mi(sual).com

1. Introduction

Tunlaiah chuan Internet hmangtu tam zawk te hi Hnathawh lai nei leh Thalai zirlai an nih deuh ber avangin, Thalai-te tâna tangkai tur lam ka ngaihtuah deuhva. Mahse, hetih rual hian, Zirlai zingah pawh rawngbawlnaa mi puitling tak takte an awm tho avangin Tisa leh Thlarau lam thil huamkawp thei tur ka ngaihtuah a, thil dang dang ațanga fawmkhawmin “Side A leh Side B” tih hi ngaihtuah zui atan ka rawn chhawp chhuak a ni.

2. Side A leh Side B  Pawimawhna

Khawvela thil awm, hlu tak tak zingah hian Side A leh Side B nei an awm nual a. Hengah hian a Side A leh Side B tel ve ve lo hi chuan an famkim thei lova, an hlutna pawh a tla-hniam țhin a, a țhen-te phei chuan hlutna an nei lo hial a ni. Entirnân, kan Pawisa (Currency) hmanlai ah hian Side A leh Side B hi a inkawp tlat avangin “Pawisa, hlutna nei” a lo ni a. A Side A lam chauh hi awmin in print ta sela, Side B, a lehlam hi blank ta se chuan, pawisa a tling lovang.

Tungchhova kal mihring pawh hian Side A leh Side B (Tisa lama tih tur leh Thlarau lam tih tur) pawimawh tak mai kan nei a. Thlarau tello Taksa ringawt chu ‘Mitthi’ a ni mai a, a uih a, a tênawm a, a hlauhawm tawh țhin. Taksa tello Thlarau ringawt pawh “Thlahrâng” tih bak a hlawh zo bawk hek lo. Chuvangin, Van rama kan kal hunah pawh he lei taksa hi ala pawimawh dawn a, tihdanglam (transformed) niin thlarau leh tih-danglam taksa (transformed body) neiin Van ramah kan la lêng dawn a ni.

Kohhran leh Sorkar hnuaia Thalai hnathawk leh Zirlai awm te hian kan Tisa leh Thlarau lam thil hi balance-a kan kalpui a, Side A leh Side B te hi a nihna tur dik tak zela kan hman loh chuan kan rawngbawlnaah, kan zirlai ah, kan sorkar hnathawhnaah leh țhianzahova kan awmkhawmnaah kan hlawhtling thei lovang a, midang tana hnawksak leh harsatna siamtu kan ni mai dawn a ni. Chuvangin, Tisa leh Thlarauva inbuatsaihna a pawimawh ve ve.

Paula chuan Ringtu nun belhchiandawl leh chhenfakawm nei tur chuan “Taksa insawizawi a, inthunun țhin mi” leh “Thlarau lam thil ngai pawimawh mi” nih a ngai, a ti a. Lal Isua pawhin, Tisa hi rawngbawlna kawngah a tangkai êm êm a, mahse a chak lova, a peih rei țhin lova, Thlarau erawhchuan a peih rei a, a țangkai zawk bawk a ni, a ti bawk. Chuvangin, Rilru & Taksa-in a thawh tur dik tak a thawh theih nan-a buatsaih hi Side A lam chan a ni a, Thlarau lamin a thawh tur dik tak a thawh theih nan-a buatsaih hi Side B lam chan a ni thung.

3. Side A

Side A lam lo ngaithla hmasa ila. Side A hi “Tisa lama tih tur Pawimawh” (Tisa Ralthuam) tiin ka vuah a. Kan Rawngbawlna leh thiltihna kawng engkima hlawhtlinna kan neih theih nan kan rilru leh taksa te hi hna an thawh tur dik tak thawk thei tura buatsaih leh vawn uluk a țul em em a. Rawngbawlnaa hlawhtling tak tak tur te, kan zirlaia ti țha tak tak tur te, leh kan Sorkar hnathawhnaa hmantlak tak tak tur chuan taksa leh rilru invawn uluk a, nasa taka inbuatsaih (train) a ngai a ni. Chuvangin, heng  training kan lakna hrang hrang te hi Tisa Ralthuam angin ka ngai a. Heng Ralthuam pawimawh tak tak te hmang hian kan taksa leh rilru te kan train anga, kan tichhel ang a, hlawhtlinna kawngah min hruai dawn a ni. Pawimawh tam tak awm zingah kawng 3 chauhvin lo chhui ila:-

