mi(sual).com

1st. Saturday: Mizorama thingpui chingtu pawl, All Mizoram Small Tea Growers Association chuan New Delhi-a tlawmngai pawl pakhat, Centre for Education and Communication nen thingpui chin chungchanga an harsatnate an sawiho. He inkawm khawmnaah hian Baktawng, Biate, Bungthuam, Khawzawl leh Saiphai-a thingpui chingtute an tel. Inkhawm hi All Mizoram Small Tea Growers Association Chairman, H. Rohmingthanga’n a kaihruai a, Indian Small Tea Growers Association leh State Level Tea Growers Association te inkara inkungkaihna ṭha tak neih a ṭul thu te a sawiho a ni.

2nd. Sunday: Sorkar thil pawimawh thawka Kolkata a cham mek, Chief Minister Pu Lal Thanhawla chuan Union Finance Minister Pu Pranab Mukherjee chu a chenna inah hmuin minute 40 chhung vel an inkawm. Chief Minister chuan Mizoram sorkarin a hnathawkte hlawh 6th Central Pay anga pek an nih avang leh accumulated non plan committed liability avanga sum lama harsatna belhchhah a thlen avangin a sutkian dan tur ruahman sak turin a ngen a. 13th Finance Commission a Mizoram sorkar assessmenta non-plan indaih lohna gap awm pawh a phuhruk dan dap pui turin a thlen bawk. Hengte bakah hian Pu Lal Thanhawla chuan Pu Pranab Mukherjee hnenah Union Finance Ministry in an lo hnawl sak tawh thin, Special Plan Assistant chu Mizoram sorkar pe tura a ngenna chu Finance Minister hian pek a tum thuin a lo chhang a ni.

3rd. Monday: Mat lui ruama leilet neitute chuan a huhoin, Agriculture Minister, H Liansailova hoin Agriculture Rest House, Zawlpui-ah lo an zo a, hun hlimawm tak an hmang. Mat ruama Zawlpui pháiah hian chhungkaw 134-in ram hectare 115.9-ah SRI buh an chíng a, chhungkaw 31-in Improved Method-in ram hectare 17.7-ah an ching bawk a; Zawlpui phaia buh an chinna hmun zau zawng hi hectare 133.6 a ni.

4th. Tuesday: September 30 zinga Sairang Kurung luia hmeichhe bawp chhar chu mitthi vui dan pangngaiin bialtu pastor, Rev. T Lalthantluanga’n Sairang Dinthar YMA Hall-ah a vui. Hmeichhe bawp vui¬naah hian YMA aiawhin Central YMA President, Lal Chungnunga’n thu a sawi a; MHIP Gen.Hqrs Vice President, Ngurmawii Sailo, Aizawl North SDPO, Lalthangpuii Pulamte, Sairang Dinthar VCP, Zahmingliana, Sairang Sihhmui YMA Vice President, Vanlalsawma leh Sairang Branch YMA President, Teresa Rothangpuii ten thu an sawi bawk. Mihring bawp vui lai hian Sairanga eizawnna dâwr zawng zawng leh sikulte khar a ni a; Sairang Dinthar YMA chuan, râwng taka inthahna leh mihring taksa chan darha paih chu an dem thu an tarlang bawk.

5th. Wesnesday: Maubawk Veng Kumpuan duty-te’n dap an tum avanga tlanchhia, Lawmzuala (37) s/o Chalchhunga, Maubawk chu step-ah a lum a, a hmunah a thi. Lawmzuala hi ruihhlo ti ṭhin leh zuar ṭhina sawi a ni. Kumpuan duty hotute sawi danin, Maubawka kumpuan duty-te hian Lawmzuala hi kawnga a kal laiin polythene duma awm an zâwt a, Lawmzuala chu a tlanchhe nghal a, a tlânchhiatna lamah inbilh palhin step-ah a lum; a thi ta a ni. He thihna chungchangah hian thubuai siam a ni lo a, a chhungte pawhin FIR an thehlut lo a, post-mortem pawh tih loh a ni.

6th. Thursday: Mizoram Synod hnuaia inkhawmpui lian ber dawttu, Presbytery Inkhawmpui chu Zoram hmun hrang hrang leh state pawna Mizoram Synod huam chinahte neih an nia; he inkhawmpui hian Pathianni zan lo awm tur thleng a awh ang. He hun hmanpui tur hian Synod puipate pawh hmun hrang hrangah an insem darh a ni.

