Sihphir Vengthar Pawisa LAD Commissioner-in Chhui Turin Thu Pe
Aizawl, Sept 08,’06 : Sihphir Vengthar Village Council hnena thleng tur pawisa an hriatpui loha lo laa bialtu MLA leh Minister Dr.Lalzama puhna chu chhui chian turin Local Administration Department (LAD) chuan a ti. LAD Director hnenah LAD Commissioner Pu R.K.Thanga chuan lehkha pein he puhna hi chhui turin a ti a, LAD officer-te chuan Sihphir Vengthar V/C hi thiah atan an vau nia sawi a ni bawk.
Nimina chhuak Newslinks chanchinbu chuan LAD Commissioner hian he thil chhuina report hi naktuka thehlut turin a ti niin a chhuah a. Sihphir Vengthar V/C President Pu Lalthardenga chuan Bawngkawn Police Station-ah thu thehlutin Minister Dr.Lalzama chuan Aizawl North bial aiawh a nih angin a hriat lohvin pawisa a lo la a ni tiin chhui sak turin a ngen a ni.
Hemi chungchangah hian eptu hruaitu leh MPCC President Pu Lal Thanhawla chuan August ni 28 khan LAD Commissioner hnenah hian lehkha ziakin Dr.Lalzama chuan pawisa Rs.65,000 sawrkar atanga la chhuakin Sihphir Vengthar MNF Unit hnenah a hlan thu a lo hriattir tawh a, Pu Hawla hian Commissioner chu he thil hi lo enchiang tur leh LAD official pakhatin he veng VCP vau leh V/C thiat tura a vau tih a hriat pawh police chhuitir turin a lo ngen tawh a ni.
Sihphir Vengthar V/C hi Congress sawrkarna a ni a, MNF V/C pakhat chuan Urban Local Body Scheme pawisa a lo la niin a lang. Hetih lai hian Sihphir Vengthar MNF te chuan he thil sawifiah nan press release an chhuah a, he pawisa laknaah hian MLA hi a inrawlh lo a, V/C member pakhat Worked supervisor-a ruat R.Liandawla chuan a la a ni an ti. MNF press release chuan VCP hian Dr. Lalzama’n pawisa a lo la tia FIR August ni 7-a a thehluh R.Liandawla chuan pawisa hi August ni 21 khan a la a, Rs. 65,000 chu khaw chhung kawng siam nana hman a ni a ti.
MBSE Tender Hal MBSE President-in State Pawn Lam Mite Ngaih Pawimawh Vang
Mizoram Press Owners Association chuan MBSE-in School zirlaibu chhu tur thlanna atana tender koh chhanna tun hnaia hal kha MBSE President-in an rawtna pawm lo a, state pawn atanga lokalte duhdan a ngaih pawimawh zawk vang a ni tiin state pawn atanga lokalte hlau ni awm taka thil tih a nih tha lo an tih thu an sawi. Nimin khan Press release chhuahin MPOA chuan MBSE President-in heng tender chhanna hal chhan chanchinbu lama a sawifiah dan chu dikhlel tamtak a awm a ni an ti a, tender chhannate hala nih dawn hian a chhangtute remtih leh tih loh chu MBSE President hian a zawt ngei a, mahse, Mizo tenderer-ten a rawtna pawmpui lo a, dahthat zawk an rawt laiin state pawn atanga lokalte duhdan ngai pawimawhin MBSE President chuan hal a ti ta tlat mai a ni an ti. Hei hi ram leilung fate ngaih pawimawh lohna a ni an ti bawk.
MPOA chuan tender chhan hian zawm tur a awm nual a, chumi ang chuan tender hi hawn a niin a tling lote chu tling lo, tlingte chu tlinga pawm mai tur a nih laiin dan zawm kim lo a tam ber state pawn atanga chhangtutetihtlintumnaa ngaihtheihin tender chu cancel a ni a, hei hi a pawi takzet a ni an tri.
Tender chungchanga MBSE-in experience an neih loh thu an sawi chu MPOA chuan tender halna tlingah an ngaih loh thu sawiin tun hma pawhin tender an kovin an lo hawng fo tawh a ni an ti a, tuna hal phenah hian thil a awm thei a awm ang em tiin an zawt.