3.1. Hriselna & Exercise hi ngaih pawimawh a țul hle. Ringtu engang mi tan – Zirlai a ni emaw, Sorkar hnathawk a ni emaw, a hriselna a ngaih pawimawh ngei ngei a ngai. Hriselna țha lo chu rawngbawlna lamah mi hmantlak tak pawh nise, lehkhathiam tak pawh nise, Sorkar hnathawhnaa hna thiam tak pawh nise an hman tlak thei tak tak lova, an tlo lova, an chhawr tak tak theih loh a ni ber. Tin, mihring hi atirah hrisel tak pawh nise, taksa insawizawina lam te a ngaih pawimawh lohva, ei leh in te a fimkhur loh chuan a hriselna-in a daih rei ngai lova, hna a thawh rim luattuk emaw, a hriselna a ngaihthah phei chuan reilote-ah natna-in a tlak buak a, hmantlak lohvah a inchhuah thuai țhin. Hetiang mi khawngaihthlak tak tak hi Zoram rawngbawltu chhuanawm tak tak zingah te, officer duhawm tak tak zingah te hmuh tur leh sawi tur an tam hle. Chuvangin, Zan mut hmat leh Zing thawh hma te, exercise/walk uar te, ei leh in fimkhur te, taksa hriselna lam hrim hrim ngaih pawimawh te hi Ţhalai changkang tan chuan hlawhtlinna bul leh malsawmna bul a ni tih i hre nawn leh ang u.

3.2. Taihmakna hi Rawngbawltu, Sorkar hnathawk leh Zirlai tan chuan hlawhtlinna, hlawhtlin tawh hnu-a hlawhtlin zelna, leh hlawhtlin rengna rahbi pawimawh lutuk a ni leh bawk. Rawngbawltu hmantlak tak pawh rawngbawlna atana inbuatsaihna kawngah a taihmak tawk loh chuan Rawngbawltu hmantlak a ni rei thei ngai lo. Chutiang bawkin, Sorkar hnathawk a hnaa thiam tak pawh Taima taka a hna a thawh loh chuan a tirah fak lo hlawh ve pawh nise, Hotute fak leh chawimawi a hlawh rei tak tak ngai lo. Zirlai tan bik phei chuan mi lehkha zir peih loh huna zir țhin te, mi class kal peih loh laia kal peih țhin te, mi mut tluk tluk laia am taka lehkha lo zir țang țangte hi mi hlawhtling leh result țha hmu an ni ngei ngei țhin.

3.3. Adviser Ţha Neih (Advise ţha lak tam) hi thil pawimawh tak a ni leh. Khawvela mi ropui leh hlawhtling tak tak te hi Adviser nei ţha ber ber te an ni zel.  Zawlnei-te leh Pathian Thuhriltu hmingthang te, Ram hruaitu ropui leh Sports lama mi hmingthang te, Lemchanna (film) khawvel leh University ațanga mi hlawhtling tak tak rawn zir chhuak-te hi Adviser te, Coach te, Director leh Professor, Books, etc., nei țha ber ber-te an ni chawk.

Chuvangin, kan hlawhtlinna thuruk hi thurawn min petu leh min counsel a, min zirtirtu kan neih ţhat leh ţhat lohva a innghat thui hle. Hei hi keimahni’n kan zawn chhuah a, kan dapchhuah a, thurawn țha, adviser țha leh zirtirtu ţha kan khawm thiam a pawimawh thung. Zirlai leh Ţhalai hlawhtlin ngei tum leh duh tan chuan, kan ngaihsak zawng leh ngaihsan zawng-te uluk taka thlan pawimawh a, Bible sawi angin Ţhian sual-te kawm lo tura fimkhur pawh a țul hle ang (1Kor.15:32).

