mi(sual).com

– Zorammuana

[Source : MCPA Annual Magazine 2004]

Tun hma kum 40 chuang lai kal tawhah khan Lower Primary School zirlaibuah ‘Primary Thuvawn’ tih bu hi a tel a. Recitation atan hman thin a ni a. Primary Scholarship Examination atana subject pakhata bet ve a ni.

Exam-naah an sawi zawha mark pek nghal mai a ni thin. Heta hla thlanchhuah zingah hian Pu Vankhama hla ‘Rimawi Ram’ tih chu a tel ve a. Chang 2-na, tlar 1-na chu – “Thalah hnah hlui an lo til chawr tir duatan,” tih tur ni mahse, “Thalah hnah hlui lo til chawr tin duah tan” tia chhut a ni tlat mai a.

Chumi anga naupangin nal taka an sawi chuan mark tha tak ka lo pe mai thin a. Nutei, chutih laia Tuikual Primary School naupang, ngo ve vaw, hmeltha leh hnap thleng fai vang mai pawh khan ‘chawr tin duah tan’ ti khan a sawi ve thin em aw! Lo sawi pawh nise a awm tho mai, zirlaibu a inziak dan a ni miau si (Nutei tih hi Pi Vanlalruati, zaithiam, a tet laia ka koh thinna a ni)

Tum khat chu Pu Vankhama nena kan inkawmnaah Primary Thuvawn bua a hla an chhut dik loh thu a sawi lang ta a. Kei chuan i hla an chhut dawn hian an dil lo che em ni? ka han tih chuan, ani chuan, “Dil lem lo ve, dil ahnekin hrilh pawh min hrilh lo,” a ti mai a. Zirlaibua an hmansak chu lawm hle turah an ngai ni maw! A sawi zui zelnaah, hetianga ka hla an lo ti lar hi a lawmawm hle a, a dika chhut tal  chu nise a tha mai a. Han sawisel ta ila, intivei nih kan hlawh mai angtih ka hlau va, engmah ka sawi lo mai a ni. Kan hun tawngin a phak tawk a ni rih a nih hi a ti mai a.

Chung thil kan sawi pah chuan hla thu – Typewriter-a chhut, a tawpa a hming, pena ziak ( a signature awm dan pawh ka mitthlaah a la cham reng mai) min pe a. He hla ka phuah hi sak tur chi atana ka tih a ni lo va, a thluk siam pawh ka tum lo. Nangni zirtirtu in ni a, Middle School naupang zir atan te an la rawn thlan ve duh tak hlauhvin, a ziak, ka kut hnu ngei hi lo kawl ve rawh,” tiin min pe a. A thupui chu “Kan Hmun Inpui” tih a ni.

Hla tha leh ropui tak mah ni se, thluk nei lo, sak ualau ve loh a nih avang hian “Hla Thulkhung” kan tihsak mai a ni. He hla hi tlar 10 hlir chang 4 lai a ni a. Hla sei angreng tak a ni. A chang tawp ber hi a thuchah laipui kengtu, Thangtharte  fuihna, zilhna leh sawmna a ni a. Hei chauh hi lo tarlang ila :

Thangthar lungfingten ti ru hei hi hria ilang,

Kan hmun in ram, kan ta, kan neih hmang tha an;

Rennain kan neih chhun, kan ram thing leh rua,

Tiak tir, chawr tir chen duatin chawm ilang,

Tul lovah i hnamchem sen chu vai lo lang.

Kawng kam kik leh perhte pawi sawi lo vai hian,

Kan phuhrin at zia puangzar mai lah ni le!

Thang leh thar tan kan ta hi zuat ve ilang,

Tui mal far te te, tuipui lian lo tlintu,

Tuna kan rente kan tunhnu renpui tur.

Kei, thingtlanga seilian ve bawk chuan tlar 5-na leh tlar 7-naa a sawi ang, tlangval tha za, chem hriam keng si nunchan hlui te min hriat chhuahtir a. Kawng kama thing ding (Tawitaw kung) pan ser, so luk mai te kha ka mitthlaah a la cham a. A beiseina leh fuihna hlawhtling ta ang maiin tunlai kawng kam thingte chuan hliam an tuar nep ta hlein ka hria.

