mi(sual).com

Khua chu a thim lek lek a. Losul Thereng te pawh an hram chuah chuah tawh a. Muantea hnathawk bang pawh chu a haw ve mek a. Ina a han luh chuan a Nu chu a khua alo sik niin. Eirawng pawh bawl peih lo chuan alo mu renga. A nu chuan, “Kha, Muante.. rawng pawh ka lo bawl peih meuh lo a ni e, lo bawl mai teh. Dawra artui te I va lei mai dawn nia” a ti a. Muantea chu a inbual sawk sawk a, a nu chu damdawi te a’n ei tir te te a artui lei tur chuan a kal nghal a. A rilru chu a hrehawmin a ngaihtuahna chu a kal ding hle mai, a thil leina tur pel rawk chuan a kala. A harh chhuak thuta a han hawi vela tumah chuan an lo hmu lova.

A nu hi a hmangaihin a nu pawh hian a hmangaih em em a. Pasal pawh neihsan duh lovin Muantea-Pu(a nu-pa) nen a enkawla a tulpui ta a ni. A pu hian a boral san tawh a. Mi te neih ang te nei ve phak lo mahse ti hian an nufa-a khawsa in an hlim thei ve em em a ni. Muantea hi tlangval tlawmngai leh mawng zang tak mai a ni a. Harsa tak chungin lehkha a zir hram hrama tunah chuan Mcom. hial a zir ve tawh a ni. Ti hian lehkha zir pahin a inhlawhfa thin a. A nu hi a lo hrisel tak loh avangin a inhlawhna ringin an khawsa ve tawk tawk a ni.

Nikhat chu Muantea chuan Class chu a kal ve leh a. Mahse mite anga pawisa hman tur a neih ve loh avangin thian pawh a kawm tha ngam meuh lova, Canteen velah pawh hian a chawl ve zen zen lo a ni. Chutia amah chauha thingbuk hnuaia a thut lai chuan nula pahnih Mami leh Chhuantei-te thian dun an lo kala, a thutna bulah chuan an rawn thu ve a. Mami chuan, “Muante..i va mal ve, tunlai chu ka hmu khat riau che a class i kal tha vak na nge..”? a ti a. Muantea chuan, “kal tha vak lo, ka nu a dam sam lova. Chuvang chuan ka kal thei lo a lawmawle. Mahse tunah chuan a dam tawh e” a ti a. An ei tur rawn kente chu an pe ve a.

An haw kawngah chuan Mami chuan, “Muantea hi chu a fel ngawt mai, nula pawh hi a ngaihven miah lo niin ka hria. Ka duhzawng tak a ni.. Chhuante..ka ti mai mai nih chu” a han ti a. Chhuantei chuan, “Hm..I ti mai mai lo tih ka hre reng I hmuh tawh hi chuan a bula awm dan I ngaihtuah ziah kha..ka hrethiam vek a lawm..nia, tak taka Muantea hi chu a hmelthain a fel bawk si a tha ka ti ngawt a sin” a ti a.

Tuk khat chu Muantea te Inah chuan Pu Chhunliana (a nu nuta) hi rui deuh chhur mai hian alo lut a. Muantea pu chuan, “Nang khan engvangin nge ka thu hi i lo hnial ve fova..he In hi ka ta a nih hi, ka pa ro a ni a. Pa ro chu fapa naupang ber chan tur a ni” a rawn ti nghal khur khur mai a. Muantea thin rim chuan, “Ka pu, fapa naupang ber I nih avang khan I chan ngawtna dan a awm love, ti hian i ti ziah mai a. I ngam ngam ka ngam. Nu leh pa i enkawlin i chawm lova, hmun dangah nupui neiin in leh lo i nei a, sawi pawh sawi tawh suh” ! a ti ve ta hmiah mai a. A pu thinrim chuan “kan la hre dawn a lawm” tih pah chuan a chhuahsan nghal a. Muantea chuan, “Ti hian harsa takin kan awma, anni nuamsa lutukin an awma. Mi tanpui ahnekin mi chhuh sak theih a piang hi chu mi chhuh sak a pawi ti lo a nih hi. Ka pu-ina thuro chhiah fel tak a lo dah lo hi chu a pawi ngawt mai….buai lohna turah kan buai reng mai a nih hi” a ti a. Muantea-pu Pu Chhunliana hi sumdawng pa hausa deuh mai a ni a. A duhamin an in hi a chuh buai reng thin a. Mawi leh mawi lo pawh a dawn meuh lo a ni.

