mi(sual).com

Emmanuel Zomuanpuii pawngsual a thah a ni tih ka hriat tirh a ka rilru a lo lang hmasa ber chu a thattu Lalrammawian a han vau vel leh kut a thlak lai vela a thlaphan tur zia leh tanpuitu, a bikin a nu a ngaih tur zia a ni. Zomuanpuii nu leh pa chanah ka han in chan chhin vel a, a nat tur zia suangtuah thui ngam chi pawh a ni lo.

Mi tamtakin he tualthahna hi kan haw ngawih ngawih a, tualthattu hi hmuh a kut thlak kan chak zek zek ni in a lang. Kut thlak mai ni lovin mi tamtak phei chuan hun remchang hmu se tîmna nei miah lovin an sawisa hlum ve nghal duh ang tih post hmasa a comment leh post dang atang tein a hriat theih.

He tualthahna mai ni lo, tualthahna/pawngsualna thleng tawh dang chungchang post-ah te leh kan comment zawng zawng ka thlir let atanga ka rilru a thil tamtak lo lang ka han sawi ve dawn teh ang.

Naupang pawisawilo pawngsual a thah hi nunrawng tawpkhawk thiltih a nih avangin mi pangngai chuan hetiang thil rapthlak tihduhna hi neih ahnekin a rilru pawh in a suangtuah pha lo. Engvanginnge Lalrammawia hian he thil rapthlak hi tih duhna a neih? Tisa chakna vawikhat hrikthlak nan ringawt, midang te tan a natna leh lungchhiatna thlentu mai ni lo, mahni nun ngei tihchhiatna, mi zawng zawng huat nihna tur a he thil rapthlak ti duh Lalrammawia hi mi rilru kim, rilru hrisel a ni thei lo reng reng tih kan ngaihtuah em?

Ram changkang zawk tamtakah chuan mi in thil sual a tih in enge a tih chhan an ngaihtuah hmasa thin. Naupang tamtak, school a awm tha duh lo, zirtirtu control hleihtheih loh, che lo va awm thei lo ang chi phei chu mithiam an entir thuai thin. Tunlai a lar ta em em ADHD (  Attention Deficit hyperactivity Disorder) kan tih ang chi te phei hi chu a damdawi pek in an tha ve tial tial thei. Heng naupang a bik a enkawl nan hian sorkar pawhin sum a seng hnem em em a, kawngdik an zawh theih nan leh rilru hrisel an put theih nan an mamawh ang zel a scheme siam in an enkawl thin.

Tunah hian mizo naupang pakhat hian ADHD lo nei ta se, schoolah awm tha duh lo vin thilsual tih chakna nei ta tlat se, tuman a pianpui natna a ni tih kan ngaihtuah lo vang a, a sual zia leh enkawl a harzia sawiin a nu leh pa thleng in kan dem nghal anga, kan fate pawh kawm lo tur in kan hrilh ngei ang.

Khawvel a kan lo pian hian mihring theuh theuh kan vanneihna leh vanduaina hi a in thlau em em tih kan hre vek awm e. Naupang thenkhat chu nu leh pa fel tak karah an piang a, nu leh pa ten fa te enkawl uluk a tul zia hria in an theihtawk in an naupan lai atangin kawngdik zawh thei tur in an kaihruai thin. Heng naupang vannei zingah ngei pawh pianpui rilru piangsual an nih tlat a,an natna hmuh chhuah a nih lova enkawl dan tur diktak a enkawl an nih si loh chuan thil rapthlak tak tak tih duhna  an nei thei.

Serial killer lar tak tak Ted Bundy, Dennis Raider, Jeffrey Dahmer etc. te pawh chhungkaw pangngai a piang a seilian an ni chungin an mahni pawhin an hriat thiam loh rilru natna (thualthah chakna) an neih tlat avang in an in control zo lo. Tin,serial killer zingah pianpui rilru natna ni lo, pian leh seilenna in a zirloh avanga rilru lo piangsual ta pawh an awm nual bawk. Mi in chhan awm lovin tualthah duhna a nei ringawt lo.

