mi(sual).com

(Chhiar duh in lo awm tak mialin… )

Ui vulh tute tan a ninawm leh an buaipuiawm ber chu hmul tla (alopecia) hi a ni awm e. A bik takin ui hmul sei leh buk/chhah (Golden Retriever, Pomeranian, Spitz, Alsatian, Cocker Spaniels, poodle, etc.) te’n an vei tam bik. Chhan hrang hrang awm zingah, ui note an than chhoh lai a an hmul inthlak hun laite, hun bik a zir (seasonal) te, natna hrik vang te emaw, chaw tha tlakchham vang te pawh a ni thei.

I Ui vun leh hmul hrisel nan:

1. Nitin emaw kar khata vawi 2/3 tal an hmul khuih thin tur(Brushing): An hmul a zirin brush hman tur pawh a dang thei. Ui hmul khuih hian, hmul tla tawh kan khuih thlak bakah, tuhrik/saphihrik awm te pawh a khuih thlak theih a. Tin, an vun a thisen kal vel pawh a pui thei bawk. Ui reng reng, khuih nuam ti lo an awm kher lovang tih theih a ni.

2. Hmul to ang zel in khuih tur: Hmul to/tluk loh zawnga khuih hi, a hmul sei tan phei chuan a na viau thei.

3. Chaw tha pe ang che. I theih angin chaw tha pe la. Ui hriselna leh dam thatna hi an vun/hmul ah hian a langchhuak ber thin. Doctor-te rawn la, i ui tana chaw pek tur an hrilh thei ang che.

4. I chaw ei ang kha I ui tan a hrisel vek lo thei. Mihring chawah hian ui tana chaw tha tam tak a awm ngei mai. Amaherawh chu, an tana tha lo tam tak a awm bawk. A bik takin ui tha chi I vulh a nih phei chuan, an chaw leina atan sum insen huam a ngai, an hrisel that I duh chuan.
(more…)

(Zu ka sel lova, zu in mi ka sawisel hek lo. ‘A thui em a, ka chhiar chhuak peih lo’ i ti a nih paw’n, a tlangkawmna tal hi chu i chhiar hram ka beisei.. )

A khuhhawnna
Primary leh middle school kal chhung zawngin, Football khelh aia khelh loh thlang zawk thin ka ni a. Football khel thiama hriat ka ni ngai hek lo, tun thlengin Ama’rawhchu awmna hmun a zirin thil kan tih ngai loh leh kan thiam em em loh pawh tih a ngaiin thiam anga kan awm a ngaihna hun te pawh hi a awm ve zel a. Nikum hmasa, October thla khan kan College Football Team-ah ka tel ve vangin Mangalore kalna hun tha deuh ka neih phah a. Football thiam vang ni loin khel thiam an tlem vang zawkin chu hun chu ka pumpelh duh bik hek lo

Duhthusamin a lum…
Kan thu mai mai pawh hi kan thlan nghal dep dep mai nia! Tuifinriat kam tih takah a boruak a uap churh mai a. Zokhaw tlangval tawnah, lung min len tur reng a awm lo.
Beach kan tlawh ve chhun lah, nula tawih deuh hmuh chu hnai lo; tuifinriat kama vai puithiam pali te’n an sakhaw serh leh sang khawihin an thu bial laih a, a laiah mei an chhem khu let let. A piah lawkah Isua zirtir Peter-a te hnathawh ang thawk sanghamantu kan hmu tih mai loh chu, a hmun a nuam a tih a ni mai. Thil danga awm hlawl lo. A awm lo tak zet.

(more…)

(Tunlai chu Ui leh Zawhte chungchang ngawt ka post mai a. A ninawm lem lo’ng chu maw… Vawiin atangin ka insum ve tawh ang… )

Kan chenna hmun, chhungkaw dinhmun leh mizia a zir hian ui kan vulh duh te pawh a inmil a tul. Chhangchhe chhung; naupangte nen a khawsa I nih chuan, naupang te hrethiam leh zaidam chi I vulh ang che.

Ui chi (breed) hrang hrang a awm a. Chu’ng zingah chuan: Golden retriever, Labrador retriever, Cocker/English Spaniel, Pug, Beagles, ldt., hi an zaidamin, an nun pawh a zawi a, thu an awih em em bawk.

Ui hi ran fing leh rinawm tak ni mah se; ran an nih angin, enge maw thil tha lo tih thut chang an nei ve thin a. Hmun fal deuh a naupang nen an awm changin, naupang beih/fiam thut thut an ching a. Chuvangin ui note I lak reng rengin, I awmpui lai ngeiin I fate nen an innel in an infiam tam tur a ni. Hetia naupang nena an awm ho fo hi chuan, midang leh ran dang lakah pawh an chhan thei thung. Hei vang hian, ran rinawm tih an ni reng a ni.

(more…)

Nizân chu ka thianpa pakhat nên kan in text mai mai a, eng eng emaw kan sawi hnuin an vêng nula thenkhatin min * (star) tih a sawi ta! Ka ka hau mai maw le! Ka awih chiah lo a, ka awih lo phal bawk si lo, ‘a nuam e, a hrehawm’ an tih ang deuh hian ka awm!

Isua ka an vêna lai tak “piahmang thatna leh hmêl mawina rêng rêng a nei lo va; amah kan hmuha amah kan duhna tûrin mawina rêng rêng a awm lo” tih ziak ang mai khân mawina leh thatna rêng ka nei lo a, mite min duhna tûrin keimahah hian duhawmna rêng a awm bawk si lo. Nulain min * theihna tûr khawpa hmêl tha ka ni lo tih chu ka thiante pawhin min Amen-pui thlap. Mahse, vêng thenkhata nulate chuan min lo * ve khang lang a nih chu.

Ka tân zawng a bâka lâwmna hi a awm thei hauh lo. Mut ka tum a, ka mu ngei alawm, mahse muthilh te chu khawi lamah. Zîng takah ka tho a, ka hawiher te chu zâng tak a ni, zâng tak. Tihtûr awm ang ang pawh phûr takin ka ti zo duak nia maw le! A chhan ni âwma ka puh thlûk tâk ber chu ‘Nula-in min *’ miau alawm. Nuam veng veng tak a ni!

(more…)