Eirawng a bawl zawh hnu chuan ala hma deuh bawka tiin Muantea chu a thianpa Bena te inah chuan a lenga. Bena chuan, “zanin chu Mami te inah kan va leng dawn mi ? Lo leng rawh u a ti zing tawh bawka” a ti a. Muantea chuan, “Zahthlak deuh lo maw, an milian ropui si a” a ti a. Bena chuan, “Ho lutuk tlangval te chuan duh duh kan rim thiang a lawm. Leng turin kan inbe fel vek tawh, kan leng dawn nia” a ti a.

Khuangchawi thla a ni a. Kum khat chhunga Thla en ber thla niin arkaiden zan tak a ni a. Thla chu a eng no ruih mai a. A eng lawma Nula leh Tlangval interek hrang hmuh tur pawh an awm leh zauh thin. Bena chuan lengah chuan Muantea chu a sawm a. Amah chauha lo awmin, Bena chuan, “Hei ka thiannu phai kalin min lo hawna, tiang thil te hi chu a vang a, han lak loh ka ui bawk si a ka la ve ta mai. Tlem chu I tem ve chhin ang hmiang, thla eng kan lawm ve pah ni mai lawm…tin, len huaina te” tiin a kawnga atang chuan sap zu hi a rawn phawrh a.. Muantea chuan, “E..tih chi loh ang, kan vawi khat lenna tur a ni lehnghal, zahthlak”. “Ho em mai, mipa fa kan nih ve hi maw..vawi khat na reng reng chu I han ti ve chhin teh ang” tih pah chuan a herh hawng pawpa novah chuan a thli ta bawrh bawrh mai a. Muantea chu a pe ve nghala. Bena chuan, “ruihna tham a ni hlei nem, len huaina, tawng duhna te ania tha deuh a sin” a ti a. Chutia an in zawh hnu chuan an kal ta nghal a.

Muantea pawh chu a tawng duh ve khawp maia. Mahse an thil in kha a thawk tan ta a le,la in ngai ve lo ta chu a lu a haia, a luak a chhuak ta but but mai a. A tho a bathroom lam a pana, a pai thuta Dining Chair te chu a pal thlu phei rawk rawk mai a. Bathroom-ah chuan ava luak ta vak mai a ! Mami leh Bena chuan an buaipui nghala. Muantea chuan,”Mami, ka tih palh hlauh a ni min ngaidam rawh aw..” a ti deuh chhen mai a. Mami nu leh pa lo haw hmain an in kuah haw ta nghal a.

Muantea chu a zakin a inchhir em em a, mahse tih vak ngaihna a hre si lo. A phone ngam chiah bawk si lova. Mahse Bena chuan Mami hnenah chuan engkim a lo hrilh fiah veka. Mami pawh chuan hrethiamin a huat phah ta lem lova. Muantea hian a hriat lohin Mami hi a lo ngaina hman em em tawh niin, a rilru-ah hian a cham veng veng thin a, tih reh a tum a, a reh thei mai si lo. An dinhmun inthlauh dan a ngaihtuaha phu lo a tiin zahthlak a ti bawk si.

