Ka thai duatlai…

September 24th, 2012 11:00 pm by Dr Mahminga Sailo

(Tawnhriat nei miah lova, pawl sawmpahnih ka zirlaia, ka suangtuahna hrula ka ziah a ni e. Hetiang taka nupui fel tur hi ka la zawn chhunzawm zel… )

Khai aw…!
Lunglei nitin chanchinbu Ralvengtu.com phek hma ber ka’n en a. HIV/AIDS chungchanga hmalak dan hriatthiam a har tawhzia leh he natna a hluar sawt em avanga sawrkar a beidawn hial thu ka chhiar meuh chuan min barakhaih hle mai! Kan nitin khawsak leh nunphung changkang zelin, sualna maksak tak tak a rawn ken tel hi a ngeiawm teh e aw.., ti vawng vawngin kan nu’n zing thingpui min hlui chu muang changin ka in a. Ram danga khawsak hnu paw’n Zoram chanchin hian rilru a luah lo thei si lo va, a va’n pawi teh e tiin eng eng emaw ka ngaihtuah chhunzawm a…

Bawihtea nu lo kal teh…
Ka nupui duh tak hian, ka thil vei leh ka rilrua awm hi min tawmpuiin, thukhawchang kan sawi dun fova. Tukina chanchinthar ka chhiar chungchang pawh a hriat ve ngei duh si. Kan fate sikul kal tur buaipuiin hmanhlel mah se, a hriat ve ka duhpui tlat. Bawihtea nu, I hman chuan lo kal lawk teh ka ti a. A ngaitein, a thiltihlai kalsanin a rawn kal ve mai bawk a. Chanchinthar ka chhiarin ka rilru a khawih dan te, Mizoram hunphung leh khawsakzia ngaihtuahawm dan te, chhungkaw kehchhia an tamzia leh a rahchhuah tha lo tak tak te kan sawi dun a. Kan fa te’n an rawn koh avangin min kalsan leh rih a.

Hun kal tawh…
Ka hun kal tawh ka chhui let a. Bawihtea nu nena kan intawn dan te; vanneihthlak tak mai a, India sawrkar zar zova Geneva-a kan khawsa thei ta mai te ka ngaihtuah a. Tin chhungkaw bilin awm mah ila, kan fate pahnih nena kan hlim dan te ka ngaihtuah zel a. Pathian malsawmna ka va dawng nasa tak em!

A ni, Pathian malsawmna dawng tura dawnthleng min zauh saka, min chawipui tu; nupui ka nei hi ka lawm a zual. Lehkha ka zirlaia zingtin leh tlaitina min tawngtaipui a; kan awmdun ve chang pawh a, thianghlim taka min ngaizawngtu a ni. Phu lo ngawih ngawiha ka inhriat thin khan, hmangaih takin min pawm a. Inneih hnua hmeichhe mize tha lo leh tawngkam chhia langchhuak thin an sawi lah, bawihtea nu nunah hian lang chhuak a awm der lo.

Hnathawhna atangin chau taka haw chang awm mah se, duat takin min lo dawngsawng a; ka mamawh apiang a theih chin chinah min tihsak thin, hah hi a dam sawng sawng zel nia. Kan fate enkawl kawnga ka puih tlemzia te ka ngaihtuah chang phei chuan, bawihtea nu hlutzia hi ka sawi seng lo a ni ber e.

Ka phur thut a…
Bawihtea nu rawn kal leh lawk ka’n ti a. Vawihnih zet ka koh takah chuan, mak tih hmel takin ka thutna bulah chuan a rawn ding a. Ka tho lawk a, ka pawm ta. Bawihtea nu, chhungkawm hlim tak nei tura nang ka nei che hi vannei ka inti thar em mai. I fate leh kei min enkawl dan kawng tinrengah hian sawisel tur reng ka hre lo. Nangmah avang hian vannei ka inti ngawih ngawih tiin a biangah ka fawp zauh a. A nui mawi tak mai, ka en nin ngailoh thin aia mawi zawk maha min nuih saih chungin, nang ka nei che hi nihlawh ka inti zawk asin a ti a.

Kan hmai a inhnaih tial tial lai chuan, bawihtea te unau sikul kal tura inpeih ap chuan, mak ti takin pindan kawngka a dingin min rawn thlir a. Mampuii, a naupang zawk chuan, a-nu leh a-pa an induat leh tawh a ti reuh a. An lam hawiin, mampui I nu hi a fel em a, ka’n duat leh lawk a nih hi ka ti a.

Bawihtea, pawl thum zirlai chu ka pawm a, a nu’n Mampuii pawl khat zirlai a pawm ve bawk. Kan fate sikula thlah turin, kan chhungkua chuan, hlim takin kan chhungkaw car-ah kan chuang ta a.

