mi(sual).com

(William Ralte thu ziak THUTAK nge RINTHU tih kha ka chhiar a, comment a ka ziak dawn chuan a thui dawn bawk si, ziak thiamlo chung chung in he thu hi min phawrh tir ta a nih ber hi maw. A hrilhfiahna chu ni hauh law.)

Sunday tuk a ni a, naupang zingkar inkhawm ka kal peih loh avangin ka u, ka cousin nula senior deuh tawh chuan chhuat nawt tur in min tur lui a. Kan in a lianin chhuat lah chu a zau nasa mai si a, peihloh theih lah ni hek suh, kan chhungkaw tih phung ve reng a nia, Sikul kal leh Inkhawm peihloh chuan hnathawh tur. Ka nawh zawhah pangpar tui ka pek chhuah leh thlap a la ngai; chutih hun velah chuan naupang dang inkhawm chu anlo bang tawh thin. Kei lah chuan ka hna ka la zo lo, vawk chaw pek a la ngai.

Chu zingkar hna hautak em em mai thawh hrep ai chuan inkhawm ka thlang zawk fo reng a ni, tukin zing erawh inkhawm ka peihloh dan a namai lo em a leh!! Vawk chaw ka pek zawh chuan tukthuan ei hun a ni a, ka nin ber mai chhung inkhawm in vawksa thau ala hmakhalh tlat, inkuangkuah chung a che che lova thut tlat tur, chu chu thupek tiam nei a ni; chet chet chuan chaw ei lain min hau min hau thin, a chhan pawh Kristian chhungkua a(n) ni tlat a!!!

Ni, Kristian chhungkua a(n) ni. Ka nu leh ka pa pawh chhuan engemaw zat atang tawh khan Kristian an ni. Tunhnua ka hriat dan chuan ka nausen lai khan ka nu leh pa te hian an Pathian hnenah min lo hlan fel dim diam tawh a ni awm e, kei ber lah chuan engmah ka la hrethiam ve der silo.  Ka duh e duh love tih sawi tur in ka la sen lutuk.

Ni a liama kum a liam a, ka lo thang lian deuh a Sunday sikul kairual ka nih chuan ka hming an ziahtir ve a, ka duhthlanna ni lovin!! A pawina ka hre lova a pawilohna lah ka hre hek lova, chu hmuna an thusawite chu ka ngaithla liam mai a, thuzir a zawh chuan an lehkhabu thianghlim Bible an tih atang chuan chang min vawn tir a, chung zawng zawng ka tih zawh vek chuan naupang fel ka lo ni a. Enge naupang fel ni turin ka tih that em em? Nu leh pa leh zirtirtu te thu ka awih vang a niang. Naupang fel chu ka ni chho zel a, sikulah pawh dawhkan chungah ka ding ve ngailo.

Rawlthar kan han chhuakchho erawh thawk khat laiin thil tihruk ka ching ve ta, chu ka thiltih thalo ka chhungten an han hria chu an rilru hi a na em em mai a, kan veng a salvation camping an neih hmasak ber tikah chuan min hnawh lut lui ve ta hial a. A tir a ka hreh ang reng nen, thian zaho kha chuan a lo nuam phian zel mai a kan hlim tlang dar dar thei ngei mai. Chaw ei a tui a, mut a tui bawk a; kar lovah camping hun chu a liam dawn ti tih ta mai.

Chutah ‘se hnuhnung in vuak a tuar’ tih ang mai kan thian zaho chu speaker ho ho chuan counseling class-ah an Pathian thu hmang chuan min chilh rawn hrep mai a, chu pawh an la duh tawk lo service leh hmasa berah chuan speaker chuan sawmna ka siam e a ti a, patling pui e tilo chuan tap per pur, aw chhang tham tiak tuak hian sawmna minhan siam khum a. Ka kun tlat a ka sir a mite din leh dinloh chu ka mitsir relh relh a, sual em em hian ka in hriaa, ka dum deuh muk hian ka in hre bawk a.

Speaker hnap sut ri lah mike –ah a ri ring tawlh tawlh a, chutah ka vei lama mi a ding nawlh..….ka ding lam ami pawh a ding ve leh…… Tiauphova midum nilum ai ang larh hi niin ka in hriaa, duhthlan tur awm hek lo le ka ding ve tawp, ka ding chiah chu Kristian ka ni leh ta,ka fel leh ta, ka var leh ta sur emaw ni zawk ni. Khawtualah tlangval fel ti a hriat ka lo ni chho ta zel a, midangte hruailuttu nih tum in camp dangah te pawh ka lut leh bawk a. kum alo upa chho ve zel a, lo tithang tawh bawk nen, bul a mite din vang loh pawn ka ding ve nalh nalh ngam tawh a.