Mami hi Pu R. Liankhuma leh Pi Romawii te fa neih chhun niin, an duat em em a. Pu Liantkhuma hi Group A Officer niin sum lamah pawh an buai lem lo a ni. Nula fel leh inngaitlawm tak mai a ni a. ‘Nuhnap’ an tih ang deuh hi a ni. Muantea hi a ngaina ve hle a. Mahse a ruka an in duhna hi an sawi chhuak ngam lo ve ve a. Mami chuan Class kal te hi nuam a tih phahin a phur thei hle a. Mahse Muantea hian kal loh chang a nei fo mai a. Muantea kal loh chang hi chuan a khua a har ru thei em em a. Thian pawh hi a kawm tha peih meuh thin lo a ni.

Ni chu a sa vawl vawl mai a, thlang lam atang chuan thlifim a rawn thaw heuh heuh bawk a. Mami chu thingbuk hlim hnuaia thutna an siamah chuan amah chauhin a thu a. A piaha Ngirtling hram vang vang chu ngaithla pahin an khaw hnuaia Lui tui luang tle siar siar te chu a thlir vang vang a. A khua chu a har ta em em mai a. Tiang renga khawhar hi a la nei ngai lo a ni.

Zah pawh dawn lovin Bena chu a phone-a, zana lengah a sawm a. Bena chu alo zin daih maia, mahse Muantea chu a hrilh chhawng ve nghala. Muantea chuan amah chauha len chu zak viau mahse a leng ve leh ta nge nge a.

Mami te Inah chuan tlangval pakhat (Hmingthanga S.I.) hi a lo leng ve a. In ti thei tak mai hian a tawng a tawng a. An hna thawh dante an misual man chungchangte chu sawi nuam a ti hle a. Amah lah chu zu rim a nam huam lehnghal a. “Kuhva leh Cigarette ka theih nghilh daiha, kha.. tlangval min va lei lawk mai teh” tiin Muantea chu a tir ta mai a ! Muante chu inngaitlawm leh thuhnuairawlh tak a nih avangin kal nghal mai a tum a, mahse Mami chuan phal lovin an awmpui chu a tir ta zawk a. Tlangval nula rim theuh theuh intirh chu a ruk tak chuan a tha a na ngei mai.

Zan khat chu Muantea chuan tih dan a ngaihtuah ve ta a. Mami te In-ah chuan a leng ve leh a. SI. Hmingthanga pawh chu a lo leng ve leh ngei bawk a. Muantea chuan hma angreng takah chuan haw chu a ti ta mai a. Mami chuan Varanda thleng ava thlaha mahse Muantea chuan luh tir mai lo chuan a din pui ta tlat a. A rilru-a a vei dan te chu a hrilh ta vek a. “Mami, ka phu lo em em che tih chu ka hria a. I ngaihdan lo deuh te ka lo sawi a nih chuan min ngaidam dawn nia.. Ka thinlung zawng zawng hi i luah zo vek a, Zahthlak pawh ka ti a mahse a reh thei si lo, hmaichhana hrilh ngei che ka duh si a. I huatthu ka lo sawi a nih chuan min ngaidam dawn nia..” a ti a.

An ding rei ta si a Hmingthanga thinrim chu a chhuak a, “Ka la leng ve reng a ni lawm ni” tih pah chuan Muantea chu a su her ta sawk mai a. “I la hria ang” tiin a kal ta nal nal a. A ni pawh chu a haw zui ve ta nghal a. A rilru chuan a ti fuh nge ti fuh lo zawk ang aw tih te a ngaihtuah neuh neuh a.

