mi(sual).com

By Denis Lalfela

Khawvel ropuina atanga thlir chuan Kraws chu ânchhe dawng, Pathian fapa meuh pawh a thihna a ni. Tirhkoh Paula chuan Kraws hlutzia ti hian min hrilh a, “Kraws thu chu boral mekte tan chuan âtna a ni si a; keini chhandam mekte tan erawh chuan Pathian thiltihtheihna a ni zawk e” (I Kor 1:18). Kraws thiltihtheihna hmu fiahte chuan an ngaisang a; huaisen takin Lalpa an zui thin. Kraws hmangin Lalpan mitin a hnenah a hip a. Amah ngeiin, “Tin, kei, lei ata khaikanin ka awm chuan mi zawng zawng keima hnenah ka hip ang” (Jn 12:32) tiin Pain a pek tawhte chu a huikhawm tur thu a lo puang tawh a. A pa duhzawng tih chu a chaw tui ber (Jn 4:34) a nih avangin a tuarna kal tlangin tlansate min hruaikhawm vek dawn a ni. He Kraws thiltihtheihna rinchhan hian Zofa tam takte chuan India ram leh ram dangah Chanchintha an puang mek a, he Kraws avang hian zâm lovin Lalpa tan ram an kâp zau zel a ni. Harsatna a tam poh leh Kraws atangin chakna an thâl tam a, mite tana malsawmna ni thei khawpin an inpe ngam thin.

Kraws chu sual hnehna a ni

Kraws-ah khaikân a nih hnuin Isuan, “Ka Pa, anni hi ngaidam rawh; an thiltih hi an hre lo a nih hi” (Lk 23:34) tiin amah thiam loh chantirtu leh khengbettute a ngaidam a. Ngaihdamna hi Pathian atanga chhuak a ni tih leh ngaidamtu nih ropuizia a puang chhuak bawk a. Hre reng chunga min tinatute pawh kan ngaihdam hian hnehna kan puang a lo ni reng mai. Tin, Krista hnehna azarah hnehtu kan ni ve a; mihring ram atanga thil theih loh ni anga lang kha Krista avang zawkin kan lo hlen ve reng a lo ni. Kalvari inthawina chuan mi tin min silfai ta a. Sual leh thihna chu hnehin a awm ta. Chak lohna nei theuh ringtute kan nih avangin vawi khat chauh hnehna puan chu a tawk ngai dawn lo va, ni tina hnehna kan puan a tûl dawn a ni. Thil tha chu hre reng mah ila kan hlen kher lo. Kan duh anga kan awm theih lohna tak hi kan thinlunga sual awm nghet tak chu a ni. He duhthlanna inlumlet reng mai nunram hi Tirhkoh Paulan Rom 7:14-23 ah min hrilh a. Mahse chu sual hnehna tur kawng dik chu min kawhhmuh bawk a. Kan sual avanga krawsa khenbeh Isua Krista hminga hnehtu kan ni (Rom 7:24). Krista thihna leh thawhlehna chuan mi tin hnehna famkim min pe ta. Lalpa chu fakin awm rawh se!

Kraws chuan nun thar min pe

Vawi thum lai a Lalpa phattu Petera kha, vawi thum vêk Lal Isuan a beramte chawm turin a ko nawn tlat mai (Johana 21:15-17). Lal Isua chhandamna ruahmanna (project) ropui takah chuan misual ber pawhin hmun kan chang vek a ni. Hei tak hi Pathian leh hringfate danglamna a ni. Keini chuan min phatsantu leh min tiduhdahtu chu ngaihdam ahnêkin an hmel pawh kan hmu peih meuh lo. Lal Isua chuan a mangan lai bera amah haidertu kha a la hmang duh tlat a ni. Ngaihdam tlâk loh khawpa suala i inngaih lai khan, Lalpan a la ngaidam duh che asin! Tun aia nasa a hman che a duh tlat a ni. Nun thar pek che hi kan Pathian hlimna zuk ni tlat a. Kan va han nihlawh em!