MBSE President-in a insawithiamnaah “An inhnial buai ta viau mai a, a ngaithlatu kan ni mai a…” a tih chu MPOA chuan an dan siam angin kalpui mai se tuman an hnial buai ngam lo ang an tia. Tender hawn tirh phat atangin tender terms and conditions an siamte chu an kengkawh ngam lo a, chuvangin officer-ho hmaah tender chhangtuten an ngaihdan an sawi lo thei ta lo a ni an ti.
Loan La Duh Project Siam Turin NABARD-in A Tanpui Thei Reng
August ni 21-24 chhung khan NABARD chuan hmar chhak pum huapin Guwahati, Agartala leh Dimpaur-ah workshop pali an buatsaih a, hetahhian NABARD hmalakna kalmek Rural Infrastructure Development Fund (RIDF) chungchanga hriattir pawimawhte NABARD hotute chuan Officerte an zirtir.
RDIF hnuaiah hiankum 11 kal ta chhung khan NABARD chuan state 28 hnenahcheng vaibelchhe 53,885 a pe chhuak tawha, a dawngtu turte hnena pek chhuah tawh zat chu cheng vbc.2,237 a ni. Hei hi sum lu atanga chhutin 4% vel a ni. DRIF hi tui lakna siamna atan te, thingtlang kawng laihna leh lei dawhna atan te, van ruahtui dawnkhawlna tuizem siamna atante, ran vulhna atan te, huan leh thlai chinna atan te, hriselna lam enkawlna dinna atan te, sangha dil atan te, hydel project tenau dinna atan leh thil dang tamtak atana dil theiha ni a, loan anga pek chhuah thin a ni.
Pu Amresh Kumar, NABARD Executive Director chuan heng project chi hrang hrang duang chhuah dana harsatna nei state te chu NABARD hnuaia Consultancy Wing (NABCONS) chuan a tanpui thei a ni a ti.
Medical Re-imbursement Tihtawpah ADCC-in MNF Sawrkar Nunrawng An Ti
Aizawl District Congress Committee chuan MNF sawrkarin sawrkar hnathawkte hamthatna pakhat Medical-Reimbursement a tihtawpsak hmiah mai nia sawiin nunrawn thlak an tih leh hriatthiam loh thu an sawi. Nimin khan sawrkar hnathawk leh an chhungten an tangkaipui leh thlamuanpui em em thintihtawpsak an nihah Chief Minister mawhphurhin CM chuan a tuh rah a seng ngei an rin thu an sawi.
ADCC chuan press release chhuahin Minister leh MLA-ten sawrkar atanga hamthatna chi hrang hrang, free travel, vehicle, electric,tui, telephone, medical treatment,etc.an dawng thin mipuitenan itsik ngai lo a, chutiang bawkin sawrkar hnathawkten sawrkar atanga hamthatna awm theite an dawng thin pawh mipuiin awm antiin itsik chu sawi loh vannei an tiinan lawmpui thin zawk a ni an ti a. Sawrkar hnathawkte hi sawrkar neitu ber leh sawrkar innghahna, ramhnukpui ber an ni a, kumnga dana thlan thar ve mai chi pawh an ni lo a ni an ti.
Sorkar Hmalakna Thlawp Turin Contractorte Ministerin Ngen
FCA&CS Minister Pu K. Sangthuama chuan Supply Department hotute leh Carrying Contractors’ Association te nimin khan a pisaah ko khawmin an harsatna tawh hrang hrang te a sawipui a.
Pu K. Sangthuama chuan sorkar leh contractors te thawhhona tha a pawimawh a ni tiin a hmaah Tender lova hna pek thin chu sorkar-in Carrying Rate siam tha in Tender hmangin mumal zawkin a kalpui dawn a, sorkar hmalakna hi contractor te pawhin lungrual taka thlawp turin a chah a. Bukna (Weigh Bridge) tha lei nan sum dil a nih mek thu leh privatize hial pawh an ngaihtuah thu a sawilang a. Mizorama buhfai rawn lut hi hla tak atanga phurh a nih bakah Mizoram hmun kil ber thlenga phurh a nih thin avangin tihchingpen a nih loh nan contractor te pawh fimkhur zual tur leh tangrual thiam turin a chah bawk a. Mipui emaw sorkar hek zawnga thil ti reng reng chu sorkarin dan ang zelin a hrem dawn a ni, a ti. India Sorkar laipui in mipuite harsatna sukiang turin state tinah dan thar siam zelin mipui hamthatna tur a haichhuak zel a, mipuite pawhin sorkar chu beiseina sang tak neiin an thlir reng avangin fimkhur leh uluk takin hnathawh a ngai a ni, a ti bawk.
