mi(sual).com

-For the 2000th mi{5ual}.com fb fan, Mamie Pachuau; My two dearest friends Zira & Freddie along with their soulmates-

Greek Mythology hi ngaihnawm ka ti thei thin khawp mai a, ka hmuh phak ang ang te hi ka chhiar nasa ve em em thin. He thu pawh hi Greek Mythology a ‘soulmate’ lo chhuah dan sawina lampang thawnthu pakhat a ni a. A english term ‘Soulmate’ tih in ka dah a, kan hrethiam vek tho ang chu.

‘Soulmate’ tih hi kan sawi fo lah tak a, tleirawl ho te ngat phei hi chuan an ngai pawimawh lehzual emaw tih theih tur a ni. An ngaihzawngte hi “Ka soulmate i ni,” an ti thlazen thin.Inngaihzawnnaah hian inkawp rem thei hlawl lo hi awm ve a nih rualin reilote inngaihzawn atang ngawt pawha inkawp rem nghal thlap mai chi hi an awm ve tlat bawk. Engpawhnise soulmate hi a awm tak tak leh tak tak loh chu mimal ngaihdanah innghat rawh se.

Greek mythology ah chuan pathiante hotupa, pathiante zinga ropui ber chu Zeus a ni a. Khandaih, ţek tiang (Lightning bolt) hi a keng reng thin a ni. Thilsiam tirh ah khan greek pathiante zingah inhnialna lian tak mai a chhuak a. Zeus hian mihring siam a duh a, pathian dang tumahin an duh ve lo thung.

Mahse pathiante pathian, Zeus chuan a thu chu a ti tlang ta a. A duh ang takin mihringte chu thilsiam zawng zawngte zinga ropui ber ni turin a duang ta a ni. Zeus-a mihring siam te hian lu pahnih neiin, ke pali leh kut pali an nei a. (Tuna keimahni ang pahnih belhbawm tihna a nih chu.) Mihring chuan lu pahnih a neih avangin a hnung lam leh hmalam a hmu thei vek a; A inringlo lai a beih thut ve theih loh a ni. Kut pali a neih avangin hna a thawk chak bik em em bawk a. Tin, ke pali a neih avangin a tlan chak em em bawk a ni.

Chung hunlai chuan pathiante tih loh, thilsiam dangte lakah chuan mihringte chu an ropui lawr lak a ni. Tin, mihringte zingah pathian tluk hial deuhthaw a ropui te pawh an awm bawk. Minotaur, medusa, pegasus, centaur, satyrs, chimera, dragons te leh thilsiam dang zawng zawngte chuan mihringte chu an ngam ngai reng reng lo a ni.Thluak pahnih nei mihringte chu an fing si a, an lo ropui ta tulh tulh mai le. A huhova awm nachang te an lo hre chho a, an ţangrual a, anmahni siamtu pathiante ngei pawh chu an cho ţan ta mai a. Tichuan, pathiante chu Mt.Olympus ah inhmukhawmin mihringte leh anmahni inkara boruak thalo in mung mek chungchang chu an sawi ho ta a.

Pathian tamzawkte chuan Zeus chu an chhuahchhal a. “Min beilet tu tur mihring i siam a ni ringawt. That chimit vek rawh,” an ti a. Zeus chuan a hmangaih em em leh duh taka a siam, mihringte chu a hrem ta a ni.A ţek tiang hmang chuan mihring chu a lai takah a sat phel ta phawk mai a. Tichuan mihring pakhat atangin minung pahnih zel an lo chhuak ta a. Ke pahnih, kut pahnih leh lu pakhat neiin anchhedawngin kan lo awm ta a ni.

Kan zawmpui peng min sahthlak sak avangin kimlohna kan lo nei ta si a. A hma ang in kan ropui thei ta lo va. Ei hmu tur pawhin rim taka thawh alo ngai ta a ni. Tin, thilsiam dangte lak atangin sahimna kan zawn a ngai ta a, tichuan Khawvel hmun hrang hrangah vak darhin harsa takin kan nung chho ta a ni. Chu mi, kan zawmpui min sahthlak sak a chu kan ‘soulmate’ theuh te chu an lo ni ta a ni. Kan hmuhphakah chuan an awm ngei thin a, mahse kan zawn thiamloh avang te, kan soulmate nilo midang nena kan awmdun avang te in kan soulmate chu kan zawng hmu zo lawk lo ta thin a ni.

Miin a zawmpui, a soulmate ngei mai a tawn fuh chuan a lo chak thar leh em em thei thin a. Sah then an nih hmaa an ropuina kha tluk pha chiah tawh lo mahse, soulmate ni lo inkawpte ai chuan an chak em em thin.An hlim dun a, an inhrechiang a, an inhmangaih a, an inthlahlel ngawih ngawih thin; Chuvangin tumahin an thenhrang thei tawh lo. An inchhan tawn a, thlavang an in hauh sak tawn a, engkimah an inthurual thiam thin; Chuvangin tumahin an hneh thei tawh ngai lo thin a ni.

An infuih tawn a, an in tanpui tawn a, tlinlohnaah an inkhaichhuak tawn thin; Chuvangin an pahnih tang dun chuan thil ropui tak tak te an hlen thei thin a ni. Tichuan soulmates in tawng fuh te chu khawvela mi awhawm ber te zinga mi an lo ni ta thin a ni.

(purely mythological)

Similar Posts:

• Pathian Chungchang
• LALRAMA MIHRINGTE PATHIAN KAN NIHNA
• Pathian kan nihna
• Zo Sakhaw Zepui
• Mi Mawl Pa (Sunday Pual)

Recent Posts:

• Ka Mit Laa, Ka Rilru Khawihtute
• mi(sual) member piancham!
• Kal dem dem.
• Nova’n Anchhia A Lawh Sual Emni? {:Sunday Pual:}
• Beiseina nung (Pathianni pualin)

This entry was posted on Thursday, September 9th, 2010 at 4:00 am and is filed under More than words. You can follow any responses to this entry through the RSS 2.0 feed. You can leave a response, or trackback from your own site.