mi(sual).com

“Ani chuan kan natnate phurin, kan LUNGNGAIHNATE pawh a phur ngei a” (Isaia 53:4)

Isaia bung 53 na hi a mawiin a thlamuan thlak ngawt mai. Lal Isua hian kan Sualnate zawng zawng a phurh bakah kan LUNGNGAIHNA te pawh a lo phur reng mai hi a lo nia. Pathian anga awma Pathian tluka awm chu thil thlakhlelh hleih theihah a ruat lo va, mihringte anga lo piangin, bawih angah a insiam a, amah leh amah a intitlawm ta zawk a. Tin, mihring anga lo awmin a inngaitlawm a, thi khawp hiala thu zawmin a lo awm ta a, krawsa thihna ngei chu.
Kan Lalpa Isua Krista hi Pathian Mihringa lo chang, mihring nihna pumhlum nei niin, na hria leh Lungngai thei, Hrehawm tinreng tuar thei a ni.

Mihringa alo chan khan mihringte ai hi a han awh zo khawp a, Mihringin kan paltlang ngei ngei tur ang chi, Saruaka lo pian te, lum leh vawt tuar te, riltam leh tuihal te, Lungngaih leh thlaphan te, Duhtak te Suna tah chhuah hawm te, Thlemna mihring tuar theih ang chi reng reng te a lo tuar chhuak vek a. Chumi avang chuan Hebrai bung 4:14-16 ah khan chiang takin a inziak a ni. Kan Puithiam Lalber kan sual thawi nana amah leh amah inhlana hian kan chaklohna te min hriatthiam pui a, Thlemna leh lungngaihna kan tuar theih chin a hria a, He mihring taksa hian na leh hrehawm a tawrh theih chin hi amah ngeiin tuar chhuak vekin min hriatpui vek a ni.

(more…)

…Thu hmatheh…
Matthaia 21:1-22 chhung thu ațang hian Expository Sermon ngaihthlak kan tum ang. A thui deuh dawn avangin Sermon 4-ah kan țhen ang. Mat.21:1-22 chhungah hian Thupui lian tak tak 4 a awm a:- (1). Sabengtung leh a note, (2). Hnehtu Jerusalem-ah a lut, (3). Jerusalem Temple thenfai thu, (4). Theipui kung hau-hlum thu, te hi thupui pawimawh zual an ni. Hengte hi Expository Sermon-in kan zir-ho ang a. A hun thu-ah hian, tlai lutuk a awm thei lo turah ngai ila, a țha ang e.

Lal Isua Hnehtu nihna famkim nen-a Jerusalem-a a luh chungchang hi kum tin biak in-ah leh lenkhawmna-ah kan ngaithla țhin a. Kan ngaithla zing viau naa, Pathian thu a nih tlat avangin tuma’n kan ning lo hi thil ropui leh mak tak a ni. Vawiinah hian Matthaia 21:1-3 chhung thu hi kan zir dawn a ni.

…Bethphage… {Matt. 21:1},
Bethphage hi Heb. beth-phag-e, “house of un-ripe figs” tihna a ni a, Bethany hi Heb. beth-anya, “house of dates” tihna a ni. “House of poor,’ ‘house of misery” tihna pawh a ni thei bawk. Bethphage hi Bethany leh Jerusalem inkara awm a ni a. Jerusalem ațangin Bethany hi Mel 1.5 vel (kms 2.4) a ni a, Jerusalem ațanga Bethphage hi Mel 1 a tling lo deuh. Bethphage hi Lal Isua hunlai hian Jerusalem kulh hungna bul (pawn)-ah a awm niin an sawi. Lal Isua hi Bethany-ah (Lazara-te in-ah, John 12:1,12) a riak a, Bethany ațang hian Jerusalem-ah rawngbawl-in a kal țhin a ni.

(more…)

 “Tin, chawfak hun lai a lo ni a, chumi achin behliang mun hun thlengin khawvel a lo thim ta vek a,ni eng a reh ta a; tin, Pathian biak in puan zar chu a laiah a lo thler ta a”. Lk. 23:44-45.

Lal Isua thih ni a Jerusalem Temple chhunga hmunthianghlim ber daidanna puan zar a thler thu kan hre fur awm e. Mahse a awmze riltak hre pha erawh kan tamlo mai thei.

“Chutichuan, vana thil awm angte chu chung chuan tihthianghlimin a awm tur reng a ni, van thil taktakte erawh chu chung aia inthawina tha zawktein tihthianghlimin a awm tur a ni. Krista chu kuta sak hmun thianghlim, atak anpuiah chuan a lut si lo va; tunah Pathian hmaah kan aia ding turin vanah ngei a lut ta zawk a;nimahsela Puithiam Lalber chu kum tinin mahni thisen lo, thisen keng chunga Hmun Thianghlima a lut thin angin,ani chu mahni inhlan fo turin a lut hek lo;chuti ni suh sela, leilung pian tirh achin vawi tam tak a tuar tawh tur a ni; nimahsela tun lai hun tawpah hian inthawi nana inhmang chawpin sual tihbo nan vawi khatah a lo lang ta nghal a ni. Tin, mihring tan vawi khat thih ruat a ni chu mi hnuah chuan rorelna a awm ang;chutiang bawkin Krista pawh mi tam tak sualte kalpui tura vawi khat hlana awm tawhin, chhandamna hmu tura amah lo nghaktute hnenah chuan sual tel lovin vawi hnihnaah a lo lang leh ang” He 9:23-28.

