Mihring kan pung zel, thiamna a sang telh telh a, mahni hmasialna leh nawmsak kan tumna a zual zel bawk a. Kan thiamna sang tak vangin, mihringte kan hlut zia leh kan chungnunzia ka hria a, mahse kan thiamna leh finna sang tak hi thil siam dangte nek cheptu mai a ni leh si thin erawh hi chu a pawi vawng vawng thin.
Kan kut hmawrin khawvel kan thunun a. Kan duham luatah kan vela thilsiam dang, thing leh mau, ransa leh sava te, kan leilung chen hian dimna leh duatna reng reng kan nei lo va, keini a tawrhtirtute ngei pawh hian kan la tuar ve dawn a ni tih pawh kan hre pha bawk hek lo. Nawmsak duh luatah zu a in teuh a, a rui hrehawm leh hle si ang deuh leh, nawm duh lutuk vanga kan zawh loh tur kan thisen zamah kan thuna kan O.D.-pui ta daih thin ang hian, mihringte hian kan chenna khawvel leh keimahni ngei hi kan in tichhe mek a ni.
Ecology awmzia ?
Ecology hi ‘oekology’ Greek tawnga Oikos ‘chenna in’ tih leh Logos ‘Thurin’ emaw, ‘thu zirna’ emaw tih kaihkawp atanga lo piang chhuak ta a ni a. Tichuan, ecology chu khawvel leh a chhunga cheng zawng zawng te, kan pawimawhna leh kan inrintawnna zirna tih lam a kawk ta ber awm e.
Eco-theology
Eco-theology chu Kristiante nun dan tur tha leh, awm dawn mawi inzirtinna peng khat pawimawh tak, thilsiam chunga kan tih makmawh, a Pathian thu lam zawnga inhrilhhriatna leh inzirtirna hi a ni. Hei hian Kristiante’n khawlvel leh thilsiam dang kan ngaihdan zawng zawng pawh a huam tel vek thei bawk ang; a bik takin min tuamtu boruak, kan sik leh sa inthla vak tur leh, kan khawvel chhe zel tur venna atana mi tin te mawhphurna inhriattirna pawimawh tak a ni.
Eco-theology pawimawhna
Mihringte kan duhamna leh hmasialna avanga thilsiam dangte’n an tawrhna hi tunah chuan kan hmuh hmaih thiang tawh lo. Hindu-ho chuan thilsiamah leh thilsiam piahah te hian Pathian a awm an ring a, thilsiam dangte pawh an zahin an tinawmnah khat khawp mai. Muslim-ho chuan engkim hi Allah hnen atanga chhuak vekah an pawm a, thih-chilh-bomb nen khawlai leng vel mah se, an nawmsipbawl nan nungcha te, thing leh mau te an hmang ve lem lo.
Kristian, van boruak zau takte khian Pathian ropuizia a puang chhuak a ni tih ringtu, lei chung leh tui chhunga awm zawng zawng te, thla neia thlawk leh bawkvaka kal chi te, tungchhoa kal mihringte leh thing lera zawng rual ban te chena a siam a nih ringtu te hian kan chenna khawvel leh nungcha te, thing leh mau te hi kan duat tawk loin, Siamtun a siam ve a ni tih pawh hi kan hre lo ta fo mai a ni hi.
Thil mak kan khawvel hual veltu chhim tawpa vur tlang lian pui pui awm khawm te, hmar tawpa lunglian pui pui Bishop Rock tia an koh te, ramsa mak tak tak khawvela cheng ve ta lo te chen hian kan Pathian chuan a lo siam a, an awm dan tur a ruatsak a. Mihringte hmasawnna hian pawi kan khawih hnem ta hle mai, vur tlang zawng zawng hi kan chenna boruak lum zel hian titui ta vek se la chuan, Nova anga lawng kan tuk a nih si loh chuan tui hian awlsam takin min chim hlum mai awm e. Tuifinriat hnuaiah hian Himalaya tlang sang ber Mount Everest aia sang a awm fur mai tih te han ngaihtuah chuan kan Zotlang ram nuam hi a chim pil thei em em ang tih hriat sa a ni .
