He thu ka ziah hah man hi tu mân min pe lo va, ka phût bawk hek lo. He thu ziak tûr hian tu mân ka beng bulah se se thu dî min hlân lova, eng hla thu ril mah min fah bawk hek lo. He thu ziak tûr hian min ti mah suh se, ziak lo thei lovin chu putar mittui chuan min cho chhuak a. A man pein min leisak dâwn ni ula, eng zâta tam pawhin a man chuang hauh lo vang.
Putar kum 83 mi nên chuan kut thing meuhin kan inchibai lâwp lâwp a, a hmêlah hlim hmêl pu siin lungchhiatna sâr a zâm a, insûm theihna tlachham tih hriat takin lehlam a hawi a, a mittui chu a hru zauh zauh ta mai! A khawhar thu leh a lunglên thu te a sawi lai chuan, kei, mi tlâktlâi lo ber hian eng vânga hnemna thu chhâk chhuak thiam lo nge ka nih?
Keimah hi ka inten a, ka inhua a, eng vangin nge tawngkam thiam lo tûra Pathianin min siam, ka vanduai mang e tiin ka rûm vawng vawng a ni. Ka pain hnêmtu a mamawh êm êm laia ka kha a chih tlatte kha thlarau sual hnathawh ti ngam chiah lo mah ila, thlarau thianghlim hnathawh zawng a ni hauh lo vang.
A riang ngawih ngawih a, a damlai nun chu zinkawng khawhar takah hmangin, zîng leh zân hi a tân a dang lova, thlasik leh nipui hian a thinlungah pawimawhna a nei hrang chuang bawk hek lo. Chu putar chu ka Pa (ka Ni pasal) a ni.
Ka thianpa nên kan thlenna in (ka u, ka Ni fanu) lam panin dâr 9:30 pelhah kan inzui haw hnak hnak a. In kan luh dâwn chuan ka pa rawn chhuak tûr nên kan intâwk a, “Zânin chu i rawn riak dâwn em?†tiin min zâwt hâ a (heti anga zan rei hi a meng ngai lo, zîng takah a tho va, kawtthlêrah kalin a insawizawi thin). Min lo la nghâk reng a ni tih ka hriat chuan zahawm ka ti hle a, ka rilru pawh a buai kher mai.
A zan khatna atanga ka thianpa riah chhuahsan chu ka hreh hle a (ka bula rawn thleng ve a ni si a). Ka pa min sâwmna chu hnial chi niin ka hre lova, mahse, hnial lo thei lo dinhmunah ka ding bawk si. “Naktûk zânah ka rawn riak mai dâwn nia aw†tiin hreh tak chungin ka insawi fel thei ta hrâm a, lungawi vak lova ina a lût lai en chu hrehawm ka ti kher mai.
Ka Ni (ka Pa u) hian Oct. 12, 2010 khân kum 77 mi niin khawvêl a chhuahsan a. Ka pa hi sipai pensioner a ni a, tihian a nung ve tâwk tâwk a ni. Chutia khawhar taka a awm lai chuan kei ve hi min thlahlel ngawih ngawih a, a bula awm tûrin min duh a, nimahsela, ka thei si lo. Ka thlen tlaia ka va lên chuan ani patling, kum 83 meuh pawh a insûm zo lo a nih chu! “I ni chu la dam se chuan aw! A va duat dâwn che em! Nimahsela, tûnah chuan duattu pawh i nei tawh si lo. Kei lah hi tihian mal takin ka awm a, ka khua hi a har êm êm thin a ni†tiin min hrilh malh malh a. Ka tân engmah a ui lova, min tihsak a châk êm êm zâwk a ni tih ka hriatin atân eng nge ka tihsak ve ang tih ka ngaihtuah neuh neuh thin.
Ka thiante chuan zâna haw an ti ta thut mai. Kei lah ka pa hnêna riak tûra ka lo intiam zân chiah a ni bawk si a, ka mang a ang kher mai le. Chuti chuan rilru helhkam nei rêng rêngin hun ka hmang a, kâwla ni a liam dâwn chuan haw ve lo tûrin thutlûkna ka siam fel thei ta hrâm a ni. Ka thiante chuan min chuk malh malh mah se, na ka ti hran lova, pawi pawh ka ti bawk hek lo, a aia pawimawh tihtûr ka nei tlat alâwm.
Zânah chuan a inah ka riak ve ta ngei a, a lâwmna aiin ka lâwmna chu a nêp bîk hauh lo vang. Zîngah chuan ka thawh hmain a tho va, insawizawiin a lo chhuak daih mai a. Ka haw a hun tawh si, ka u pasalin min va thlah a, ka pa chu râl khata a kal lai chiah ka hmu ta! A rawn haw hman a inring a ni ngei ang, nimahsela, a rawn thleng hman ta si lo. In a thlen chuan engtin tak ngai ang maw?
(Thlalâk dah tel ka tum a, mahse ka upload fuh hleithei tlat lo. Sorry!)
Similar Posts:
- Pawisa bag(purse) chhunga Isua thla.(Sunday pual)
- Zo nun mawi kan kalsan ta kan ti maw?
- Zu zuar veng min ti maw, vannei ka inti asin
- Search engine…!
- Haihawt!
kawrek mai rawh
February 11th, 2012 at 11:59 am
Ngaihtuah zui theih tak thil a nih hi mawle.
[Report abuse]
February 11th, 2012 at 12:25 pm
Hlim leh lawmin leng thin mah ila, kan hlimna te chu nunhlui ngaih tizualtu mai an chang leh thin zawng a nih hi.
