mi(sual).com

By Denis Lalfela, Rome

Kristian State ni a inchhal Zoram a zu leh drugs ngawlvei tamzia ngaihtuah la, duhthlanna dik siam a harsatzia i chhut thiam ngei ang. Chuta chhapah Icon, Model etc ti a kan chhuanvawr, kan milar thenkhatte chanchin duhawm lo hriat tur a awm leh zauh thin. Zoram nula tlangval tana thu tha tam tak sawi thei, mi hip theihna leh talent nei tha takte chetsualna hi an mahni mai bakah tlang tina Zofate tan thil pawi tak a ni. Kan khawvel theuhah hmelma Setana leh a hoten englaipawha min beih lai hian, kawng dik leh nun tluangtlam zawh turin zing thawh phat atangin duhthlanna tihthar zel kan mamawh theuh mai. Kan nun pum nghawng thei duhthlanna chu fimkhur taka siam a tul a.

Nasa taka midangte nghawng thei duhthlanna phei chu uluk taka siam tur a ni. Josefa kha Lal ropui tak a ni. Amah thlem thlu tura nula hmeltha tak pawh Pathian a tih avang leh atana tha lo a ni tih a hriat avangin a hnar fithla thak a ni. Malsawmna a dawn zui zel dan pawh kan hria. Pathian Biakbuka kan lanmawina leh eiruk suma Kohhran thenkhat kan chawmnate hian chhungkua leh mimal nunah rah tha chhuah thei an ni tlat lo reng a ni. Chuvangin kan milar te leh kumtling awrhte an hmingchhe mai thin hi dem ngawt thei kan ni lova. A bul chhuichhuak a, Kan Chief Minister tawngkam takin, kan khawtlang nuna sualna punlun mek hi, “a zung chawpa” kan karchhuah a, kan tuaithar a hun hle mai. Sual hnathawh leh sual hneh tum a duhthlanna sang ber siamte nihlawhzia i thlir ho dawn teh ang.

Mahni duh vang reng a sual a tlu an awm ngai meuh lo; fimkhur loh, thuawih loh, chapona leh ho taka nun vanga tlu erawh an tam! Icon, speakers leh evangelists ropui takte hi engatinge inngaihna sual leh sual dangah an tluk thin le? Thlaraua thuamtu Isua zawi zawi a an kalsan thin vang a ni. An mahni chawisangtu, dinhmun thaah dahtu Pathian an theihnghilh rualin an tlachhe thin. Tin, Pathian chauh kan engkim a kan pawm theih nan, kan duhna piahlamah vuak leh tihtlawm fo kan ni. Kraws a hnehna puang ngamte erawh chuan tluknaah chakna an hmu a, tlawmnaah thiltihtheihna an hmu tlat thung. Hei hi thlarau finna, thlarau rah duhawm chu a ni. Anih leh sual lian dai lo inti si khan eng salah i tan le? Midang la kawk ngam tur i ni em? Sim tur kan nei theuh. Kan chaklohna erawh a in ang lova, a then sualna a langsar deuh a, an mualphopui mai a ni. Duhthlanna sang ber – Krista thlangtute chuan midang an kàwk ngai lo. Mahni nun inenletin, thil dang zawng aia hlu, Krista nitinin an thlang thar thin. Harsatna leh thlemna kara chunglam tanpuina dilna chang hriate leh sual hneh tum tlatte hi kan Pathianin a ensan ngai lo. Humsual dai lo tura rilru siam te pawh thlarauah chakna a pe a, a humhim tlat thin. “Ka Pa, anni hi humhim rawh; khawvelah an awm a, khawvel mi an ni si lo” ti a Lal Isuan a zirtirte tana a dil ang khan, sual do pui tura Isua sawm nachang hria te hi mi chak leh mi vannei an ni. Kan tlu palh a nih pawhin, mahni indema tluk hlen nana hmang lovin, duhthlanna sang ber- krista kan thlan thar a tul takzet a ni. Sualsim a nunthar nungte tluka Krista tilawm an awm lo.

