mi(sual).com

DAPTATRÄW, tiin bul han tan phawt mai ang aw! han ti ila chu(h) in lo phur hlawm dawn em mai, sawi chhunzawm lehlo mai ang. A hming ringawt pawh lo ning tawh in awm nain, vawi khat chu han thai lang leh hram ila; ‘Lalhna Sipai leh Chhanchhuahnakhawpui’!!

Kan thupui nen bul tanna a inrem lo em mai, pu HV-a te an lo ner leh hman pek ang e; hel kual vak tawhlo mai ila. Zofate thinlung leh ngaihtuahna luah reng thintu, Jordan lui leh Gallili dil te’n a rawn thlak tâk Rih Dil chu, Zofate thinlunga hmun a rawn chan thar leh zel nan a chanchin i lo bel chiang teh ang u.

”Kan pi leh pute kha Kâwl rama an khawsak laiin, Rihi leh a nau hmeichhia chu a nuin thihsanin nuhrawn an hrawn a. An nuhrawn chuan a huat em avangin a pasal chu thah tir turin a zâwl thlu a.

Ni khat chu Rihi nau chu a pain ramhnuaiah kalpuiin a that a, a nghawng a mfik a, a hnute a hleh sak bwk a. A lu leh a hnute chu a paih bo ta daih a. Rihi chu a nau lo haw tak loh avang chuan a mangang ta em em a. A tuk hma takah chuan a nau zawng turin a kal ta a, a va hmu ngei a, mahse a mau hnute chu a hmu zo ta lo a. Chuti anga beidawng taka a nau ruang a tah a tah lai chu Zatih(Lasi) hian a lo hmu a, a khawngaih em em mai a.

Zatih chu Rihi tanpui tur chuan a lo kal ta a, ” Sawlai ram ngawhah sawn va kal la thing hnah pakhat chauh nei i hmuh chuan rawn la la, i nuai sawm ang a i nau ruang hi a lu atanga a ke thlengin zût chhuak la, a lo dam/nung leh mai ang. Tunhnuah pawh thil tihtheih nan i la hmang zel thei dawn bawk a ni” ati a. Chuti ang chuan Rihi chuan a ti a, a nau chu a lo nung leh ta a, mahse a hnute kha a hmuh zawh loh avangin hnute a nei ta lo va.

A nau rawn nung leh ta chu a tui a hal em em mai a, Rihi chuan a nau chu a thih leh mai a hlauh avangin a thil tihtheihna kha hmangin tui lî ah a chang ta a. Lî a a chan dawn khan a nau chu kalsawn miah lo turin a ti a, a u Rihi kiangah chuan a cheng ta a. Nakinah chuan tlangval ramvak pakhatin a va hmu a, a duh em em ta mai a, chumi hmuna cheng dun tur chuan an innei ta a. Fa an neia mahse hnute hnêk tir tur a neihloh avangin Rihi chuan a enkawl ta a. Fa pawh pathum lai an neih hnuin, a pasal chhungte chuan hnute neilo hmeichhia chu mihring ni thei lovah an ngai a; ramhuai nula a nih ringin an tiduhdah em em mai a.

Rihi chuan a nau chu a pasal chhungte hmuh phak lohah pem turin a ràwn a, an fa a enkawl sak pawh chu a pe chhuak a. Rihi pawh chu Sepui varah changin, hmun him zawngin khawthlangla tlâng chu a pan thla ta a. Rihi chu Zofate sulhnu zuiin Kabw phaikuamah a lo chhuk a. Natchawng khaw kiang Zur ngawpui te, Falam khaw kianga Laizo khua te chu tlawhin Len tlang pang chhak lam hrutin awmhmun a zawng zel a.

Bochung khua leh Khawpual inrina hmuna awm Chiakzawlah awmhmun khuar a tum a. Mahse, Rûn lui huai chuan a lo huphurh em em mai a. “Hetah awmhmun i khuar chuang nang aiin ka hnuaihnung zawk si a, eng hunah emaw chuan ka la hip kang vek ang che. Tin, i mawngah ka hawlh ka hawlh bawk ang che” tia a lo vau chhen a vangin a insawn leh ta zel a. Lentlang kal liamin Tuiphei a kân a, Bawlte hmunah a chawl a.

Chutianga kal zel cguan Khawthlir khua leh Khawdar te chu kal tlangin tiau lui a kân a, Champhai zawl a thleng ta a ni. Champhai zawlah hian duh anga thûk tui a awmloh avangin a kir leh a, Khawdar tlâng hnuai ruamah chuan lî-ah a chang a, chutah chuan a awm hlen ta a ni.

Similar Posts:

• Serh a hmarcha intah sak
• Mipa ve thung
• Mizo landmark #2
• Mizoram ramri kan tlawh a
• Maternity Leave ni 160?

Recent Posts:

• PÂWL LAL HRAWTNA AIZÂWL???
• MIZO HNAM SAKHAW DIK PHOCHHUAHNA- IVby. Rorelliana
• Hriat chian lehzual
• Sunglass man to chhan!
• Tawng tih hausak a pawimawh!

This entry was posted on Saturday, August 11th, 2012 at 2:35 pm and is filed under Books, Mizo Society & Culture, Mizoram. You can follow any responses to this entry through the RSS 2.0 feed. You can leave a response, or trackback from your own site.