FCA&CS Director Pu K. Lalnghinglova pawhin thu sawiin BAFFACOS hnuaiah Mizoram district 8-ah mautam tuar tur te hnenah cheng nuai 1,235 a tul anga sem tur chu tihfel a nih tawh thu leh tun hnaia Champhai khuaah tam nasa tak a tlak avangin mipui kham tawk buhfai a awm lo tih hriat a nih veleh BAFFACOS hnuaiah chhungkua 2,300 te hnenah a thlawnin ration sem a nih tur thu a sawilang.
Jimmy L. Chhangte Kuthnu Lakkhawm Lehkhabu Tlangzarh
Nimin khan Jimmy L. Chhangte kuthnu lakkhawmna lehkhabu ‘Nunhlui Tlaitla Lenkawl’ Sabereka Khuangkaih chanchinbu in a buatsaih chu Sports & Youth Services Minister Pu Z.H. Ropui-an a tlangzarh.
Lehkhabu tlangzarhtu Pu Z.H. Ropuia chuan Mizo Literature a miril leh ngaihsanawm kuthnu thamral mai tur vawnthat na atana Sabereka Khuangkaih Editor leh staff ten lakhawma a bu a an siam chu a lawmawm tak zet a ni a ti a. Jimmy L. Chhangte nuna tawrh chhelna leh rinawmna leh tumruhna zawng zawngte kha thangtharte entawn tlak a tling tak meuh a. A hun tam tak chin hriat loha ramdanga a awm bo hnu pawha a hun hnuhnung lama Mizo hnam tana thu leh hla thangthar lokal leh zel tur te tan pawha hnam rotling a chher chhuahte a hnutchhiah vangin a hming hi hriatreng a ni dawn a ni a ti a.
Jimmy L. Chhangte lehkhaziak lakkhawm ‘Nunkhaw Tlaitla Lenkawl’ bu hi phek 151 a chhah a ni a. Rs. 50 a hralhchhuah a ni ang.
District Magistrate Thupek
Aizawl District Magistrate chuan Cigarettes and Other Tobacco Products (Prohibition of Advertisement and Regulation of Trade and Commerce Production, Supply and Distribution) Act, 2003, No 34 of 2003 in a sawi angin a hnuaia tarlan ang hian khapna thupek a chhuah :
1. Zirna in atanga Yard 100 bial chhungah tumahin naupang kum 18 hnuai lam hnenah Cigaratte/Vaihlo leh a kaihhnawihte hralh, hralh tura pek chhuah khap tlat a ni.
2. Heng puipunna hmun – Office, Hospital, Auditorium, Hall, School, Libraries, Airport, Bus Stop, Taxi, Bus leh Sumo Service reng rengah tumahin MEIZIAL an zu tur a ni lo.
He thupek hian thla hnih chhung a awh ang a, thupek bawhchhiate chu a chunga tarlan dan hmang hian hrem theih an ni.
JSS Review Committee memberah Pu H. Kapthuama
India rama JSS Unit 172 te hnathawh dan enfiaha 11th Five Year Plan lo awm tur a chak zawk leh tha zawk a hna an thawh theihnan Human Resource Development chuan Review Committee a din a. North East India a JSS Unit 9 te aiawhin Pu.H. Kapthuama, Chairman, JSS, Aizawl chu committee member atan ruat a ni a. North East atang hian Pu H. Kapthuama bakah Arunachal Pradesh mi pakhat ruat a ni bawk a. Anni pahnih hian India Hmarchhak ai an awh ang.He committeeah hian Minister of State (HRD) chu Chairman a ni.
Relief & Rehabilitation Deptt. hmingthlak
Mizoram sorkar chuan August ni 24,2006 atanga hman tan turin Relief & Rehabilitation Department chu Disaster Management & Rehabilitation Department tiin a thlak a. He Department-a lehkha thleng tur reng reng chu hetiang hian address tawh tur a ni : Secretatary, Disaster Management & Rehabilitation Department, Government of Mizoram.
