Pathian hi hriat chian lehzual kan duh a, kan bei thin. Tun hma aia hriat chian lehzual dan awm chhun chu hmangaih lehzuala a duhzawng anga awm hi a ni mai.
Thenkhat chuan kan thlarau chauh kan ngaihtuah a, kan taksa kan ngaihthah fo. Nan taksa hi kan hre chiang tur a ni. Kan taksa huat zawng leh mamawh kan hre tur a ni. “Ka pum a na” kan ti leh ngawt thin. Pum na siamtu eng vang nge, eng nge ka taksa tana damdawi tha ni ang tih te hi kan zir fo tur a ni (midang ei ang ei ve ngawt loin). Mahni leh mahni hi kan inenchhin (experiment) fo a tha hle.
“Zan dar 12:00 hma chu ka muhil thei lo,” kan ti leh ngawt thin. Eng vanga muhil thei lo nge kan nih? A chhan chu kan taksa circadian rhythm (biological clock) chet vel dan vang a ni. Cortisol hi kan mut leh thawh chungchanga thuneitu ber a ni. A tlangpuiin kan thawh hnu minute 30 vêlah cortisol hi a lo sâng a, nilengin zawi muangin a tla hniam hret hret a. Mut hun zanah a lo hniam ta hle a, chu chuan mut a tichhuak thin.
Circadian rhythm hian darkar 24 (ni khat) chhunga kan taksa awm dan tur a hril a. Zing a nih chuan min kai tho a, zanah kan mut a tichhuak thin. Mahse, chu biological clock chu kan herh danglam chuan kan mut leh thawh hun a buai thin. Taksa hi khawl ropui tak a nih angin zan dar 12:00 thleng meng thin kan nih chuan zan dar 12:00 hma chu cortisol a tla hniam lo a, kan harh tlat thin tihna a ni. Ama’rawhchu, zan dar 7:00-a i mu a, a tuk zanah dar 12:00-a i mut leh a, a tuk leh zanah dar 9:00-a i mut leh si chuan i taksa circadian rhythm (biological clock) kha a buai dawn a, mut hun mumal i nei thei lo ang a, i mut chhuah hun pawh a buai vek ang.
Chuvangin kan taksa awmdan hi fel taka kan rel a ngai a ni. Lirthei leh khawl dang te pawh uluk taka kan enkawl a nih chuan eng vangin nge kan taksa khawl hi uluk taka kan enkawl loh bik ang? Circadian rhythm dik taka kan vawn theih nan mut hun leh thawh hun bi dik tak neih tum ila. Chu chuan taksa hriselna kawngah nasa takin min pui dawn a ni. Kan taksa hi hre chiang turin i bei zel ang u.
)
hairehai
