mi(sual).com

- James Ramdinmawia

A mangan thlak thin ngawt mai! MZU chungchang chanchinthara a lo lan apiang maia chanchin lawmawm lam aia chanchin lungchhiat thlak ringawt mai kan hriat thin hi eng tikah tak tawp ve ang maw! Mizote hian Mizoram hi kan hmangaih thlawt lo tih hi kan ram nghahfak zirlaite zirna in kan suasam duhdan atang hian a lang chiang reng mai.

Vawi tam tak kan auchhuahpui tawh, MZU hi zirna tlak lo khawpin kan pawngsual ang tih hlau ngawih ngawihin eng emaw incident a awm apiangin thiante hmai eng pawh zah hlei thei lovin MZU thlavang hauhna thute kan ziak awl lova, chuti chung chung pawha mipuite rilru sukthlek kan la khalh ngil zo meuh lo pawh a beidawnthlak tawh tehlul nen tun hnaiah 12:30 p.m. bus ngiatin MZU zirlaite’n MZU Registrar Car an hal leh ta deuh deuh a ni si!

Pawn lam zirlai pawl thenkhat te’n MZU hmangaih niawm fahrana MZU-a eng emaw thleng hleka thawm an han nei hluai thin te hian MZU hmasawnna kal lai leh a hmingthatna tur a tibawrhbang tih tawh nak alaia a chhunga cheng MZU zirlaite ngei, pawn lam atanga beihna a tawh pawha MZU venghima humhalh tlattu tur te meuh pawh heti taka rawvaa an chet duh si chuan kan University neihchhun hma lam hun chu ngaihtuah thiam har tak a ni ta!

MZUSU-a kan inhman ve chhunga MZU hma lam hun thui tak thlir a, system fuh tawk lo tam takte siam tha a, thahnem ngai taka MZU Authority ten MZU hmasawnna tur atana an beihna te thlawp a, an tihdik tawk loh a awm pawha chhungkaw thila ching fel mai a, pawn lam atanga eng pressure pawh dawl zo thei khawpa kan awm lai te kha chuan miin MZU hi dik lo takin an sawi fo lo asin. Chutiang taka MZU chhungkaw thawhhona leh inpumkhatna a that avang chuan Zirlai pawl dangte pawhin an rawn zuam tawh lo viau thin kha a ni a.

Mahse tun dinhmunah chuan a neitu, a chhunga zirlaite ngei chu mahni chauh inngaihtuahna avang leh MZU hmangaihna tlakchham avangin MZU timualphotu, MZU pawngsualtu-ah an tang ta si, a va dawn tawi thlak tak em! Hei hi kan ram nghahfak zirna in kan neih san bera zirlaite chet dan a nih si chuan kan ram hian nakin lawkah Politician leh Officer mahni hmasial tak, mahni hamthatna chauh duh vanga sorkar motor leh building pawh hal ral pawiti lo a hrawn teuh dawn tihna a ni mai lo maw?

Kha thil thleng duhawm loh tak khan chhan hrang hrang a nei a, a boruak inmun dan pawh hi ril tak a ni. Mahse mipuiin kan hriat tur atana tul ka tih chin chauh ka sawi rih ang.

Zirlaite’n 12:30 Bus an Ngiat

Kan hun lai pawh khan 12:30 p.m. bus hi Campus atangin khawpui lam panin tlantir a ni tawh thin. Mahse hman ni deuh khan tihtawp a ni a, chumi duh lo chuan zirlaite’n tlantir leh turin MZU thuneitute an nawr a ni. 12:30 bus tlan avanga class kal that loh a tam em em, a chhan chu haw maina tur remchang a awm tlat avangin. Kan hun lai pawhin Function kan neih dawnin class thulh tam loh nan tiin chawhma lam class kala chawhnu lama Function neih kha kan chin thin dan a ni a, chutiang hunah phei chuan zirlaite participation that kan duh avangte-in 12:30 bus tlan tur kan cancel tir zawk fo a ni.