International Literacy Day
Vawiin hian Vanapa Hallah International Literacy Day pualin School Education Department chuan hun an hmang dawn a. Dr. R. Lalthangliana, Minister School Education, etc., chu khuallian tura beisei a ni.
Kulikawn-ah crusade
Zanin atang hian Kulikawn Catholic kohhranah Brother Dennis Lalfela, Italy chuan rawngbawlna a nei dawn a. Chawlhni zan thleng he rawngbawlna hi neih a ni ang a; taksa leh rilru damna nei duh tan pan theih a ni. Zanriah ei duh tan leh riahna duh tan hmun a awm bawk ang.
Group ‘D’ Association Lawmthu
Mizoram State Group ‘D’ Govt. Employees Association General Conference in tun kum chhunga a hmalak zelna atana member pakhat in Rs. 50/- theuh thawh nise ti a a lo rel chu Branch thenkhat chuan an thawh tawh a. Hetianga Special Fund thahnem ngai taka thawhtute chungah Gen. Hqrs. chuan lawmthu an sawi a. Branch dang pawh thahnem ngai taka thawh theuh turin an in ngen.
Vawiinah Zephyr Drama Party
Zephyr Drama Party chuan vawiin hian Vanapa Hall a International Literacy Day pual a hun hmannaah show an nei dawn.
DOEACC Centre Parents Meet
DOEACC Centre, Zuangtui, Aizawl-a zirlaite chuan Digital Festival an hmang chu nimin khan an zo. Nimin khan extempore speech, debate, kit leh singing competitionan nei a, hlimawm tak leh boruak zang takin an hmang. Vawiin dar 10:30 a.m.-ah Parents Meet an nei dawn a, Pu J.C.Ramthanga, Secretar y to CM leh GAD khual lian a ni ang.
Dr.Lalzama’n Bial Fang
Dr.Lalzama, Minister chuan a MLA bial chhung Falkland leh Thuampui veng a tlawh a, an khawtlang mamawhte chu a tahtawla tihphuisui zel a tum thu khawtlang hruaitute hrilhin dawh thei taka lo nghak turin mipui a ngen. Minister hi PWD,PHE,LAD leh P&E department Officerten an tawiawm.
A Thlawnin Damlo 1,307 An En
August ni 31 khan Kawnpuiah Aizawl Civil Hospital buatsaihin Outreach Programme neih a nia, Outreach Programme Team Dr.Zothantluanga, Dr.Lalrinfela, Dr.Lalhmuchhuaka, Dr.Biakhluna, Dr.Lalnuntluangi, Dr.Lalrintluangi, Dr.Zohmingthanga leh Dr.Hauthangpui-te chuan an hruaitu Dr.B.Lalramzauva hovin damlo 1,307 a thlawnin an en a, an zingah zun leh thisen exam 99, FNAC 21, x-ray 37 leh USG 79 tihsak an ni.
I&B Minister Lo Zin Dawn
Sawrkar press release sawi danin Dr.R. Lalthangliana, I&PR Minister ngen angin Union Information & Broadcasting Minister Priya Ranjan Dasmunshi hovin Expert Committee member 5 chuan September ni 25-ah Mizoram tlawhin daiha thleng an kal dawn a, thu thar thehdarhna lama Mizoram mamawh hrang hrangte an enfiah ang. An cham chhung hian DDK, Mizoramin an mikhual ang. Sawrkar press release chuan August ni 24, 2006 -ah Information & Public Relations department hmasawnna tur leh mamawh chi hrang hrang sawihoin Cunsultative chuana vawikhatna atan inkhawmna an nei dawn a, September ni 14-ah Mizoram chanchinbumi 18 chuan President chenna New Delhi-a Rashtrapati Bhavan tlawh turin anchhuakang a, IPRO PuDavid Thangliana chuan a tawiawm ang a ti.
Similar Posts:
- IT department and Mizoram
- NLUP atan Rs 100 crore hmang hman ta lo
- Mizoram-ah oil leh gas verhchhuah tan a ni ta
- Health Minister bang rawh se
- Stadium sakna tur tender chhuak tep
First ava khat ve...
ni hman nuam vek u...
December 14th, 2010 at 9:21 pm
Urdubat leh Cotd ten nuam an ti em mai first leh mai ang.
…khrum
Report this comment