mi(sual).com

Kan pi leh pute kha chuan October thla hi ‘Khuangchawi thla’ tiin sawi nuam an ti em em thin. Kum khat chhunga hun nawm lai ber pawh niin a lang. Amaherawhchu, tuna kan hmanliam tak October zet kha chu thla chhe tak a ni. A bikin kan hmeichhiate’n an tuar zual. Heng zawng zawng thlen chhan hi mipate vang a ni thung. Chuvangin hmeichhiate u, fimkhur ula; mipate pawh kan inenfiah a tul hle.

1st. Friday: Thenzawl Zone Football Association leh Mizoram Football Association tangkawp ten LAD Minister Pu PC Lalthanliana nu leh pate (July 14, 1999 a boral Pi Lianchhingpuii leh December 26, 1998 a boral Pu Zanghinga) hriatrengna puala an buatsaih Mizoram Open 1st. Zanghinga & Lianchhingpuii Memorial Football Running Trophy-2010 chu Mizoram Chief Minister leh Bialtu MLA Pu Lal Thanhawla’n Thenzawl Public Playground-ah a hawng.

Mizoram hmun hrang hrang atangin Football Team 33 an tel a, an zinga pali hi 1st. Division team an ni. October 16, 2010 ah Final khelh a ni ang. He Tournament-a Best Player trophy hi Chief Minister te nupa in an donate dawn a ni.

2nd. Saturday: India Hnam Pa, Mahatma Gandhi pianchampha phak a ni a. Larsap Lt.Gen.(Rtd)M.M.Lakhera PVSM, AVSM, VSM chuan Zodin Square-a a lim-ah zahna parthi a hlan. Larsapin a hlan hnu hian sorkar mi pawimawh dangte’n an hlan ve nghal a ni.

3rd. Sunday: Commonwealth Games chu New Delhi-ah hawn a ni a; India infiammite chhinchhiahna (placard) kengtu puanchei leh kawrchei nena inthuam Mizo nula chuan Mizo mipuite mit a tlungin a ti hlim hle. He games hawnna function-ah hian Mizo thalai cheraw kan thiam ho pawhin cheraw mawi takin an show nghe nghe a ni. An lamna hmunin a zir loh em avangin nula pakhat chu chesualin a tlu.

4th. Monday: Aizawl Municipal Council inthlan hmasaber atana hriattirna chu Mizoram Gazette-ah tihchhuah a ni a, chuh tumte tan hming thehluh hun leh inthlan chungchanga hriattur pawimawh te tarlan a ni.

5th. Tuesday: Synod Music Committee buatsaih, Kristian Chhungkua leh Inneih hla inphuahsiak Result chu Synod Conference Centre-ah puan a ni ta a, lawmman sem nghal a ni bawk. Hla inphuahsiak hi – Kristian Chhungkaw Hlapui; Kristian Chhungkaw Vantlang Hla; Kristian Chhungkaw Solo Hla; Kristian Chhungkaw Hla Chham leh Inneih hla (Vantlang hla) ah then a ni a. A vaiin Kristian Chhungkua leh Inneih hla inphuahsiaka hla lut zat chu 1,316 a ni a.

He intihsiaknaah hian Sihphir Venglaia Pu H.Lalremruata (Mer-a) leh a nupui C.Lalremruati (Maremi) te chuan hla phuah vein lawmman pahnihna ve ve an la a ni. Mer-a hian KRISTIAN CHHUNGKAW HLA ‘Lo cheng rawh se’ tih a phuah a; a nupui, a hming pui chiah ni bawk Maremi hian Solo hla ‘Lo leng rawh kan thinlungah’ tih a phuah thung a ni. Anni nupa hi zai lama mi thawhhlawk tak anni.

6th. Wednesday: November ni 3-a Aizawl Municipal Council inthlannaa chuh turin mi pahnih – MPC leh MNF candidate intâwm, Ward No. V-a ding tur Rosiamngheta, Chanmari leh, BJP candidate, Ward No. XV-a ding tur, C Ramkinlova te’n hming an pe lut. MPC candidate Rosiamngheta hian Returning Officer, J Hmingthanmawia office-ah hming a pe lut a; BJP candidate, C Ramkinlova hian Retur¬ning Officer dang, Lalzarmawii office-ah hming a pe lut thung. Heng mite hi AMC inthlanna tura candidate hming pe lut hmasa berte an ni.

