Archive for the ‘Zu’ Category

RV Lamtluang Part II

Friday, December 2nd, 2011

Khatia ka haw ta kha, ka sawi tawh ang khan ka fapa ka han pawm kha chaw ei a hun tak mai avangin ka nghat a, tichuan kan nu chuan chaw ei a han siam saw sawk a, chawhmeh lam erawh chu a tha fahran lo.

Kei erawh chu a hma lama ‘chaw ei tuina’ ka lo tih tawh avang khan kan chawhmeh chu a tui leh tui loh lam pawh ka hre chang meuh lo. Ka ei buan buan a ni deuh ber mai. Mi dang min lo hmutu chuan sawi chhawngleh sela chu vawk, chaw ei tui tak ei buan buan te pawh ka ang zawmah mai thei a ni.

Chaw ei kham chuan thutthlenga thu mu chungin TV kan en a, ka lo thumu hman hmawh pek a niang chu, kan nu-in mi rawn kai harh a, “Hey rawn mu ve tawh ta che, naupang pawh ka muttir vek tawh a nia” a rawn ti a. Tichuan ka han tho tual tuala, khum lam pan chuan ka phei ta a. Khumah chuan ka lawna, ka mu hlawm tawpa, ka muhilleh nghal mai ni tain ka hria.

(more…)

Zu zet hi chu aw…..

Thursday, November 24th, 2011

Amah chu Department pakhat ah Joint Director a ni a, motor te pawh dawng pha khawp a nihna sâng chelh a ni. Mahse, zu in a tih danglam thin avangin thenawm khaw vengte buaipui ber chhungkaw din tu a ni tlat. A ruih tawh chuan chhungkaw awp lumtu tur khan buaina a siam a; thil ho te te ah a thinrim a, a nupui chungah tuanin kutthlak satliah chu sawi loh, in sawisak chang an nghah mai a. An ri bur bur a, zahna hre tawh hek lo le, a au ruai ruai a, a nupui hau ri nen thenawm te tan ngaihthlak nuam lo tak a ni. Zingah thung chuan zan lama boruak nei lo niawm tak hian in kawt velah inngeih hmel tak hian nilum te an lo âi dun ang leh lawi si a. Heti tak hian zu hian mihring a lo thlakthleng thei a nih dawn hi ka ti rilru neuh neuh thin.

Amah chu a ruih lem loh chuan pa dam thlup mai hi a ni a, han kawm vel pawh a nuam viau; mahse a ruih tawh erawh chuan a danglam hlak thung. A ruih tawh chuan zanah a bulah a nupui a awm tha ngam mang lo a, a sawisak hlau reng rengin thenawm te in velah a fate nen an biru a, a mutthilh hnuah an haw ve ngam chauh thin a ni. A nupui leh fate hlau tlanchhia thenawm vela a rawn zawn chang lah a tam. A rem chang lai laiah kan lo bihruk tir mai thin. A hna avangin khaw dangah te a awm chang a awm a. A lo haw tur hi a nupui hian a huphurh thei em em a. Vawi khat pawh a nupui in “Tun Krismas chu lo haw lo hram se, thlamuang taka Krismas hman ka va châk em!” a tih ka hre hial a sin.

(more…)

Pawngsual (RAPE) rate atangin, “MLTP hian kan khawtlâng hi hmeichhia leh naupang tân a ti him” tih chi a la ni em?

Tuesday, November 15th, 2011

Pawngsual hi kan Mizo khawtlâng hmeichhiate leh naupangte tâna a him tak tak leh him tak tak loh tehfung á¹­ha tak pakhatah ngaiin, tûn hnai, 2009 leh 2010 pawngsual record thlîrin Mizoram dinhmun dik tak zir ta ila… (Pawngsual zawng zawng record theih vek a nih loh mai bâkah, pawngsual ni tak tak lo lo record pawh a awm thei ang. Hei hian “dinhmun dik tak” kan tum chu a á¹­helh sa pang ang. Amaherawhchu, record awm aá¹­angin a lan dân tal a hriat theih ang).

MYTH: “MLTP Act hian kan khawtlâng hi hmeichhia leh naupang tân a ti him.”

