mi(sual).com

(Hei chu a thui deuha khawngaih chhiar chi)

Unau panga zinga ami lai leh mipa hmasa ni turin ka lo piang ve a, ka pa chu a lawm kher mai. Mipa fa diktak ka niloh hlau in kum 5 mi lek ka nihlai chuan a ramvah silai chu min han ka tir a. Aia u zawkte velh a ka awm pawhin tap chunga in ka thlen a phal ngailo. Vawi tamtak min zilha min fiah fo thin.

Kum 9 mi lek ka nihlai chuan chu ka pa (kum 32) min ngaihtuah em em tu chuan a hnathawhna atanga Malaria hrik rawn kai in min boralsan ta maia! Ka chhungte zawng zawng an tap a, kei erawh chu u te tah vangin ka in hnit ve hluam hluam ringawt. Enge kan chhungkua in kan hmachhawn dawn ka hre lo!

Pa tello chuan ka lo seilian a,  ka u hmeichhia te hi ka zui ve dat dat a, anni erawh chuan “Mipa in hmeichhia an zui ngailo” tiin min hnar fo thin. Thian ka thlahlel ve ta em em a.

Ka nu lah eizawnna mumal neilo in a remchang apiang thawkin min tulpui a, kan harsat a zual zel a kan mamawh alo tam takah chuan chhungkua kan awmkhawm thei talo. Ka u te chuan kan chhungte an bel taa, kei leh ka nau te pahnih erawh ka nu kiangah kan khawsa ve ta naw naw a.

School ka kalnaah te chuan thiamthei leh thuawih tak ka ni ve a, thian ngaina an thu zawm em em leh fiamthu duh tak ka ni bawka. Ka thianten “Chumi khami ti turin chuatah chuan i kal ang hmiang” an tihin ka hmanloh chang pawhin ka hnial ngai lo a. Meizial leh ganja(marijuana) zukte an ching a, keipawh chuan ka lo duhve leh ta zela.

Zirlai ah chuan an hlawhchham ta pheuh pheuh hlawma, kei erawh chu ka pass ve nawlh zel a, “ Ani hichu i kawm tawhlo ang u, min pass san zel” min ti fiam thin a. Mi zu(alcohol) thuhruk rukchhawn te kan han ching chho taa, a nuam angreng phian mai. Sunday chawhnu inkhawm aiah meizial leh kuva inchawiin football khelh kan hrat ngei mai. Ka thiante chu Kohran hrang hrang te an nih hlawm avangin ka kawm remchang ber te Kohhranah chuan kan Kohhran kalsanin ka inkhawm ve mai zel bawka.

Ka nu chuan zan chhuah a phalloh thin avangin kan inhau fo a, ka titau chu ka patea te hnenah ka rawl/tlanbo ta daiha. Ka patea te chu tlangval pahnih anni a (upa zawk natna benvawn nei), ka nu aimahin an retheia. An hnena ka awm chu rawngbawl, insuk, tuichawi zawng zawng chu ka kutah a awm a. Ka thatchhe ngailoa engkim ka tihfel hnuah chauh thiante kawm turin ka chhuak thina. Ka u a lo len chang in buh ka thap khawl tir a, ka hahzia ka nu hnena sawilo turin ka chah ve lawm lawm thina.

High school ka han rap ve tana, ka thian kawmngeih ber ber te chuan an chawlhsan taa. Anmahni sawmna leh thlakhlelh vangin ka tlan bo ta fo maia. Thil eng engemaw kan ti ru a, lui ah te kalin Ganja kan zu a, Zu te kan in a, kan hotupa(Boss) Proxyvon inchiu-na turte kan leisaka a chang leh keimahnin kan vih sak bawka (proxyvon a ka lo inchiu ve hmanlo kha ka vannei takzet a ni). School ka ngainat theihna tura Pathian hnathawh nge ka hrelo kan class a thiamthei leh hmeltha ber mai Miriam-i chuan min ngaizawng ta tlat maia!

Min duh em em mai bawka. Short/Lunch Break apiang chuan ka kiangah thu in ka kut techu a han laa a hmingte a han ziaka ka lai ve em em thin, school ban apiangin min nghak bawka. Ngaihzawng ka ngaihtuah ngailoa duhve pawh niila ka phu lo, min hrem zin tehreng nen engtinnge mi duh theih? lehkha a thiam si a hmel en reng rengin an hausa tih a hriat ngawih ngawih.

Ni khat chu tlanbo dan ngaihtuahin tukverhah chuan ka hawi vang vanga, chutih lai tak mai chuan Miriam-i chuan minlo kuah ta chat mai! Kava lai kher em! Kan thianpa Ruata chuan minlo en a! intih zei hmel tak hian ka han kuahlet ve a “Ruata kan inhmeh i ti ve tho em?” tih pahin a biang leh ka biang techu ka han sik tir ve a, inhmeh lutuk tihpah chuan min kalsan leh ta maia. Ka kut lakthlak leh ka duh, mahse… a har tlat tawh! Ka aikherh lo chauh a ni! Chumi ni chuan ka tlanbo loh phah ve ta thak a. .