7th. Friday: Home Minister, R Lalzirliana chuan Hmuifanga Mizoram Police Radio Organisation (MPRO) hmun thar a tlawh a, SP, Lallianthanga leh a thawhpuite’n an lo dawngsawng. Hmuifanga MPRO office-ah hian awlsam taka thil inhrilh tawnna tur, Computer Data Communication leh Radio Repeater Station-te dah a ni a; Computer Data Communication hi amaha network hmang niin, station dang innghahna a nei lo a, khawl a that chhung chuan hmun dang biak pawh theih rengna a nih avangin, chhiatrupna leh rîkrum thilah a tangkai hle beisei a ni.

8th. Saturday: UPC ṭhalai, Kolasib khawpui chhunga branch hrang hrangte chuan Kolasib damdawi-inah thisen unit 32 an pe a, a petute hi mipa 17 leh hmeichhia 15 an ni.

9th. Sunday: Silchar lam pana tlân 407 truck, MZ-05 4589 chuan Bualpuiah kawng sira kêa kal, Lallungmuana (52), Bualpui a chíl hlum. Lallungmuana hi truck-in a chil hnuah Kolasib panpui nghal a ni a, mahse, Kolasib damdawi-in thlenpui a nih hmain a thi a ni.

10th. Monday: Agriculture department-in thiamna hmanga buh thar hlawk zawk dan an kalpui mek, System of Rices Intensification (SRI) hmanga Kaphliri, Bungkawn Veng Aizawl ram, Dihmunzawla buh tharte chu Parliamentary Secretary (Agriculture) KS Thanga hoin an seng a; buh hi a hlâwk dawn hle niin mithiamte chuan an sawi. He ramah hian Agriculture department-in buh chi khat, Hybrid Rice (KRH-II) an tih chu kumin June 8 khan kûi tiakin, June 20 khan an phun a, tunah hian seng theihin a hmin vek tawh a ni.

11th. Tuesday: India ram mai ni lo, khawvel huap pawha hlawhtling taka lung zai (stent angioplasty) upa bera ngaih, VL Bela, Tuikual chu kum 94 mi a nih laia a lung an zai hnuah, a kum 101-na an lawmsak a, a a kum 101-na lawmna hi amah zaitu, Dr Tarun Praharaj, BM Birla Heart Research Centrem, Kolkata pawhin a telpui. VL Bela hi kum 2005 khan, kum 94 mi a nih laiin BM Birla Heart Research Centre-ah hian hlawhtling taka zai a ni a; zai a nih dawn hian, zaipui hmachhawn tur chuan a upa tawh lutuka ngaih a nih rualin, zai a nih loh chuan heart attack na tak a tuar ngei dawn bawk si a, a chhungte nen an inràwn hnuah, Dr Praharaj chuan a zai ta a ni.

12th. Wednesday: Mizoram Excise & Narcotics Department-a Anti-Narcotic Squad-te chuan Bawngkawnah Opium Kg 2 leh a chanve an man a. A neitu nia hriat, Thenkholen s/o Tamngam, M.Saheiphai khua, Churachandpur District, Manipur chu an man nghal. Opium hi Everyday packet 3-ah dah a niin, Manipur aṭanga hrahna tur zawnga rawn kenluh a ni. Thenkholen hi NDPS Act 1985 hmanga thubuai siamsak a ni.

13th. Thursday: Regional Institute of Paramedical & Nursing Sciences (RIPANS) chuan Graduation & Lamp Lighting Ceremony an hmang a, Mizoram sorkara Health Secretary, M Zohmingthangi’n a hmanpui. Health Secretary hian zirlai ti ṭha zualte hnenah Proficience Award a hlan a; RIPANS Director-in an zirlai pass chhuakte hnenah certificate a hlan thung. RIPANS Graduation-ah hian B.Sc (Nursing) zir zo mi 26, Optometry zir zo mi 16, Radio Imaging & Cardiac Instrumentation Technology zir zo mi 25, B.Pharm zir zo mi 26 leh Medical Laboratory Technology zir zo mi 20-te thlah an ni. Inkhawmah hian kumin atanga B.Sc (Nursing) zir turte tan Lamp Lighting Ceremony hman nghal a ni a; Florence Nightingale Award lo dawng tawh, K Thansiami, Asst. Nusing Superintendent (Rtd) kaihhruainain zirlai tharte’n thu an tiam a ni.