Tlai khat chu Zu zuar In-ah hian zu in an tam khawp mai a, funte a lam nen an in sul zut zut maia. Pa pakhat pawh chu kil khatah chuan no dawmin a thu ve mek bawka. A thutna bulah chuan tlangval pakhat hi a rawn thu ve a. Tlangval chuan, “Ka pu ka lo thu ve mai ange..Vawin lam ka hah deuha rawl damdawi tih ve leh zeuh hi ka duh thin a..” a han ti a. Pa pakhat chuan, “e lo thu ve rawh, tlei rawl ho ti ti duh zawng leh kan duh zawng hi a in ang ve tawh thin lova tiin keimahin ka lo thu a, kha hei hi i nghah chhungin lo dawm ve rawh. A hmunah hian ka in ngai vak lova, ka lam tir mai thin a” tiin a thlit sak ve nghala. Tlangval, “A ngai hlei nem an rawn la tep tawh ang..a nih leh ka lawm lutuk e..Kei chu Hmingthanga ka ni a, Hminga tiin min ko thin a. Ka pu eng tin nge ka koh ve ang che ” a ti a. Pa pakhat, “Chhunliana ka ni a, Pu Chhun min ti ve mai rawh” a ti a. An pahnih pawh chu an ti ti tui sawt hle mai a. Pu Chhuna chuan chaweiah techuan a sawm ta nghe nghe a ni.

Zan dar 8 velah chuan an haw ve ta a. Chawei pah chuan an ti ti chhunzawm zel a. Pu Chhuna chuan a rilrua a helhkam, a pa ‘ro’ chung chang bawk chu a sawi chhuak leh a. A tupa nena an in tih dan zawng zawng te chu a hrilha. “Ka pa ro a ni a ka ta tur a ni, Lalmuanzuala hian min ti buai reng tur a ni lo” a ti khur khur mai a. ‘Lalmuanzuala’ tih ri chuan Hmingthanga beng chu a verh ta hle mai a. Tu Lalmuanzuala nge tih a zawt chianga. A tih Lalmuanzuala ngei mai kha a lo ni ve chiah a. An ti ti chu a hma aiin a rual leh zual sauha. Hmingthanga pawh chuan Muantea tih dana a thinrim zia te chu a hrilh ve ta vek a.

An chaw eikham hnu pawh chuan an ti ti chhun zawm zel a. Pu Chhunliana chu Hmingthanga hma ngai awm tak chuan a tawng reng bawk a. Tih dan tur a ngaihtuah ta a. “Pu Hming, nangni Officer tan te chuan eng vak nge huphurh awm le. Mami chu i nei em em ang, tih dan ka hria a nia. Duh tak neih tluka hlu a awm hlei nem. Chutia a ni pawn a duh viau si che chuan he pa hi kan dah kiang mai tur a lawm. Enge i ngaihdan ka hre hauh lova ka tan mi hnawk ber a ni bawk si. Lungte pakhatin sava pahnih kan vawm thla ningawt mai dawn a..” a han ti a. A nui huah huah a.

Hmingthanga chuan,”chu, engtin nge kan tih anga” a ti hu a. Pu Chhuna chuan, “aw..zanah i duhlaii chu a rim leh ngei anga, a leng haw lam ka nau ten an lo kuk thlu mai dawn alawm. Ka ro chan ai chan a tum, i nupui tur chhuh sak che a tum bawk. I bial chhung a ni bawka tih dan i lo thiam mai anga” a ti a. Hmingthanga chuan pawi a lo ti lem lo bawk nen. Rem an ruat dun ta a. Hmingthanga chuan, “kan thu hi tuman an hre tur a ni lovang, i tan leh ka tan a pawi dan tur chu i hrethiam vek ang chu, hmanhmawh thut thut lo ila fimkhur takin rem chang kan zawng dawn nia” a ti ta a.

Muantea pawh exam-te zo tawhin Mami te Inah chuan tlangnel takin a leng ngam ve tawha. Len pawh a leng zing tawh hle a ni. An induh tawnna te chu a zual tulh tulha, Mami nu leh pa pawh hian an hai bik lova. Muantea hi fahrah mah nise fel an tiin an duhpui ve hle a ni. Tin, a kut a lo them thiamin a tul a piang hi a thawk thei vek a ni.

