Kan Politician-te tawngkam takin khawvel hmasawn zel hian mimal leh Pawl tin maiah kalphung thar a rawn thlen mek zel niin a lang. Hei hi hmasawnna tih loh rual a ni awm lo e.
Kum sawm nufa loliam a la ni lo ang, YMA Branch hrang hrangte’n chhiat ni fund khawna chhiat tawkte pual atana pawisa an lo khawn lawk thin hi. Tunhma deuh kha chuan a tlachawpin kan che a, buaithlakna chin tam tak a awm avangin YMA hruaitu te’n khawn lawk zawngin hma an han la ta a, harsatna tam tak a su kiang a, a lo thatzia hi kan hmu chho mek zel a ni. Branch thenkhatte phei chuan kuang te hial pawh an lo siam lawk ta.
Kuang pawh tunah chuan kokia pua zawn loin Branch tam takah chuan motor-a phurin emaw, a nawr lirhna tura siam hmangin emaw thlanmual kan inpanpui ta a. Aizawl te ang khawpui lian (ti mai ang) atan chuan a lo remchangin a lo tha hle mai a.
Hetih lai hian mitthi chhung thenkhatte tan chuan a hmuh a la hrehawm deuh pawh a ni maithei a, mahse kalphung thar han hman tan hian thenkhat tan chuan mak han tih deuh chhung hi a awm chawk thin; khua a lo rei a, ngaia neih hun a awm ve leh mai bawk thin. Veng thenkhatah chuan khawhar In riah pawh an titawp ta a, awm ti lem lo mi tam tak an awm pawh hi a mak lo a, Mizo hnam dan kalsanna lian taka ngai an awm pawh hi a awm viau tho mai.
Mahse hei pawh hi khawvel thang zelin a ken tel, kalphung thar chi khat a ni zel mai awm e. Nakin zelah phei chuan thlanmual-in min daih loh hunte pawh lo thlengin kan ruangte pawh hi electric thuka inrawhral zel mai tul hunte pawh hi a la thleng lo ang tih pawh sawi theih a ni lo.
Engpawh ni se, kalphung thara kal thei tura kan rilru kan siamrem theih zel a pawimawh a, chutih rualin chu kalphung thar chu kan tan a tha ber em tih pawh uluk tak leh zau taka kan ngaihtuah thin a tul hle zel dawn a ni.
Similar Posts:
- Kalphung thar vrs Sawrkar Thar
- Chhiatni Dan
- MHIP thuchhuah
- EEE hmelhriat teh ang u
- Zirna kalphung thlak (Education Regime Change)
in va lut...
May 7th, 2011 at 6:34 pm
1
[Report abuse]
May 7th, 2011 at 6:35 pm
Comment ka hawng e………..chhiar tan ang
[Report abuse]
May 7th, 2011 at 6:46 pm
Hehe…ka chung amia chuh ava hman ve aw…
[Report abuse]
May 7th, 2011 at 6:53 pm
Khawhar in riah hi chu keini veng pawhin kan ban tep tawh, thlan laih nen. Han sawi ho phawt teh se
[Report abuse]
May 7th, 2011 at 7:02 pm
Misual ho pawh hian kalphung thar kan mamawh mai lo maw…??
[Report abuse]
May 7th, 2011 at 7:04 pm
kan first teh ang!!
A dik khawp mai. Changkanna anih vang leh ni loh vang chu sawi tur ka hre lem lo a. Mahse, kan eizawnna, kan nitin hnathawh dante a lo danglam a, chhiatni thatni ah pawh kan kal phung thlak a ngai zel ang.
Ka sawi tawh a, kan sawi nawn mai mai ange. Spain ka awm lai khan kan thawhpuipa pa a thi thut mai a. Tlem a zawng an va kal a (khaw dang, darkar 1 vel a hla a awm ani a), a bak zawng chuan hna kan thawk mawlh mawlh tho! Kan thawhpuipa ber pawhin nihnih khat bak chawlh a la chuang lo.
Helai ka thawh lehnaah hian Phd student, nula a thi leh thut mai a. Ngaipawimawh viau mah ila, an in lam a kal, va lenpui etc..tih vel kha a theih loh. An phum niah Biakin ah kan kal ve a, thlan lamah a peih peih..chuzawng chu. A college kal pui, a thiantha tak tak te pawn engmah an ti chuang lo. Hetiang anga kan kal hun hi a thleng dawn a. A tlawmngaih loh thlak, a Mizo lo tih theih ngawt ani kher lo ang.
Mitthi vui chuang changah pawh Biakin a invui mai hi a buaichuar lo zawk a, kan la tih ngei turah ka ngai. Thlan lai pawh hi hlawhfa kan rawih mai hi a tha zawk in ka hria. Mahse hengte hi a Mizo lo ti tawk kan awm zel ang, mahse a Mizo lohna a awm chuang lem lo ang chu.
