mi(sual).com

Tunlai chu Euro futbawlin min chiahhneh bawk a, a ṭhenin kan tuipui laiin a ṭhenin kan ning bawk nen, ning leh nuam ti chungin futbawl lampang ka rawn vawm bei ve e.

Kum 1952 March ni 3-a Kawnpui khua a pi Dari Cup Mizoram pum huapa inchuh tur an han nghat rup mai kha chu, pui mem mem tak a ni. Mizoram dung leh vang atanga khaw tin thiam thlan khawm ṭhiau team 47 teh meuh mai te chuan, an bialnute vaihlozial thahnem tawk tak paipawn chungin ke ngat maiin Kawnpui vangkhua chu an rawn pan khawm hum hum mai a. Sipai bang leh sipai chhuṭi telna team-te kha chu an induhin an chapo deuh lar zel a.

He tournament hi khatih hun lai kha chuan Zoramah na na na chuan a la ropui ber pawl niin team lut pawh an ṭhahnem ngiang reng a. Hemi tum hian an khaw mipui zat deuh thaw ngawt mai mikhual an neih avangin Nu ho inkhel en ve chak ngawih ngawih te pawh en hman lovin chaw chhumin an nitla vanvuai zak zak mai reng a ni. In tinah hian mikhual chawei hi a indawt zut mai a, a hau a takin a thlengtu khua tan pawh buh ngah kum te ni lo phei se chuan, ṭam chhuahna tling tham hial ni ngei tur a ni.

AN BALL HMAN CHUNGCHANG : Khang hun laia an bawl hman thin te kha asin la tu-ru riu-reu chu ni. Phai vai ho savun ren loh laia siam tih hriat reng reng, savun hlang dik tak mai leh chhah rit nual mai kha ala niin, a blader hnun nei ngauh mai, a case chhunga bilhluh chi ngei mai kha a la ni a. Chu a chhapah a hlui tawh leh an hman rim tawh em avanga duh ang zan pawha pampuar nat ngam tawh loh, sawl ang peu-pou, sawt dul hnuk mai, chu a chhapah a ṭeh ngun tawh em avanga a damna (a chhunglama sorkar boot chhe zaithlera kolom) khat ṭuk tawh mai kha ani ṭhin si a,khatiang ball huh zawi hnuang kara chirhdiak han kai khat tlat mai ṭhin lehnghal kha chu, head nat leh lu a na ting mai ṭhin kha a ni a. Khatiang ball teh hrep kha zawng kan tunlai khawvel ball control thiam, Messi, Ronaldo, Chicco, Sisen-a, Amigo etc. etc. te pawh hian han hmang ve ngat se zawng, an nawm an mak chuan an control bik lek chuan a rinawm loh a ni.

BALL BUT LAM : Khatih hun lai vel khan khawpui ah chuan ball boot neih kha an intihhmuh ve ṭan tawh a. A thuhrim ah Mizote hi thil intihhmuh ching tak hnam kan ni ve reng reng a. Khawpuiah khan tlangval nazawng, inkhelhthiam emaw thiam lo emaw pawh khan football boot neih tur emaw hi an han ti thlarawk pek a… An boot pianhmangte lah chu a inang tlangpui a, a rawng dum, a chhip sak tlat mai, rit ang leng lawng, a ke hling sei pui pui nei chi kha a ni tlangpui a. Bazara an kal a duh tawka an zuk thlan thar pawh hi an thianpa ta nen an han entawn a, a rit hlei deuh a ni lawm ni? tih mai loh chu a danglamna a awm chuang lem lo. An thlan dan ber kha chu an han chawi chhin dan dan a, a rit ber kha an la nalh zel a, a pet nat an rin deuh vang a ni.