14th. Friday: MHIP chuan Synod Conference Centre-ah Coordination Committee an hmang a, he hunah hian General Secretary aṭanga an bântir, Lalbiakengi chu a tel ve a, President, B Sangkhumi nen inhma-chhawnin an inhnial. MHIP Coordination Committee-ah Gen.Hqrs. hruaitute, Aizawl khawpui branch tin aiawh, sub-hqrs aiawh, block aiawh leh joint MHIP aiawhte an tel a; meeting neih laiin Lalbiakengi pawh a lut ve a, stage-ah láwnin thu sawi ve a duh thu a sawi a, meeting kaihruaitu, MHIP President B Sangkhumi’n a phalsak lo a ni. Stage-ah hian Lalbiakengi leh B Sangkhumi te chu an inhnial a. B Sangkhumi’n Lalbiakengi chu hruaitu aṭanga an bân tawh a nih thu sawiin, eng aiawha tel nge a nih leh sawmna a hmuh leh hmuh loh a zawt a; Lalbiakengi chuan, Gen. Secretary aṭanga bàntirna chu Court-in a ‘stay’ avangin, Gen. Secretary a la nih reng thu leh, Gen. Secretary a nih anga tel a nih thu a sawi a ni.

15th. Saturday: Norway company, Fiber Strength chairman, Arne E Svinningenin chuan Chief Minister Lal Thanhawla a kâwm a, Mizorama rua leh mau hman tangkai theih dan tur a sawipui. Arne E Svinningenin chuan, rua leh mau aṭanga siam, oriented straw board chu hmanna tam tak a awm thu sawiin, “Rua leh maute hi hman ṭangkai chuan sum tam tak hâi luh theihna a ni a, China-in rua leh mau atanga hlâwkna a hmuh nasatziate hi zir tham a awm, India ramah hmarchhak state-te chu rua leh mau tamna ber a ni a, India rama mau leh rua 66% lai a awm avangin state hrang hrangte’n hma in lak ran a tul a ni,” a ti a, Mizoram bikah chuan Fiber Reduction Factory Unit din phawt a tul hmasak tur thu a sawi bawk..

16th. Sunday: 12th Senior Women’s National Boxing Championships Bhopal-a khelh zawh takah chuan Mizo nula Jenny R Lalremliani DSP (CID) chuan 69kgs category-ah a khingpui Manipur boxer E.Menthoi Devi chu 19-7 a hnehin a champion. He championship-ah hian Haryana chuan medal la tha berin gold medal pathum, silver pahnih leh bronze medal pahnih lain an che ṭha ber a, Manipur chuan dawtin gold medal pahnih, silver medal pakhat leh bronze medal pakhat an la a, pathumna chu Railways niin gold medal pahnih leh bronze medal pathum an la bawk.

17th. Monday: Aizawl atanga Champhai thlen hma km. 18 velah 207 truck a chesual a, motor neitu, M Suakzaliana, Teikhang Bethel Veng chu a hmunah thiin, mi dangin hliam an tuar. Motor-ah hian mi pasarih an chuang a, nutling pakhat leh a fanu naupang tihloh midang zawng chu mipa vek an ni. Motor hi ft. 500 vel a lum a, a chhe hneh hle bawk. Motor hi October 11-a dealer aṭanga lak, registration number pawh la nei lo a ni.

18th. Tuesday: Bairabi khuaa tlawmngai pawl hrang hrangte leh political party tinte thawkho chuan Bairabi-a Mizo hmeichhe pahnih, hnam dang pasala nei Mapuii leh Zoramparite chu an khua chhuahsan tura tiin an bungrua an dah chhuahsak. Bairabi NGO-te hian kum 2001 khan ‘an khuaa Mizo hmeichhiate’n hnam dang pasala an neih chuan, an pasalte khuaah an awm tur a ni’, tiin resolution an lo siam tawh a ni. Kum 2005 khan Mapuii chuan Rajasthan lam mi (teak hmanga sumdawng) pasalah a nei a, kum 2007-ah Zorampari’n hnam dang a nei bawk a, fa an nei ve ve tawh a ni. Anni pahnih hi NGO-te chuan resolution an lo siam tawh angin, kumin September thla chhunga an khua chhuahsan turin an hriattir a, October 11 khan an hrilh nawn leh a; an thupekin awmzia a neih loh avangin an bungraw ṭhenkhat an dah chhuahsak ta a ni.