[Report abuse]
May 7th, 2011 at 7:07 pm
ozhima mai mai chu awwww
[Report abuse]
May 7th, 2011 at 7:20 pm
#7 rawn OT nghal ngawt lo la.
Kohhran-ah pawh hian ka ti mai mai thin a, atheist, non-christian te hi awm nawlh nawlh ila ngam ila a zia zawk ang em aw?
Thlan lunglak mawlh te kha, ruang thlak tukah nisa emaw ruah sur emaw a sawi theih loh, kal tur a ni ringawt. motor a lak khawl kan han tih tan tirh lai khan a ‘thianglo, chuti khati’ ti pawl te khan kan awm a, mahse tunah chuan thlanlung zawng chawp pawh kan awm tawh meuh awm love.
[Report abuse]
May 7th, 2011 at 7:30 pm
Ka chhiar chhuak leh dap e.
[Report abuse]
May 7th, 2011 at 7:32 pm
Hnam tin hian kalphung/ Culture kan nei hrang theuh a, hnam dang tih dan/ culture nen a khai khin fo hi a dik ber angem?
Tunlai a Aizawl khawpui veng thenkhat a mithi awm ni khua a in chin thar Mithi ruang thlanmual pan pui na a, mithi ta chhungte’n Rose par var in insem thin hi Sap tih dan in lak anih ngei ka ringa kei thingtlang Pa hian ka helh deuh tlat mai.
Hnam pui zawk tihdan chu atha chu kan copy na meuh tur ani mahse a zawng aza a kan culture a lo lak luh tum hi atha ber angem aw ka ti thin.
[Report abuse]
May 7th, 2011 at 7:33 pm
In thlak chhoh ve zeuh zeuh chu angai, khawhar in riah te hi tunlaiah chuan khawhar chhungte phurrit mai kan ni tawh.
[Report abuse]
May 7th, 2011 at 7:45 pm
Chhiat ni a pangpar dah te pawh hi, khawpuiah chuan sap tih dan pawh la se ala zia deuh mah na. Thingtlangah ngat phei chuan pawisa-ah chantir ila tangkai tham fe tur a ni. YMA in bawm hun te kan han ching a, a tha na ngiang, kan sunna kan tuarpuina kan lan tir a, kan theih tawk pawisa te kan thlak thin. Mahse hei pawh hi kawng tam takah chuan credit la lem lova mi va tanpui te hi kan phur em em lo emaw ni aw tih tur a ni. Tu khawkha hriat pui loh leh hmuh pui lem lova Rs 50/100 te lova thlak ai chuan pangpar 200/300 man mahni hming/chhungkaw hming chuang ngei va dah chu kan phur tlang zawk ni te pawh in a lang.
[Report abuse]
May 7th, 2011 at 7:56 pm
Japan flag hmangtu Lalduhoma tawngkam a ni mai lo maw? Tling thei bar si lo!
YMA kalphung thar pawh hi sel ngawt chi a ni ta lo, mi kan indaih tawh lo. Mahni hnaah kan bung fur tawh a, mi chuangliam rinrawla kan neih tur an awm tam thei ta lo. Kalphung thar mil zelin aw … pangpar inpek hner hnur ai chuan kei chuan PAWISA ngeia inpek hi ka thlang, kan ti ta rau rau … puana intuam ai pawhin PAWISA nge nge inpek ka la thlang fan. Puan hi eng atan vak mah a hmantlak si lo, motor hruk fai nan pawh a tlak mang bar si lo!
Post chhuanawm tak a ni e.
[Report abuse]
May 7th, 2011 at 7:59 pm
Hei kan kal phung thar hi tha ti chuan lo ti ve teh u. A senso atlem khawp mai changel hnah leh hnang chiah angai.
https://i.imgur.com/FY7dr.jpg
https://i.imgur.com/hT0hP.jpg
[Report abuse]
May 7th, 2011 at 8:01 pm
Taitesena te, Vanapa te. Chawngbawla te, adt an hun lai vantlang nun, rindan, eizawnna, khawtlang lenzawng,adt mil thlap a kalphung an lo duang a, an lo zawm thin kha an ngaihsanawm tak zet a ni.Tun a mizo khawtlang nun mil a insiamrem nachang kan hrelo a nih erawh chuan kan atzia kan pholang a ni tawh thung.
YMA a kal hre luai luai…….
