Mizoramah chanchinbu mi, vengva tak tak leh hawi zau tak tak kan nei ve nual a. Chutih lai chuan, mahni kal kala kal, tawngkam thiam ve satliah, journalism kalphung pawh hre mang lo, thil intihre ve satliah, rawl chang ti ring ve em em hi kan nei nawk bawk a. Hei vang hian kan chanchinbu tam tak hi a ngaihnawm lohva, chhiar man lah a hla hek lo.
Mizoram chanchinbu tam tak hian an hnuaia thawk an neih tam tawk loh avangin, eng thil emaw a lo thlenin a hmun ngeia an aiawha enfiahtu an nei lo fova, chanchinbumi ni ve lem lo, tu tu te emaw thusawi te an thutak chhuah leh mai mai thin a. Tihsual chang an nei zauh zauh a.
Tin hei bakah hian, thu belhchian dawl mang lo chhuah chang pawh an nei thin. Tin, thil eng emaw a lo thlenin, an report pek reng reng hian belhchian a dawl lo hle thin a, a ngaihnawm tur ang leh a informative tur ang hu-in a tha tawk lo fo mai. Chanchinbumi ni ve ta rau rau, inchhiar zau ve deuh se, The Guardian, New York Times etc te hi chhiar ve fo se, miin report an pekdan kimchang te hi zir ve se ka ti thin.
Tin, tunhnaia mak ka tih em em chu : LPS, kan rama news reporter hlun tak maiin hmeichhe naupang pawngsualtu an kawm kha a ni. A kawmtu khan journalism-ah degree a nei a nih pawhin, degree chhe chi a ni tal ang! Khatiang khawpa mi kawm ngaihnawm lo leh kawm thiam lo kha ka la hmu tam lem lo khawp mai. A kawmtu thiam loh thu kha lo dahtha ta ila. LPS khan eng beiseiin nge an kawm le? An kawmna te kha mizo mipui, a lian ber atanga a te ber thlengin an en dawn a ni tih an hre lawk ngei ang a, a pawi an ti lo tihna a ni phawt a.
A mak tih bak chu sawi leh chuan vak ngaihna ka hre lo. Internet atanga kha thil ka en hnu khan youtube-ah rapist kawmna ka zawng a, a vang raih raih hle mai. Thiam loh an chantir hma, Court-a an dintir hma-a an kawmna phei chu khawiah mah ka hmu lo. Google lamah pawh ka zawng a, ka hlawhchham thak bawk a. Mizote hi dangdai tak hi kan ni ve reng a ni. Tun tumah chuan a tha lama dangdai ni lovin, a tha lo lamah a ni thung.
Police lam ve thung kha le. Khawi ram Police Department-in nge khatianga pawngsualtu kawm kha phal ngai? Kan Police Department khan eng beiseiin nge pawngsualtu kha an kawmtir? Police Officer online thin in awm a nih chuan han chhang dawn teh reng u.
Rawtna leh ngenna ang reng ka siam teh ang. Mizoram chanchinbu mite hian theihtawp tak meuh chhuahin, mipuite rawngbawltu an nihna hi tun aia tha zawk leh tlin zawka an thawh theih nan inchhiarzauvin inzirzau ve deuh se ka ti a ni.
Mi thenkhat thusawi leh report ngawt chhuah chhawng mai mai lo hian, anmahni ngeiin finfiah ve thlap thlap zel se, tin, an thil report reng reng-ah, a lo chhiartuten a hmuna engkim en ve ang hiala thil kan hriat ve zel theih nan, reporting te hi zir teh se.