7th. Thursday: Mizoram Synod hnuaia inkhawmpui lian ber dawttu, Presbytery Inkhawmpui chu Biak In hrang hrangah Nomination, Finance leh Sub-Pastoral Committee-te neia tan a ni a, remchan zâwkna avanga hmang hma hret leh tlai hret tur an awm bawk. He inkhawmpui hian Pathianni (10th. Sunday) thleng a awh ang.

8th. Friday: Mizoram Bar Association (MBA) chuan, Tourist Lodge, Chaltlangah Silver Jubilee an lawm. He huna khuallian, Gauhati High Court Chief Justice, MB Lokur chuan, “Ukilte mawhphurhna chu fiah fai taka Court-a thu dik present a ni,” a ti.

9th. Saturday: Joey Zorinsanga s/o B. Lalkungi, Dawrpui leh Yisel Amaro (South America) te chu an Missionary-na hmun Nisshin Christ Center, Japan-ah an innei. He inneihna hi U.S.A atanga Spanish Pastor, Pedro-a leh Rev. Dr. Joseph Kim (Christ Bible Seminary, Vice-president) te’n an officiate a ni. Kum tawp lam hian Aizawl-a an chenna hmunah lawm leh an tum bawk a ni. Yisel hi tunah JAPAN PRESBYTERIAN MISSIONS hnuai International Christian Academy of Nagoya-ah zirtirtu a ni a. Kum 4 a awmna ani tawh. An Biak In (All Nations Fellowship) history-ah hian innei hmasa ber an ni nghe nghe.

10th. Sunday: 7th.October (Thursday)-a tan tak Presbytery inkhawmpui chu hmun hrang hranga neih a nih hnuin harsatna liantham thleng lovin a tiak ta.

11th. Monday: November 3-a Aizawl Muni¬cipal Council inthlannaa chuh tura hming pek theih hun chu a tawp ta a; vawiin, a tawp ni khan Returning Officer-te hnenah mi 18-in hming pe lehin, hun tiam chhunga hming pe zawng zawng chu mi 45 an ni.

12th. Tuesday: Sorkar laipui chuan kumin 2010-2011 chhunga NLUP atana hman tur sum, Rs. 2,34,82,00,000/- chu Finance Department of Expenditure, Plan Finance-I Division lehkha No. F. No. 44 (3) PFI/2010-623 hmangin Mizoram sorkar a rawn pe (release).

13th. Wednesday: Malsawmzuala (26) s/o Ramengmawia, Rulchawm chuan F.Chanchinmawia (25) s/o F.Dawngliana, Mualpheng chu an ramvahnaah sa emaw tiin a kâp palh a, Chanchinmawia hi a ká pawh chhawn lohin a boral nghal.

15th. Friday: Hnahlan winery atanga grape wine, Zawlaidi siam chhuah case 320 (ûm 3,840) chu a hralh chhawngtu tur mi palite hnenah pek chhuah a ni a, Hnahlan Winery Managing Director, Vanlalruata Chenkual-in a vailiam.

16th. Saturday: Tun thla ni khat atanga tan tak Zanghinga & Lianchhingpuii Memorial Football Tournament chu zawhfel a ni ta a, Police team pahnih 1st. MAP Football Academy leh 3rd. Bn. MAP-te final-ah inhmachhawnin II Division-a awm mek 3rd. Bn. MAP-te sikhat faiin an chak. Thenzawl playground-a khelh he tournament hian hlut a hlawh hle a, Thenzawla football tournament awm tawhah chuan mipui hlut berah an chhal. Champion team 3rd. Bn. MAP hian sumfai Rs.70,000/- leh trophy an dawng a, runner up 1st. MAP Football Academy te’n Rs.30,000/- leh trophy dawng bawkin semi final lut 1st. Bn. MAP leh College Veng FC te’n Rs.5,000/- ve ve an dawng bawk.

MFA 1st. Division team 4 tel te’n inbuatsaihna Rs.10,000/- theuh an dawng bawk a ni. Fair play trophy chu 1st. Bn. MAP-in an dawng a, he chawimawina hian sum fai Rs.5,000/- leh trophy a keng tel a. Best player chu Lalmuanpuia, 1st. Bn. MAP captain niin trophy leh Rs.2,500/- a dawng a, goal 7 thuntu 1st. Bn. MAP striker F.Lalrinpuia chuan trophy leh Rs.2,500/- a dawng ve bawk.

