mi(sual).com

Hlau Suh (Sunday & Krismas Pual)
Mihring nihphung pangai bak a thil thleng a lo awm hian, Mihringte hi kan sahawk a, kan hlau a, ka beng kan tun hru hru thin anih hi. Eden huana Setana(Diabola) bumna avang a Pathian Thianghlim leh Mihringte inkara inzawmna lo chat ta, rawn suihzawm leh tur a Pathian Fapa Isua Krista he khawvela mihringa alo chan dawn hian thil pangailo tak tak a thlen a ngai nual mai a. A lo dawngsawngtu Mihring thisen lum tan phei chuan hlau a phut hlum theihna hial tur khawpte anni hlawm awm e. Nimahsela, bawhchhiatna avanga Mihringten Pathian hmel kan lo zah leh kan lo hlauh tak tlatna atang hian Pathian chu kan hnenah lo cheng lehin, “Hlau suh”(Do not be afraid) tih hi Krismas in a ken tel thuchah pawimawh tak a lo ni ta a ni. Chungte chu I han tarlang dawn teh ang.

1. Thuthlunghlui lam a Lal Isua lo pian tur hrilhlawktu ber Zawlnei Isaia khan Isaia bung 9 a kan hmuh ang khan, “Thlaphanga awm tawh tan chuan nguina reng reng a awm tawh lo vang” a lo ti daih tawh a.

2. Lal Isua tana kawng lo buatsaihtu tur Baptistu Johana lo pian dawn khan a Pa Puithiam Zakaria hnenah khan Vantirhkoh a rawn inlar phut mai a (Luka 1:10-17). Zakaria kha a mangang a, hlauh pawh a hlau a ni(Luka 1:12). Nimahsela, Vantirhkoh khan, “Zakari, hlau suh” tiin thlamuanna thu a rawn thlen a.

3. Isua paitu tur Mari hnenah pawh Pathianin a Vantirhkoh Gabriel-a a rawn tir a. Mari hnenah chuan, “Chibai, Vohbik! Lalpa I hnenah a awm,” a han tih khan Mari kha a mangang hle a ni. (Luka 1:28-29). Nimahsela, Vantirhkoh chuan thlamuanna thu a rawn puang chhuak leh ta a, “Mari, hlau suh; Pathian ngaihsakzawng I ni e,” a rawn ti leh ta!

4. A nupui hual Mari a rai tih a han hriat khan Josefa kha a mangang ve ta thung a, mahse mifel/mitha tak a nih avangin a Hmangaih em em Mari chu tihmualpho a duhlo a, ngawi reng a bansan mai a tum ta zawk a(Matthaia 1:18-19). Nimahsela, Lalpa Vantirhkoh Josefa hnenah a rawn inlar leh ta a, “Josef, nang Davida fapa, I nupui hual Mari chu neih hlau suh; a naupai chu Thlarau Thianghlim laka mi a ni asin, Fapa a hring ang a, a hmingah ISUA I sa ang: ani chuan a mite an thil tihsual lakah a chhandam dawn si a,” a rawn ti leh ta khauh mai a ni.

5. Isua Krista a lo pian takah khan, Khatia Van Lalber Fa lo piang chu, In pangai pawha piang lovin Ranin chhunga Ranthlengah a piang ta mai mai si a, Doctor leh Nurse pawh an awm si lo; tumah han chiau au tu leh han lawmpuitu an awm bawk si lo. Khatih hunlaia Khawvel Lal ten an aiawhtu tur fapa an neih lemin Zaipawl leh Rimawi tumthiam ten ropui takin an awi thin si a. Van Zaipawl an insum thei ngang bik ta lo. Pa Pathian pawhin a dang zo biklo nge a thupek zawk chu kan hre chiah lo na a, Van tukverh hawngin Daipawna an Beramte riahchilhtu Berampute hnenah an rawn inlar ta mai le.
Beramputen an hlau nasa ta mai. Nimahsela, Vantirhkoh chuan an hnenah, “Hlau suh ulang, ngai rawh u, mi tin ta tur chanchin tha lawmawm em em ka rawn thlen che u a ni. Vawiinah hian in tan Davida khuaah Chhandamtu a piang ta, Lal Krista chu” a rawn ti leh ta. An va han lawmin an va han thlamuang dawn tak em.