Bible Thlirna
Bilble keu thatchhe ber pawhin “Atirin Pathianin lei leh van a siam a” tih atangin a intan tih hai rual a ni lo. Gen 1:31-ah chuan “Pathianin a thil siam tinrengte a en a, ngai teh, tha a ti em em a” tih kan hmuh bawk atang hian sawi tam vak ngai loin Bilble-in thilsiamna a ngaihdan chu kan hre mai awm e.
Ni tina kan hip luh boruak tha, a tel lova kan khawsak theih hauh loh tui thianghlim in tur te hi mihringte nunna bul an ni a, thing leh mau, nungcha te hian tawp chin nei lovin kan ei tur leh kan chenna min pe bawk a, chu mai a ni lo, tlai ni tla tur kawlah a sen phut mai te, luia tui a luang ri her her te, tui khawhthla mawi tak te, chhimbal rawng mawi taka a zam chiat mai te, hian kan chenna hi a chei mawi a, a siamtu themthiamzia min hrilh nawn leh thin bawk.
Pathian hian thilsiam tinte hi kan awmna tur leh kan tih tur bik fel takin min ruatsak a, thilsiam dang chunga hotu ni tur hian Pathian hian min dah a, enkawl turin min duh, mahse chu chuan kan thu neihna hmang suala duh duha kan nawm kan maka thil siam dangte chunga kutthlak tur hian min ti hauh lo. In neituina chhiahhlawh hnena a in a enkawltir ang chauh hi a ni zawk, kan khawvel thatna tur atana thawk lo chuan a Siamtu a dodal a , a duhdan kalh tlat a ni zawk e.
Similar Posts:
- Ecological Crisis: Thalaite Thlirna Atangin
- Favang Ni Eng
- Moral Reform Pawl
- Pathian Chungchang
- Zo Sakhaw Zepui
December 22nd, 2011 at 6:46 am
nia tiraw, sei hle mahse, paws tra khawp mai, kzp,
Report this comment
December 22nd, 2011 at 7:22 am
Ni e
Report this comment
December 22nd, 2011 at 7:23 am
He thil hi Zofaten kan vei hle a hun tawh tak zet a ni. Pathianin kan mamawh chuan ei a phal tih changchawi a, mahni kuthlei leh virthial vanga nungcha kan suat chereu nasa lutukte hi a Kristian loin a zahthlak tih kan hriat a hun tawh lutuk. Tin, mipui tam zawk eizawnna nen a inzawm tlat avanga thing leh mau Zoramin kan suasam nasa lutukte hi engtia inzirtir nge kan sawtpui ber ang tih bengsika ngaihtuah chunga humhalh leh, enkawl that hi kan tihmakmawh a va ni tehlul em!
Hman ni lawk khan ka hmelhriat chian em em mai, mi pangngaia ka ngaih pakhat chuan ram kal an tum thu a sawi ka hre fuh palh a. A hnu deuh lawka a fapa rawn leng chu, a paten enge an kah tiin ka lo zawt fiam ti ila, ka zawt tak tak a ni zawk mah awm e. Muvanlai an kah thute min hrilh a, mak ka ti bawk si, thinrim bawk si chu ka va’n tawng chhuak teuh kher ve aw! Muvanlai sa an ei ngai awm pawh ka hre lo a, bakah sa rawp em em tur dinhmuna ding an ni lo satliah mai pawh a ni lo, min hmusita min melh tha peih lo khawpa hausa leh inla milian chhungkua an ni zawk lehnghal a! Tin, kumin hi heng ram vak thin ho inkah-hlum palh tam kum tak a ni awm a sin. Sim a hun tawh tak zet a ni ang.
Report this comment
December 22nd, 2011 at 7:51 am
# 3na chuan ka nunhlui min ti hrechhuak a, ka inchhir nawn leh hle mai. I ngaihtuahna ang hi Mizo te hian kan put a hun tak tak ania.
