Hmanni deuh khan Dawrkai Phakar tih ah khan a chhuak tawh tho a, pawisa nawi chungchang kha. Ka lo chhiar liam vel mai mai a, mahse mahni ngei in a han tawn chiah hian a lo thinrimthlak khawp mai.
Tinge Aizawl (Mizoram khaw dang te chu an ni ve em ka hre lo) ah hian dawr neitu te hian pawisa nawi hi an neih ngai miah loh? An thil zawrh zawng zawng hi round figure vekin an hralh pawh ni si lo. An tum lo ni ber hian ka hria. An nepnawi an hralh duh vang ni bawk in ka hria.
Aizawl ah ka lo haw a, haw tirh kha chuan coins pawh ka la ngah viau. Mahse thil ka han lei a, tuman a nawi kir tur an lo neih ngai loh avang khan ni hnih khat lekah ka purse ti rit tham lawih tu ka coins neih ho chu ka hmang zo der mai. Chumi hnu ah chuan ka bag ah hian sweet chi hrang hrang leh chewing gum pawisa nawi aia min kir hi a khat ta hung reng mai. Dawr thenkhat ah chuan pawisa ka pek rual hian “A nawi min kir thei em, ka mamawh lutuk” te hi ka ti nghal a, a chang chuan min kir ve mai a, mahse a chang chuan awmzia a nei chuang lo.
Thakthing Bazar ah hian dawr lian ve angreng tak mai, nitina biscuit kan leina thin a awm a, pawisa nawi hi min kir tak awm pawh ka la hre lo. Kan dawr lo thei si lo a, duhloh pui pui hi kan lei tel tun reng mai ani. Zion Street ah sawn thil ka lei a, an dawr a lian a, an thil zawrh pawh cheng khat atanga cheng sangkhat man inkar a ni. Appy bur khat cheng 12 man ka lei a, cheng 20 ka pe a. A nawi ka duh tih ka sawilang bawk a. A nghaktunu khan counter hnuaiah khan coins kha a khawih ri ruk ruk a, a neihloh thu sawi reng pah chung khan. A tawpah cheng 5 note zawr chhe lutuk tak mai hi a rawn phawrh a, cheng 2 thir nen, chuan cheng 1 man sweet nen. Ka tuilo nasa mai, cheng 5 note kha ka lek kual vel a, a inthiamlo deuh nge ka hre lo a dang a rawn phawrh a, chu pawh zawr ve tak, a hmaa mi ai chuan tlema ziaawm hret tur hi. Ka la vat a, a coins khawih rik ruk ruk kha chu sawichhuak lemlo in ka kalsan ta daih a.
Mission vengah thil ka lei a, cheng 5 kir ka ngai a. A nghaktupa khan a neihloh thu kha a sawi leh ngei a. Thil dang la tur khan min ti leh a. “I nei miah lo maw, han inen vel teh” te ka ti chiam chiam a, a neilo miau a nih chu! Vanneihthlak takin an sweet bawm pakhat chhin ah hian cheng 5 thir hi a lo awm liau a, ka kawk a, “Hei hi?” ka tia, lawm vak lo chung khan min kir ta a.
Vawikhat Electric pheiah sawn wholesale dawr aniang chu ka ti mai sahbawn leh eng ilo ka lei a, cheng 5 kha min kir tur a nia, a nghaktunu khan a nei leh ta lo! A kid (ti mai ila) vaipa khan sweet min pek ngial a tum, ka duh si lo. Hetiang dawr lian te chuan cheng 5 te chu neih tur a lawm, ka ti ve hmiah! Shampoo kha a tlarin an zuar a, a loose a lak an phal bawk si lo. An sweet min pek kha ka lak duh miau loh avang khan shampoo pakhat cheng 5 man kha a tlar atang khan a pawtthla ta ringawt a min pe ta a.