I ziak ngaihnawm a ni ang, ka inrin hmain a tawp daih mai.
tren tren
[Report abuse]
February 11th, 2012 at 12:26 pm
A ngaihnawm hle mai. I pa chu a khua a har dawn vei nen. Mahse, amah avangin i châm phah a, i ngaih pawimawhzia a langchiang tawh viau. Nidangah zinna remchang a awm leh mai ang.
Phuahchawp a nih leh nih loh pawh ka hrethiam love a!
Thlalak upload dan: imgur.com-ah i thlalak duh chu upload phawt la. A direct link kha copy la, misual.com new post-a image-ah click la, i direct link kha paste la, description-ah ‘kezungpuiliana ka ni’ tih i type ang a, i OK ang. Han preview chhin teh, a dik thlap mai ang. Thlalak pakhat aia tam i dah duh chuan a hmaa i tih ang tho khan i ti leh dawn nia. Mahse, description-ah khan a dang i hmang leh thung ang a, ‘ka naupan laiin hnap ka ngah hle’ tihte pawh a hman theih bawk a. I duh leh ‘valentines day hi ka hua’ te i ti dawn nia.
[Report abuse]
February 11th, 2012 at 1:12 pm
[Report abuse]
February 11th, 2012 at 1:35 pm
Thu i thiam zek mai! Ngaihtuah belhtur min hnutchhiah nual mai a.
Ka lo OT lawks .. Riakmaw sava hi ka perhthla tawh
[Report abuse]
February 11th, 2012 at 2:02 pm
Tar leh upa te hian an vanglai, an chaklai, an theih lai, mahni tawka thil an tih ve theih lai te kha an ngai thin ngawt ang. An upa tulh tulh a, kawmtu leh titi puitu tur an van tial tial a, an khua a har ngawih ngawih thin. An thian hluite, nitin zantin hun an hmanpui thin te zawng zawng kha an tuanna tlang a dang zo tawh aniha a thenin dairial an chan zawh san tawh anih phei chuan, riakmaw ianga khawhar taka tei ruk ruk mai loh chu hmabak an nei tawh lo.
Upa leh tar te kan hmangaiha kan duat viau laiin, an khawhar hnem turin kan titi pui peih hauh si lo. Damrei viau pawh hian hlutna a lo nei tak tak chuang lo anih dawn hi……
[Report abuse]
February 11th, 2012 at 2:17 pm
A lo haw hun chuan a ngai ngawt ang che nga, enge maw chen chu ngawi rengin a thut ka ring, ngaihtuah zui zel tur min hnut chhiah
[Report abuse]
February 11th, 2012 at 2:37 pm
A va ngaihnawm rua em. I ngaihsakna thinlung ngawt pawh chu a hlu hle mai.
[Report abuse]
February 11th, 2012 at 3:20 pm
Ngaihnawm hle mai. Chhim lam mi chu ni la ‘Ka Pa (ka ni pasal)’ ti duat lo in ‘Ka Tanga (tranga)’ ti fel nalh mai tur.
[Report abuse]
February 11th, 2012 at 3:34 pm
A ngaihnawm hle mai. Thangtharte zingah hetiang rilru pu in la awm zel hi a thlamuan thlak mang e. ‘Kan khawvel hi a la chhe lutuk lo’ tih min hriatchhuah tir e.
[Report abuse]
February 11th, 2012 at 4:15 pm
#3 Phuahchawp ni lo ve, tunkar maia ka thil tawn a ni nghe2 asin. Ka Pa thlalak rawn upload ka tum a, nizanah rei ngial ka bei a, ka ti hleithei lo. A tihdan min hrilh a, ka lawm hle mai. Tar leh upa zawkte ngaihsak hi thalai zawkte tih makmawh, kan kova innghat tlat a ni.
[Report abuse]
February 11th, 2012 at 4:26 pm
Ka pa thlalak en duh te in lo awm hlauh takin he thu tho hi ka blog (https://zunleng.blogspot.in/2012/02/riakmaw-iang-damlai-hringnun.html)-ah ka dah a, in lo en mai dawn nia.
#9 Ka Tanga tih chu ka la hre ngai miah lo. Awlsam et tak mai a.
[Report abuse]
February 11th, 2012 at 4:36 pm
I thu ziah thiam dan a la ngai reng a nih hi. Socio-politics lam ngawt lo deuhte pawh i thuziakahte hian han hrut tel tam thin ta la tun ai hian i thu ziakten chhiar a hlawh zawk lehzualin ka ring. Ngaihnawm khawp mai. Mahse kei chuan a zirtir lam hi ka ngaihtuah ve vak lo. Thu phumruk erawh chu i thiam lutuk, mi hruaibo tep alawm le.
[Report abuse]
February 11th, 2012 at 4:41 pm
I ziak thiam hle mai…ka pa min ti ngai á¹ep a lawm le
[Report abuse]
February 11th, 2012 at 5:13 pm
#13 Ka lawm e, in hniak hnung kan rawn zui ve det2 a nih hi. Huang zauh hi chu ka hmasawnna tur kawng pawimawh tak a ni ngei ang.
[Report abuse]
February 11th, 2012 at 10:49 pm
Ngaihnawm ka tih zawng tak, “Dawn ti sei” a ni ber e.
#9 ka thlawp khawp mai che..tawng hausakna zel pawh ni in ka hria..
[Report abuse]
February 11th, 2012 at 11:27 pm
‘Ka Tanga’ tih chu han vawrh lar teh u. Tawng hausakna tha tak a ni ngei ang
[Report abuse]