mi(sual).com

Mihringte leh nunna neia boruak hmanga thaw thei zawng zawng khawvela lo piang chhuak ve hrim hrimte hian kan zavaia hunbi inang tlang pawimawh tak pahnih kan neih chu ‘Pian ni leh thih ni’ hi a ni. Hei hi tumahin kan pumpelh thei lo reng reng a ni. Mi, he mi khawvela a lo pian chhuah tawh reng reng chuan hmuh thiang lo hmu ang a ni a, thih a hmabak hrim hrim ta phawt mai a ni. Chatuana nung tlang turin a pian theih loh.

Chatuana nung tlang tur chuan pian chhuah ni nei lo, awm tan ni nei lo nih a ngai a ni. Chutianga awm tan ni nei loa chatauna thi lo tura lo nung tlang thei chu engkim siamtu Pathian chauh chu a ni. ANI chuan a lo awm lai hian awm tan tirh lai a nei chuang lo a, Amahah ‘A tir’ a awm ve lo a ni. Thil siam zawng zawng hian awm tan tirh lai an nei vek a, an tawp leh vek dawn bawk a, ‘a tira’ awm an ni vek a ni. Chuvangin, awm tan ni/pian ni an nei ang bawkin, tawp ni/thih ni an nei leh vek dawn a ni.

A nih leh ‘THIHNA’ hi engvanga lo awm nge le? Kristiante inzirtir dan chuan mihring zawng zawng hi an thlahtu bul ber, mi pakhatin dan a bawhchhiat avanga mihring hi lo thi ta thin niin an sawi a. Chu mi chuan lo bawhchhe ta lo se mihring tumah hi an thi dawn lo ni awm takin an inzirtirna thu atang chuan chhut theih a ni. Chuti ni sela, nungcha leh thing leh mau te, hnim hring tinrengte hian Pathian dan an bawhchhe ve tihna em ni ang? Engvanginnge an thih ve kher? Nge, mi pakhat Adama bawhchhiatna mawh chu an phur tel ve zel zawk ni ang le? A nih loh leh, kan bawhchhiatna avanga kan taksa chu lo thi thin ta a nih a, kan thlarau te pawh lo thi ta a nih chuan, min tinung lehtu Krista chuan kan thlarau chauh tinung loin kan taksa pawh thi thei tawh lo turin a chhandam thei lo em ni ang le? Engvanginnge kan thlarau chauh a chhandamnaah chuan tihnuna a awm ni? Thiltihtheihna famkim a nei lo em ni le? Engpawh ni rawh se mihring hi thlahtu bul ber mi pakhat Adama tihsual avanga taksa leh thlaraua thihna tawrh phah kan nih a, Isua Krista an tih, hmana an khenbeha kha mihring tak mai ni loa, Pathian tak anih tak meuh chuan kan thlarau mai ni loin, kan tisa taksa ngei pawh thi leh thei tawh lo turin a tinung thei ngei ngei tur a ni. Chutianga a ti thei lo a nih chuan Pathian a ni lo emaw, Pathian fapa a ni lo emaw a ni ang.

Awle, Lazara kaitho tura a thlana a kal pawh khan Isua kha engtinnge an tih kha? ‘He mi, mitdel mit tivartu hian he mi pawh hi a thih lohtir thei lo em mi?’ tiin zawhna an siam a nih kha. Isua kha Pathian emaw, Pathian fapa dik tak emaw ni sela chuan Lazara thi tawh pawh kha chatuan nun neiin a kaitho ang a, tun thlengin Mizo Israel ram fangte chuan Lalzara chu an la chibai nuk nuk ang chu. Mahse Isua kha siamtu Pathian a ni lo a, Pathian fapa mal neih chhun a ni bawk hek lo.

Tin, mihring hi thlahtu bulte’n thil sual an tih avanga thi kan ni lo a, an thil sual tih avangin thlarau thi kan nei hek lo. Engkim siamtu leh dintu hian mihring leh nung dang zawng zawngte hi an thlatute sual vang emaw, anmahni sual vang emaw pawh ni loin, nung tur leh eia in tura lo piang an nih rualin, thi leh tura lo piang hrim hrim an ni a, chu chu anmahni siamtu Pathian ruat dan a ni zawk a ni.

Chutichuan rei lo te chauh dama thi leh mai tura kan lo pian chhuah hian, mitthite kan hmu thin a, chu thihna chuan a damte tan nunna hlutzia min hriattir thin a, engkim siamtu leh nunna siamtu hlutzia te min lo hriattir bawk a, siamtu Pathian inpuanna ropui chu he thihna hi hmanruaa a rawn hman hian kan hring hriatna chu tihfinin a lo awm a, Lal inpuanna ropui chu a lo lang fiah ta thin a ni. Nunna leh Thihna te siamtu Pathian chu Lalber a ni a, fak leh chawimawi tlak Pathian KHUANU chu a ni e.

Similar Posts:

• Thihna
• Kristian sakhua leh Mizo hnam sakhua danglamna
• Thihna thupekah “Thlarau” a tel ve em?
• Pathian kan nihna
• MIZO HNAM SAKHAW DIK PHOCHHUAHNA – IIby. Rorelliana

Recent Posts:

• PÂWL LAL HRAWTNA AIZÂWL???
• MIZO HNAM SAKHAW DIK PHOCHHUAHNA- IVby. Rorelliana
• Hriat chian lehzual
• Sunglass man to chhan!
• Tawng tih hausak a pawimawh!

This entry was posted on Sunday, April 1st, 2012 at 1:30 pm and is filed under Opinion. You can follow any responses to this entry through the RSS 2.0 feed. You can leave a response, or trackback from your own site.