Ka lo puitling chho deuh deuh a, lehkha ka zir sang deuh deuh a, chhia leh tha hriatna ka lo neih belh zel a. chutah zawhna alo awm ta!! Engvangin nge Kristian ka nih? Engtin nge Kristian sakhuaah hian Pathian a awm tih ka hriat? Milem bia/ pathian lem bia sakhua ka lo tih te hi enge an nih chiah a, engtin nge anni sakhuaah hian pathian a awmlo ka tih ngawt theih? Pathian awm chu ka ring, mahse khawiah nge Pathian? Brahma a mi? Nge Allah? Nge ni a ‘God is good’ ni lovin ‘good is god’ zawk ? Min hrilhfiah tur ka duh a tunge ka zawh ang?

Evangelist, Pastor leh kohhran upa….. a theih loh anni chu Kristian an ni a Kristian sakhua bak a tan chuang lovang. Lehkhabu…….aizawlah hian a awmna ka hrelo nge sakhaw dang lehkhabu hi leitur ka hmu mumal mang tlat lo mai a, Mizo ziak chu ka hmu a mahse a ziaktu Kristian a nih avangin one-sided tlat hian ka hre pek a. Zawh mai tur ka hre bawk silo, chutah ngaih dan ka siam ta, ka zawng ang, keimah ngeiin Pathian chu ka zawng ang!!

Faktea a rawn lara, LPS a a testimony sawi ka ngaithla a, enge ni min mawlh ka hrelo, hmanni lawka addict ve mai mai khian Pathian awmna hre bik suh tih melh hian ka melh a. Mimi ala awm, ani pawh Shillong-ah khan lehkha zir hle hle se ni mai, Pathian thuhril chaw khawn leh mahni hna tlansana vak vak ka ngaisanglo, khawiah Pathian va hmu bik suh tih ngaihdan chuan min hneh hle mai a. Mahse thil pakhat hetih lai hian inkhawm leh sunday school kai ka thulh ngailo. ‘

Tlaikhat ka leng haw chuan mualpui lam hawi a mipui tlan hum hum hi ka hmu a “enge ni ta” ti a ka zawh chuan “vantirhkoh thla puanzarah an hmu” tiin min chhang akekekekeke….. ka nuih pawh an tiza lo, ka hmusit ngawih ngawih hlawm ni ber in ka hria, phiangsen hlawm tak in leh, an Pathian pawh hi an sawi ang tak tak hian lo kal tak tak se camera nen a tlanchhuak a hmuhnawm thlir a thlir tum pawl hi an awm thovang. Kristianho Biak inah hi chuan hriatloh pathian hnenah ka tawngtai fo thin a, “Nang hi Pathian tak i nih chuan min chhang rawh, i awm a ni tih hi tilang rawh” tiin ka ko fova, min chhanglo, a awmlo a niang!

Ka thianpa(kan sumdawnnaa kan chhawr Bengali muslim) hnenah hian Aizawl mosque a min hruai ve tur in ka ngen a, a ni pawn min welcome hle mai a. A tha lutuk mosque ah chuan ka kal anga a chhungah ka tawngtai anga “Pathian tak i awm chuan min chhang rawh, i awm a ni tih hi tilang rawh” ka ti ang. Kan huntiam alo thlen chuan ka thianpa chu Silchar lamah a liam a ngai tlat, anu a damlo…shaaaala.

A lo let leh hnu chuan kan ruahman tha leh a, zingah min rawn sawm ang, a fel leh ta duak mai. MZP hovin zanlamah donation an lo zuk khawn chu ni in, a tukah chuan mosque ah awzawng kan kal thei ta lo, MZP office ah ka kal ta zak zak mai a, document neuh neuh nen lo phei chuan tawh lah an khirh em em leh nghal a, ka plan a tlawlh leh ta!! Ka thianpa dang Hindu ve thung hnen atanga ka dil lah engmah hmuh tur awm silo, a pi puja bawmte bang kila an tar bak engmah sakhaw thil an lo kawl reng reng lo chu ni in.