Rilru piansualna mai ni lo, seilenna environment in awmzia a neih thui zia chu thingtlang naupang leh khawpui naupang ngaihtuahna in thlauh zia a tang te, America, Europe etc. a cheng te nen a kan perspective in an loh zia atangte etc. hian a chiang em em. Africa indona ram a piang naupang chuan nunna hlut zia a hre pha lo va, a ai a u ten mi an kah hlum mai mai avangin kahhlum duhna rilru a nei ve mai a ni. Chutiang bawk chuan rilru hrisel pangngai a piang naupang pawh chhungkaw hrehawm, harsa leh buai, nunrawnna leh mawlna in a hual vel kar a sei lian  a nih chuan nunrawnna leh mawlna bak rahchhuah a nei hlei thei lo.

Lalrammawia hi tunge a nih ka hre lo va, a nu leh a pa ka hre hek lo. Harsatna tamtak kar a lo seilian nge, fahrah a lo piang a ni nge ka hre lo. Zomuanpuii a pawngsual a a thah ringawt chhan diktak hi tumah hria kan awm lo. A hringtu nu ngei pawh hi mi pangngai a nih ngai chuan a fapa ngaihtuahna sual kal kual vel hi a hrethiam pha kher lovang.  Mahse thilchiang tak erawh chu; Lalrammawia hian heng thil rapthlak tih duhna rilru a nei ta mai hian CHHAN a nei a, rilru piangsual sa in a piang emaw, a seilenna environment in a zir loh vang emaw a ni ngei ang.

Tualthattu leh sualna chi hrang hrang titu te hi an dinhmun ngaihtuah hmasa lo hian keimahni dinhmun atang a teh in, kan rilru ang  pu chung a thilsual tih duhna va nei ta thutah hian kan ngai thin ni ber in a lang. Chuvangin heng thil rapthlak an ti thei te hi kan hre thiam thei ngang lo a nih hi. A dinhmun hrehawm tur zia leh a chan chhiat zia kan ngaihtuah duh lo va, lainat chu sawi loh, a mah kha a huat in ka haw tlawk tlawk mai a nih hi. Lalrammawia hi rilru piangsual sa a lo piang a ni emaw, nu leh pa tlaktlai lo tak karah  a duh vang reng ni lo va lo piang in, heng thil rapthlak a tih te hi a pian a seilenna in a zir loh a vang lo ni ta se, keini hian kan lo huat em em a thah duhna rilru hial kan lo pu hi a dik ber em? Kei hi tunge ka nih chiah? Pathian zarah heng thil rapthlak  tih duhlohna leh sual huatna nei a ka lo piang leh seilian hi ka va han vannei em!!

Lalrammawia hi  rilru hrisel pangngai a piangin, nu leh pa fel tak enkawlna tha tak hnuaiah lo seilian ni ta se he thil tih duhna hi a neih ka rin loh avangin a lainatawm ka ti in ka dem ve ringawt  thei lo. Ka dem ringawt lo ka tih avangin a thiltih hi a tha ka ti tihna a ni lo va, Zomuanpuii chung a a thiltih hi  ka haw ngawih ngawih a, Zomuanpuii tuarna leh thihna hian ka lung a ti chhia a, a nu leh pa leh laina te rilru nat dan tur ka ngaihtuah in ka mittui a tla hial. Hetiang thil rapthlak hi midang chungah Lalrammawia hian a tih theih tawh loh nan a damchhung a jail a khung bo ni thei se ka duhthusam a ni.

Zomuanpuii nunrawng tak a Lalrammawian a thah avang a kan lo thinrim em em leh he tualthahna kan huat zia kan lo sawi bawrh bawrh te hi a mak lo ve. Tin, dan in diktak a ro a rel loh thin a vang leh misual hremna mumal awm lo va zalen tak a an chhuak leh thin te kan dem a kan sawisel pawh a awm bawk e. Mahse tualthattu  nunna laksak duhna rilru hial nei te tan erawh a ngaihtuah tur, zawhna  ka han chhawp chhuak ve duh a ni.