19th. Wednesday: Ni hnih awh tur North East Zone Cultural Centre, Art & Culture Department, Mizoram leh Sub-Headquarter YMA, Serchhip-te ṭangkawpte huaihawtin Serchhip Field No.-II-ah Mizo Infiamna Kûtpui vawi 4-na hman a ni a, Pu Zolawma District Education Officer, Serchhip chu khuallian a ni.

20th. Thursday: Ṭhuampuia Zuangtui kawngah 207 truck MZ-01 G-5956 chesualin, kawng thlangah metre 25 vel a lum a, driver Lalduhawma (28) s/o Mandanga, Saitual leh handyman Lalthazuala (19) s/o. Thanglungkhama ten hliam na lutuk lo an tuar a, Aizawl Civil Hospital-ah hruai nghal an ni.

21st. Friday: Horticulture department leh M/s Anubhav Biotech Ltd., Kolkata ten inremna an lo siam tawh angin, Anubhav Biotech chuan Sabual leh Aibawk tlangdunga stevia hnah ro an lei ṭan. Stevia hnah hi a that dana zirin kg. 1 Rs. 65-85 inkarin an lei a ni.

22nd. Saturday: Aizawl aṭanga Guwahati pana chhuak maxi-cab pahnih MZ-01G-0225, Lalthlamuana, Bawngkawn khalh leh AS-11/C-1488, David Lalfakawma, Khatla khalhte chu Silchar thlen hmaa Kabuganj bul, Sonabarighat-ah misualin an suam a, khualzinte pawisa leh thil neih hlu dang, cheng nuai 2/- hû vel an chhuhsak. Maxi-cab pakhatah hian mipa panga leh hmeichhe pathum an chuang a, pakhat zawkah mipa hlir pakua an chuang thung a, an zinga Mizo sipai, chawlh hmang zo, an awmna Punjab lama kal leh tur pahnih Laltanpuia, Tachhip khua leh Lalmuanchhunga, Samlukaite chuan misualte hi beiletin sipai pakhat zawk, Laltanpuia chu a beng dinglam chungah an sat a, Silchar-a Gungur damdawi-inah admit niin, thisen unit hnih pek a ni. Sipai pakhat zawk Lalmuanchhunga pawh misualte chuan a kutah an vuak avangin a kut ruh a khì bawk.

23rd. Sunday: Mamit district-a 4th IR constable no. 97, Lalhmachhuana, Lawngtlai Chandmary Veng chuan a nupui, Lalsangzuali (40), Chhiahtlang khua chu Dil lui kamah a sât hlum.Lalhmachhuana hian a nupui hi tlangval dang laka a rinhlelh avanga hetianga that ta mai hi a ni.

24.Monday: Cherhlun khuaa vanduaina hmun hniha thlengah B.Lalchhuanga (49) chu an khua aṭanga km. 2 velah savawm sûm sarih vela lianin a seh a, a hmùi leh hmai hmuh tlak a awm meuh lo a, a khabe ruh dinglam a tliak bawk. Nula Lalchawngi pawh rama thingphur a a kal laiin khawithingawnin nasa takin a zuk bawka; an pahnih hian damdawi ina lak ve ve anni.

25th.Tuesday: Lawngtlai Bazar Veng, Dokulha Hall atanga Areopagy pan na kawng, Baptist Biak In bul step-ah Car, MZ-01 F/ 2535 chu a tlanliam. Car-ah hian mi pahnih chuangin hliam engmah an tuar lova, Car pawh hi a lan dan maiah chuan a chhe lo. Car chesual buaipuitu Lawngtlai Bazar Veng mipuite chuan Car chhungah parvon spas mum 390, Rakzu fun khat leh khuh damdawi atana hman chi Rexocod bur khat an dapchhuak. Heng damdawite hi Car khalhtu, Drugs Inspector ni bawk Samson Lalfakawma (31) S/o. H.Lalhmachhuana, Kolasib New Diakkawn chuan a man a nih thu a sawi.

26th.Wednesday: Mizoram Synod hnuaia pastor leh pro.pastor nupuite chuan Synod Conference Centre-a Pi Zaii Hall-ah intawhkhawm vawi 38-na an hmang a, mi 90 an tel. He hunah hian infuih tharna hun hmangin, Rev. C Chanchinmawia’n ‘Chak lohnaa Pathian thiltihtheihna’ tih a sawi a; tlaiah zanriah an kîlho nghal a ni.

