mi(sual).com

(Ka ṭhianpain a ngaihzawng tân a ziah a ni a, hming hi a lem a hmang thung.)

Theihnghilh daih ka duh a, ka thei lo a. Nikhat tal amah ngaihtuah lova awm theih ka chak em em a, ka thei lo a. A lak atangin beisei tur engmah ka nei tawh lo tih ka hria a, beidawnsan theih ka duh em em a, chu pawh ka thei chuang lo.

Kumkhat zen zawn a liam ta. Ka mitthlaah ka hmu fo va. A nui lai hmel ka hmuh chuan ka lung a chhia a, a lungchhe lai hmel ka hmuh in ka lung a ti leng a. Heti em em hian hmeichhia ka lo duh thei ang tih ngaihna pawh ka hre lo.

Ka pa chuan “A hmeltha reuh hle mai a” a ti a, ka nu chuan “A la naupang em mai” ati thung. Ka nau chiah mipa chuan nui vur vur chungin “I thlang thiam ve reuh khawp alawm” a ti a, kan te ber erawh chuan “Awi a u,a fel bon top” a ti thung.

A tumah khan min sawisel sak duh lem lova, a neitu ber khan ka duh em a, min ṭha en mai ni khan ka hria.

Ka hming chu Lalrinkima a ni a, min hria chuan Rina tiin min ko vek a. Mihring mihrinnaah buaina han siam tur leh thilsual lian pui pui ti tur khawpin huaisenna ka nei lem lo bawk a, thenawm khawveng velah pawh misual hmuh chuan min hmu bik lo niin ka hria. Rilru chhungril ngaihtuahna kan inhre lo tawn nasa bawk a, ruihtheihthil engmah ti lo ta chu fel min lo ti ve deuh deuh te chu an awm a ni awm e. Ka miziaah thutak run aiin ni deuh huau huau chi ka lo ni bawk nen, ka thian kawmte pawh kei aia naupang deuh vek an ni. Chuvang te pawh ni fahmiang, min ralkhat hriat feih feih chauhte pawhin naupangchhia min han ti thla rawk zel a. Chu aia min hrechiang leh deuhte chuan ngaihzawng nei ve tawh turin min rawn thla zen bawk a. A tute mah chu ka bengkhawn teh vak chuang hlei lo a.

A nihna takah chuan ngaihzawng neih te chu ka duh lo pawh a ni bik lo. Ṭhianho han titi nikhua pawhin a  sawi peih pawl tak chu ka ni. Keima tawkah neih ve pawh ka tum thin a, mahse a saseh-ah meuh chuan ka ti niu niau a, thian tha takah ka chhuah mai zel! Kan inngainat viau tawh a, kan han inkhalhfal ve nalh a, thiante ho pawhin hei chu a ni ve tak tak tawh ang an tih hnu pawh hian a thupui tak tak han luhchilh a, a tuipuia han pil pui dan tak hi ka la man fuh chat lo deuh a ni ber mai ti mai teh ang. Chu thleng thleng a min hriatpui tu chu mi tlem te tak tak an ni tho a pawi pawh ka ti teh vak rih lo e.

Mahse a inmil tur chi hi chu awm a ni ngai..Siamtei ka biak hmasak ber ṭum chuan aw khur dur dur in ka bia a, ani’n aw lawi rutin min chhang thung a! Mi pahnih sawi tur hre miah lova darkar chanve vel han din dun vang vang a, a khat tawka inen paha han innuih var var  tawh chuan rilru puthmang  tur ang hi chu a lo hriatthiam ve theih khawp mai. Rilru kan inhre tawn a, ‘ni’ ang chuan kan han awmchho a, a rei deuh hnu chuan kan ‘ni’ ve mai. Ka thiante ho pawh an lawm ve viau kha maw.

Ngaihzawng nei ngai lo tih takah ka phur khawp mai a, ka rin ang he hu erawh a lo ni lem lo. Kei aiin kum li velin a naupang a, mahse mipa han chhawnchhaih vel leh awmze nei taka mitmei han neihte chu a vawikhat tihna a ni lo tih ka hre thei mai a. Zirlai lampang a thlahthlam ve hle a, sakhuana lampang a la thutak angreng hle thung. A hmel chu tha eltiang leh  a aia tha awm lo han tih tur chu ni lo mahse mipa pangngai tan chuan lungawina tham chu a ni. A ngo hle a, a pian  a nalh pangngai hle a, a sam a sei nalh viau bawk. Nilenga fashion channel en peih tih takah a inhmeh zawng thawmhnaw a hre hle a, a inchei duhdan chu pa kherkhiap deuh tan pawh sawisel hleih theih loh tawk chiah chiah vel a ni awm e ti mai teh ang.

