- Bawiha Renthlei
Favang hun hi mi tam zawkte lunglen hun a ni, tiin bul han tan phawt mai ila, thiante pawi kan sawi em lo’ng chu maw? Kan pipute hun lai pawh khan favang awllen hun hi ramchhuah hun atan an hmang thin reng a. An lung tilengtu ber pawh ramchhuaka sapel te kha a ni rêng bawk a. Chuvangin sapel mi tan pawh he hun hi ‘lunglen hun’ a tih theih awm e.
Favang lai chuan boruak a nuam êm êm a, buh hmun zau tak hmuh theihna hmun Champhai leh a chhehvel, keini khua Zote-ah ngei pawh he hun hi a mawiin a nuam zual bik emaw’n chu aw ka ti thin. Ni chhuah atanga a tlak thleng hian a mawi tluan vek mai.
Zingah ni a lo chhuak a, hnim hringa dai tla te chuan lunghlu an pai emaw tih tur khawpa mawiin a chhun tle siar siar a, thing leh mau ,thlai hring leh phaitual hnim thlengin chu ni mawi tak chuan a chhun hring no nghulh mai a. Hawi vel a nuamin zing tho hma mi tan chuan dam man a awm hliah hliah niin a hriat thin.
Chutia leilungin a hmel mawi tak mai a’n lantir meuh chuan awm mai mai a harsa thin hle. Eng nge tih tur ber pawh hre lo a phiruai mai awl tak a ni. He “Favang ni eng” in nunphung a her danglam theih dan hi thil mak tak zawng a tling ngei mai.
Tichuan, ni a lo tlang sang zel a, mahni hna theuh thawkin feh tur an kal sang sang a, an hlim hle thin. Nilengin hna an thawk char char a, tlaiah hlim tak bawkin an haw leh thin.
Tlai lam ni hi a mawi leh hle mai bawk a; he ni hi a ni, mawlhtu nei ang a min awmtir thintu chu! Khaw thiang kûk maiah tlai ni a èn siar siar hi chuan tih danglamin ka awm ve tlat thin. Sawi vak pawhin awmzia a nei lem lo. Tu tan pawh hai rual a awm lo.
Pathian thil siam, keini mihring aia hnuaihnung zawkte pawhin A hmel mawi zia leh a ropui zia an tarlan nasat thehlul nen, keini thil siam zinga ropui ber mihringte hian Pathian ropuina hi kan va hliah zawk si em!’ tiin ka ngaihtuah ve mai mai thin.
Pathian thilsiam ten mawina an lan chhuahtir dan hi hriatthiam a harin a ril em em a. Engamaw zat chu mihringte hian hmuin hre ve bawk thin mah ila, a zavai chuan kan hre zo thei ngai lovang. Hriat vek sen pawh a ni hek lo. Pathian thil siam mawi tak tak hmutu mihringte zingah ngei pawh hian a them thiam zia pho lang mektu an lo awm ve zel zawng a nih hi!!
Tlai lam Ni, kawlkila liam mai tura intintuah a, liam mai tura inring reng tawh hmuh hi chuan rilru a hruiakawi hneh thin teh e. Ral leh lam tlangte chu a chhun hring nghulha, a piah lawkah chhum var a inhlum tup mai bawk a, chungte chuan a ni, ‘kha nu’ kha min ngaih tir em em thin ni.
Awle, thian duh tak, he favang hun thengthaw nuam tak, zalen leh boruak thiang bawk si, rilru hah ruk riauna nei tan pawha dam sawng sawngna tham hun nuam hi, hunbi kan tawn thin a nih ang leh eng ngaihtuahna mah nei lo chunga I lo bye bye liam thin a nih chuan eng nge a danglam bikna leh engtin nge I nunah nghawng a neih ve dan chhutin han chik ve chhin ta che.
September 9th, 2011 at 11:34 am
A ngaihnawm e
Report this comment
September 9th, 2011 at 11:47 am
Lunglenthlak khup mai.
Report this comment
September 9th, 2011 at 11:51 am
Report this comment
September 9th, 2011 at 11:54 am
Thu thiam tak i ni e.
Report this comment
September 9th, 2011 at 11:57 am
Report this comment
September 9th, 2011 at 11:58 am
A ni ngawt mai! A mawi a ni. Second tin maia scene leh color a han danglam thinte hian … rilru a khawih khawp mai!