Dawrkai ho chauh pawh an ni lo, bus ah pawh a ni tho. Bus tawt elkhen maiah hian ka chuang a, conductor tawi thau im em deuh khan mipui kara rawn inzep tawlh tawlh chung khan “Hnung lamah khan tunge la pe lo awm, cheng nga lo nei ru aw” tiin a rawn au lauh lauh a. A la polite lo em em zui. Pa pakhat kal hla tur deuh hi pawisa nawi a lo la kir lo a, chu pa chuan conductor chu a dil a. “I kal hla dawn tih ka hre reng alawm, nakin ah ka pe ang che” a tih khum vel. “Ka la nei rih lo” kha tih ve mai awm ka lo tia.
Sawi nawn leh ila, pawisa nawi neih hi an tum lo tawp niin kan hria kan Aizawl dawrkai ho hian. Sumdawng i nih a, pawisa nawi i mamawh dawn tih i inhriat chuan bank-ah te pawh pawisa nawi chu a thleng theih reng a ni lawm ni? Bank ah i kal peihlo anih leh in veng kohhran treasurer emaw KTP treasurer emaw hnen atang khan pawisa nawi chu a thleng theih lutuk. Pawisa engemawzat chu inah an kawl reng, in va thleng khan an lawm lutuk zawk, an hna a awlsam phah, i tan pawh awlsamna leh i customer te lawmna i siamna a ni bawk.
Kan ramah hian pawisa nawi leng vel hi a tlem hrim hrim emni? Hei chu ka ring chiahlo. Vairam te ang em em in pawisa nawi chu tam lo mahse heti em em a han van tak mai hi chu, sumdawng ho hi an inthurual vek emawni chu awww te pawh a tih theih rum rum. Aizawl Sumdawng Association* in an Annual Meeting vawi 15 naah an pass emni? “Tuman pawisa nawi pekchhuah loh tur, neih reng pawn ka nei lo tih tlat tur, midang dawr tur an nei chuang lo” tiin?
Eizawnna angah a hman theih mai loh maw? “Pawisa chhia kan thleng” tih ang deuh hian “Pawisa kan tinawi thei” tiin sumdawng ila. Nitin hian pawisa nawi tam deuh nen fehchhuak ila, dawrah kal kual in thleng nawi tir ta ila, commission tlem nei bawk ila. Mahse tu sumdawng in nge min dawr duh ang? An tan kha chuan loss hlir loss hlir kha a ni dawn si a.
A nih loh chuan tlawmngai pawl din ila, “Zoram Pawisa Nawi Association”, nitin mai hian bazar ah vak kual in dawrkai te pawisa tih nawi sak ila, engmah commission emaw charge emaw awm lo in, a thlawn liau liau in. Chuan mipui ten dawr thenkhat pawisa nawi kir tha duhlo an hriat te an rawn report anga, chumi te dawrah chuan a siruk la in kan va thawk chhuak anga, an pawisa tlang neih zawng zawng kan va tihnawi sak anga. Mahse hlawh kan nei dawn lo a nia.
A hmuna chenchilh ho khan hetiang pawl hi lo din mai teh u! Kan sumdawng ho te hian engtikah mah hian an dawrtu te lawmna tur hi an ngaihtuah dawn si lo. Sumdawng i nih chuan lo inngaihtuah chiang teh. Pawisa nawi nei hi dawr an nuam a, midang ai pawh in kan dawr duh zawk a, tlemin i dawr awmna lo hla deuh pawh ni se kan rawn kal vang vang peih a nia. Chuan mipui te pawh hian pawisa nawi kan neih ang ang hi chu khawl ila, chhuah dawn apiang hian engemawzat chu han hum chhuak ila, thinrim lo deuhin kan awm ve thei mahna.
(* ka phuahchawp, a tak a awm nge awm lo ka hrelo)
Kan...