17th. Sunday: 10th. Assam Rifles-a Intelligence Cell chuan Seling leh Keifang inkarah Jeep MZ-01 D-9583-a chuang, Nguncheu (36) s/o Salianthjang (L), Ngunchianang (37) s/o Sangtim Kam, Burma mi ve vete leh, C Lalsanghluna (49) s/o Thal Liana te hnen atangin pistol pahnih – Beretta leh Rouger an man a; magazine pathum, Myanmar ID Card pahnih, mobile phone pathum, SIM Card, India pawisa Rs. 6,305/- leh Burma pawisa cheng 50/- an man bawk. An thil mante hi Bawngkawn Police Station-ah an hlan nghal.

18th. Monday: Emanuel Zomuanpuii(5) d/o C.Zoramthanga, Khawrihnim, tuna Don Bosco School, Khatla a Kg I zirlai, a nu Lalruatkimi hova Thakthing Veng Pu Albina Thangkhuma In luah a khawsa mek chu Lalrammawia (26) Salem Veng chuan pawngsualin a hnuah a that.

19th. Tuesday: YMA General Conference 2010 chu ropui takin Leitlangpui runah mi 3000 chuang mahin an tan ta. A tan zan inkhawm hi palai lawmnana hman a ni a; Pu R. Lalngheta, Treasurer, Central YMA- in a kaihruai a, Pu Vanlalsiama, Treasurer, Vaisam Group in Hunserh a hmang thung. He khawmpui hian 21st. October thleng a awh ang.

20th. Wednesday: November 3, 2010-a Aizawl Municipal Council inthlan lo awm turah MPCC leh ZNP tangkawp chuan Vanapa Hall-ah campaign hawnna inkhawm an hmang. He hun hi ZNP Vice President Pu K.Liantlianga’n a kaihruai a, Joint Campaign Committee Secretary Pu R.Liantluanga’n candidate-te mipui hmelhriattirna a nei bawk.

21st. Thursday: YMA khawmpui lian vawi 65 na Leitlangpui run, Lunglei, Thuamluaia Mual a 19th. October-a tan tak chu tluang takin neih a ni. A tawp zan inkhawm hi ‘Palai thlahna inkhawm’ tia sawiin Pu Lalbiakzuala, GS, CYMA in a kaihruaiah hian thuchah ngaihnawm tak tak Minister Of State Pu PC Zoram Sangliana leh CYMA President Pu Lal Chungnunga hnen a tangin ngaihthlak a ni. He conference-a palai kal upa ber chu Sub.C.Thanmawia MM (89) Khatla a ni. Nakum General Conference chu Kolasibah neih a ni ang. Central YMA Budget 2010 – 2011 atan Rs 72,20,864/- ruahman a niin, kumpuan atan ‘Khawtlang Nun Siamthat’ tih thlan a ni bawk.

22nd. Friday: MNF din champha vawi 49-na a ni a, Mizo Hnam Run-ah he ni hmanna inkhawm hi neih a ni. He inkhawm hi Pu R.Tlanghmingthanga, Vice President-in kaihruaiin, Rev.C.Laltanliana, Tuikual South chuan hunserh a hmang. Adviser Pu H.Thangkima leh President Pu Zoramthangate’n thu an sawi bawk.

23rd. Saturday: Mizoram Police-te chuan Mizorama Metei, Inner Line Permit nei lote dapchhuah beihpui thlak an tan. Hetih lai hian, Central Young Manipuri Forum (CYMF) chuan thuchhuah siamin, Mizoram sorkarin Mizorama Meitei awm, ILP nei lote man an nih thu hi an hriat tawh thu an tarlang a; Mizorama Meiteite chu Mizoram sorkarin dan anga a enkawl a, an chungah zahngaihna a lantir an beisei thu leh an ngen thu an puang. CYMF hian Manipur-ah pawh Mizo thahnem tak an awm tih sawiin, chung mite chu hmasang atang tawhin Manipur mi (citizen) anga an en thin thu an tarlang bawk.

