mi(sual).com

“A va rawn thleng har ve”
“rawn thleng tep ang, ka lo chhuak a tihna a rei tawh kha”
Chutih lai chuan ka thianpa dawr kawtah chuan bike dum, a tanky sawi ngei mai chu alo ding a, ama sawi dan chuan a tlukna a ni lo, zan a len hlanin miin an lo nam tluksak; a khup leh kiu hliam erawh nidanga a tlukna a ni awm e..
Nula lamah chuan a peih bawka kan thian pathum zingah chuan kan Pu en a ni ber.

Dawr-a a lo lut “iva lo thleng..” kan ti dek dek a,”nula awmlai chuan Hnapa inti tawh lo ila” a rawn ti lut nang nang a. Thut pah chuan “chhuk ila” a rawn ti nghal, khawi nula ber kha ni leh ang maw?
“petrol pawh ka nei lo” kan thianpa chuan “keipawh” alo ti ve nghal zat a.
Min melh pah chuan “Hnapa khawimaw pawisa i nei lo maw”?
“130 bak ka nei lo”
“100 chu min lo hmantir mai teh” ka pe ve mai a. Thianpa melh leh pah chuan “Hnapa khawimaw 100 min lo pe ve la”
“kha mahse rei lo la”
“rei lo ang” a chhuak leh nghal a.

Thianpa chuan “tunlai chu ka rilruah KEIMAH hlir ka awm mai” a ti a, a thusawi chu mak ka ti angreng khawp mai. A hmel ka va en a, hetiang em em hian ala thutak ngai lo. “hmm..enge awmzia?” tiin bo tih hriat takin ka zawt hu a. Thutak fahran hian, “tunlai chu ka tawngtai hian mahni intheihnghilh thak khawpin midang tan hlir ka lo tawngtai thin a, ka in enlet a, lawmthu takngial pawh ka lo sawi ngai mang lo hi alo nia; dikin ka hre lo a ni. Mahni hi indah hmasak ber tur niin ka hria” a ti a. Kei fiamthu duh tih takah, nui chungin “ilo tawngtai ve thin reng elo?” ka ti mai chuh, “Hnapa, sual hle mah ila nikhatah vawithum chu ka tawngtai ve ziah a nia, tlem ka tlak keuh paw’n tawngtai ka thlah phah ngai lo, a tih chi leh chi loh phei chu ka hre lo a, rau a thawh chang phei chuan ka mi(sual) memberpui te tan pawh ka tawngtai ve leh khut thin, midang tana ka tawngtai chu tha ka ti tho a, mahse keimah ka intheihnghilh ber chu a ni dik lo ka tih chu, engkimah mahni kan indah hmasak hi a pawimawh a ni” min ti ta nek a.

“I lo mi(sual) ve reng elo? A reng rengah ‘engkimah mahni indah hmasak’ itih chu engtin maw?” ka ti a, ka uang tawh bik lo.
A en ngai a en vang vang a, “Sual ve reng e, en teh Hnapa, kan ram hi han thlir la, mahni insiamtha hmasa lovin midang siamthat kan tum hlawm theuh niin i hmu ve em? Saw kawnga kal pa thau lampang kawr var ha saw i hmu tiraw? Kohhran leh khawtlangah a langsar asin, mahse a fate chu…hrethiam em? Beram 3/4 mah kawng dika hruai thei lo chuan beram 100 tel chu engtin teh lul nge a hruai dik ang? ‘An nupa an fel tehreng nen an vanduaia an fate ruihhlo bawiha chuti khati..’ kan tih te hi enge a chhan?. Ram, khawtlang leh kohhran hmasawnnan pawna va committee deuh reng ai chuan In uaplumin mahni chhungkua theuh enkawl fel ila hma ka sawn zawk lo’ng maw?” a ti ta duah a.

Sawi tha hi ka ti khawp mai a, chibai lawp lawp tak ka nap a, “nia a dik reng” tih bak sawizui tur vak ka hre lo. A ni chuan a chhunzawm leh a, “midang kan sawisel thin te pawh hi mahni kan inen hmasak loh vang mai mai a ni duh khawp asin, sawiselbo ka ni bik lo tih ka inhriatna chuan midang ka sawisel loh nan ka hmui min thuisak a, ka that lohna chu ka mawina alo ni zawk ta a ni” a ti leh a. Ka rilru te te chuan ‘i va lunagliam ve mawle’ ka ti neuh neuh a’.

“A nih chuan Hnapa, miin i chungah thil sual ti ta se i ngawihsan mai mai dawn a ni maw?” ka ti a, mawl tih hmel zeta mitmeng zim sata min melh pah chuan, “An hriat loha an tisual anih chuan ngawihsan mai dawn e, keipaw’n ka hriat lohin midang pawi ka sawi thei reng sia, mahse an tisual lui anih chuan ngawihsan lo e le..a chhan chu mawm, hrereng chungin ka mihring puite chungah thilsual ka ti dawn hleinem”.

“Mahse suala i ngaih loh kha anni tan sual alo ni thei tho a” ka ti ve keuh a, a ngawi vung vung a “ni tho mai” a ti ve mai a. Sawi tha ka inti ve khawp mai, ka hawi deuh lah nghalin ka hria.

Kan thian pakhat chhuak pawh alo let ve leh chiah a..
“Hnapa iva rei ve”
A bag a a thil ah phawrhchhuah pah chuan “RV ah chuan ruah a sur alawm, ruahin min dang reng a”
A nam deuh ther ther a, a bike fai hlarh danah chuan kawng chu a berh eih hmel loh. Engmah sawizui lem lo chuan no pathum la chhuakin ‘sharing’ nei turin dawr kil lamah kan inhnawh phei ta a.

Similar Posts:

• Eng Sakhua hi nge dik ber?
• Sual
• Tawngtaina
• A sawm che!
• Ka mumang mai a ni lo

Recent Posts:

• Heti zawng hian hma sawn ta i la…
• NGHILH NI I AWM LO’NG E !!!
• ZO HNAM SAKHUA
• Vaivawm President’s Cup ka en ve a….
• Cheng 4000-5000 an sem dawn an ti

This entry was posted on Friday, September 21st, 2012 at 6:00 am and is filed under Luangliam, Mizo Society & Culture, Mizoram, More than words. You can follow any responses to this entry through the RSS 2.0 feed. You can leave a response, or trackback from your own site.