Kraws chu nun keh sawmna a ni

Kraws thlangtute nun chu a kehsawm ngei ngei tur a ni. Lal Isuan keh sawm nun hi a ngai pawimawh a; mi dangte tana thlarau chaw ni thei tur khawpa keh sawm turin min sâwm theuh a ni. “Buh fang leia a tlâk loh va, a thih loh chuan a mal chauhvin a awm reng thin; a thih erawh chuan tam takin a rah thin. Tupawh a nun thlahlel chuan a hloh thin; tupawh he khawvelah hian a nun ngaitlâwm chuan chatuana nunna tur a vawng reng ang” (Johana 12:24-25). Tisa châkna sual te, eirûkna leh sual lian dangte kan khenbeh ngam si loh chuan, kan rawngbawlnain rah tha a chhuah ngai lovang. Keh sawmna nun chuan thianghlimna nun a hring tur a ni. Lal Isuan, “Thinlunga thianghlimte chu an eng a thâwl e, Pathian an la hmu dawn si a” (Mathaia 5:8) tiin pawn lam leh chhung lama thianghlim a tulzia a sawi a. Pathian hmu tur chuan ni tin kan intihthianghlim a, ni tin Lalpa hmangaih lehzual kan tum a tul bawk ang.

Kraws chu ni tina put tur a ni

Kraws chu ni tina pu tura sawm kan ni. Amah Isua ngeiin, “Tupawhin mi zui a duh chuan mahni hrehawm pawisa lovin, ni tin a kraws puin mi zui rawh se” (Luka 9:23) tiin min phût a. Luka ziak hi i chhiar chiang em? ‘NI TIN’ tih hi a ziak tel kher a. Hei hian kan peih châng châng ni lova, englai pawha Lalpan kraws min pêk vete pu tur kan nihzia a tichiang a. Kan krawste hi zo taka pu tura beisei kan ni hauh lo va; chhel taka pu tura koh kan ni zawk bawk a ni. He kraws pu tur hian khawvel mit hmuha mifing leh mi chakte thlang lovin, chhuan tur rêng nei lo mite thlan an ni (I Korinth 1:26-27). Tin, kraws lêra a tuar lai khan sipai za hotu khan Pathian Fapa a ni tih an puang chhuak a nih kha!

Isua nun pum mai kha Pathian Fapa a nihzia puan chhuahna a ni. A thihna leh thawhlehna hian a nemnghet chiang hle. Famkim lohna khawvela kan la awm avangin mamawh leh duh tam tak kan nei. Kan duh apiang kan hmu hek lo. A chângin kan buai a, a chângin kan mangang ru thin. Kan hliamte a nasa a, dam harsa kan ti fo. “Engati nge Lalpa?” kan ti fo theuh awm e. Heng kan zawhna leh tuihâlna zawng zawng hian Krista Krawsah chauh chhânna fumfe leh damna famkim a hmu ang. Bân phar meuha kan tana a tuarna azarah tihdam kan ni. He damna thu hi Mt. Peteran ti hian a sawi: “Sual lamahte thi tawhin, felna lamah kan nun theih nan amah ngeiin thingah khan a taksain kan sualte a phur a; amah an vuakna vualte chuan tihdamin in awm ta a” (1 Petera 2:24). Krista kha tholeh ta lo se la, a tuarna khan awmze famkim a nei lovang. Krista thawhlehna hi kan tan beiseina thar lo ni se la: a tuarna, thihna leh thawhlehna chuan kan hliam zawng zawngte tidamin thinlung thar min thlen theuh rawh se.

(He article ziaktu hi Katholik Puithiam a ni a. Sacred Heart Theological College, Shillong ah Lecturer a ni. Mobile: 09862753130).

Similar Posts:

• Tih nun kan ni (Easter pual)
• Tunlai ka mutmawh hnarmawh.
• Beidawngte Pathian lungngai te Thian
• Chhandamna Thu
• Kraws chuan khawvel nen min tihrang ta

Recent Posts:

• mi(sual) member piancham!
• Kal dem dem.
• Nova’n Anchhia A Lawh Sual Emni? {:Sunday Pual:}
• Beiseina nung (Pathianni pualin)
• Burma-ah ka zin Part – IV (Tuingo khuaa lung satel mak an tih kha)

This entry was posted on Tuesday, April 3rd, 2012 at 4:00 am and is filed under Information, Religion. You can follow any responses to this entry through the RSS 2.0 feed. You can leave a response, or trackback from your own site.