Hun te a lo liam ve zel a. Muantea pawh chu a ngai te bawkin Mami-te Inah chuan a leng leh a. Anin duh tawnna leh hmangaihna te chu a zual deuh deuh a. Mami chuan zah pawh dawn zo lo chuan, “Muante.. palai lo tir ve tawh mai la., ka nu leh pa pawh hian an fak thei em em che a, an remtih loh ka ring miah lo” a ti ta tawp mai a. Muantea chuan, “ngawi teh Mami, nupui nei thei ka la ni lo. Chubakah kan dinhmun hi a in thlau si a, tunah pawh mi hian min nuih zat deuh ni hian ka hria a zahthlak te hi ka ti thin. Ka hmangaih em che avang hian ka then thei si lo che a. A chang chuan ka rilru hi a hah em em thin a ni. Tin, lo innei ve dawn tehreng pawh ni ila i nu leh pa te hian dan anga inneih hi an duh ngei ngei dawn a. Chu chu ka tan chuan thil theih a ni si lo. Engtin nge tiang dinhmuna ding chung chuan dan anga nupui ka neih ve ngam ang le” a ti sap sap a.

Mahse, Mamin a hmangaih em avang chuan eng pawh Muantea bulah chuan tawrh a huam zia te chu a hrilh mial mial a. Mami chuan, “a nih leh Muante..tlan mai ila..chuan dan angin kan innei dawn lo a ni mai lawm, ka pa te pawh thinrim deuh mahse ka hrilh fiah anga, an hrethiam ve leh mai ang” a ti niah niah a. Muantea chuan, “Inruk lek phei chu a tih chi loh leh zual ang, Thalai-ah te I lo inhmang ve bawk si nen I mualpho lutuk dawn a sin” a ti a. Chutia an ti ti dun kauh kauh lai chuan ‘Lenghnar Ar’ chu a rawn khuang ta al al a. Muantea pawh chuan haw zai chu a rel zui ve ta nghal a. An Gate thleng chuan ava thlaha inthlahlel em emin an in pawm vawnga.. an in mangtha ta a..

Pu Chhuna nau-te pahnih chuan Muantea leng haw chu an lo chang reng a. Thingbuk thim chinah chuan- “Thianpa, min lo pui lawk teh” tih leh Chemtea vih chu a rual nghal a! A thi chu a rawn chik chhuak nghal zuai zuai mai a.

Chutih lai tak chu Muantea chuan va nangchingin misual pahnih pawh chu an tlan chhe zui ve nghal a. A vanneih a siamin misual khan an lo hai niin. A bawihsawm nghal vat a. A awma chemte bur vu chu a phawi saka. Bike hian Police pakhat hi a rawn ding dawt a, “Che tawh suh, i chet leh chuan ka kap nghal ang che. I Chemte ken lai kha dah thla la i ban phar nghal rawh” a rawn ti ta mai a ! Muantea chuan Misualin an tih anih thu leh a bawihsawm zawk dan te a sawi paw’n Police Officer chuan a awih duh der si lo. Muantea chuan an en chianga, “E..Pu Hming, nang i ni maw ….” Pu Hminga chuan engmah sawi lo chuan a handcuff mawlh mawlh a Thana lamah chuan a hruai zui ta nghal a.

Zinga an thawh hma chuan Mami-pa phone chu a rawn ri ral rala.. “Kohima a i farnu, Chawii kha tun maiah khan lungphu chawlin a boral a, in theih chuan a rang lamin in lo kal dawn nia” tiin. Mami pa chuan an be chianga, hrilh ngai te a hrilh kual zung zung a. Flight hmasa bera thlawk tur chuan an in ti fel a. An in siam zungzunga Mami chu a nu leh pa nen Lengpui pan chuan an tlan ta nghal vang vanga.