A chhan chu MZU zirlaite hian rilru pawnlang tak leh University neitu rilru pu miah lova he University-ah hian an zir liam puat kan duh lo a ni. Chumiin a ken tel tlat chu zirlaite’n an hun tam zawk campus chhungah hmang se, chu chuan an hriatna leh thiamna nasa taka a pek bakah mi hmantlak ni tura puitlinna a pe ang a, Post Graduate hi College ang maia nuam chen paha zirna a ni lo tih an rilrua tuh kan duh thin a ni.

12:30 bus an ngiatna chhan nia an sawi te chu chanchinbu lamah pawh kan hmu nual tawh a. Mizo Society-a chhiatni thatni-a zirlaite inhman ve theih nan 12:30 awm a tul zia an sawi. MA hi kum hnih chauh zir a ni a, hemi chhung na na na chuan chhiatni thatni ah chuan tel kim vek loh pawh tum ve a tha khawp mai. Mithiam a nih tak tak hunah khawtlang tan chuan a la tangkai dawn chauh. Tin, zing dar 10-a class tan a, dar 12-a bana 12:30 bus-a haw leh ringawt zel te chuan mi hmantlak loh, a hminga Degree nei kan chhuah leh teuh ang tih pawh hlauhawm tak a ni.

Tin, zirlaite hriselna a inchen loh vang niin an sawi bawk. MZU hian Health Centre a nei a, chutah chuan Doctor, Nurse leh Dresser thlengin an awm, zirlaite tan ID card hmangin pawisa chawibelh ngai miah lovin an rawnin an pan thei. Zirtirtute’n class an lak hman loh changa haw hma a tulin a buaithlak thin an tih erawh hi chu ngaihtuah ngun ngai deuh a ni a. A chhan chu zirtirtute hi thil dangah an inhmang nasa deuh a, class lak mumal loh hi an ngah ve em em (a bikin Mizo zingah a hluar, a zawng zawng erawh an ni lo), hemi chungchangah hi chuan zirlaite an thiamawm viau a, zirtirtute lam an inenfiah a ngai ve thung. Chutih rual erawh chuan ngun taka ngaihtuah chet chetin an thil phut leh chumi nawr chhuak tura an hmalak dan hi a thliarkar rilru hle a, Non-Violence duhtu kan pu Gandhiji kha lo tho leh ta se a thin a rim ve hle-in ka ring.

Registrar Mimal Taka Beihna

Pu Benjamina hi a lo ninawm viau tawh a ni, hnawk titu leh chhuak thuai thuai se titu a ngah riau mai. Amaherawhchu Mizote hi hnam dingchhuak tur kan ni lo mai ang tih hi hlauhawm khawp mai. A chhan chu mi taima leh thawkrim, mahni principle-a dingnghet tlata engkim a nih dan ang tura kalpui a, mahni hnuaia mite pawh hrual nawk nawk a, midangte sawiselna leh beihna pawh pawisa lova anmahni chhia leh tha hriatna hmanga tha zawk tur nia an hriat kalpui ngat mi, duh duha kan nawr theih loh, vision neia hmasawnna thlen thin mi te hi hnawk kan ti vat zel.

Pu Laldenga’n Ramhlun kawng phei a nawr zau tir lai khan nasa taka sawisel leh beih a tawk, chutiang bawkin Pu C.Pahlira te pawh an lo ni tawh. Mahse tun hnu-ah an thil tihthat zia kan hmu. Mizote hian Officer biak nuam, kan duh duh kan tihtir theih te hi mitha ah kan ngai tlat a, mahse chu chu MZU tan a tha hauh si lo. VC hmasa Prof. AK Sharma kha mi polite em em a ni, MZP leh pawl dang dang pawhin an duh duh an tihtir theih deuhthaw khawpa dawr nuam a ni, mahse a term chhung zawnga MZU hmasawnna kan hmuh chu tuna Commerce Dept. awmna block te, Exams Dept. awmna te, Temporary Academic block leh Main Adinistrative Building slab pahnih vel chhun tawh zawng a ni.