4. Side B

Side B lam lo ngaithla ve thung ila. Hei hi “Thlarau lama tih tur Pawimawh” (Thlarau Ralthuam) tiin ka vuah a. Ralthuam hi a pawimawh êm êm a. Khawvel-a sorkar te in-elna leh sorkar chak an tehna pawimawh berte zinga pakhat pawh “ralthuam neih that” ah a ni.

Ringtu mimal tin nun pawh hi nitin ralthuam famkim inbel a, sual ral do tura a inbuatsaih loh chuan a ei theih tur zawnga phi ruai țhin kan hmêlmapa Diabola hian ringtu duhawm tak tak te, țhalai chak tak tak leh rawngbawlnaa țangkai tak tak te hi awlsam takin a rawn hneh-lak leh mai țhin. Chuvangin, Paula chuan heng  Ralthuam 7 te - Thutak, Felna, Chanchin Ţha, Rinna, Chhandamna, Thlarau Ngunhnam, Ţawngțaina (Eph.6:14-18) te hmanga inthuam turin thu min rawn a ni. Chhum bung deuhvin, ka duhlai leh ngaih pawimawh lai chauh ka’n thual rih mai ang e.

4.1. Thutak leh Felna-a inthuam tlat. He ralthuam 2 te hian ringtu mimal nungchang, chetzia leh ţawngkam chhuak (believers’ integrity & faithfulness; sanctifying righteous living) a kawk bik a. Heng, “In awmdân chu Krista Chanchin Tha nen inmawi rawhse,” (Phil.1:27) tih thu te, “In chêtzia zawng zawngah lo thianghlim rawh u…Jentailte zinga in chêtzia chu mawi tak ni rawhse,” (1Pet.1:15; 2:12) tih thute nen hian an sawitum a in-ang a. Tungchhova piang mihring chu mahni ngaihin fel, țha, dik, fing, hria eng-ang pawh nise, ‘Lal Isua avang chauhva mifel ni thei kan ni’ tih hi theihnghilh lo turin min duh a ni (1Kor.1:29-31).

4.2. Lal Isua felna ţawmpuitute hi kan nungchang leh chêtzia a thianghlim a, a mawi hi Pathianin min phut tlat thung. Nun thutak, belhtlak leh belhchiandawl nungchang put a ngai a, Lal Saula anga midang ti-chhia leh ti-beidawng zawng nungchang (destructive character or destructive motives) hi Pathian huat zawng a ni. Midang tihchhiat aia tundin hram hram tum tlatna rilru neih tlat-te hi a Pathian-Thu a, Pathian lawmzawng a ni. Tirhkoh Paula chuan, thikna avanga midang chhiatna tura thiltih te, ringtu tih-a mawi lo khawpa thinrimna hrik-thlak te, dawta mi chanchin sawi te, a chhe zawnga mi rel te etc. chu bansan turin ringtute min fuih a ni (Eph.4:25-32). Upa T. Romama hla kaltlanga “Thlarau Thianghlim aw” hian a pawimawh zia a rawn tarlang chiang hle,

Miten min chhiar, min thlir reng e,

ka awmdan zawng zawng an hai lo,

Krista nunmawi leh Chanchin tha,

Keimah ah hian hmuh an chak țhin.

a lo tih hi a takin hman theuh i tum ang u.

4.3. Lal Isua chauh hi Chhandamtu a ni. Khawvelah hian, engang hawi zawng pawhin, chanchin thar leh chanchin mak pui pui a pung tual tual a. Belh tur leh rin tur apui an tam tual tual bawk a. Kan harsatna-te min sutkian sak vek theih inring mi mak leh ropui tak tak pawh an lo chhuak zel bawk. Bible sawi angin an pung tual tual dawn tih hre phawt mai ila.

Amaherawhchu, hetiang karah hian ringtute chuan Lal Isua Chanchin Ţha lo hi chu chanchin țha dang a awm lo hrim hrim (Gal.1:8ff), tih hi kan hriat reng a pawimawh a. Lal Isua lo chu min chhandam thei hming dang reng vanah emaw, lei ah emaw pawh an awm lova (Tirh.4:12), Lal Isua anga Rintlak leh Belhtlak, min Chhandam thei hi an awm lova, an awm ngai dawn lo, tih hi chiang taka kan vawn tlat a pawimawh a ni.