Tichuan le… an boot thar nei, inkhel chak tawh leh chhuang ni-pah-fawm chuan zan lama an nula rimnaahte khan an han bun chhuak ta reuh mai thin a… an bialnute dap chhuat mawih tawh lam kha an han rap tliak phei ta ṭhet ṭhet mai thin a… kha em kha zawng an nula rim-i pa tan WORK ORDER an pe hi a ni ringawt zel mai a. Ani lah Mizo pa rilru dik tak puin sawisel leh phunawi hauh lovin, a chhe lai apiang thawm ṭhat nan MAU pu turin hlimawm takin –atukah a in akchhuak thei zel mai a ni. Khang kan Mizo pipu, hranghluite khan ‘Aw tlawmngaihna hlu’ tih hlate hi, an ka in sa lo mahse , an thil tih leh an nun in an sa in an zawm ani tih a hmuh theih. Keini thangthar lungfing inti, hrawk bawk chunglam chauh a, tlawmngai-a te, tlawmngai-i te leh kan sakhaw rawngbawltu, inhmuamup taka, kal ding ngut ngut hote runah hian han lawi ve na se.. kan thingphel chhuat te han rap khuar chik hrup se emaw kan cement chhuatte hi han rap khawk hlek hlek mai se zawng… kan mitko rang an hmuh em loh pawhin kan ṭawngṭai sak kur nguai chuan a rinawm loh hle ani.

INKHELH TAN DAWN:Tichuan,tlai chawei kham chuan an khaw tlangau, chuan “Naktukah,Chaltlang leh Hlimen khua te boot bun ngatin an inkhel dawn” tiin a han au mai chu!!!!! A tar,azur,nu leh pa,tlangval,nula leh naupang chenin an au te teng tung mai a….Mahse vanduaithlak takin kan ti dawn nge? Board lamin nguntaka an han ngaihtuah leh hnuin puan pheikhawk bak bun an phalsak leh ta lova,a chhan pawh an intihnat palh an hlauh leh an venthawn vang a ni.

Tichuan, field laiah chuan ball chu an han dah a, Centre forward-in a han thai zauh a, an in pa-s-s.. an inchilh.. an ri nghal ta rup rup mai a.. ball awmna lam apiangah an bawr lui lui zel mai a, chutah, remchang lutukin a lehlam full-back-in atu saw nge ka pass ang a, kan pawl tana tangkai tur a ni ang em? Tih chu hnai lo mai.. let a rem em avang hrim hrimin thatawpin a han let phei ngheng mai a, lehlam goal a thleng phei thuak mai a, chutah mipui an lo au dur dur mai a, chutia ball thlawk phei chu lehlam pawlin a lo pet pial a, antam huanah a lut.. chutah lehlam pawlin out an han theh a, pek tum bik pawh nei chuang lem lovin lehlam goal lamah a vawrh chhoh nghek ringawt mai a, a lehlam pawl thiampui pa a lo inkhawr khur khur a, khawilamah nge ball a kal dawn tih pawh hisap hranpa lem lo chuan a lu chhip ngei maiin chirhdiak per chuai khawp hian alo head ngheng mai a.. anmahni goal kham chungah chuan a head over ta liah liah mai a.. entu mipui thiam ti lutuk chu an au dur dur mai a.An mahni lo tantu,Leng-i te lah chu field kovah an bahsam ngil taka phiar kak in,kawr darpuk(sang)ha leh ngotekherh leh Lenbuangthuam bih in ,Afghan Snow rim nam rum rum chungin a kel rawl a kel rawlin an lo vai bawngchawphur bo au ve vak vak mai bawk nen,khelthiam val rualte tan zawng thih tha teh meuh va tan a ngai reng a ni.

Mizo tlangval huaisen, tlawmngai, ṭhian chhan thih ngam, mihrang sahrang hmaah pawh zam ngai lo ten SI phur zawk nih hlau a, an goal an han chhan tak tak reuh mai thin chu.. goal ban bul lawk lawkah hian an inpang-aw-zial ta tup tup mai thin a…chumi karah chuan awrawl chhuah meuh in,’Khawnge,keimah T-Ao a,”ti a lo au lauh lauh tawk lah bo lo,a chang leh engemaw ti ti hian tu pet ber nge tih pawh hriat hran loh hian ball hi a rawn per chhuak ve leh nawlh mai thin a, chutah thinrim engphiara lo in tin zuau zuau tawk lah bo lo,mahse chutiang a khelhpuite nena thinrim engphiara hmai-sa an in hmuh lai ngei pawh chuan, Board lam hawi hian an rawn nui phei leh sung thin a, a chhan chu Board lam khan khelmawi lawman an siam ve miau thin si a..chumi dawn ngei chu an tum ru ve ran thin a ni.