Pu Raia leh Pu Benjamina awm chhunga Development khu zu en ula, rilru put dan tawk chu in thiam ve mai ang. Chuvangin MZU hmangaihtu tak tak tan chuan VC chhuak ta Prof. AN Rai leh Registrar Pu Benjamina te hi an fak loh theih loh a ni.

Tuna motor hal velnaa a phusa zualte tawngkam ka hriat chu, “12:30 Bus hi chu kan nawrh chhan ber a ni lo, Registrar lakah hian eng nge kan tih theih tih kan lantir dawn,” tih te, “Registrar hi nawr chhuah kan duh tawh” tihte a ni nawk mai. Zirlai nih lai leh hruaitu nih lai hian chapo a awl viau mai. Mahse hei hi kan hriat a pawimawh, College SU leh MZUSU hi a status a inang lo em em a ni tih hi. College-ah chuan SU President kha Principal an nih tlat avangin engkimah SU thuneihna a sang em em a.

University-ah ve thung chuan Department hrang hrang inrelbawlna, Dept. Head theuh hnuaiah a awm a, entirnan Academic Depts., Administrative Dept. I, I, III thlengin, Library, Exams., Sports, etc. Heng Dept. chungah te hian MZUSU hian thuneihna pakhat mah a nei lo, chung zawng zawng chunga thuneitu chu Registrar leh VC an ni. MZUSU-in duh a neih chuan tha taka dawhkan kil hova sawi tur a ni, thunei tak emaw intia tharum hial thawh lovin. Chu chu lehkha zir sang te awm dan tur pawh a ni reng a ni.

Pu Raia leh Pu Bena hnawk titu leh chhuak thuai thuai se titu zingah hian MZU-a Teaching leh Non-Teaching Staff te an awm nual bawk. A chhan chu an chunga dicipline khauh tak leh hna la na tak mi, mimal inhriatthiamna aia kalphung dik ngaipawimawh zawk an awm tlat chuan hnawk an ti zel, kan Mizoram work culture chhiat em vanga zelthel deuh hleka thawh ve duh si, thawk thei si lova an awm thin vang a ni.

Chutiang mi te chuan zirlaite fuihpawrh an ching viau, keini hun lai pawhin kan tawng ve fo, mahse kan hnena complaint lo kal reng reng hi uluk tak leh rilru fim taka kan chhui chian hnu-ah an complaint te hi a lo genuine lo fo a ni tih hi kan hmuhchhuah a ni thin. Tun tumah pawh hian Asst. Professor pakhat chuan, “In thil duh nawr nan chuan property damage a tul pawhin ti mai rawh u,” ti hialin zirlaite a fuih niin an sawi.

Chutianga zirlai fuihpawrh chingte chu MZU tana thawhhlawk tak an ni ngai lo. Chuvangin tuna zirlai hruaitute pawhin thil hi chik ve deuh sela, an hnena complaint rawn kal apiang leh an zirlaipuite pressure zawng zawng dawl zo lova hmalak pup pup hi ching lo deuh sela, tichuan anmahni pawh an zahawm zawk ang a, MZU pawhin a thatpui bawk ang.

*************************

Similar Posts:

• NIT zirlaite’n lungawi lohna lantir
• Mizoram University – Dictator Hnuaiah?
• MZU: Engtin Nge Ni Zel Ang? Part – II
• Mizoram University Registrar Motor Hal (Photos)
• MZU thilthleng chungchanga Ex-Students Thuchhuah

Recent Posts:

• School zirtirtu hmeichhia ten karkhatah ni hnih puan bih a ngai tawh dawn…
• Sawmna – Dah mai a!
• Leitlangpui
• MIZORAM CHU AIZAWL (Aizawl Khawpui zauh a tul kher em?)
• Comedian Search 2012 Top 10-ah mi 12!

This entry was posted on Monday, October 25th, 2010 at 8:30 pm and is filed under Education, Opinion. You can follow any responses to this entry through the RSS 2.0 feed. You can leave a response, or trackback from your own site.