mi(sual).com

(Facebook group pakhat, ‘Thu Ngaihnawm Huang’ tih group-ah ka post tawh na in, he lai hmunah hian kan rawn vawm lut leh mai mai ange. )

Ka CPU hnunglama Internet LAN Cable invuah va ka hmuh apiang hian kan naupan laia computer kan ngaihsan theih zia kha ka hrechhuah leh thin.

‘Computer hmu lova matric pass’ an tih ang deuh chi kha (‘Pathian zar’ han tih deuh hluai chi ni lem lo mahse) ka ni ve a. Pawl 10 final kan exam tep tawh tih ah kan sikul (‘sap sikul’ tih kher tur) chuan ‘Computer lab’ kan nei  ve chauhva. Khami tuma kan Headmistress in left leh right click diklo mangkhenga min hrilh bak kha matric ka pass hmain thiam dang ka nei lo. Left leh Right click zir tur ringawt khan pawl 10 zirlai zawng zawng te kha lab kawt ah kan in tlar put a nih tak kha.

Thingtlang anhnah ring ta na na na chu sap leh computer ngaihsan ka pe na ve thei hle a. Khatih hun laia kan khua a computer nei awmchhun chu kan High Sikul zirtirtu, Pu.Thlantea kha a ni a, thingpui dawr a a titi na ah “Computer chuan…” an tih tawh kha chuan dawr  thenawm a a titi hre pha ho hi chu an lo phei a nih loh pawhin an ngawi thuap thin a nih kha.

COMPUTER- THE DETECTIVE :

Tum khat chu kan veng nu pakhat in an lukham hnuai a pawisa a dah chu alo bo daih mai a. An awmpui tuikuk pakhat chu a ringhlel deuh khop mai a. Mahse, a hriatchian loh avangin han pawng tawng puh vak lah chu a hreh ve bawk si a. Chutia thenawm khawveng te an lo punkhawm hnu chuan, rum leh puam tha tak, Sibudar aw ang zet chuan, “a rutu chu tupawh ni rawh se, Pu.Thlantea Computer in ka chhuichhuah tir anga a chak lo viau ang,” an ti chiah mai chuh….. an awmpuipa chuan a hlau kher mai! Chumi tlai  chuan pawisa chu a awmna ngai ah chiah chiah a lo awm  leh a ni.

Khang hunlai atang daih tawh khan Computer  hi kan veng ah chuan ‘detective’ ah kan lo hmang tawh a ni.

KAN THIANPA ZIRA TAK KHA O:

“Ka pa chuan sairawkherh in sihal a perh thlu mawle… ” tiin thianpa Tlanglawma chuan a sawi lauh lauh a. Kan thian za ho chuan ngaisang awm takin a thusawi chu kan ngaithla thap mai a. Chutah thianpa Zira chuan, “Kei pawh ka pa chu ‘Headmistress’ ania….,” a rawn ti leh ta tlat pek mai. Chutah, kan thianpa inhnial hrat zet chuan, “aaa.. mipa chutiangin Headmistress anni thei lovang,” tiin alo hnial nghal a.

Zira chuan a tlawm zawk nih a tum der lo. “Headmistress a ni chiang khop, Headmaster chung chiah ami, apa pawn a sawi vek,” a rawn ti leh ta tlat pek a, ‘e’ tiin kan bu suau a, a pa chu headmistress en a en in kan zah phah hle a nih tak kha.

Tum khat chu kan Sir hian kan ‘aim in life’ hi min zawt den den a. Zira a zawh ni a lo thleng ve ta a, “Zira what is your aim in life?” Sir chuan a ti a. Zira chuan awlsam zet hian, “Teacher,” alo ti vat mai a. Sir bawk chuan, “Then, how  you will become a teacher???” a rawn ti leh a, Zira chu a zam ta kher mai!!! A hawi kual zuk zuk a, a phun sep a, ka thian te ho chu an nui huk mai a. “Engtinnge a chhan a??” tia kan zawh nak chuan, “ ‘headmaster’ a ti mawle,” an ti a nih chu!!! OO khua hi ava han var lo thin tak em!!

Scooty a rawn lar hluai tum pawh khan ‘Skiuter’ zu han ti tlat pek a. Scooter nen a hming inang deuhhlek a ni tih kha chu a hre ve ngei ni tur a ni. Thil hming hriat sual hi a hrat ve hrim a ni a ni hi chuan. Hman kum lawk a rawn lar, tuna Manchester City defender nita ‘Clichy’ pawh hi ‘Klits’ tiin zu han ko tlat pek a.