Filmstar atchilh deuh deuh a nei ve a, infiamna lam pawh khunkhan takin a titipui theih a, inkhel te chu en peih ve tak a ni. Mi biangbiak a thiam hle a, a nelawm a, a zuamawm hauh lo thung. A chapo lo hle a, a ‘chhelo’ tih erawh a inhai lo viau. Ngawichawi tak leh zakzum tak a ni lem lo a,a ngaihdan chu puah chhuah pui pawp chi, thiante zing a hmahruaitu nih tum tlat chi a ni.A tunlai tawng takin a ‘confi’ hle tih hian a sawifiah ber awm e..

A thikthu pawh chhe ve tak a ni.Hmeichhia ka ngaihzawn rual chu thik theih loh pawh a nei lo.A kumin a la zir bawk a,han tihtauh maite kha a la hrat a,a tihtauh ngun ang ai khan thlem lungawi a har lo hlauh a a zia viau thung.

School kan chawlh lai a innang fuh bawk a, nitin zantin deuhthaw kha ka’n luhchhuah tehreng a! Thalai thisen lum lai tih takah kalvari sadai han ṭhiah mai chak rum rum changte pawh awm lo chu a ni lo. Mahse nakina kan inchhirna tur a ni tihah khankanchiang dun a, heti lamah chan angel bihthlak ka zuam e.

A luh a lut tam ta nangang chu a chhungte pawhin min hre ṭha ve viau a. An rilru te chu hriat theih  a ni lo a, mahse an lan mai dan atang chuan an fanu ka rim chu pawi an ti tehchiam bik lo niin ka’n hre ve ngawt a! Zankhat pawh a putea damlo kan turin an chhuak a, in min nghah dun tir ngawt mai a, an rawn haw hma chu lo awm ve tur khan min ti mauh mai. An damlo kan dinhmun han tlahniam deuh, an chiai si khan engmah an rawn sawi ta si lo, keini riltam bawk si khan an chawthing kan han ei zo vek mai ah. Dar sawmpahnih velah an rawn haw a, keini kan lo la laklawh nasa mai  si. Kan chaw ei lai kha chhungkaw pa ber khan min nghak ran mai a, ei tui chu har ve tak a ni..a tuk tlaiah an ina chaw ei turin min han sawm zui a, mi ina chaw ka ei tawhah chuan ka la ei tlem ber tum  a ni awm e.

Tumkhat chu khawhar inah ka thiannu ka kalpui ngawt mai a. Chupawh amah ka sawm a, a hman loh vanga midang  kalpui chauh ka ni nghe nghe. Thalai an tlem bawk nen tum lawk hauh lohin kan tlaivar zui a. Khawvar dawn hnaihah kan lo muthlu a, kan lo inkuah a ni awm e. Tuin nge lo hrilh a, engtin nge a bulah an lo sawi chiah chu ka hre lo na a, a tuk zana ka leng chu kan in chhuahchhal tluan zak hi a ni mai a.Ka hnial lem lova, thlem pawh ka tum lem lo.A hrilhtu khan dawt pawh a sawi nual tih ka hai lo.A duhtawk a sawi a, a tap titih ta mai a.A bulah ka thu a, ka thiam ang tawk chuan a tana ka rinawm tur zia te chu ka hrilh ve a..A nui lova, a tum lova, a mittui parawl kiang chu a lawm vang nge a thinrim vang tih ka hre lo.

Ka kuah a,a kut chu han lak mai ka tum  a,a tang nasa kher mai. A mitah ka en a,”min hmangaih em” ka’n ti tawl mai a.

A rin loh lai taka ka’n zawt phawng chu a lai ve deuh a, a mengzau kawk a, mi pawh a en ngam lo. A hmai a hup a, a lu a bu nghat nghat a. A kut chu ka han la kang leh a, a tang tawh miah lo tih ka hria. Min rin tawk leh rin tawk loh ka zawt a, min chhang lova. Ka tan a rinawm theih dawn leh dawn loh ka zawt leh a, min la chhang chuang lo..Ka sawitur hre tawh si lo tihngaihna hre lo chuan ka kuai dak hret a,ka fawp ta ringawt a. Chutah zet chuan min chhanglet ve ta.

Kei ai mah khan lunglen te kha a lo tuar thei lo ve lehchhawng a. Phone-a kan inbiak changa a lungleng a’n tap hliam hliam thin zet chu bungraw tel fel a, a nih nih ni tura haw vang vang mai chakawm duh tak a ni. Mahse a mittui khan mi a ti pachang a, ka nihna min hriatchiantir a, theihtawp chhuah thei turin chakna min pe thin. Siamtei khan keimah rau rauah pawh ka mize tha zawk, fiamthu duh leh phawk ru fu, mahni inringtawk tak leh a huna luhlul larh mai, mahni hna chanpual zawh tum tlat thin  kha min phawrhchhuah sak niin ka hria..

Kanni rei tawlh tawlh a,ka duh telh telh ni maiin ka hria..ka hmalam hun ka ngaihtuah apiangin ka suangtuahnaah a tel ve ta ziah a. Innei tawh mai ang ka tih fiam tuma “I zak thei lo e a” a ti ringawt kan nuih nasat zia te kha theihnghih pawh ka inring tawh lo.