He ngaihdân kan in zirtîr reng lai hian pawngsual (rape) bîk han thlîr ta ila… (domestic violence, kidnapping etc. te chu thlir kân phawt mai ila)

FACT: National Crime Records Bureau annual publication, ‘Crime in India‘ 2009 & 2010-ah chuan pawngsual 83 kum 2009 khan kan ramah a awm a (zêp tam tak a awm bawk ang), population nêna chhûtin pawngsual rate chu 8.3 a ni. 2009 vêk khan kan á¹­henawm, Manipur chu pawngsual 31, rate 1.2 niin; Nagaland (22 / 1.0) a ni a; tin, min hnaih ber tu chu Assam (1721 / 5.6) leh Tripura (238 / 5.3). (A rate aá¹­ang chuan India ramah kum 2009 khan Mizote’n mi kan pawngsual nasa ber). “Ram thim, Kristiante tihduhdahna ram,” kan tih, Orissa-ah pawh pawngsual rate hi 2.5 chauh a ni.

(more…)

Ka lo ruih em vang a lo ni

Sunday, November 6th, 2011

Mizo hla hlui tha tak tak heng- Lalrintluanga Varte-Ka nghei dawn chuang lo, Lalbiakzauva-Zuapa a rui e, Lalkima Zote-Ka lo ruih em vang a lo ni, leh a dangte hi up bo mai atan chuan a pamhmai ka ti deuh.

Ngaihtuahna tam tak min neih tir a, a hla thu thlir pahin; ka rilrua thil awmte han pawt khawm dawn teh ang. Lei em ka chawi em lovang chu maw.

Ka nghei dawn chuang lo-
Zet-u-zu sawi apianga chil put tlat thin hian a do chu sawi loh, a tihrem dan kawng dapa MLTP Act thlenga nghawngkawl an han bat rup kha chu; saruh helh takin ka helh hial a.
“A duh chuan in se, a duh lo chuan in lo mai rawh se; in sawi a ngai lo” tia, Ui â ang maia bauh bauh thin ka la ni ta dah. Zalen takin zuar se kan changkang tawh lutuk, kan in thiam em em ang tiin; inthlan campaign taka campaign ching kha ka la ni zui.
(more…)

Mizoram grape wine leh kei

Thursday, November 3rd, 2011

Khatia grape zu tia Mizoram-a a rawn lar hlut vanglai khan kei chuan Zu pangngai ka in daih tawh a; Zu tak tak in ve ngamlo leh a khap dan kawng zawnga lo phisekte ang chuan grape wine kha ka phulpui ve lova, ka phurpui hlut lem hek lo.

Chumi kum Inthlanpui hma deuh, Suangpuilawn biala MLA candidate-ten drama an chan hma thla ruk velah khan Pu Lalhmingthanga MP (RS) hnungzuiin, Pu John Neihlaia MPS leh Dr. Biakzuala (BZa) te nen Suangpuilawn tlangdung te, Hnahlan lam thleng thleng tlawhin kan zin khawthawng a.

Chutih lai chu a kum ka sawi lovang; Suangpuilawn-a tihdam rawngbawlna vung taka Parmawia’n a kalpui zawh hlimchhawn, a par mawina chuai vel lai tak kha a ni e.

Keini zin ve kha nuam fu ni! Suangpuilawn-ah Ui min talh a, kan puar kher mai. Uisa kan ei vang ringawt hian min hmuh dan ilo nei hmanhmawh ang e.

(more…)

Zu Hi!

Tuesday, October 18th, 2011

Thatchhiat ka hausak pui a,
Taihmak ka thlachham thung.
Duhawmna ka mamawh a,
Hmuhsitna ka fawm thung.

Nawm chen ka tum a,
Hrehawmna ka dawng thung.
Thenrual ka pawl a,
Sualrawng ka bawl thung.

Hlim nih ka tum a,
Nguina ka chang thung.
That chhuah ka tum a,
Buaina ka chhuah thung.
(more…)

Kan nu leh pa kan u te ngaihsan em em “ZU”

Friday, September 2nd, 2011

Post hmasa lam ah zu chungchang ka hmu a ka rawn tui hnih dawn lo a. Ka ngaihdan leh ka hmuh dan ka rawn thawh leh dawn.:P

ZU: kan u te ho in a in ngaihsan em avang leh in sawi zing lutuk avang hian in nau te hian a tha lo leh sual zawng hlir in kan ngai ta nih hi maw!