He Krismas hun hi Mihringte tan hian hun Lawmawm ava ni chiang tak em. Kan nunah harsatna leh Rilru hahna chi hrang hrang kan nei em? Kan lo nei mai thei e. Chutiang kan lo awm anih pawhin he hunah hian hlau tur leh mangang tur kanni lova, Hlim a lawm a Thlamuang tur kan ni. Chu chu Vantirhkohte thuchah ken pawimawh em em mai a ni si a. He Chanchintha hi mitin ta tur a ni a, hmaih reng a nei lo va, a duh apiang tan a ni.

Exodus 33:20 ah chuan, Pathianin Mosia hnenah, “Ka hmel zawng I hmu thei lo vang: mi hmua nung reng thei tumah reng reng an awm si lo va,” a ti a. Tin, Genesis 32: 30 ah pawh khan, Jakoba khan Pathian a hmu a a thi silo kha mak a ti zawk a, “Pathian chu a hmai hma ngeiah ka hmu a, ka nunna hi zuah a ni si” a ti he haw a ni. Heti anih laia Vantirhkohte rawn inlar a, Pathian Fapa meuh keimahni mihringte ang a lo chang a kan zinga a lo awm ta mai hi a va mak em. Immanuela( Pathian kan hnenah a awm) kha a hming ang takin kan hnenah a lo awm ta si a. Chu chu thil hlauhawm a ni lo chauh pawh a ni lo va, Chanchintha Lawmawm em em a ni si a.

Sapho tana Mizo hnam mawl lutuk, an khaw mi ni lo chu thah a, an lu tanchhum a Iptepuia ah haw tum te, Africa rama Midum Ramsa u deuh awrhte anga chan ringawt pawh Sapho tana a harsat awm nen, Pathian Fapa meuh keini a thilsiam Mihringte anga lo chang a, Mi Rethei berte tawrh ang Riltam leh Khawvawt te a rawn tuar a, Heroda Sipaite hlauin Aigupta ramah tlanchhiatpui dawr dawr a ngai a, Dawt tinrenga hek a ni a, Chinghniain Beram tlafal seh tuma an chang reng ang maiin A chetsual leh tawngsual an chang reng a, a tawpah phei chuan, thihdan a zawnga mualpho thlak leh Rapthlak, Natuar rei thei ang ber zawnga in sawisakna Kraws-ah Saruak a tihhlum a lo ni ta hial a. Chuti khawpa min hmangaihtu leh kan tana inpe zo chu Kan Pathian hi a ni.

“Puithiam Lalber kan chak lohnate min hriatpui thei lo nei kan ni si lo; Keimahni anga kawng tinrenga thlemna tawk tawh, sual erawh chu sual lo, nei kan ni zawk e.
Chutichuan zahngaihna kan hmuh theihna tur leh puih kan ngaih huna tanpuina khawngaihna kan hmuh theihna turin, khawngaihna lalthutphah chu huai takin I hnaih ang u.” (Hebrai 4:15-16).

Lal Isuan, “Ngaiteh, Kawngkhar bula dingin ka kik hi; tupawhin ka aw hriaa kawng a hawn chuan a hnenah ka lut ang a, a hnenah zanriah ka ei ang” a ti si a. (Thupuan 3:20)
He Krismas zarah hian, “Tuihal apiang lo kal rawh se; a duh apiangin nunna tui hi a thlawnin la rawh se”(Thupuan 22:17) tiin Lalpan min sawm reng a ni.

Lalpan a thu malsawm rawh se, Amen.

Similar Posts:

• Amen ti thei – Mari (Isua nu)
• Josefa Lehkhathawn
• Bible Thu Chang Inkalh Anga Lang
• Kristian sakhua leh Mizo hnam sakhua danglamna
• Tunlai ka mutmawh hnarmawh.

Recent Posts:

• PÂWL LAL HRAWTNA AIZÂWL???
• MIZO HNAM SAKHAW DIK PHOCHHUAHNA- IVby. Rorelliana
• Hriat chian lehzual
• Sunglass man to chhan!
• Tawng tih hausak a pawimawh!

This entry was posted on Sunday, December 25th, 2011 at 7:00 pm and is filed under Christmas, Religion. You can follow any responses to this entry through the RSS 2.0 feed. You can leave a response, or trackback from your own site.