Chutih lai tak chuan kan veng lamah Pu Ropianga khan rawngbawlna a rawn nei a, a power lah kha Fakte-a te, Mimi-i te power ang zet a chak a ni leh nghal, inkhawm zawng zawng chu a tlar tlar khan an rawn kal a alo khawih thlu phawk phawk a, kan tlar kal a hun ve ta, mawihnaiah ka kal ve tawp, ka tlu chuang lovang!!! Ka ding kak ten tawn a, ka insang mar bawk a, shaaala….. kha putar khan ka inrin loh lai a hmu fuh tlat, Ka ti leh tawh ngai lovang. Zan muthmunah chuan ka phu sep sep a, “Tunge min paihthlutu kha, nangmah i ni em?” tiin.

Ka beidawng tak zet a C.Vansanga hla sak ‘kan dam chhan’ tih te kha ka duh thar em em a. Ka tawngtai nasa hle a; Kristiante Pathian, allah, hindu pathian engpawh hming in, leh hriatloh pathian hnenah ka tawngtai vek tawh a, ka beidawn tizual tu bak ka hmu lo, tuman min chhanglo. Ka peih tawh lo, eng pathian pawh ni se a duh duh chuan an duh hunah min chhang mai the se.

A lo mak thei khawp mai, Pathian hnena kan thil dil leh tawngtaina te hi kan duh ang diak diak emaw, kan duh hunah tut tut emaw hian alo thleng kher ngailo hi alo ni a. ‘Pathian thil rel dan chu, A va mak em! Hriat phak rual loh a ni, A tum zauzia……….Pathian ruat ang zelin, engkim a thleng’ tih hi ava dik tak em! Khatiang thinlung khauh leh hel ka neih te kha zawi zawi a tih nem in a awm a, ka tawngtai ka thulh chuang lova, sakhaw dang pathiante hnenah ka beidawnna a zual deuh deuh a, sign engmah ka hmu hek lo. Kristiante Pathian hi a awmang deuh ber angem aw tiin ka ngaihtuah nawn leh thin a, beiseina ka nghat ta deuh deuh a.

Thil a laka beiseina kan neih hian engemaw chen kan lo ring alo ni reng mai. Pathiana rinna ka nghah ngam chinah hei erawh a thleng dik, Tunhmaa Pathian rawn chunga ka thil ruahman, mihring taka ka lo hlawhchham tawh na te leh ka lo chawlhsan tawh te kha ka ruahmanna tel hauh lovin, engemaw ti ti in thar thawh leh in alo awm a, “nangmah rawn chungin hengte hi bul ka tan ve a khawiah nge a tawp min thlen pui tu tur I awm” tia Pathian ka lo chhal nate pawh kha a hlawhtling mai a nilo, ka ruahman phakloh leh mang lama pawh a ka man phak loh ka chungah hian a thleng tawh a ni.

He thil ka chunga hlawhtlinna thlengte hi kan Pathian a awm tih keimaha a fiahna ber erawh a nilo, Amaha Rinna min nghah tlat tir ngamtu hnathawh erawh ziak in ka sawifiah thiam lo a ni e, chhungrilah hian ngaih a ngam veng veng mai ti ila ka sawithiam dan ber a ni mai awm e.  Miracle hian Pathian awm leh awm loh a proof zo lova, Science thiamna hian Pathian ropui zia a hrilh fiah zo hek lo. “Sual hnehchhiah hnu thlaraute u, Lalpa thu in rin chuan, A chawlh hahdamtir ang che u…… Aw ring mai r’u, Aw ring mai r’u” tih ka pawm ngam chinah chuan muslim sakhaw lehkhabu Dr. Zakir Naik ziak ‘The Quran & the Bible- in the light of science’ tih te ‘Answer to non-muslim common question about Islam’ tih Guwahati ka kal tum a ka lei te chu lehkhabu naran mai mai alo chang zo ta.

“Pathian chu Thlarau a ni; a chibai buktuten thlarau leh tih tak zetin chibai an buk tur a ni”  Joh 4:24

Similar Posts:

• Pathianni a inkhawm a tul em?
• Vawiinah hming ziak ang!
• Chhungkaw tana Hlimna Thlentu – Kan Fate
• Inkhawm ti tlem ila!
• Enge In Ngaih Ve Dan…?

Recent Posts:

• School zirtirtu hmeichhia ten karkhatah ni hnih puan bih a ngai tawh dawn…
• Sawmna – Dah mai a!
• Leitlangpui
• MIZORAM CHU AIZAWL (Aizawl Khawpui zauh a tul kher em?)
• Comedian Search 2012 Top 10-ah mi 12!

This entry was posted on Wednesday, October 20th, 2010 at 6:15 pm and is filed under Religion. You can follow any responses to this entry through the RSS 2.0 feed. You can leave a response, or trackback from your own site.