Setana bumna chanchin mak pui pui – The Da Vinci Code, The Last Temptations of Christ, etc. tih te, “Isua kha Kalvary kros-ah a thi lo, Tibet-ah a tlan bo a, a Thlanlung pawh Tibet-ah a awm”, tih ang chi inbumna te hi hre cham-chi țhin mahila, hengte hian Lal Isua Chanchin Ţha duhawm tak te, Lal Isua kan rinna te, Chhandam kan nihna te, Bible thu nghet leh rintlak tak-a kan innghahna te hi ti-nghing mai mai lo sela,  Thlarau ralthuam famkima inthuamin, Diabola hi huai taka beiin, ringtute i kal zel ang u.

5. Conclusion

World Cup 2006, Germany-a Italy leh France an in final zân kha ka thlir ve a. Khawvela Footballer ţha leh ka ngaihsan em em, Algerian mi Zinedine Zidane (34), French ho innghahna khan…a sportman rilru paihin (bawng rilru pu-in?) Italian player Marco Materazzi awm mai mai kha a sithlu tawp mai a!

Red Card pe-in hnawhchhuah nghal a ni.  Zidane’n a sik thluk hma hian Materazzi hian Zidane-a huat zawng tak thu a sawi a. News leh Chanchinbu lam ten an ziak danah chuan Zidane hi Algerian Muslim rethei tak chhungkua ațanga seilian a ni a, a Nu hi nu-nikhua vak lo a ni a, a farnu hi Nawhchizuar (prostitute) a ni nghe nghe a, amah pawh hi Muslim Terrorists zingah atui hle a, sum pawh a thawh nual ni ten an sawi nghe nghe.

Heng zinga a engemaw ber hi Materazzi hian Zidane-a hriat turin a a sawi chhuak a, chu chu Zidane hian a ngaithei ta lo niin an ring țheuh a ni. A vawikhat tihna mai a lo ni lo lehnghal a! Kum 1997 khan field chhungah bawk, player pakhat a hnek thlu tawp tawh a, kum 1998 World Cup khan player dang a rap-hrual vak tawh bawk. Kum 2000 Champions League match ah pawh khan Hamburg player Jochen Kientz chu a lo sithlu leh tawh bawk a ni. Zidane hian “Ka thiltih kha ka inchhir lo,” zu han ti zui nghe nghe a!

A enga pawh chu lo ni se, khatiang hun pawimawh lutuk tawh-a khatiang thil rapthlak lutuk a ti duh mai kha… amah maiin a zahawmna a hlohvin, hnehna a chân lova, French chak loh chhan kha AMAH ZIDANE-A VANG ni ta berin khawvelin a ngai ta reng a nih kha.

Keini pawh Side A leh Side B (Tisa lama tih tur leh Thlarau lama tih tur) te hi kan ngaih pawimawh ve ve loh chuan kan tan chhiatna leh mualphona ala rawn thleng ang, chumi hunah chuan keimahni mai kha kan mualpho dawn lova, kan nu leh pa te, chhungte, kohhran te, khawtlang leh Pathian thleng pawha ti-lungngaitu kan ni dawn a ni. Chuvangin Side A leh Side B hi i ngai pawimawh ang u.

Similar Posts:

• Pentecost pualin
• Kristian sakhua leh Mizo hnam sakhua danglamna
• Damna duhin boralna lamlianah(?)
• Nunna thing vs a chhia leh a tha hriatna thing
• A ram leh a felna zawng hmasa la engkim a pe ang che.

Recent Posts:

• Church Denomination leh Mizo Kristiante
• Chhungkaw tan thusawm pek.
• MILADY
• Mizo League (EPL)
• Niuh neuh!

This entry was posted on Saturday, March 10th, 2012 at 9:30 am and is filed under Advice, Opinion, Religion. You can follow any responses to this entry through the RSS 2.0 feed. You can leave a response, or trackback from your own site.