mi(sual).com

Kan vei hi a inanglo tlang khawp hian ka hre thin. Ram hmasawnna ngelnghet (sustainable development) han tih ngawt pawh hian a kalkawng zawh tur kan hriat dan leh hmuh dan a inang lo nuai thin bawk. Mizote anga thil tihho (cooperative movement) thiamlo tan phei hi chuan mimala eizawnna kawng thar (manufacturing emaw service sector pawh nise) chona  thar, ngaihtuahna thar nena eizawnna (entrepreneurship movement) avanga tunlaia India ram leh China ram economy a maka maka rawn invawrhchho thut mai chungchang hi kan zir chhoh fe zawng a ngai dawn a ni. Harvard Business School, USA-a management lam thiam filawr (management guru) pakhat Tarun Khanna chuan research nasa takin a bei a. Tun thangkhat lian kal chho meka China leh India ram rawn invawrh chhoh san chhan em em mai chu “Entreprenuers” ho vang a ni tih a rawn sawina a ni. A thil hmuhchhuahte chu a lehkhabu “Billions of Entrepreneurs : How China and India are Reshaping their future & yours” tih lehkhabu-ah a ziak ta a ni. He lehkhabu hi ram thanna duh, ram veimite tan chuan zir tham a ni ang. Tarun Khanna hmuh dan hi India sorkar laipui hotute hmuh dan pawh a ni ve ngei ang. Tunhmaa “Industry” tih hming kan hmuh ang chi zawng zawng kha “Enterprise” tiin an rawn thlak danglam ta deuh vek a nih hi.

Tunge ni “Entrepreneur” chu?

Chona thar leh tumruhna nei a, harsatna tawn ngam a, tlawm duh hauhlova mahni eizawnna kawng tur sualchhuaktute leh sual mekte hi “Entrepreneur”-te chu an ni, ti ila a tawikim ber awm e. “Entrepreneur” reng reng chu sumdawngmi (businessman) a ni a, sumdawngmi reng reng hi “Entrepreneur” an ni hauh thung lo. Chutiang mi ni tur chuan engemaw ti taka mi danglam bik nih a ngai hauh lova – Thiltum hrechiang mi, taima rumrut, paukhauh leh kawlhrawng nih erawh a ngai thung.

Mihring hi mahni kea kan dinchhuah tak tak dawn chuan tihtur leh tihloh tur kan nei hmasa vek hi alo ni. Sum leh pai duhtawk, mamawhna apianga hman zar zar tur nei tan chona thar leh tumruhna hi alo awm hauh lo mai alo ni. Kan nu leh pa rosum khawl khawm sa emaw khawi emaw atanga awlsam taka bul tanna tur kan neih sa nghal am mai phei chuan kan “project proposal”-ah alo hlawhtlin theih  hauh lo mai. “Entrepreneurship” in a tum tak takah phei chuan kan thil tih mek kha “Risk” a ni, a business kha kan tihsual vaih chuan kumkhaw chhiat hlen rupna a nih dawn avangin mit meng ranin – tisa (physically) leh thlarau (mentally)- ah in-fit a ngai em em. Chu THUTAK avang chuan ringlo mi kan tih – Hindu/Muslim-te leh Olympic ropui ber thlengtu Communist-hote’n hma an lo sawn duak duak ni. Chu “entrepreneurial spirit” chu a ropui em em a, Mizote hian kan va mamawh ve tehlul em! A thlawna pawisa dawn duhna rilru-in Mizote min tichhe zo ta. Engemaw tia thawk vak hlei lova lakluh teuh duhna-in min bual a zo ta vek mai. Chu pamhamna rilru chu kan paihbova, tih tak tak duhna leh hun lokal zel tur atana kei leh ka tuchhuante thleng ei bel tur a ni, tia hma thar engemaw kan lak a ngai ta a ni. Chu chu,  India sorkar “ Planning Commission” pawhin a ngaihpawimawh ber “Hmasawnna ngelnghet (Sustainable Development)” chu alo ni.

Chutia kan sawi avang chuan Mizo mipuite hi kan chhe ta vek a ni lo. Tihtur tha leh tihloh tur min hrilhtu leh min zirtirtu ber kan hotu lute’n hma min lakpui tlat lo alawm. Party worker min nih-tir vek a, contract therhlo engemaw mai mai chang thuap turin hma min lakpui tlat a ni. China rama thilsiamtu leh sumdawnna tenau khawihtute tana an sorkar thiltihdan hrang hrang-te chhiar theih vekin a awm. India sorkar, Mizote chunga roreltute ngei khuan policy, programme, scheme tha lutuk tak tak an siam del dul reng mai. Heng thiltha zawng zawngte keini Mizote, India mi, duhsakna tinreng dawng thei tribal lehnghal, special category state lehnghal, Non-Lapsable Central Pool Fund hnukchhuak thei lehnghal hian hma kan la la ve tak tak lo mai a ni. Chutiang policy tha karah chuan Subsidy emaw Grant-in-aid emaw engemaw tanpuina beisei hmasa a, bul tan chi a ni lo. Hna kan thawk phawt ang a, kan mamawh tur leh thiltul tur hrang hrang te chu  kan va claim theih mai tur khan min lo chhawpchhuahsak reng tawh zawk alawm. Chutiang dinhmunah chuan “Entrepreneur”-te an lo dingchhuak thei a ni.