Class ka kal a, phone keng tho mah ila ka switch off a, a message dawn ka beisei vangin ka on zeuh zeuh ngam chauh a. Tlai lam, kan bang ṭep tihah lecturer te awm loh laiin ka on leh a, ka pa number aṭangin miscall a lo awm ṭeuh a, message a lo awm bawk a.

“Mama i thiannu Siamtei kha motor accident ah a boral a a pawi khawp mai.A hnukchah dawnah i hming a lam a lam asin.Tuar dan i thiam hram hram dawn nia aw.”

Ka mualpho ka hlau a, class aṭangin ka chhuak a, ka ṭhianpa (kan pahnih chiah kan class ah mizo kan awm)in min rawn zui ve bawk a. Ka rilruah engmah a awm lo a, ka ruak vek ni mai khan ka hria. Room ka thleng a, khumah ka bawk thlawp a, ka piantirh ata a vawikhat nan hmeichhia ka hmangaih vangin ka mittui a tla ta zawih zawih a.

A liam ta, ka suangtuahna khawvela ka inchhung lalnu tur chu a kal ta. A hma lawka mu hahdam tura min ti tu kha kaihthawh rual lohin a mu hlen ta. Thildang zawng zawng chu thu hran ni se, a hnukchah dawna ka hming a lam hi chu ka ngaihtuah apiangin ka hnuk a la ulh thin, ka phu mawlh si lo.

Ka pa kha ka va han ngaisang tak em. An accident tih a hriat ve leh damdawiinah a tlan chho a, ka bialnu kha a dawmhlum a, pachang takin a rawn zualko a. “He thihna hi a tawpna a ni lo, vanramah kan zawngchhuak leh dawn nia” a tihte kha ka theihnghilh ngai lo ang. Lumen zanah a tlaivar a,thlan laihnaah min kalkep vek a. Mi kha a ngaihtuah em em a,hnemna thu leh fuihna thu tha tak takin min veng zui a. Khati em emin ka pa kha ka ngaisang thei ang tihngaihna pawh ka hre ngai lo.

A tir lamah chuan mahni inkhawngaihna ka nei lian ve hle a, Pathian han dem mai chak chang te pawh ka nei thin. Amah Siamtei tak pawh kha khawngaihthlak deuh tur angah khan ka chan thin. A damlai mahin a lungleng chi a nih ve tehlul nen, mahni chauha han mut chu a khawhar awm mange tih rigawt te kha ka ngaihtuah vak vak a. Rilru a kal sual chang phei chuan van atanga min rawn  thlir ve reng tur ah te ka ngai a. Ruah a surin a nan huh ang tih te ka hlau a, rilru mumal put hleihtheih loh chang ka nei fo ṭhin.

A ni, tunah chuan ka chungah ni a tla a,khua pawh a la thim zui ta ve ang..Khaweng hlira kal rem thin kha arsi leh thla eng rinchhan te pawh a ngai rih mahna. Mahse chunglama Pathian khian ka tana ṭha lo tur chuan engmah a ruat lo tih ka hria. Khua a thim phawt loh chuan ni a chhuak thei lova, zanthim zuankanin khawfing a chat ngai hek lo. Tunah ruahin min nan huh mahse, ruahsur banah chhimbal a zam leh ang.

Siamtei chu a liam tawh a, ka hmangaihna leh ka ngaihna te chu awm reng mahse ka tan chuan a boral tawh. Thla a liama anga, kum a lo vei ang a, nunah thildang a lo lut ang a. Khawvel inher danglam chak takah hian Siamtei tello in la inher rem ve pawh a ngai ang. Nun hi a tawi em a, chen te pawh kan la chen ve ang chu. Chutih hunah chuan tun ang em te chuan lung a lengin khua pawh a har tawh nang. Ngaihzawng dang te pawh ka la nei anga, damtea awm chuan fanau maltluan chawiin chhungkua te pawh kan la din ve mahna. Chutih hunah chuan ennge ka tih chak ber min zawt se, Siamtei bula hun hman leh a, ka hmangaih zia hrilh nawn leh hi a ni tiin ka chhang ngei ang.

Similar Posts:

• Kitchen-Pathy Part – II
• Titi..
• Lehkhathawn 2-na
• Magdalene-in an vocalist ban!
• Nunna thing vs a chhia leh a tha hriatna thing

Recent Posts:

• Kum 5 an bo hnuah a fate a hmu leh ta!
• Thehmeh
• Love your mother
• Fixture Siam Dan Tlangpui
• Ngatinge???

This entry was posted on Saturday, May 26th, 2012 at 4:30 pm and is filed under Luangliam. You can follow any responses to this entry through the RSS 2.0 feed. You can leave a response, or trackback from your own site.