[Report abuse]
May 7th, 2011 at 8:41 pm
Thihna han sawi hi chuan mi a run a, min ti thlabara, a mi den a na duh hle thin, nie in han sawi tak ang khian hmansawnna rahbi kan penna ah hian kan tunlai mila kan insiamrem a ngai tawh viau ani. Tun hma deuh lawk kha chuan mitthi awm ni chu ‘awmni’ a ni maia, a khawtlangin kan buaipui a, tunah chuan a theih reng ta lo. Tunlai thangthar tam tak te hi chuan Damlo zawn te, mitthi zawn te hi kan hre tawh kher lo mai thei, ‘Mizawn inchuh’ kha a tobul leh a tum chu a tha; sport chi khat a ni a, intihnat pawh a awm zen zen lo. Reilote an han inchai a, a tlem zawk nana kha chu an bawhbeta, ‘kan khaw tlangval te kha han tang teh u’ tiin an au a, an in chaia, an in nawra, Lal tlangval leh Upa te’n tawk an tih chinah an thelh leh mai thin. Hun a lo kal zela, kan thiam lo telh telh a, kum 1930 hmalama infiamna tha tak kha, a hnulamah chuan, ‘Ruang chhuanlama inphek sual’ a ni ta hrim mai. Chhawnghnawh tuma induhsakna, chhang, artui in barh tih te kha chhunzawm zel chi ani ta lo.
Tin, inralna chungchang ah hian intanpuina te pek an ni thin, Tunlai hian lusun khawhar lenpui peih tak tak an tam laiin, mi tam tak hi chuan, ralna, puan emaw, pangpar emaw, pawisa emaw kan pek chuan kan duhtawk mai thin, inthutpui hi harsa leh hmanlo kan inti thin, hei hi a tam zawk chu kan eizawnna vang ania, kan inhriatthiampui a ngai hle ang. Hriattur erawh chu pek tur nei lo pawhin, thilpek ai chuan mahni ngei khawhar ina kan kal hi a ropui zawk tih hi a ni. Tunlaiah pangpar lem, man tam tak, kan han invur luk hi a dawngtu tan chuan lawmawm hle mahse, a uchuak lam zawng anie, mi pangpar pek khawma Sitting Room chei chiam hi mi vengva lo hna ani. Pangpar ai hian a pawisa in inpe zawk ila, a that zawk a rinawm. Tin, Mizo chindan pangai ah chuan laina hnai, thisen inzawm te hi puana intuam tura beisei an nia, tunlaiah zawng a tu pawh hian puan te tak te te, khawl tah, pan zet, sin tham loh, ven tham bawk siloh kan han inpe khawm rui zel hi chu a pawisa hian inpe zawk ila a lawmawm zawk ngei ang. Tin, kuang kan han zawn chhuaka, khawlai kawngpui dungah a mak a maka thla kan han la chiam te hi thil tul lutuk erawh ani ber ta lem lo, a tawp thei tawh dawn lo emaw tia, a hmanlai thiante, a tunlai thiante, a lehkha den pui te, a zu inpui te kan la tilo ang tih pawh a sawi theih loh.
Tin, thil tul teh chiam loh ka tih pakhat chu, mi kan han thi a, vanramah emaw, pialralah emaw, mitthi khua-ah emaw inhmuh leh beiseina chhe te, chiang lo riai riai (kan neia)nei mah ila, chu chuan min hnem thei tak tak si lo. Mi a thih chuan a bo vang vanga, hmuh tur a awm tawh loa, biak tur pawh a awm tawh hek lo, chuvangin Chanchinbu-a, “Vawiin I thih champha-ah hian kan ngaih che a zuala,†emaw “in loving memory of, emaw, with profound grief and sorrow we inform the sad demise of†tia chhungte thi tawh hnu pawisa tam tak senga chanchinbu ah te hun kan han hmangral hi chu a hek thlawn mai mai niin ka hre thin (Ka chhungte hnaivai tak an la thih loh vang emaw pawh a ni thei e) Thihnaah kher hi chuan kan pi leh pute khan an tuar thiam lo lehzual ngei ang, tunlai keini misual hote (pawh) ang hian Pathian thlamuanna an dawng ve silo. An inhnemna awm chhun, an hla chu-
Thilovi khua awm maw, famlovi khua awm maw,
Laia suanglungpui e, famlo te’n awm na ngai,
Ka nu e, tap tuk hlah law, zankhua hrui ang sei
Keini riak kan fam lo, milai leng an fam zove
Tih te ani a, an sa a, an tap vawng vawng mai thin a ni.
A tlip nan, he hla hian kan khar ange,
Aw, ka va han riang kher em
Ka phenlai bungpui a tliak ta;
Awmlai lian a hrang e, Runlui tui ang lian
Ka dang zo lo, ka nu
A post tupa ai hian ka comment hi a sei em aw! Kan tlak teh duah a, hrethiam hrethiam,…
[Report abuse]
May 7th, 2011 at 9:49 pm
Kalphung thar chungchangah hian a duh leh duh lo inhnial hrep a awl khawp mai, ka ngaih ve dan chuan hun hian a rawn hril chhuak ve mai hian ka hre thin.
Kalphung thar kan mamawhna ber chu politics-ah hian a ni a, mahse, a harsa ngang chu a nih dawn hi!
[Report abuse]