Report this comment
December 22nd, 2011 at 8:15 am
post ava tlem v
Report this comment
December 22nd, 2011 at 8:16 am
post thar ava tlem ve
Report this comment
December 22nd, 2011 at 8:49 am
Ziak tha khawp mai. Kan ziaawm viau tawh amaw tih lai hian khawi lai laiah emaw hian Ramvak inkaphlum palh te hi an lo la awm reng a, Sa kan la pel nasa tih a hriat lawi si. Kan Rama Ramsa te hi thah chimih kher kan tum te hi a ang deuh roh.
Kan Naupanlaia Tlaiberh, Tukhumvilik, Kwlrit, Tuklo, Vate Saihlum tiat awrh thlenga kan veh kan veh thin te kha a lo thalo ngawt mai. Chhungtlai ka hawn tak tak thin chuang si lo. Sangha Tur hmanga hrai mawlh mai hi sim a hun tawh tak zet a ni.
Report this comment
December 22nd, 2011 at 10:45 am
Post tha tak a ni. Thilsiam te thleng phak Kristian nun kan mamawh a ni.
Report this comment
December 22nd, 2011 at 11:02 am
V.Good Post, KZP ka chhawng e :happy:
Thilsiam dang(nature) hmangaihna neilo Pathian hmangaih si hi a awm theihin ka ring lo.
Khawvela zaidam ber leh Pathian hmu tawh tu chu Mosia a ni.
Khawvlea Pathian ropuina hmu teuh ber leh Pathian thinlung ang pu mi ni a sawi chu lal Davida a ni.
Davida hian Nature aṭanga Pathian ropui zia leh fak tlak anih zia a hmu chiang hle niin an sawi a, a hla phuah ah pawh thilsiam dang te a tel zing ber a ni.
PATHIANIN khawvel a hmangaih em em a, chutichuan a Fapa mal neih chhun a pe a. (John 3:16)
Khawvel zawng zawngah kal ula, thil siam zawng zawng hnenah chuan Chanchin Tha hi hril rawh u. (Marka 16:15)
Khawvel a tih deuh kher na chhan khi mihring chauh kan nilo tihna a ni. Khawvel chhandam turin a ni alo kal, thilsiam dang tepawhin kan pu Adama bawhchhiatna keini ang bawkin an tuar a, chhanchhuah mamawh an ni a kan Bible ah chuan “nghakhlel takin an thlir” a ti. Mihring te chauhin thawhlehna hmel hmu tura in ngaihna kan nei lian em em a thilsiam dangte chungah kan nun a rawngin kan kut a hlei ṭhin. Heng Pathianin a siam, a ropuina hmel lan tirtura a rilru ang taka a siam te hi kan hmangaih tel loh chuan Pathian ropuina kan la zah tawklo tihna a ni.
Report this comment
December 22nd, 2011 at 11:33 am
Good Post.
Report this comment
December 22nd, 2011 at 11:49 am
“…mihringte hian kan chenna khawvel leh keimahni ngei hi kan in tichhe mek a ni.” (Inconvenient Truth) :rolleyes:
Thil siam enkawl tur hian mi thenkhatte chauh tih a khek chi a lo. Mitin ten a rual a ke kan pen a ngai tak zet ani.
Report this comment
December 22nd, 2011 at 12:22 pm
#3 sawi ang deuh khian inlak changkan nan leh kuthlei vanga ramchhuak vel hi chu an ngeiawm khawp mai.
post tha hle mai.
kum tin ram kan hal hluah2 mai te hi engtia tih chi nge mawni dawn ni. :rolleyes:
Report this comment
December 22nd, 2011 at 6:48 pm
He post chu ka hel ka hel hnuah ka chhiar chiang a, a lo tha zek mai..!
Report this comment
December 22nd, 2011 at 9:56 pm
Good Post. KZP Chhawng.
Report this comment