Pu Chhuna te in-ah chuan Hmingthanga chu leng lehin a thil tih dan vel te chu Pu Chhuna a hrilh a. “Nizan kha chu kan che sual hle mai. I nau te an fimkhur lo deuh a ni. Mahse kan hling thei ta hram a nih kha. Tikhan murder case-in kan rek thei ta thova, a fuh khat thove” Pu Chhuna chuan, “tikhan a tang reng tawh anga a ni mai lawm. A lawm nan Ar ka’n talh ange, chaw kan ei dun dawn nia..”

Muantea chu Jailah chuan a lut nghal a. A rilru chu a hrehawm ngei mai, a Nu chu angaihtuah em em a. A bei te chu dawng rum rumin Ngaihtuahna fim pawh a chang chuan a pu hlei thei lo a ni. Mami’na a ngaih dan tur te a dawnin a thei mai dawn te hian a in hria a ni. A luh zan phei chuan chhin khat mah a chhing lo a ni. A dikna te sawi ve thei miah lova a awm chu a thinrim bawk si. A zan hnihnaah chuan midangte chu an mu reh thiap tawha, chutia beidawng tak leh lungngai em em a inngaihtuah lai chuan damchhung tang tura convict pakhat chuan, “Tunge beidawng chu..kei aia beidawng hi tunge awm a..hremhmun thleng rawkin i han in um ang hmiang” a rawn ti vak mai a..

Mami te pawh chu engemaw chen an cham hnu chuan an lo haw ve leh tawha. Muantea chanchin a han hriat chuan a rilru a na em em a, awm ngaihna pawh a hre meuh lo a ni. Tual a thah duh a ring lova, a khawngaih em em zawk a. A room lamah a tlan luta a tap ta tlawk tlawk mai a. “In ru mai ila ka tih lai khan lo duh ni se chuan tiang thil hi a thleng lo tur” a ti vawng vawng a. A tuar em em a Inah chuan a tawm tlata, len pawh a leng chhuak peih lo a ni.

Hun te a lo liam ve zela a hrehawm tihna te chu a zia ve ta deuh a. Mami chu thilawm zia tal hrilh ve thaa a hriat avangin lehkha a thawn ta a. Vawi hnih a thawn hnu pawh chuan a rawn chhang ngai reng reng si lo. A ngaih te chu tha lovin Mami pawn a then ta niin a ngai a. Jail-a a thian chhar ‘Duha’ chu a chhuak tawh dawna. A tawp nan lehkha chu a ken tir leh a.

Mami chuan Muantea lehkha chu a hmu ta a, a lainatin a rilru a nat pui em em a. Hmingthanga lo leng ve thin pawh chu a huat phah leh zual sauha, a len pawhin roomah a luh san daih zel a ni. Muantea lehkha a lo hmuh loh chhan te hi Hmingthanga’n alo dah bo sak vek niin a ring ta rum rum a. Intlawh theih hmasa berah Muantea chu a tlawh ve ta a.

An han inhmu chu, bar chhanah chuan anin chelh vawng vawng a.. Tu amah chuan tawng zai an rel thei lo, an mittui a tla zung zunga..Muantea zawk chu inti pachangin, “Mami…a pawi hle mai, min ngaidam rawh aw..engmah tih sual ka nei lo. Mahse, I rilru ti hrehawm tu mai ka ni hi pawi ka va’n ti em..I tan ka tling zo lo a ni.. Kei chu.. ti mai hi ka ni ta si a.. Hlim taka i awm zel ka duh sak che a ni…, engati nge ka van duai bik em em mai le.. Mami min then mai rawh..” a ti kauh kauh a. An mittui a sur zung zunga dan zawh rual a ni lo. Mami chuan zawi te hian, “Ka then lovang che, ka then dawn lo che..ka hmangaih che lawm.. I tih a nih hi ka ring reng reng lo sin..” a ti mial mial a. In thlahlelin inngai em em mahse inthen leh mai a ngai si, thenna dar a lo ri a..Security duty chuan chuan, “Hun a zo ve, lo kal tawh rawh” a rawn ti a. An in hmuh theih chhung chu an in thlir vawng vawng a. Ruah a rawn sur ta seng seng a.

