat ve hunah chuan MUP member nih theuh kan tum dawn nia. 

Similar Posts:

• Sub. Pakunga, Mizo lal huaisen.
• Two wheeler taxi buaipui mêk
• Orissa for Christ-in an Budget khum
• Bawrhsap MacDonald leh Sub.Pakunga Khawthlang Zin Chanchin !
• Pawl leh Thuneihna

Recent Posts:

• PÂWL LAL HRAWTNA AIZÂWL???
• MIZO HNAM SAKHAW DIK PHOCHHUAHNA- IVby. Rorelliana
• Hriat chian lehzual
• Sunglass man to chhan!
• Tawng tih hausak a pawimawh!

This entry was posted on Sunday, May 15th, 2011 at 11:05 pm and is filed under Mizo Society & Culture. You can follow any responses to this entry through the RSS 2.0 feed. You can leave a response, or trackback from your own site.