Report this comment
September 9th, 2011 at 11:59 am
A ngaihnawm e. Hei ai hian han tuaihnum in duhthawh leh deuh la, a ngaihnawm zual awm mang e. Anyway Thumbs Up
Report this comment
September 9th, 2011 at 11:59 am
A ni ngawt mai! A mawi a ni. Second tin maia scene leh color a han danglam thinte hian … rilru a khawih khawp mai! Painted Desert-te khu … tlai ni tla tur hian second tinah rawng mawi danglamin a pawlh a … digital camera a lo awm tawh nen hian inchawbe tak chu a tling, lung a leng vawng vawng.
Report this comment
September 9th, 2011 at 12:01 pm
Hla phuah thiam ho pawn an chawi vul deuh ber a ni reng a sin!
Report this comment
September 9th, 2011 at 12:25 pm
A ni teh tak e a.Kei fahran pawh hi he hunah hi chuan tih danglamin ka awm ve ziah….Duhlai mi u mi dawn ve em?Ka ngai em che ka ngai ber che. Hlim te a len dun ve nan,oh ka nghakhlel em tawn leh ni tur…Vangpui Lunglen hi na ve tak mai a nia o
Report this comment
September 9th, 2011 at 12:43 pm
Ka lung a leng e…
Report this comment
September 9th, 2011 at 12:46 pm
Lung ivan tileng reuh ve mawle
Report this comment
September 9th, 2011 at 1:15 pm
A leng vawng vawng.
Report this comment
September 9th, 2011 at 1:57 pm
Favang kan tih tak hi eng hun nge? a hunin nge hril a khuain tih hi ka ngaihtuah mai mai thin. Fur khua a chet tlai deuh a, Thlasik a hma phei chuan Favang hi an bawh bo thak thinin ka hria.
Hun inher(season) hi a sawithiamte chuan lunglenthlak takin in sawi thei mai zel a-C.Thuamluaia ‘Zoram nipui’ te, Zikpuii pa ‘Sikni eng’ te, Thanpuii pa ‘Fur khawthiang’ te kha han chhiar chuan lung a leng duh khawp mai. ‘Vangpui lunglen’ tih kha High School-ah kan zir thin a-min hruai thui thei hle.
Kei, a posttupa season Favang(Vangpui lunglen) hian min uai na ber mai-lung an leng tak tak hi chu hnuk a chat phauh phauh thinin ka hria.
Report this comment
September 9th, 2011 at 2:00 pm
bracket chhungah ‘y’
Report this comment
September 9th, 2011 at 2:01 pm
Lung a leng em mai…
Report this comment
September 9th, 2011 at 2:08 pm
Thianpa chu i ziak thiam kher mai. Teh nawlh che chuan! Misual-a lut tharte hian mahni post-a comment kan inthlahrung thin a, inthlahrun loh zawk tur a ni e.
Report this comment
September 9th, 2011 at 2:32 pm
A nia sin favang hi hun mawi leh nuam tak a ni. A ngaihnawm hle mai
Report this comment
September 9th, 2011 at 3:11 pm
Essay ziah i thiam hmel hle mai, a ngaihnawm e..
Report this comment
September 9th, 2011 at 3:14 pm
A ngaihnawm mang e! Lunglen i chawk tho dawn tlat…
Report this comment
September 9th, 2011 at 3:57 pm
I hming ang chiah Lalrinmawia Renthlei, thian ka nei a, i ni amaw ka’n ti thut dawn a, mahse Zote (Champhai) lam mi a nilo tlat. Lunglei lam chhuak, Aizawla awm a ni.
Report this comment
September 9th, 2011 at 5:14 pm
Favang boruak thiang tak hi chuan thinlai mu hnu a kai tho leh thin.
Report this comment
September 9th, 2011 at 5:33 pm
A chang chuan ‘Fur pui’ ruah sur bur bur te hian ka lung min len ve fo. Ruah sur bana thla an eng kuk phei hi chuan hla phuah thiam nih ka chak ve rum rum thin
Report this comment
September 11th, 2011 at 11:21 pm
Favang zet hi chuan i lung a lên a ni, tiraw?..A ngaihnawm khawp mai a
Report this comment
September 12th, 2011 at 5:38 pm
Heti zat2 comment ka dawn ka ring phak lo! In comment a lawm lutuk e
Report this comment