Muantea chu lungchhiat nak alaiin a thian te chuan an lo fiam laih laiha. “Va lo nei chhe lo ve..a thlalak min lo pe ve teh..” te an lo ti a. An nui ham ham a, a lung chhia pawh a zia phah deuh a. A thil rawn ken sak te chu a sem diat diat a. “Hm..tiang bial nu hi duh ve hle mai..” tiin an nui dar dar a.

Tlai khat chu Duty pakhat hian Muantea chu, “Mcom. i zir a mi, in result a chhuaka, hei i thianpa’n min thawna..” ti pah chuan a pe a. Muantea chuan a han en chian chuan 1st Class a lo ni reng mai a. A lawm ngei mai. Jail chhunga a luha a hlim ber tum a la ni. A thiante pawh chuan lawmpuina thu an hlan mawlh mawlh hlawm a.

Muantea-nu chu hrisel lohna chuan a tlakbuak nasa deuh deuh a, Muantea Pute-a chuan fin rawl chhuahin an in lamah ala a. Tuk khat chu a chau ta riaua tawng pawh a tawng peih ta meuh lova. ‘Muantea a lama’, a chatthla zui chu a ni ta mai a. Thenawm te an rawn tlan khawma, Muantea hrilh dan tur chu an ngaihtuah nghala.

Vuina hunserh an hman lai chuan a lo thleng a. A inhnit hlawp hlawpa, “Ka Nu ava na ve.. Ka nu.. ka lo haw a sin, Mahse.. min nghak zo ta si lo maw..”! a tap tlawk tlawk a..

Muantea tan chuan tawrh ava har em.. Tawrh zawh loh mai pawh awl dawn hlein a hria a. Mahse a jail tan pui thiante an fel em em a, lainat takin an enkawl a. “Jail tang ho hi misual awmkhawm turah ka lo ngai thin a. Mahse an lo ni vek lo tawp mai, vanduai vang te, dinhmunin a zir loh vang te-in mi fel tak tak pawh an lo awm teuh a ni”, a ti hial a ni.

Pu Chhuna pawh chuan a tum ang ngeiin Muantea te In chu a nei ta a. LSC pawh ama hmingin a thlak tir ta veka. Sum siamna a nei tha bawka a hausa tawh hle a ni. S.I. Hmingthanga nen pawh chuan an inkawm ngeih hle zel a. Mahse Hmingthanga erawh chuan Mami chu a tum ang ngawt chuan a ngaizawng thei der lo mai a. Mami lahin a haw em em bawk si.

Pu Chhuna’n khawchhak bungrua (No. 4 a rukin a tel teuh thin a) a chah chu a lo thleng dawna, kawng laka an man chhuah mai hlau chuan tih dan a ngaihtuah a. Hmingthanga hnenah chuan, “hei khawchhak bungrua ka chah a, a lo thleng dawn tawha min lo pui mai teh a…min puih man te chu zia zang ve deuh pawn kan in pe ve ang chu mawle..” a ti a. SI Hmingthanga chuan remti-in chawlh ala ta a. Champhai-ah chuan a lo han hmuaka, dawt-in Custom-ah leh Gate-ah chuan a-U bungrua angin a sawi a. Pu Chhuna chuan lawmmanah Rs. 20000/- lai a pe nghe nghe a ni. A sen chi te hi Pu Chhuna hian a tawlh thin a, Hmingthanga chuan Gate-ah hian a lo pui fo thin a. Sum pawh Hmingthanga chuan a neih phah hle a ni.

Muantea hi tual thata puh nimahse Court-in tual thata ala pawm chiah loh avangin Convict ala ni lova. Mami chuan a pa hnenah Muantea chanchin zawng zawng chu a hrilh ta vek a. Muantea bail a duh thu chu a hrilh ta tawp a. A pa pawh chuan a khawngaihin bail dan tur chu a ngaihtuah pui ta zawk a. Muantea Court ni hmasaleh berah chuan Magistrate-a tih fel ngai te ti felin a bail thei ta a ni.