March 12th, 2011 at 11:55 am
Tia a nawi min kir duhloh hian kan consumer rights an palzut mai bakah force a duhloh leh mamawh chung inleitirah ka ngai. A nawi i nei awm silo,ka lo ba lawk dawn ami han ti dawn ila kan dawr bik thin te an nih loh chuan an phal awm tawp silova.hairehai a buaithlak thin mange.
Report this comment
March 12th, 2011 at 11:57 am
ka phuah chawp a’n ti khera a ma tawn vek a ni sia.
Tui mal far te te chu,… tih a nih kha RS 1/- tello in Rs 100/- a awm thei lo.Pawisa hlutna hi hre tlang ila, thawhchhuah a har zia nen.Kan ngaihzam mai2 vang hian threnkhat chuan advantage ah an la ni in ka hria, vai ram ah pawh hian duli min kir kimloh der an chinga, ka dil hram2 thrin, kan mizia hi an hre diklo laklawh ang tih ka hlauh vang in.
Report this comment
March 12th, 2011 at 11:58 am
Zodin star awmna lai khi en keuh!!
Report this comment
March 12th, 2011 at 12:05 pm
pawisa nawi nei reng chunga ka nei lo an tih hian dawt sawi an ni reng si a
Report this comment
March 12th, 2011 at 12:10 pm
A thiam nih hi..a rhyme scheme chu a nalh reuh hle. ab ab cd cd ef ef gg…
Report this comment
March 12th, 2011 at 12:19 pm
Uh..khuta ka comment heta hi a om daih..
Nia, poisa tlang poh poisa noi in a kamki loh cuan, an tih kha..
Rs 150 coin kha in hmu toh em? Ka la hmulo, a takah..
Report this comment
March 12th, 2011 at 12:22 pm
Haha.. A va sa tehlul em! A dik pah reng. Bus conductor-ah hian polite aiin polite lo an tam zawk. Pawisa nawi avangin harsatna ka tawk ve fo mai.
Report this comment
March 12th, 2011 at 12:24 pm
VitaminC,sweet- tih vel ka kawl ruih mai!Dawrkai thenkhat ho coins ka ti mai!mahse a hman let leh thei lau!
ReMpY, chutiang coin a lo awm re re e mi a?
Report this comment
March 12th, 2011 at 12:25 pm
Vanglainiah emaw, evening post ah emaw chhuah chi a nih hi.
…khrum
Report this comment
March 12th, 2011 at 12:29 pm
#8, https://newsilike.files.wordpre.....es-150.png
poisa noi pe lo tur chu dawr loh ngam a ngai anih chu..
Report this comment
March 12th, 2011 at 12:47 pm
Evening Post ah kan lo chhuah ang e!
Kei pawh nimin khan thil ka leinaah pawisa nawi a awm lo an ti zela ka in lei nual bawk sia, cheng 5 nawi an nei lo zela ka mamawh lem loh cheng 15 man ngawt mai ka lei phah!
Report this comment
March 12th, 2011 at 12:51 pm
A tawpna mai mai chu leh
Report this comment
March 12th, 2011 at 12:53 pm
Pawisa nawi kir that duh loh hi a pawi khawp mai. Ti mai mai teh ang, mizo product ah hian a numerical digit tawp ber ah hian cheng 6 man te, cheng 7 man te, cheng 8, cheng 9 man te zuk awm ngai miah lova. 5 leh 10 ah round-off a ni zel. Pawisa nawi hlutna hria kan tlem khawp mai.
Report this comment
March 12th, 2011 at 12:58 pm
doctor phone a chhia a internet a lut theilo, chuvangin link ah khan letter a upload theilo…a number ah khan phone mai chi
Report this comment
March 12th, 2011 at 1:01 pm
vai ho chuan poisa nawi an nei thlap zel saiha ah hian, vai ni lo ho chuan an nei ngai lo thung.