A chang leh tlangval tlawmngai ball um laklawh tawh si te hi mi leikapuiahte hian an han tlan kai ang zak zak thin a,feh kawnga thui tak tak zuk tlan liam ta lah bo lo.an zahzel hian inchungah tui an han in pah thlazen lehnghal!!!!!

Tum khat chu, hmar lama tang zinga an left-wing-hian ball tlafal hi a chang fuh pek alawm mawle, veilam sir ah chuan chak mangkheng hian a khalh phei buan buan mai a, a thiante’n ‘He lamah… rawn pet chho rawh… p..a..s..s.. an lo ti tuar tuar mai a, ani tlanchak laklawh tawh bawk si, ball sawt kang leh a kezungpui chhip a insut palh tak a leh! a tum loh deuh maiin a hma zawnah ding kawh luah hian a thlawh chhoh tak a leh!!…chutah… Field bula bawhtah bang chu le.. ball chanve hnunglam thla lang kulh khawp hian an pet per dup mai a., inchhung lamah bungbel a tla darh ri rum rum mai a, chutah tukverhah hian nu uaithla lam tawh tih hriat reng reng leh beauty contest-na a telve tum lo tih hriat tak hi sam thur hreu be bu nen a rawn dak chhuak heu mai a, ban vai meuhvin a rawn au ṭeng-ṭial-rang nasa mai a! , a sawi chiah chu tu’n hre pha vek mah suh sela, chungho inkhelhthiam zia leh an pet natzia chu rawn fak a, lawma hlima lam chu a nih duh hmel vak loh hle ani.

Tin, khang hun lai khan diar khim kha an la ching hle mai bawk a, an ball head apiang mai khan an diar kha a tla ziah mai lehnghal a.. anni lahin ball kalna lam ai mahin an diar tlakna lam kha an ngai pawimawh zawk mah zel lehnghal a. A thu hrimah khang hun lai kha chuan ball pet kang sang thei deuh leh head kang sang thei thei kha mipui thiam tih an ni mai si a, Tin, a tlan chak chak kha goal vengtu an nih loh chuan forward an ni deuh mai bawk a. Chaltlang khelhthiam Pu Thanhlira phei kha chu a tlanchak thawkhat ani ta ve ang,Durtlang pa pawhin’Thanhlira chuan,left-out atanga right-out a ball a pet phei hi,amah vek in ava dawng leh hman’zuk ti mauh pek a!!!

Tin,inkhelh hunchhung rei zawng vawn nan khan sana kha ala vang em em mai bawk a,dan naran in sipai chhuṭi deuh chauh khan sana an la bun hunlai leh a enthiam pawh an la tam loh lai ala ni a,keini a mimirte kha chuan “a seizawkin chumi, khami a kawka, a tawi zawkin chumi chu a kawk” tih mai mai kha kan la thiam tawk hun lai ngang kha a la ni rih si a…rifiri chauh khan a bun ṭhin bawk si a..a tan zawng khua te an chak loh deuh ṭum kha chuan a duh chen chen a khelh tir ta reuh mai ṭhin a….mual chhung kha an thunun ani ber.