Tul mang lo leh kan tu leh fate hmakhua ngaihtuah lek lova kan lo dehral tam zia te sawi tur a tam. Kum 1961 kuma Armed Veng hmuna kan thingzai tur kih, tlu tang, amah tiat dawn lai thing danga kan vuak thlak tir dan te, kan thing lak duh tak ni lo, a daltu kan suasam tel zel takte avang khan kan dai vel pawh a lo chereu ta a lo ni e.

Tunah chuan kan YMA-te leh Forest Deptt-te pawhin kum puan atan, “Ramngaw Humhalh” te hmangin hma an rawn la ta a. An hmahruaitu chu Pu Vankhama kha a lo ni reng mai! Lo tho lehin rawn hre thei sela a va lawm dawn em! A hun lai kha chuan a la mal tan deuh si a.

He hla copy hi kan ram buai lai khan ka lehkhabu dangte nen kan khua, Hlimenah ka tlanchhiattir a. Kan inpui a kan tak avangin a kangral ve ta daih mai a, ka ui ngawt mai. Ka lo thawh vena thin Middle Schoolah chuan zir a ni ta lo va.

Tlai khaw hnu, kum 20 liam taah khan, ka tlai lam umpawngpar ka ti dawn emaw ni, lehkha ka han tlai zir leh a. College zirlai Mizo tawng(MIL)-ah “Ka Hmun Inpui” tih chu zir tel a lo ni a. Mi a tiphur sawt a, private-a zir ka ni na a. mi a titlangnel a, ka lung a tileng bawk.

MIL kan exam ni chuan he hla chang tawp ber, a hnukharna tlar hnuhnung ber, “Tuna kan rente, kan tunhnu renpui tur” tih sawina remchang tak a awm a. Nel tak leh hre bulfuk inti takin ka ziak a. Sawi vel pawh nuam ka ti hle a ni. Heta REN tih hi hmanrua emaw, chak emaw tihna a ni a (Tawngkam hman khat deuh tawh anih avangin hre lo a awm theih awm e, a lam dan pawh Saptawnga RENT kan tih anga hniam phei deuhva lam tur a ni). A sawi tum chu – ‘Tuna hmanraw tesep/tenau deuh atana la tling chauh te hi zuah rih ila, nakinah chuan hmanraw lian leh hruanghrau, tangkai zawk an la ni dawn a ni,” tihna a ni.

Teak huan neite pawh hian he sawmna hi ngai pawimawh ila a that hle ka ring. Kan zinvah ve nikhuaa Tuirial kam leh Kolasib-ah te teak tuai chawn tiat, malpui tiat lek lek chhek khawm ka hmu thin a. Tunah chuan ‘ren te‘ an la ni a, ‘ren pui‘ an nih hun chu nghak thleng ila zawng, a that zawk bakah a man pawh a to zawk ngei ang.

MIL ka exam-na kha han sawi leh hlek ila. Mark ka hmu tha lo. Note-bu siamtute sawi dan nen pawh a inang lo. Ka hriatna ka ring tawk a, ka vui chuang lo. Pu Vankhama thuchah (message) dik tak ka ziak miau va. A thu min chah ka hlenchhuahna hmasaah ka ngai a. Tuna ka rawn sawi leh hian chhiartu zawng zawng hnenah Pu Vankhama message puangchhuakah ka inngai a, ka lawm hle a ni.

[P.S : He article hi tha ka tih em vangin leh Mizotawng humhalhnaah a pawimawh pha ve a ka hriat avangin ka rawn bel ve leh tawp mai a ni e.]

Similar Posts:

• Chawr no
• School II
• Ka Vawih
• Headmaster pa rem rem
• STEM

Recent Posts:

• Tawng tih hausak a pawimawh!
• MIZO HNAM SAKHAW DIK PHOCHHUAHNA – IIby. Rorelliana
• MIZO HNAM SAKHAW DIK PHOCHHUAHNA ~ Iby- Rorelliana
• Ngaihtuahna
• ‘Remna’ Palai Bâwngte

This entry was posted on Friday, November 25th, 2011 at 9:00 am and is filed under Copy Paste, Mizo Society & Culture, Whatever. You can follow any responses to this entry through the RSS 2.0 feed. You can leave a response, or trackback from your own site.