Kan zirtirtunu zei em em mai lah chuan naupang duhawm min ti ve deuh ni ngei tur a ni ka hming hi alam deuhreng bawka, ka zirlaipui ten Miriam-i nge i duh tiin min chhaih fiam nasa thin khawp mai. Mahse school chu ka ngainat rei phah tak tak chuanglo! (Miriam-i kha engtin awmzel angmaw? Pasal te pawh a nei ve tawh ngei chuan ka ringa)

Ka absent zin em avang chuan ka lo thiamthei ta biklo, entawn ka lo duhve taa. Entawn ka zeilo bawk nen min man chiang kher mai. Ka haw vang vanga chhungte hriatlohin ka chawl taa. A hnu rei vakloah ka nu in ka chanchin te hriain a mangang taa, Aizawl tlak lama awm kan ni a veng danga ka pu (ka nu pa) te hnen lamah chuan ka nu chuan an chhawr theihna apianga chhawr turin min thawn chho taa. Ka pu chu Aizawl mi hlun leh veng laili bera awm mah nise ran vulh leh kut hnathawka eizawng mi a ni a.

Ka pi (Step-grandma) chuan “Motor khalh zir paha kan Driver hi zui nge i duh lehkha la zir?” tiin min zawt a, kei chuan “In tih tih animai” tiin ka chhang liam maia. Ka nute-i chuan “Motor khalh zir chu ala tlai hleinem, lehkha han zir leh phawt sela a tihngaihna a awmloh chuan hnaah kan trula chhawrna chu a tam ang” a ti a, ka zirzawm ve leh taa.

School chu ka han kal tha leh a, class ban leh chawlh apiangin tihtur hlirin min hmuaka, a chang leh ka pu ran vulh chaw pek leh veng turin ka chhuah angaia, ka trawp theih em avangin ka zirlaipui ten min hmuh ka hlau thina. School chawlh a awmin kapu huan/lo lama ka riah te alo ngai ta fo a, ruihtheihthil ti hman ka ni ta lo(Lalpan mi thununna a lo ni). Ka huan riahna ahte chuan ka rilru ti hahdam turin minlo ngaizawngtu chu an awmve leh ta zel a. Ka rilru ala peng ve em em a  mase ka ngaizawng ve lemlo. S

chool hrang hrangah ka kal chho a thian nghet tak pawh neih a harsa ngei mai. Fiamthu duhtak mi ni chung si hian inthlahrung  reng reng hi ka ni a, khawiah pawh mi polite leh fel hi anlo awmve zel zawk a. Tichuan ka zirna a piang mai chu reilo te ah nuam ka ti ve leh ta em em zel a, School ah chuan phu loh duhtu te ka han hmu zela, chu chuan in lam hna hahthlak rilrua pai rengloa zirna lam nuam tihna rilru tam zawk ka hman theihna min pe a. Ngaihzawng tak taka neiin mite angin rim thin lo mah ila ka hringnuna ka rilru khalh ngilna niin ka hre ve tlat a ni.

” Class 10  pass hlim subject thlang tur te kha ka va han buai tak em!” Art subject lamah kal ila a hahdam deuh lomaw tih dawnin ka marksheet-ah khawngaih mark inti lo mahse ka SS1(Social Studies) leh SS2 result atang chuan a chiang em em si. Maths/Science ka tui mase Science lak ka ngam lo, Text book leh fee man a to a hunawl ngah angai bawk. Class 10 ah Science bu pan te pawh ka hahpuia ka tlin ve lo ang ka ti a Commerse zir tumin ka apply ve a, interview ah ka tla chiang ngei mai! waiting list ah pawh ka awmlo. A tawpah zawng ka pa a lo che chhuaka “Amah ngei a ni vawiin ni a ka zuam loh leh tlinlo inti chung chunga ka tuina min petu hi”. Sawi tur ava tam em!

KAITAWI ANG

Ka pu chuan kuthnathawh a ngaihsan em avangin Kohhran leh Zirna lam a ngaihtuah vak lemlo, Sunday te hian thawhtur a awm renga,chung thawh aichuan inkhawm ka thlang zawk fo thin. Kohhranah te chuan ka lo tlangnel ta em em a, naupan laia Sunday school pawh kal ngai hleilo kha veng laili taka Naupang Sunday School zirtirtu, thalai Group OB, Kohhran chanchinbu c/m, Evangelism c/m etc. ahte chuan chanvo min han pe ta fur hlawma.

Chung zawng zawnga kohna letter chu ka khumah dahin a hmaah ka thingthi a, a chunga ka sawi takte ngaihtuah khian Pathian hmaah mittui tla zawih zawih in lawmthu ka sawi taa. Ka thian thenkhat te chu TNT ahte an awma a then Drug Overdose in an Boral tih ka han hriat chuan ka lung a chhiaa “LALPA tunge ka nih bik?” tiin ka trawngtrai fo thin. Lal Isua hi ka thian tha ber a lo ni. Vawiin ni ah chuan ka phu loh chawmawina Kohhranah leh Zirnaah ka lo chang ta, “Ka chunga a thil tih that zawng zawng avang khan LALPA chu fakin awm rawh se.” Amen.

Similar Posts:

• Zu zuar veng min ti maw, vannei ka inti asin
• Kan hma hun hi !!!
• Hmangaihna
• Just another M-book on the Wall…
• Ka hmangaih che, ka hmangaih fo ang che.

Recent Posts:

• School zirtirtu hmeichhia ten karkhatah ni hnih puan bih a ngai tawh dawn…
• Sawmna – Dah mai a!
• Leitlangpui
• MIZORAM CHU AIZAWL (Aizawl Khawpui zauh a tul kher em?)
• Comedian Search 2012 Top 10-ah mi 12!

This entry was posted on Friday, October 22nd, 2010 at 1:30 pm and is filed under More than words. You can follow any responses to this entry through the RSS 2.0 feed. You can leave a response, or trackback from your own site.