Kristian ram a nih hiiiii…
Report this comment
March 12th, 2011 at 1:02 pm
Hmanni khan Kawlkulh khua thingpui dawrah chewing gum pawisa nawi aiah min kir a. Chewing gum vek chuan thingpui in leh ka tum a an duh thak lo.
Kei ka ngaimawh ber zawk chu vawksa sat hovin kan duh loh lai a misa eng engemaw min pe tel ziah hi. Biakin ah ka lam e te chu an la ti lehnghalah! Vawksa sat ho hi chu buhfai an lei pawhin sehrep aiah tiin cubic lung pakhat buk tel sak zel se tha ang
Report this comment
March 12th, 2011 at 1:04 pm
Damdawi lei hian pawisa nawi aiah vitamin C hum haw a awl khawp mai. Ration lak hian sweet, nawalh, sampoo tih vel hi kan hawn tel duh viau bawk. Hetianga pawisa nawi aia min kir hi khawl khawm zel ila an dawrah bawk khan thil lei nan hman tum ta ila eng tin nge an ngaih ang le?
Report this comment
March 12th, 2011 at 1:13 pm
Pawisa nawi kalo nei tlem deuh a ni. Kha hei hi lo hmang hrih mai ta che
https://i53.tinypic.com/fdzy85.jpg
Report this comment
March 12th, 2011 at 1:15 pm
Max. retail price ti na na na,a ai tova kan hralh thin hi chu(h),sawi vak ngaihna pawh a awmlo ani e.akekeke
Report this comment
March 12th, 2011 at 1:18 pm
A dik hlawm khawp mai. Kan consumer association ho hi an chak lo dei dui em alawm. Tin, mipui pawh hian complain lo a ngawihbopui mai kan ching tlat a (ngawihbopui lo hian complain zel ila a zia deuh ngei ang)
#2 Ka phuahchawp a tih chu * (asteric) lai te chauh khi ania
Report this comment
March 12th, 2011 at 1:20 pm
@ 19…sahbawn vela MRP aia to ai chuan millenium leh bazar vela an boot , kawr, jeans etc…vela an MRP saw ka tithei lo zawk, anni tan chuan MRP = maximised rukru price
@ Henry…bhujipai??
Report this comment
March 12th, 2011 at 1:22 pm
zualbon, i fb mail te hi en ve thin la mawle, lel lul mai
Kha thingpui in nan ka pe ang che
https://i51.tinypic.com/znjuz4.jpg
Report this comment
March 12th, 2011 at 1:25 pm
Sahbawn i sawi takah chuan “The art of soap making” tih kan chhiar ve ringawt a. Hmanlai atanga an chin tan dan etc etc, angaihnawm ta hrep mai.
Report this comment
March 12th, 2011 at 1:28 pm
@ HV ….nia a tnagkai ang KVI vela loan dil hunah…he he
Phone chhiat chuat thingtlang atang internet email a luh theiloh…address nei ila chuan a hrilh chhawng theih anih loh pawn a ori copy chu nei ila ka lo ti thei ang
Report this comment
March 12th, 2011 at 1:38 pm
Tha hmauh hmauh khawp mai, copy tam deuh siama Aizawl dawrkai ho sem vek chi a nih hi
Dawrkai leh bus conductor in awm hlauh chuan ngunthluk tak khan lo chhiar teh un 
Report this comment
March 12th, 2011 at 1:52 pm
Zoram Pawisa Nawi Association.. hahaha. A tha viau ang. Aduhi hi president atan ka rawt e.
Report this comment
March 12th, 2011 at 2:29 pm
MRP aia sangin engmah lei loh tur….an phal loh chuan man tir mai tur
He Poisa hi a ngaihawm hle mai…lol
https://en.wikipedia.org/wiki/F.....bverse.jpg
Report this comment
March 12th, 2011 at 2:40 pm
ka sawi ve tum in sawi vek tawh alawm, kalo ngawi mai ange.
#6, Rs 150 thir kha maw, a hmu apiang an thi zel, tuman anla hmu lo.