Enge Mizote’n kan mamawh

Hruaitu tha kan mamawh. A ngaihna hria kan mamawh. A tihdan leh kalkawng hria kan mamawh. Mahni pumpui chauh ngaihtuah lo kan mamawh. MLA/Minister nih tum hrim hrim kan mamawh lo. In khuaah, in vengah MLA candidate an lokal hunah, “MLA/Minister-ah lo tling ta la, enge I principle? Enge mipuite min tihsak I tum? Engtianginge hma lak I tum?” tih lo zawt teh u.

Kan rilru (moral leh spiritual) siamthar kan mamawh hmasa ber. Chu chuan mihring puitling min chherchhuak ang. Tisa leh thlarau harhtharna hi Pathian thu ngunga inzirtir lam a kawk kher lo, a kawk bawk. Rualawhna dik, khawvela Mizote dinchhuah ve theihna kawng kan inzirtir a ngai ta a ni. Training centre tha, technical leh management lam institute thate kan mamawh  em em a ni. Vawi leh khatah kan din thei lo a nih pawhin state dangah scholarship leh stipend, student loan-te inpe-in degree sang ni lo, mithiam tam tak – level sang deuh leh level hniam deuh thlengin kan chherchhuah a ngai.

Kan hotute’n “Bakward & Forward linkage” an hmuh thiam a ngai. Kuthnathawktute thar chhuah lokal zar zar atanga a “semi-finished goods” atanga a “finished goods” thlengin, a pawimawh lai ber, thil kan tih nachhan,  suma chantir turin hma kan lak a ngai a ni. “Marketing” han tihte hian “a hralhna a awm sa vek” tih ringawt a ni lo. A hralhna te chu hmanah a awm sa daih tawh – Tunge duh chiah tak tak? Tu company/buyers-in nge lei chiah ang? Eng rate-in nge a lei ang? Engtinnge a transport? A tam lutuk… Chung zawng zawng chu sorkar lam leh Entrepreneurs inzawmkhawm pawlte tangrual hna tur a ni.

Bul tanna tur chungchangahte hian haipawh tur kan va ngah em!! Kan Chief Secretary Pu Haukhum Hauzel hian thil a ti-tha hle mai. Central hotu lian leh RBI hotu lian an lokal reng rengin “funding” lama Mizote harsatna hi alo sawi pui chat chat zel mai a. A tihtur dik tak a ti, a lawmawm e. Mizorama la rawn operate si lo, “tiny, small & medium infrastructure loan” tha tak takte hi a tam ania.

MEN kan din

Chutiang ang chona thar (new challenge) hmachhawn tur chuan mi tlemte-in Mizoram Entrepreneurship Network (MEN) tih chu kan din ve ta phawng mai.  Hrechiang duh chuan zawhchian theih a ni. Sorkar hna lama inhnangfakna tur hre tawh si lo, khawsakna kal zel atan eng kawng ber nge tha ang? tih pawh ngaihtuah thiam thei tawh lo, kaihhruai ngai kan tam ta si a. Kan ramin tun dinhmuna a mamawh ber (need of the hour) chu thalai leh pavalai rualho kawng kawhhmuh theitu, thiamna (talent & capacity) leh theihna (potential) neite tana an kalkawng tur kawhhmuh hi a ni tlat mai bawk si. Chutiang mite kan theih ang tawk tawka pui tur chuan hma lak ve kan tum a ni.

MEN chuan kan ram dinhmun leh leilunga bet hausakna (resources) te thlir ranin “entrepreneurs” rilru dik puandarh te, zirlaite an zir zawh hma leh hnua mahni eizawnna kawng an hriat theih nana  “student entrepreneurship movement” siam te,  sumdawng tenau te tana market zawnsakte, environment humhalh thu-ah te, eng sector-ah pawh training leh thiamna bik neih pawimawhzia inzirtirte, consultancy service din leh mihring hmantlak cherchhuah (human resources development) lamte bakah tunlai thiamna science & technology lama hma lakte kan tum dawn a ni.

Feedback : (M)- 9862566772

Similar Posts:

• Nepal tlawhtumte tana hriattur pawimawh
• Kalphung thar vrs Sawrkar Thar
• Lungawina neilo Tuikuk te
• Driving License Lem tih kiam nan
• Annual Budget 2011-2012 pharh a ni

Recent Posts:

• Zet U Zu (he ti zawng hian)
• SSA sum lapse(?) Pu Lalsawta bâng dâwn em?
• MZU Sports vawi 11-na tan a ni dawn ta!
• Aizawl ah Diesel a to bik em ni ??
• Rapthlak ve tak chu a ni….

This entry was posted on Saturday, September 20th, 2008 at 7:59 pm and is filed under More than words. You can follow any responses to this entry through the RSS 2.0 feed. You can leave a response, or trackback from your own site.