18 Responses to “Ka thai duatlai…”

1
Saitawk Says:
September 24th, 2012 at 11:03 pm
Chhiar ila..
Report this comment
2
aduhi Says:
September 24th, 2012 at 11:13 pm
va thui ve
Report this comment
3
saint sammoo Says:
September 24th, 2012 at 11:23 pm
va nawm hmel em!!
Report this comment
4
mamboihi Says:
September 25th, 2012 at 1:30 am
Mahminga chu pawl 12 i nih laia tangin hetiang vel dream tawh si…. tun thlenga heti i la ni hi chu i chiangkuang lo tlat hahaha!! I Scooty khan nangmah ringawt phurh a ning tawh ngei ngei ang haha!!
Report this comment
5
La lawma Says:
September 25th, 2012 at 2:06 am
Va nuam dawn em.
Report this comment
6
Mx Says:
September 25th, 2012 at 2:21 am
I duh ang ngei hi i la tawn ka duhsak che La zawng zel teh
Report this comment
7
CFL Says:
September 25th, 2012 at 4:56 am
Ka chhiar tan dawn e. Lo inhrilh darh rawh u. Haha.
Report this comment
8
chhana Says:
September 25th, 2012 at 5:10 am
I duhthusam? aia tha leh duhawm nei turin ka duhsak a che.
Report this comment
9
Awmtea Khiangte Says:
September 25th, 2012 at 6:16 am
I suangtuah ang hi nupui tur ka zawng ve dawn
Report this comment
10
Dr Mahminga Sailo Says:
September 25th, 2012 at 7:23 am
Mahni mawng hlim te pawh ka ang e. Pawl 12 zirlai nih ka chak em em lah chu, ka ni dawn lo phawt chu a niaah…
@aduhi… Mahni sei loh paw’n, thuziak tal sei ve se ka’n ti mawle..
@mamboihi.. Duhthuleng kan sam zuap zuap reng dawn a nih hi..
@awmtea.. Ka suangtuah ang khi an vang lutuk..
Ka thai duatlai thingpui lum hi ka’n khilai ang che u..
Report this comment
11
Awmtea Khiangte Says:
September 25th, 2012 at 7:30 am
E khai, a va tui ngaih ngaih ve le
Mawng hlui deuh hi chu kei pawh nula hmaah ka hlim ka hlim thin alawm, zak duh reng reng suh
Report this comment
12
Dr John Says:
September 25th, 2012 at 9:53 am
I duhthusam ngei nupui-a i neih ka duhsak a che.
Ka rilru khawih zual lai “kan chhungkaw car”
Report this comment
13
evergreen Says:
September 25th, 2012 at 10:02 am
Nula lam a nih ka ring leh deuh reng ah..

Dr. Mahming, Khi tiang khi chu MIsual zingah pawh hian an tam ang, i la tawng lo mai mai niang. Tan han la deuh la. Good luck
Report this comment
14
Dr Mahminga Sailo Says:
September 25th, 2012 at 11:08 am
@ Awmtea…

@ Dr John.. Ka lawm e. Thahnemngai takin ka’n zawng zel a niang chu…

@ evergreen… Nula ringawt ka sawi thin a, hma ka sawn tawh dawn…

Tak takin a, kan ram zimte, mihring nuai 10 chuang hlek chenna ni si, sual rapthlak leh maksak tak tak thleng fo hi a veiawm em a. Sual tam tak hi chu, chhungkua atanga inzirtirna tha lo leh dik tawk lo a niin ka hria. Kristian chhungkua (inti?) te hian hmabak kan va nei ko tak em!
Report this comment
15
lushai_er Says:
September 25th, 2012 at 11:21 am
“Bawihtea, pawl thum zirlai chu ka pawm a, a nu’n Mampuii pawl khat zirlai a pawm ve bawk. Kan fate sikula thlah turin, kan chhungkua chuan, hlim takin kan chhungkaw car-ah kan chuang ta a.”

Hlatekhua a awm i chak ve a ni maw ? “Switzerland of the east” hi a nuam ber a lawm maw le.
Report this comment
16
Dr Mahminga Sailo Says:
September 25th, 2012 at 11:33 am
@ lushai_er… “Switzerland of the east”, zu leh a kaihhnawih reng reng khap burna rama, zawlaidi leh eng eng emaw zu rui a, Anthurium Festival an tih emaw ni lawm a mi hausa te’n nawm an chenna hmun, zofate incheina aia chakma thuamhnaw mawi tia lawmman an hlan na hmun kha chen a chakawm lo em alawm… (phunchiar lawk)

Tak takin, khawpui nun ngai reng reng lova, vangpui awllen lai chen a; lentupui hring dup hnuaia, ngirtling kiu vawng vawng karah, zotui thiang dai dak han dawt khawlh khawlh lai te dawnkir chuan, lung zawng a leng a ni…
Report this comment
17
PKfanai Says:
September 25th, 2012 at 12:24 pm
Tunlaiah mi tlawktlaw, nun loose tak tak, buanchaklo leh ‘Chatuantawii’ te tam tak awm bawk mah se, i duhai sam ang pawh hi an tam lutuk tho. Cheer up.
Report this comment
18
Chhuaklinga Says:
September 26th, 2012 at 5:54 am
Ngaihnawm lehpek e.

I duhthusam ang khi lothleng chiah lo mahse, a changtunu ang khi chu tawng mawlh ang che.
Report this comment