A lo chhuak chu han hlim viau mahse a lawm chu a kim lo hle mai. A nu-in atan hlanin a boral san a, In haw-na tur a nei tawh bawk si lo. A nu chu a ngai em em a,a baihvai hle mai. Mami nena ngawi renga an in zui lai chuan a tan dawn zana mi thattu a hmuh ngei kha ava hmu fuh a. Mami chu a kai hlawk hlawka an um zui ta a. Motor-ah lutin chu pa chu a tlan ta daih mai a. Taxi lo kal chu ti dingin a rukin an um zui ta nghal a. A hnungah chuan an zui zela. An khaw dai-a In pakhatah chuan a tlan lut ta a. A chhak deuahah chuan chhukin a sir lam atang chuan an hel kual a. Muantea chuan, “tikhan lo awm la, ka zu enfiah ange, he pa hi tualthattu chiah kha a ni” tih leh kal a rual nghala. Mami chuan a pa chu phone-in an awm nate leh an chanchin te chu a hrilh zung zung a.

Muantea chu dimte-in kawngkharah chuan a lut them thema, pakhat lo duty chu a chhu thlu tawp a, a Pistol pai lai chu a phawi sak nghala, a veh phei ta zela. Pa- pathum hi ava hmu a, pakhat chu a Pute-a a lo ni a ! A bula thu chu SI. Hmingthanga a ni bawka. Muantea chhuah chung chang te leh an hma lak dan tur te an lo rel mek a ni. An thil rel te chu a hre hman nual a. Muantea chuan, “Che tawh suh u, in chet leh chuan ka kap nghal ang che u” a han ti a. Hmingthanga chu che thutin a Pistol a phawi a rawn kap nghal a. An in kap ta thuai thuai mai a. SI Hmingthanga chu a thal tawp a, a piah a pa-pakhat pawh chu a vial leh ta ngawlh ngawlh mai a.

Chutia an in kah fe hnu chuan Muantea Pistol mu chu a zo ta hlauh mai a, Pu Chhuna chuan rawn pan pheiin, “I chimawm man chu I hmu dawn khawp mai” tih leh kah chu a rual nghal a. Mahse a mu chu a lo zo ve chiah a. Muantea chuan rang takin a bawh phei a, an inbawh thlu ta rum rum mai a. A hnek chawrh chawrh a, a Pute-a chu a chau ta a. Muantea pawh chuan a thawh san ve nghala. “Engtinnge hetiang hian ka chungah rilru i put theih a.. Setana pawh hian em em a a ti lo che maw..” a ti ta phiar phiar mai. Hmingthanga Pistol chu ala a, kah a tum lai tak chuan Police leh Mami pa te chu an lo thleng zui ve nghal a.

Thil awmzia an han hriat chian chuan Police chuan Pu Chhuna chu an man nghala Hmingthanga pawh chu a lo la thi lova, an zawn chhuak ve nghal bawk a. Police te chuan Muantea hnenah chuan lawm thu an sawi mawlh mawlh a.

Mami pawh chuan Muantea chu an in lamah a haw pui ve ta nghal a.

Similar Posts:

• Ka lunglen hnemtu rinrawlte – I
• Pari Zun
• Thawnthu ho mai mai..
• Damlai par chu…
• Breaking News: Zaithiam CFL Hmingthanga kan chan ta!

Recent Posts:

• School zirtirtu hmeichhia ten karkhatah ni hnih puan bih a ngai tawh dawn…
• Sawmna – Dah mai a!
• Leitlangpui
• MIZORAM CHU AIZAWL (Aizawl Khawpui zauh a tul kher em?)
• Comedian Search 2012 Top 10-ah mi 12!

This entry was posted on Wednesday, October 20th, 2010 at 4:00 pm and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.