mi(sual).com

Lungdawh mual Hmawng kak kar atang chuan Thla chu a lo eng suar suar a, kan rala  Khiangzotlang pang  chu a en no ruih mai a. Zanin chu kum khata thla en ber ‘ARKAIDEN ZAN’ a ni bawka a eng ngei mai, lung a lengin Naupang ho pawnto-in, ‘Pang aw inzial inzial..’ an ti laih laih thawm-te chuan kan naupan lai min ti ngai thar leh a..

Thla chuan kan khua chu a en ta kung maia nula rim reng a lang lo, Luhkapui/Leikapui-a Maipawl leh Maitai lum ruih  chu dah sawnin thuthmun kan han rema. Ka thianpa farnu chuan thingpuisen hang chu min rawn chhawpa, Ukulele hrui chat  chu kan han suih zawm nawk nawka, lunglen a hnem mahna tiin thiam ang tawk chuan zai kan han vawr tan ta a..

Mual zapui kardanah leng  mahla,

Hal lo ten vul reng la ka tawnah;

Chhamang zala kan tiam thu zawng te,

Englai paw’n cham reng se thinlaiah.

I  tello  chuan  maw Bawihte,

Ka tap  thin  Chhawrthla  engah;

An  awm lo nang lo min hnemtu D.

Hlim te’n lenlai chen ka nuam ngei e… ti a kan han zai vang vang mai chu(h)… Kan thlang ngaw kara Thangfen pawh  a lung alo leng ve ngang a niang, a thiam tawk chuan a rawn hram ve karh karh a. Chu mai ala ni lo, Pawnga(Perhpawng) lung leng pawh chu a theih anga mawiin alo chiri ve vang vang mai bawk nen, kan lunglen mi trawm niawm tak chuan Leihrik te pawh chu an awrawl tawp tawp chuan an lo zai ve chiah chiah a.

Tuikhur ral pathlawi pawh a lung a leng a ni… Luhkapui tlang vuan chuan a hawi vang vanga, “Aw.. kan vanglaia Chhawrthla eng hnuaia Lengi bahsam kan chul heuh heuh lai te kha aw..” tiin a dawn ve pawh a ni mahna.., a aw a’n thian leh kharh ringawt thin. Pa ho pawh pawn Thla eng hnuaiah thingfak dawhkalh a thu-in Lo lam chanchin-te an sawi khawm a. Vanlaizawla arsi ho te pawh zanin zet chu an D’ runah an leng ve ta a ni ngei ang le, hmuhtur bar pawh an awm lo.. a lungleng tlahlang zual anin lar pheuh pheuh tih mai loh chu..   

Kan zai ngaihthlak chak ni awm tak maiin Vabak chu kawmthlang te Thringkul hmawrah chuan  fu-in  kan thutna bul te chu a rawn hrut leh thuak thuak thin. Ral hla taka Lungsang khampang Ramhuai (Tau-meichher-chhi) ho paw’n thla eng lawm an tum ve a ni ngei ang, khampangah chuan an Meichher chhi-in an kal de thriai thriai hlawm a. Kan zai lo lam rem niawm fahran chuan kawmchar ten mau ler sang taka Zawbuang vun kaih parh an tar chu thlifim thawt zawng chuan a leng leh lap  lap thin.

He Khuangchawi thla Arkaiden zan zet hi chu  lung a lengin,  ‘Nun hlui ngai lo awm thei tak ang maw..’  ka ti vawng vawng a..

Chhak lenkawlah chhawrthla haiang thovin,

Khawvel  zan thim engmawi rawn hawnin;

A her sang zel, aw I  eng mawi zel,

Hringfa leng tan thlir nin I har ngei.

Nungcha leng pawn an thlir ning law’ng  che,

Hlimin an zai aw I eng mawi lawmin;

Parmawi tin reng siahthing vul zawng pawn,

I hliap hnuaiah tuantul an rel e.

Chhawrthlapui,  Aw.. zan lalnu…

Ti a Liandailova’n thiam tak leh lungrun em ema a lo awi pawh hi a va’n awm tehlul em..

Similar Posts:

• A2Z+Z
• Zan Thla Eng, Mizo Hla leh Kei
• Mathlenga – Kar a hla
• Side B
• Mimi Renthlei – Tu nge Ruati I ngaihzawng

Recent Posts:

• School zirtirtu hmeichhia ten karkhatah ni hnih puan bih a ngai tawh dawn…
• Sawmna – Dah mai a!
• Leitlangpui
• MIZORAM CHU AIZAWL (Aizawl Khawpui zauh a tul kher em?)
• Comedian Search 2012 Top 10-ah mi 12!

This entry was posted on Friday, October 22nd, 2010 at 5:29 pm and is filed under Mizo Society & Culture. You can follow any responses to this entry through the RSS 2.0 feed. You can leave a response, or trackback from your own site.