27th. Thursday: Dt 25th.(Tuesday) a ṭan tak YMA General Conference vawi 66-na, Kolasib Diakkawn khelmuala neih chu a ṭiak taa; he Conference-ah hian Mizorama hnam dang, dan loa sumdawngte dap chhuah kawngah tun aia chak zawka chêt an rel a;nakkuma YMA kumpuan atan ‘Ram leh hnam humhalh’ tih thlangin nakkum General Conference chu Kawrtethawvengah nghah a ni dawn a ni. Conference-ah hian Central YMA office bearer thar tur heng mite hi thlan anni ni ;President-ah T Sangkunga, Dinthar (53.19%); Vice President-ah Lalbiakzuala, Khatla (82.43%); General Secretary-ah Vanlalruata Tuikual South (87.03%); Asst. Secretary-ah RL Rindika Bungkawn (30.74%), Treasurer-ah R Lalngheta, Hlimen (44.84%) leh Fin. Secretary-ah J Lalsailova, Mission Vengte (52%) hi.

28th. Friday: LADC sorkar hnuaia Sangau-a Forest Range Officer, LC Thatnuaia leh a thawhpuite chuan khaw chhak lama tawlh chhoh tur naubân Rs. 10,000/- chuang man leh a rutute Burma aṭanga Mizorama rawn pém vek Lalroliana, Bungtlang, Bawithawnghua, Lungzerh, leh Buanpenga, Lungzerh an man. Phawngpui National Park leh a chhehvelah naubán lâk rûk a ni ṭhin tih an hriat avangin, Sangau-a Forest department-a thawkte chuan an lo châng ṭhina; an chang chhuak ta a ni.

29th. Saturday: VLC Vanlalhriatrenga lehkhabu buatsaih, ‘Mizo tleirawl huaisente’ tih chu I&PR Auditorium-ah DGP, Lalrokhuma Pachuau-in a tlangzarh.

30th. Monday: Tun hma lam a Non-Mizo Convention tih ṭhin October 28 zan aṭang neih ṭan Masihi Sangati Convention, vawi 27-na chu a ṭiak ta. Masihi Sangati Convention hi Chanmari Pastor Bialin an thleng a, Chanmari West Presbyterian Kohhran Biak Inah nghah a ni. Masihi Sangati Convention hi Chhim leh Hmar Bial-ah ṭhen a ni tawh a, tuna mi hi Hmar Bial bik tan a ni. Hmar Bial bik hi Area 17 ah ṭhenin Fellowship 161 a awm a ni. Masihi Sangati rawngbawlnaah hian Office leh Evangelist hna thawktu mi 143 an awm mek bawk. Convention-ah hian Rev. Vanlalbela chu speaker a ni a, thupuiah ‘I thih hnuah khawnge i kal dawn’ (Hebrai 9:27) an hmang. Rev. Adam Kerketta-in ‘Masihi Jeewan ka Adhar’ (Exidus 20:1-17) tih hmangin Bible Study a neihpui thin bawk. He convention-ah hian Aizawl khawpui chhung leh thingtlang lam atangin palai 5,950 an inziak lut a, ring thar mi 54 in baptisma an chang thar a ni. Masihi Sangati Convention hi kum khat dana neih ṭhin a ni.

31st. Monday: Khawvel thiamna hmanga a tawnhriat ni miah lo, a hriat phak loh hrittirtu hnen aṭanga a thil hriat midangin an dam pui ṭhin, Pu Zaduna (78), ruh khawih thiam, Ramthar veng (Ramhlun South-ah an lawi) chu Chuap Cancer vangin Durtlang Hospitalah a thi.

Similar Posts:

• Taekwondo Championship wrap-up
• National Games ah Mizo che țha
• Mizoram Presbyterian Synod in WCC zawm dawn lo / Bangalore ah pastor dah rem ti
• 14th National Jr Kickboxing Championship ah Mizo titha
• Synod Choir Taiwan kal tur thlahna

Recent Posts:

• Lunar Phase
• Chet chhiatna tlem te
• Kumhlui 2011
• SOPA and PIPA: GoDaddy an che buai nual
• Ka sawisel pawh a ni lo, ka khawngaih ve tawp

This entry was posted on Tuesday, November 1st, 2011 at 11:00 am and is filed under Event, Mizoram. You can follow any responses to this entry through the RSS 2.0 feed. You can leave a response, or trackback from your own site.