Report this comment
March 12th, 2011 at 2:44 pm
Pawisa nawi aia thildang inpek hi a ninawm khawp mai. Hemi chungchangah hian ‘movement’ siam a tha khawp ang. Ngaiah kan neih tep tawh mai lehnghal a…
5
ReMpY_ScisSoR Says:
March 12th, 2011 at 12:10 pm
A thiam nih hi..a rhyme scheme chu a nalh reuh hle. ab ab cd cd ef ef gg… Ka duh reuh luttuk
Report this comment
March 12th, 2011 at 3:08 pm
inhriatthiam kan mamawh dawn khawp in ka hria,a chang chuan ma leitu leh a zuartu dikloh chang a awm ve thei tho tih hria ila.Entirnan,bus stand khat kal tur in mithenkhat chuan cheng 50 te pek an ching a(remchanloh lai nih chuan thudang),kha bus conductor tan kha chuan a thinrimthlak duh ngawt lo ang maw ka ti mai mai.
class 12 kan kal lai a kan sir pakhat in a sawi ka la hriat reng chu;a thianpa zunthlum nei kha sweet an lo kir a ni awm a,a zialo hle ani.
Chuvangin rawtna kan siam teh ang,tiang hian ti ila Rs 5 leh a hnuailam man thil lei tur te chuan a nawi nei hram ila,a chunglam hi chu dawrkai te hiannei thei se a lawmawm ngawt ang.
Report this comment
March 12th, 2011 at 4:58 pm
Bus stand khat kal turin a nawi a ah loh chuan Rs 50 chu pe mai tur chu a nih hmel. A thiam lohna a awm hran lo. Conductor pawn a nawi a kir mai tur a ni.
Rs 5 hnuai lam chu sawi loh, Rs1 hnuai lam pawh ni se vai ‘phakar’ kan tih ho hian a nawi an neih loh phah ngai chuang lo.. phai lama awm thin te sawi dan chuan.
Chuan mipuite hian Rs 2 ,1 leka in report kual kan peih loh vang hian dawrkaite hi an huang tau ta ni berin ka hria.. Report nghauh nghauh peih ila chu an tih rei ka ring lo.
Report this comment
March 12th, 2011 at 5:01 pm
@31 bus conductor ni ta la engtinnge i ngaih ang…….
Report this comment
March 12th, 2011 at 5:03 pm
#3aduh i arsi chu ka lo hmuhhmaih a ni maw, tar lam ah hian chuan khaw hmuh te hi a fiahlo thrin a ni e.
Report this comment
March 12th, 2011 at 5:28 pm
Cheng 5 hnuai lam chawi a ngaiha pawisa nawi ka neih loh chuan ka hmang nawi hmasa tlangpui. Cheng 10 kan pe a, ‘cheng 5 i nei em?’ an la ti hram zel hi a ninawm. A nawi kir tur an neih loh vanga cheng 5 chawina tura cheng 10 chawi chang ka ngah khawp mai.
Report this comment
March 12th, 2011 at 5:38 pm
ka ziah telh hmaih chu kan sorkar pawh hi a bang chuang lo ve. Aizawl Civil Hospital ah hian lehkha lak man hi cheng 5 a ni a, a nawi neih loh chuan cheng 10 pek tur an ti!!! 500 tlang chauh nei ta ila engtin nge an tih le? Hahthlak!!!!
Report this comment
March 12th, 2011 at 7:22 pm
Tihian ti ila, pawisa nawi an neih loh chuan thil dang lak aiah min tlawm mai ru ti ula. An pe mai lawng che u maw!
Report this comment
March 13th, 2011 at 2:24 pm
Mizoramah hian hmun dang aiin pawisa nawi a vang deuh ni chuan alang, ka haw chang hian pawisa nawi kg 1/2 dawn te ka hawn thin Mizoram tan, mahse awmzia a nei tham lo hle.
Report this comment