Zu = Sual ?? O.o

Mizo hmuhchhuah ka ti maia, A khawi a lai mah hi sual ka hre ve lova a in tu a hmang tu a zirin a sualin a tha a ni mai! eg. Drug te hi sual ah kan ngai a O.o damlo an chiu a damlo chu sual a ni em? “A HMANGTU A ZIR” hei hi kan nu leh pa kan u te rilru ah hian phun nung thei i la ka it khawp mai!

Thil re re hi sawi hlawh apiang a lar in kan khel ber a “zu” kan ti te pawh hi ngawi hle hle in sir ah dah tha ve mai ila ngai ah kan nei ve mai ang! Zawlaidi te kha a rawn chhuah tirh chuan in sual phah te an awm em kha an lei dawn in :D tunah chuan e  an dawr pawh kan kal pel mai mai tawh! kan duh hunah kan lei mai!

(more…)

Zu hi engtinnge kan ngaih ve le

Wednesday, August 31st, 2011

Zu hi hmasang atang a lo awm tawh a ni a, an chaw ei rual in an in ve mai ṭhin a sualna atan an hmang ngai lo a ni. Keini chaw kan ei a tuihang kan hmang ang chiah hian Bible hunlai khan an lo hmang ṭhin. Hetih hunlai pawh hian zu hi rui ṭhin chu an awm ngei  a, mahse vantlangin ruih tur ah an ngai lo a ni.

Hun alo kal zel a zu tangkaina te an lo hre chho zel a, nachhawkna atan te hial hman nachang an lo hre  ta a ni. Kan Bible ah hian uain a sawina hi hmun tamtak ah kan hmu a, hman a nihna zawng zawng ah hian uain ti vek in an let a, hmansual(a chhelam sawina ah) zu tiin an let leh hlauh thung si a, chuvangin hemi kawngah hi chuan fuh tawk lo a awm  thei awm e.

Mizoram ah khan engvang in nge Kristiante khan an khap nachhan kha ni ang le? kan tih chuan khatihlai hunah khan  zu leh sakhua na thil kha kalkawp ang reng a an ngaih avang khan an khap a ni, chutiang bawkin khuang pawh khap a ni.

(more…)

Turin min hrai ani.

Wednesday, August 10th, 2011

Kan sawi a, kan inhniala, ninawm khawpin chanchinbu ah pawh kan hmu a, kan inhriat ril siaka, Mizo mipuite hmun hnih ah min ti phel phawk ani he ZU KHAPNA DAN hian. Pawngsual leh tualthah te nen lo teh khin tawk lah bolo, a awm anglo deuh chu ka ti ani.

Pawngsual leh tual thah pawh a awm reng tho a, a khapna dan hi hlip mai ang u kan ti chuanglo, kan ti a. Hetiang thil in persan lutuk nena zu chungchang kan tehkhin fo ta mai leh tan chhanah kan nei tlat mai hi thil pawi tak ani.

Zu in leh tual thah leh pawngsual hi khawvel khawi ramah mah HUANG khat ah an dah loa, ang khatin an en ngai hek lo. Kan ramah ngei pawh a hremna pawh a in ang bawk lova, a in rapthlak hleih em em a, pawngsual leh tualthah sawi nep tumna pawh ani thei hial zawk ani.

(more…)

Breaking News: MLTP Amendment Act

Thursday, July 28th, 2011

Mizoram Legislative Assembly chuan MLTP Amendment Act 2007 (wine) tlema tih danglam na, MLTP Amendment Act 2011 chu House ah lungrual takin an pass ta e. He amendment hian 2007 a phal tawh grape leh guava bak ah, apple, passion fruit, peach, pear leh ginger  atanga wine (alcoholic beverage) siam  a phal ani. Mizoram a kuthnathawktu te tan kawl a eng dawn ta e.

Kan hriat ang in, Mizoram mipui tam ber chu kuthnathawk a eizawng kan ni a, kuthnathawkten kawla ni chhuak chhiar a, a sur a sa hnuai a hna an thawk a, hlawkpui chu sawi loh, an ei khawp pawh an thawkchhuak hleithei lo ani. Chutih lai in Agro base industry hi Mizoram intodelh nan a feasible deuh ber chu a ni bawk si a, sawrkar pawh in scheme leh project  hrang hrang te siam in hma a lo la tawh thin a, a la mek bawk a ni.

(more…)