Ngawlveite chu chàkna leh itna salah tàngin tumruhna an tlachham fo. Sual chu hneh thei lova an inngaih tlat avangin bawih rinawm, hmelma Setana michuamte an ni thin. Han sim ve ngial mahse, thlemna hmasa ber a lo kalin an tlawm leh mai. Chàkna sual khan sim duhna thinlung chu thununin a rawn chhu chhe vek a; thluak fim pawh nei hman lovin duh lo chungin an tlu leh thin a ni. He nunram hrehawm tak hi Tirhkoh Paula chuan, “Mirethei ka va han ni em!” a lo tihna chhan kha ni. Paul erawh chuan pèn zel nachàng a hria; hnehtu Pathian hnenah lawmthu a sawi thei tlat. Duhthlanna sang ber- Lal Isua a thlan tlat avangin, a sal tanna leh natna te chu laksak ni lo mahse Krista khawngaihna chu a tan a tawkzia a hre thar a, “Nun hi Krista a ni” a ti thei ta. Amaha nung chu tudang nilovin a Lal leh tlantu, Isua chu a ni. Kraws a hnehna puangtu Kristaah chauh ngawlveite leh beidawng mek ten hnehna leh damna an chang ang. Kum 32 a nih a piangthar Mt. Augustina chuan, “Aw Pathian, nangin i tan min siam tawh a. Kan thinlungte hi i hnena an chawlh hma loh zawng khawiah mah an hahchawl tawp lovang” tiin Lal Isua chu a lal leh Chhandamtu atan a puang hmiah mai. Khawvelah hlimna zawng thin mah la, Krista ah chauh i hmu ang. I pehhel rei leh i rethei/ hrehawm rei mai a ni.

Pathian ngaihdamna rinhlelh hi Setana chaw tui tak, piangthar inti tam takte eichhetu a ni. Pathianin a ngaihdam hmak tawh, tun hmaa an tihsualte inthiamlohna nena an ngaihtuah fo avangin chhungrilah an zalen lova, an nunah thlarauin hna a thawk hlei thei lo. Tidam thei hmangaihna aia tlenfai tawh suala an rilru dah lui tlatte chuan damna an chang thei hek lova, beiseina leh phurna thar nena hmalam an thlir reng loh chuan kehsawmna nasa zawk an hmabak a ni. Thlaraua zalenna i thlan tlat loh chuan piangthar sal tang, Kristian tangkai lo leh thlarau hlimna neilo mihring i ni ang. Piantharna chu thlarauva inthuamtharna a ni. Thlarau leh tisa an indova. Thlarau a khat ringtu chuan hnehna a chang thin. Nikhat thil thua hneh theih a ni lova; nitin Krista kan hmangaihna chu kan tithar tur a ni. Krista thlangtute chu mahni ta an ni tawh lo. Man a lei an nih avangin nitin inlamletna nun an nung a, mahni ral lam panin an nunah Krista an dah lal tial tial thin. Mahni felna chapo pui te aiin mahni sualna hria a inchhirte hi Pathian hmaah an ropui zawk daih! Tin, thinlung taka inchhirte hi Thlarau Thianghlimin a kaihruai a, chakna thar leh hnehzelna nun a pe thin. Youth Icon te, milarte leh i mi ngaihsan zawngte an mualpho palh anih pawhin, dem mai lo la. Nang pawh chu dinhmunah chuan i ding thut thei tih hriain i Lal leh Chhandamtu kuangkuah tlat nan hmang la. Mahni tihsual atang chauha i inzir dawn chuan i hringnun khan a daih lovang che. Midangte tlukna leh sualna hi inzir nan hmang la. Tlu mekte leh Krista zawngtute tan tawngtai ang che. Tun dinhmuna Pathianin ti tura a duh che kha nang chauhin i hlen thei a. Pathian tan i pawimawh hliah hliah a ni. Chuti anih si chuan, aw unau, nang, duhthlanna sang ber – Lal Isua chu i thlang ngam ve dawn em le?

-

Similar Posts:

• Duhthlanna sang ber
• DUHTHLANNA SANG BER By Denis Lalfela, Rome
• Duhthlanna Sang Ber
• Pentecost pualin
• Thil chiang em em chu!

Recent Posts:

• Kapkhawvunga (Paihteliana) – II
• Kapkhawvunga (Paihteliana)
• Facebook-in tharum leh tawngkam huatthlala chi remove dawn
• The Grammar of Photography: A few thoughts on Photography
• Ka nun hnar kaitu

This entry was posted on Monday, August 17th, 2009 at 11:56 pm and is filed under More than words, Opinion. You can follow any responses to this entry through the RSS 2.0 feed. You can leave a response, or trackback from your own site.