(more…)

“A saw raltiang tlangah Kros hlun tak chu a awm,
Tuarna leh mualpho tarlanna chu,
Kei ka tan chu Kros chu ngaihhlutawm ber a ni,
Misual tan mitha ber a thi si”

Mite hmuhsit nih hlau thin, rual pawl phaklo nih hlau thinte hian mi hmuhsit leh endawng hlawh chhuak turin kan nunna kan hlan phal leklo ang le!

Mi hmuhsitna tuar turin kan CM hian mi Septic Tank a ek a paih leklo ang. Nang pawh mi hmuhsit tuara khawihli vei pawh i thenawmpa lungawina a nih dawn avangin i duh chuang bik nang.

Kan hmuhsit em em hnam thenkhat te tan kan nun kan hlan phal ve meuh ang em maw chu le?
(more…)

Sam 24:7-10

“Aw kulh kawngkate u, in lu chungte kha chawi sang ula;

Nangni kawngkhar hlunte u, inkhai sang rawh u:

Tichuan ropuina Lal hi a lo lut dawn nia.

Ropuina Lal chu tunge ni?

LALPA chak tak leh thiltithei tak,

LALPA, indonaa thiltithei tak chu a ni.

Aw kulh kawngkate u, in lu chungte kha chawi sang ula,

A ni, kawngkhar hlunte u, chawi sang rawh u:

Tichuan ropuina Lal hi a lo lut dawn nia.

Chu ropuina Lal chu tunge ni?

Sipaihote Lalpa chu,

Amah ngei hi ropuina Lal chu a ni.”

Tumkau ni a lo thlen chuan naupangte tumkau nen lal Isua Jerusalema Lal anga a luh ni chu kan hmang ve thin a. ‘Aw kulh kawngkate u in lu chung te kha chawi sang ula’ tiin kan au lauh lauh thin.
(more…)

Tunlai Mizorama thil thleng hi rala khatah kan lo hre ve thin a, hriat nuam lem lo tak a tam ta hle mai; pawngsualah pawh pawngsual naran lo deuh thlengin kan tawng mek a, in kang leh thihna chi hrang hrangin min tuam vel mek a, Facebook leh social website thenkhata kan lo hriatte hi a dik hlawm ngei a nih chuan kum dang chu a ang lo a ni. Heti taka in kang tam maite hi engvang nge ni ang le? Kan fimkhur lo ta thut em ni? Kei chuan ka ring lo. A nih leh khua a lum vang em ni? Khawlum tak tak hma atang daiha intan tawh a ni bawk si. Engvang nge ni ta ang?

A chhan
Ngun taka ka ngaihtuahin chhan a nei tlat a ni; kan hla sak thinah khan, “Thil te ber pawh a veng, van thil a rel kim e” tih kan sa thin a, Pathian hian thil te ber pawh min vensak ta lo niin ka hre tlat. Thil te tak te nia kan hriat hi a lo lan chhuah meuh chuan a lian viau zel, a pawi hma chiaha chhungril lama min hrilhtu hi a bo chuan mihring fimkhurna hian a daih seng miah lo. Tumkhat chu ka thianpate chhungkua hi an lo leng a, kan inluah chung zawlah khua ka chuanpui a khawchin ka kawhhmuh lai chuan ka rilruah, “Khawnge i fapa” min rawn ti dawt hian ka hria a; ka bulah ka fapa kum 2 mi kha a awm ve reng emaw ka tih lai khan a lo awm reng reng lo.
(more…)

…Tih Theih Nise Ka Va’n Chak Em!…
Thi mai tawh tur, țawng pawh țawng ring hlei thei tawh lo, aw chau em em chung chuan, amah enkawltu Nurse hnenah chuan, “Theory of evolution ka hmuh-chhuah kha, ka hmuh-chhuah dan dik tak angin ka sawifiah hman ta lova, pawi ka va’n ti tak em! Ka hmuh-chhuah dan dik tak anga sawifiah theih ka va chak tehlul em ve aw!” a ti vawng vawng mai a.  A ngenna leh duhthusam angin, Rom 8:1-2, “Tunah zawng Krista Isuaa awm te tan chuan thiam loh chantirna reng a awm tawh lo. Kristaa Nunna Thlarau dan chuan sualna leh thihna dan ata chu min tichhuak tawh si a,” tih thu chu Nurse chuan a chhiar chhuah sak hnu ah, Pathian hla “There is a green hill far away, Without a city wall, Where the dear Lord was crucified, Who died to save us all” (S.S.S. No.1134) tih chu a sak sak leh a. Tichuan, thlamuang takin a chawl ta a ni. He a chanchin kan sawi mek hi Theory of Evolution hmuchhuaktu Charles Darwin a ni.

…Evangelist James Fegan Hnena Charles Darwin-a Lehkhathawn…
Evangelist James Fegan chu rawngbawl tura sawm a nih avangin Darwin-a te awmna-ah hian rawngbawlin thla 3 vel a awm a. A rawngbawlna hian rah a chhuah țha em em a. Darwin-a hian Evan. James hi lehkha hial thawnin lawmthu a va sawi nghe nghe a, “Thla tlemte chhunga i rawngbawlna khan kum tam tak chhunga kan rawngbawlna leh tih ve theih zawng zawng a rawn khum vek a ni. Zu leh sa-a saltang mek-te hi tuman kan chhanchhuak thei ngai lova. Mahse, i rawngbawlna ropui tak avangin, tunah chuan kan khuaah zurui pakhat mah hmuh tur an awm ta lo! Kan va lawm em!” tiin, ama mimal-in Charles Darwin-a hian Evangelist James Fegan hnenah hian lawmthu a va sawi a ni.

(more…)