KAWI LAWH NA AH KA KAL VE :

Tum khat chu kan thian za hovin kawi lo turin kan in ak chhuak ve a. Ka u Mama hi khatih hunlai a kan ‘Amrispuri-a’ ve kha a ni a, a hovin Misawn (Baptist) biakin thlang a kawi zam rah chu lawh kan tum ve a. A hmun kan thlen chuan kan zinga a nuapang deuh ber, Zira chu kan lawntir ta a(Boss berin, “ani hi a lawn ang,” a tih tawh kha chuan ‘King Kong’ pathum pawh awm raw sek sek kan hnial ngam ngailo hrim hrim a nih kha).

Chutah, a lawh zawh chuan Zira chu phur fahran hian kawi zamna thingkung lian tha tak mai pawm chuan in, ‘Mami, Mama I hmel a tha…’ tih hla kha faifuk a sa hlarh hlarh chung in a rawn tawlh thla zar zar mai a. Hlam thum velin lei ala thleng lo tih ah a mawng ah chuan,  hmawlh ler a thing hnah kan tawn beh chuan kan lo hawlh pek a. Ani chuan lei a thleng tawh emaw tiin, “He-Man, by the power of…” tih pahin a rawn tawlh thla hrawk mai a… A che He-Man lo chiang kher mai!!! A tah chhuak bawk si, tap ngam silo hmel kha tun thleng hian kan la hlimpui thin.

AGARTALA AH KAN KAL :

State level Football Under-11 khel turin ‘Rengzawl’ an tih mai, ‘Agartala’ khawpui chu kan pan ve a. Under-11 players ni si kha kan dung a sei hlawm hle mai a. A then nuthlawi rai rual zet tawh te, a then te phei chu ngal hmul pawh vawi thum ngawt in vial let tawh te kan ni hlawm a.

Kan kal kawng ah chuan motor ‘eskawt’ a awm avangin kan ding fo mai a.  Punjabi truck pawh an tam kher mai. Truck fullawt bungraw phur te chu an intlar duat mai a. Kan thianpa pakhat chuan  chu chu ropui a ti kher mai. “Hetah hian a ni maw truck zawng zawng hi an lo awm khawm,” a ti hau mai. Chutah Agartala khawpui chhung kan han thleng ta a, mipui pawh an tam kher mai. Thianpa Zira chuan, “Khawvel ah hian vai hi anlo va tam em em,” a ti vawng vawng mai.

Zana kan mutna room kawngka atang chuan DDK tower ler eng vat vat chu a lang chiang khop mai a. Kan zinga mak ti ber tu chu tun tum ah pawh Zira bawk a ni leh ta. Kawngka ah chuan ava dak a, a en vang vang a, “Satellite a ni awm e..” a rawn ti chhuak hau mai. Tuman Satellite a ni lovang tih hre bik hek lo, “kan awmdan hi min rawn en reng a nih dawn chu. Tuman kan tawng ah sap tawng telh loh tur, anih loh chuan kan kum an hrechhuak hlauh palh ang,” kan zinga a upa ber leh inkhelh thiamlo ber ni bawk chuan a rawn ti a. Khami zan khan sap tawng thiamloh bawk nen, sap tawng kan hmang khat kher mai.

Engpawhnise, thil dang tam tak ziah tur la awm mahse hemi chin ah hian a thawh khatna atan chuan lo duhtawk phawt mai ila, a lehpek ah ka pa in Phai a, ‘Very Very Sexy’ body-spray min leisak chungchang te pawh ka la rawn ziak leh dawn nia.

Similar Posts:

• Ka diary manto tak mai chu, Episode – II: (very very Sexy leh a dangte)
• February ni 29
• Ka’n ti ve teh ang…
• Chawhchawrawi Part-2
• TawiNawi-III

Recent Posts:

• Ka thil hriatchak thenkhat (Part I)
• Hmeichhia te tan… :P
• Duham chu chânna!
• Thunäwi
• Ka âwm nghêngin a ṭap

This entry was posted on Tuesday, June 19th, 2012 at 3:00 am and is filed under HAHAHA. You can follow any responses to this entry through the RSS 2.0 feed. You can leave a response, or trackback from your own site.