Field chhungah khan refiri kha an thu em em kan tih tawh kha,tumkhat pawh,sipai chhuṭi lukhum(baret) bial samak lem chuang her deuh maia khum,a banreka Ashoka pillar chuang bun, lal hmel deuh mai hian a ham pek alawm, Sehlawh pa kha a kawk a’Khalaia diartial khim kha,I faul leh vaih chuan keiman ka khawih tawh tak tak ang che’an ti chhek chhek mai chuh..tunlaia Yelow Card an hmuh mai mai te ai hi chuan,hlauhawm tak a ni.Tin, khang sipai chhuṭi te khan,danthar niawm tak tak phuahchawp hmang hian an duh hun hunah penalty te hi an han pektir ngawt chang lah a tam,anni phai atanga rawn chhuak ta chu, chinchang hre tura ngaih kha an ni ṭhin si a,’dan thar ani ‘ an tih tawh kha chu hnial a hnekin kan ngaisan phah em em zawk a ni.

Ṭumkhat kala hriatreng chu,Chaltlang leh Sairum inkhelh ṭum in Chaltlang lam hian hneh viau e tilo chuan goal erawh an thun thei der bik lo mai a,Sairum lamah chuan ball chu a cheng reng mai si a,Chaltlang goal veng chu a awlthawng em em mai a a khat tawk hian’Kan goal a hmuar dawn’tiin a au lauh lauh thin a, chang leh intithei tak hian goal ban chung khampheiah te hian alo in-uisalehlin vel thul,.Ṭumkhat chu chutianga alo in-uisalehlin lai tak chuan lehlam goal atang chuan ball arawn chhuak zawk mai a…lo insiamrem lehna hman ni tawh hek lo..a goal ta der mai a,chumi ṭuma Chaltlang team captain leh Chaltlang lal ni bawk si Pu Sailala han thinrim zia kha chu..kutzungchal rawn vilik phei pah hian’Haw nghal rawh,haw nghal rawh,tuemawber khan goal hi veng rawh u”a rawn ti phei phiar phiar mai a…..

Khang hun lai kha chuan, an lama goal a luh chang te hian a duh duh hian goal veng hnenah ’

“va chuh chhuak ve teh,kalo veng ve tawh ang e’te hi an ti mai mai reng a, an goal ven thiam vang pawh ni hran lovin an chauh deuh tawh vang te hian goal hi an inven chhawk mai mai thin a ni reeng a ni.

INKHELH BORUAK : Zan a lo ni a, khawtlangah titi dang reng a leng lo a… ‘Chumi veng chuan, chumi veng chu an hneh ngei ang’ tih ang reng, ‘Chumi veng chuan, sipai chhuṭi an telh dawn’.. ‘Chumi khua a, an sipai chhuṭi pakhat nimin khan a rawn thleng!’ ‘Chumi khua pawh chuan, sipai chhuṭi turin an chah’ tih ang reng hi pa titi thiam deuh hian dawt leh thutak inpawlh nuaih hian an han phuahchawp a, a reng rengah sipai chhuṭi tamna khua kha chu chak turah an ruat deuh ngawt zel a duh pawh an induh deu lar reng thin a ni.

A ni lah taka, khatih hun lai kha chuan sipai tang tawh phawt kha chu eng Army pawh ni sek sek se, inkhel thiam em em vek turah mi tin khan kan han ring thla rawk zel a,anni lah khan ‘kei chu ka khel ve ngai lo’ tih chu awm chuang bik der lo, phur em em hian an han inphelh sek thei nghal zel mai bawk a. A dik emaw dik lo emaw a dan leh dun ngaihtuah chuang tawh hek lo, sorkar duh lai leh dailuah par tlan an nihna kha an inhre hle zel mai a,hah lah an lo hah har nge nge bawk reng a.. thiam hle tura ngaihna nen chet pawh an che thei fu reng a ni.Ṭumkhat erawh chu sipai chhuṭi hi kel pachal hlawhin an ruai pek ani awm asin mawle,chak chu a chak,mahse alo inkhel ngai meuh lo nitur ani,inkhelh chhung zawngin ball vawithum chiah a khawih ve a, chung zinga a ṭumkhat phei chu an lama a pal luh tum ani lehnghal!!mahse kel chu a hlawh ve ta tho ani.