24th. Sunday: Samson Zoramthanga In bul, Lunglei Chanmari-ah Vanlalrema (28) S/o Larchhuakmawia, Lunglei Chanmari Bike khalh (R15) leh Vai truck an insu a, Bike khalhtu Vanlalrema hi accident thlen hnu lawkah a thi. Truck nena an insut hian Truck darthlalangah a hrawkhrui a va tauh chat a ni. Truck khalhtu hi Police-in an la. Amah hi Lunglei Bike dawra thawk (Mechanic) a ni.

25th. Monday: Saiha a nu pakhat, pasal nei tawh leh fa pawh pathum nei tawh chu Farukh Uddin (27), Karimganj lam mi chuan a pawngsual.

26th. Tuesday: Aizawl Municipal Council inthlan tura polling station hrang hranga duty turte chuan Aizawl DC Office Complex-ah vote an thlak tan. Inthlana duty tur, polling party leh security duty turte hi postal ballot hmanga vote thlaktir an ni a; vote thlak hun hi tlai dar 3 thleng hawn niin, vawiina vote thlak zawng zawng hi mi 119 an ni.

AMC inthlanah hian vengtu sipai 600 vel duty tura tih an ni a; chungte chu – Gazetted officer 11, MRP 250, MAP company thum leh platoon khat, 5th. IR platoon hnih leh CRPF platoon khat an ni. AMC inthlan atan hian polling booth 174 siam a ni a, polling booth tinah Presiding Officer, 1st Polling Officer, 2nd Polling Officer pakhat theuh leh police/sipai pahnih zel an duty ang.

27th. Wednesday: Zeef Thuamluaia Darngawn, Israel rama awm chuan in thar a lei a; he a in thar hi a fapa naupang ber kum kua nihna birthday nen thenrual thate sawmin hlim takin an lawm.

28th. Thursday: Monfort Outreach Fund, St. John’s Higher Secondary School Kolasib chuan Mamit khaw chhiat tawk tanpui nan Rs. 5,100/- (Cheng sang nga leh za) an pe. Pawisa hi Kolasib D.C. Pu R. Liankima hnenah an hlan a. DC hian vawiin vek khan Mamit DC hnenah a hlan lehnghal a ni.

29th. Friday: NLUP sum chu a thawhkhatna atan Darlawn leh Sakawrdai chhehvela chhungkaw 300 hnenah sem a ni. Heng NLUP sum pek takte hi hmunphiah ching tur an ni a, 1st. Installment-ah hian Rs. 6,280/- theuh pek an ni. Sorkar thuchhuah tarlan danin hmunphiah ching turte tan hian Rs. 1,10,000/- ruahman a ni a, beneficiary hnenah Rs. 88,000/- pek tur nin, Rs. 22,000/- chu a dawngtu in tha senga alo do let ve na tura ruahman a ni.

30th. Saturday: Mizo Zaithiam Lianthangpuii chu a pile zai a nih avangin damdawi inah a awm a; tha taka zai a nih hnuin a inthiar tur khum bulah tluin a boral zui.

31st. Sunday: Baptist Church of Mizoram, Area Baptist Council ABC 13-a October 28th. (Thursday) a tan chu a tiak ta a; he Council (inkhawmpui) ah hian Kohhran Upa Ordain theih (Upa Exam Passed) zawng zawng, mi 175 chu nemngheh an ni. Heng zingah hian hmeichhia pathum an tel a ni.

He Council-neihnaa an rorel zinga sorkar khawih chu ‘Zawlaidi sawrkarin zawrh phalna a pek hi hnukkir tura hma la turin Assembly Administrative Committee-ah thlen nise, Kohhranin kan duh lo a ni tih ABC huamchhunga tualchhung Kohhranah a hma thei ang bera puanzar nise, chanchinbuah chhuah ni bawk se’ tih hi a ni.

Similar Posts:

• 2nd Tamchon Memorial Trophy
• Aizawl school lift Subroto title
• Mizoram football team an champion
• USA mizo ten chapchar kut hlim tak in hmang.
• Independence Day Celebration Football Tournament

Recent Posts:

• Hringnun Tlangchhipa Lawn Tumin
• Hmelthatna Thuruk
• Frailty, thy name is what?
• Tlawmngai takin tlawmthlak ka ti fo!
• Kan Nunna Hi!!

This entry was posted on Tuesday, November 2nd, 2010 at 10:30 am and is filed under Information. You can follow any responses to this entry through the RSS 2.0 feed. You can leave a response, or trackback from your own site.