1. Lalrammawia hian Zomuanpuii hi Pathianin a hmangaih ngawih ngawih,  nunna a pek a nih ngai pawimawh hauh lo va a nunna a laksak avang hian NANG hian i pek theih loh, Lalrammawia nunna  hi laksak theihna i nei ve ta ringawt tihna em ni?

2. Zomuanpuii nunna hi engtikah mah kan hmu kir leh thei dawn tawh lo. Lalrammawia hian Zomuanpuii nunna mawh hi a phurh tur a ni. He a thilsual tih avang hian Pathian in keini min hmangaih ang tho va a hmangaih a nunna a pek, Lalrammawia nunna hi lo lak sak ve  ringawt teh ; Rorelna hma a i din hunah a nunna mawh hi Pathian hmaah i phur ngam chiah ang maw ? Mi nunna meuh laksak tur hian nang tehlul hi tutunge maw i nih bik le ?

3. Pathian remruat hria kan awm em ni ? Pathian in Lalrammawi a hi a hmangaih si a, a boral hma ngei in a lam a a in lamlet nan hun remchang a pe duh thei a sin. Pathian remruat hre hlek lo vin a in lamlet hma in a nunna i lo la ve ringawt dawn em ni ?

4. Kan pian kan seilen dan leh Lalrammawia pian leh seilen dan a kip a kawi a hre tu awmchhun chu Pathian chauh a ni. Pathian tehna/buknaah atang hian Lalrammawia ai hian kan tha bik a ngem ?

5. Lalrammawia chhungte dinhmun tur kan ngaihtuah em ? An rilru a na in an va han zak dawn em!  Lalrammawia fate hian pawngsual, tualthah chîng pa neih hi an duhthlanna a nih i ring em ? Kan chhungkua, laina hnai zing ngeiah pawh hetiang mi hi an piang ve thei tih kan ngaihtuah em?

Mihringte ngaih a misual tawpkhawk pawh ni se, mi nunna lak hi Pathian in rem a tih ka ring lo va, Christian te tan phei chuan Capital punishment te hi a sawi a sawi rik pawh kan tihtur ni in ka hre thei lo.

Mizoram chhungah misual tamtak mipui kut tuarin an thi tawh. Mipuiin kut an thlak rawn nasat avang a thi an nih thin avangin a hnukchhattu chiah ni lo mahse kutthlak tu zawng zawng te hi rorelna hmaah an insawifiah a ngaih hi ka ring tlat mai. Chuvangin ka misual pui duh tak! Engang a misual tawpkhawk pawh lo hmu in, kutthlak theihna chance pawh lo nei in, lo thinrim em em mah la ;  ngun tak in in ngaihtuah hmasa  la, kha misual pian leh seilenna, a nu pumchhung a a in siam tantirh a ta a kip a kawi a hretu Pathian hnenah a nunna chu lo hlan zawk in, nunna i pek theih loh  Pathian in NUNNA a pek hi rorelna hmaah a mawhphurtu i ni thei tih hria in lo insum hram hram thin ang che !

Similar Posts:

• Hmeichhe naupang thattu police in man. Amah ngei a in puang.
• Ui (Dog)
• Mizo naupang pahnih in huaisen lawmman la
• Mizo thalai internet hmang zat?
• Sunday Pual Ephesi 6:12

Recent Posts:

• School zirtirtu hmeichhia ten karkhatah ni hnih puan bih a ngai tawh dawn…
• Sawmna – Dah mai a!
• Leitlangpui
• MIZORAM CHU AIZAWL (Aizawl Khawpui zauh a tul kher em?)
• Comedian Search 2012 Top 10-ah mi 12!

This entry was posted on Monday, October 25th, 2010 at 10:58 am and is filed under Opinion. You can follow any responses to this entry through the RSS 2.0 feed. You can leave a response, or trackback from your own site.