mi(sual).com

Ni sen sa leh bus nghah…
‘Hmanhmawh ni tak hian Bus hi an vang emaw’ tih mai tur a ni ziah. Ma’rawhchu keini ang duang tan zawng, Bus nghah mai loh chu tih theih dang awm hek lo le. ‘Thian thurualpui nei ve tal ila, pawisa ka seng tlem ve deuh tur’ ka ti rilru a, a sawt der lo. Hmanhmawh nen a inmil lo tawkin ka chuanna Bus lah ka inkhawm kalkawnga kal tur emaw ka tih laiin hmun dang kal tur a la ni zui! Palace ground bus stand ka chhuk chiah tiin kan thupui hian ka mit a la nghal. An ziah ang ang in aw…

LOST
Name: Clara
Breed: Irish setter
Color: Red
Age: 5 years
To the person who finds Clara, a reward of Rs 30,000 will be given.

A hminga Veterinary Doctor ni nafam chuan ka hmuh tur tak ka hmuin ka inhria. Mahse.., Ui bo pakhat hmuh avanga lawmman an pek tur pawisa chu ka va ui e ka ti rilru! Inkhawm lo hian Palace ground velah Ui hlu leh manto (Uicho ni lo vin) Clara-i chu ka zawng mai dawn em maw ni le? Ka hmuh hlauh chuan Rs 30,000 ka hlawh mai dawn a nia…’ ka ti rilru a, ka nui ruh ruh.

Inkhawm kawngah ka ngaihtuah chhunzawm zel a. Engatinge Clara-i neitu khan a ui bo hmuh leh nan a Rs 30,000 teh meuh mai a thehchhuah ngam le? Clara-i kha kum nga chuang a vulh tawh vangin, nitin a nunkawnga mi pakhat a ni a, a tan a hlu a ni. Ui dang lei turin pawisa a nei teh meuh ang, mahse Clara-i kha atan chuan ‘cial tlat. Kawng awm zawng zawng a dap hnua a hmuh zawh loh hnu ah pawh, hmu an lo awm hlauh tak mial in… tiin a ui bo chungchang chu mitin te hriat turin a tlangzarh a lo ni.

Duli bo leh Beram bo…
Duli bo chanchin (Luka 15:8 – 10) Sunday school-a kan zir chungchang ka ngaihtuah chhuak a. Duli neitu chuan, hmuh leh theih beiseiin khawnvar eng hnuaiah hmunphiah nen a duli bo kha a zawng a. A rilru kap tlattu, a duli bo a’n hmuh chiah kha chuan a lawm a, a thenrual te sawmkhawmin, a lawmna tawmpui turin a sawm hial a nih kha.

Lal Isua, he khawvel a a len lai khan beram bo chanchin tehkhinthu (Matthaia 18:10 – 14) a sawi a. Beram vengtu chuan a beram dang zawng zawng kalsanin beram bo chu zawng turin a kalchhuak a. Tin heti hi a nia, beram bo a hmuh leh chuan, hling zing atanga chhanchhuakin, a koki ah nghatin hlim leh lawm takin a hawnpui tih kan kan zir thin.

Ni, thil kan hloh reng reng in rilru a nuam ngailo. Thil hlu tak a ni emaw nilo emaw, rilru a kap a, kan kalna leh hmun kan tlawhpuina te kan rilru in fangkualin,a bo dan kawng hriatchhuah tumin kan ngaihtuahna rilru kan seng fo thin.

I kawng zawh lai kha…
Kristian nunkawngah hian thlarauva khah reng hi a har fo thin tiraw? Kan beisei ngai loh te’n kan nun min bawh changin, hnungtawlh mai hi a a va awl tak em!

Min hmangaihna ropuizia sawi thiam phak loh kan bosan thin hi kan chapo nge, Pathian nihna hi kan hrethiam tak tak lo zawk thin ni ang le? Hringnun rahbi a pial laklawh hian insiamthat leh a har hle. Ka thian duh tak, I nitin kawng kha inenfiah la. Kristian, Pathian ni tin inkhawm thin si khan, fianrial hun engtinnge I hman thin? Nikhatah vawi engzatnge a thu thianghlim I chhiar a, I tawngtai thin?

Tehkhinthu pahnih kan sawi lan tak ang khian a hnen a ta kan bo hi a hnena let leh turin min duh a, kir leh duhna kan neih theih nan, kan thiannu/thianpa a hmang thei a, kohhhran leh thil dang natna leh harsatna te, hlimna leh lawmna te a hmang thei. Heng thil zawng zawng kan nuna a thlen changin luhlul kan chhuah khum zel dawn nge lawm takin phuloh hmangaihna chu kan pawm zawk dawn?

Mimal a zirin sual ka tih pawh a dang thei khawp. Mi thenkhat saltanna ah midang in harsatna an tawk lem lo thei bawk. Chuvangin mahni nun theuh i inenfiah fo ang u. Tu paw’n duapna lai kan nei theuh a; tawngtai harsat riau lai te, inkhawm peih loh ngawih ngawihlai te (hunawl nei tho siin), Pathian thu chhiar thatchhiat riau lai te, midangte ei loh deuh lai te, thildang tam tak a awm ang. Kan chaklohna theuh hi kan inhre theuhin ka ring.

Isua Kristaa inthuam a, min tlanna ropui leh hlu hi hrechiang a, hlutthiamin, nitin kan insiamthar reng a tul. Hun remchang kan neih apianga Krista leh a kohhran belh zel hi a tha. Kan hna leh zirnain a zir lo a nih chuan thudang; khawi hmunah pawh awmin, eng hna pawh thawk ila; he lei hi kan kumhlunna tur a nih loh bakah tu’n kan hma hun kan hre lo. Chuvangin chatuan nun nei tura inring rengin i awm ang u.

Similar Posts:

• Beram No!
• Lungleng vang
• Sual tih chu sual leh zualna
• Hei le, OT Huang Reloaded!
• Japan lam ve thung aw: Part 1

Recent Posts:

• Church Denomination leh Mizo Kristiante
• Chhungkaw tan thusawm pek.
• MILADY
• Mizo League (EPL)
• Niuh neuh!

This entry was posted on Tuesday, April 24th, 2012 at 9:30 pm and is filed under More than words, Religion. You can follow any responses to this entry through the RSS 2.0 feed. You can leave a response, or trackback from your own site.