Awle,Engpawh nise, khatianga tlangval rual pungkhawm zingah khan inkhelh ringawt ngaihtuah lova,zan lama nula zen lama hma lo la tawk an lo awm nawk bawk nen,tournament laia court han hawn leh rih te a ngai thul!!!!ti ti ati tam duh angreng hle bawk ani.

Tin,khang hun lai kha King George V, nitla seng lova roreltu Lim chuanna, pawisa lai-awng leh dere pate-ten Lal an hrawt lai, Anna khatin kuhvakhawr paruk fai thah a man lai hun, tuifinriat ral atanga tangka cheng Rothangpuii an rawn thawn lai, kan babu leh babi-i ten Rs 5/- thla khata an hlawh a, an intihtheih eu kual hun lai leh tul uk lova tairaw tiang an hawl thlak zen lai ngang kha a ni a, tunlai anga Ration card-a hming chuanglo chhungkhat laina khualkhuaa lo zin te, zirtawpni tlai buh fairel ruak tawh lama, kan han mitsir ang hian, Lal lal laia mikhual chamrei te kha mitmeng rang an la hmuh ngai hek lova. Khawkhat tlangval, inkhelthiam lehnghal bawk te chu an duh loh zawng an sawi palh ang tih an hlauh hliah hliah hun lai kha ala ni a,mikhual kha an duatin an neih thinglungkhawng tak meuh meuhvin an lo LALTHUTHLUNG keng cheibawl thin lai kha a ni miau mai.

ROKHAWLHNA : Khang hun laia tournament kha Rokhawlhna eng eng emaw hian a han tlakbuak ve duh khawp mai bawk a. A chang leh, ‘Kan vengah mitthi an awm’ emaw INNEI TUR AN AWM’ tih vang mai mai te hian an khelh hun tur sawn an han dil ngawt , a nih loh leh, ‘chumi khami vengin referi an ham chuan kan khel duh lo, chumi veng chuan ham zawk rawh se’ te hi an han ti thla zen a, a hamtu tura an duh vengte zingah khan hamrik ham thiam an lo awm loh chang alo awm bawk thin nen, a buaithlak thei ang reng thin ngawt mai.

A chang leh an inkhelh laklawh lai takte hian, bawng chal leh bawng chal insi hi field laiah an rawn innawr kat lut ta reuh mai thin a.. anni ransa zawk na na na leh hawihhawmna nei lo ta chu, a zahngaihna nei lian zawk mihringte chuan inkhel laklawh viau e tilo chuan hmun lo kian in, an inkhelh theihnghilh thak khawpa an han thlir leh rih chang lah a tam.

A chang leh, tlai ni a lo nem deuh tan ta maw tih ah hian , pa upa lam feh hawng hian thiam hnang tur emaw hi a rawn pu ngauh ngauh mai a, engmah ngaihtuah mang hlei lo hian tlak lam atang hian field lai hi a rawn vang tan ta chhet chhet mai thin a,a hnungah nu ho hian ‘Hei.hah..’tiin an rawn zui diah diah mai bawk nen,chutah zet zawng a inkhela-te laklawh viau pawh nise , han chawlh lailawk loh theih ni thin hek lo leh……

Similar Posts:

• Foot ball
• Mizo sipaia tang hmasa te chanchin tlem.
• Hei le, mi(sual) Brazilian World Cup Squad chu…
• Durtlang in Salem veng 8-0 in an hneh
• MFA League 2008 tineptu: Kulikawn leh Dinthar

Recent Posts:

• Biate Hnam leh Zialung Khua!
• Ka Diary Manto Tak Mai Chu : Episode – 3 (Zira’n Setana a bum em ni?, Wanted the Bliss leh a dangte)
• Khaikhin mai mai!
• EURO 2012 Quarter-final | England vs Italy
• Pathian anpui chungchanga zawhna pahnihte

This entry was posted on Monday, June 18th, 2012 at 3:00 pm and is filed under Copy Paste, HAHAHA, Lifestyle, Mizo Society & Culture. You can follow any responses to this entry through the RSS 2.0 feed. You can leave a response, or trackback from your own site.