mi(sual).com

Ka Office bang chu ka nupui fanaute’n nghakhlel taka min lo thlir dan tur ngaihtuahin hmanhmawh takin bike ka start a, ka lim chhuak puat puat a. Hemi tlai hian kan hna a laklawh em avangin kan tlai hle a, ka haw hian khua a thim ruai a ni tawh.

Thui pawh ka tlan hman hmain phone call ka dawng a, ‘Office lamah thil tih fel loh ka nei palh em ni ang?’ tiin tlan laklawh hle mah ila ka’n ding hram a. Harsa takin ka Jeans kekawr ipte atang chuan ka phone ring mek chu ka han phawrh a. Mahse, Office lam call ni lovin ‘Z calling’ tih a lo ni tlat! ‘Z’ hian rei tak min call ngai tawh lova, mak ka ti hle. ‘Ka pick up ang nge.. ka pick up lovang?’ tih ka han inngaihtuah a. Ani meuhvin min han call leh takah chuan Emergency tak aniang, ti chungin ka’n pick up ta a. A aw mawi tak rei tak ka hriat ngai tawh loh ngei chuan ….

I laklawh viau em?

Laklawh viau mai, ka tlan mek a, ka din phah.

A va zia lo ve, ka rawn zin thut a, rawn call che a tul tlat a ni..

Awww… a ni maw? Engtikah nge i rawn thlen?

Hei, ka rawn thleng deuh chiah, Hotel-ah ka lut fel chiah a.

E khai aw.. A ni maw? Khawi Hotel-ah nge i thlen a? Enge i rawn tih dawn reng reng?

Office Duty-a rawn kal a ngai ve ta tlat a, ka rawn zin ta nge nge a nih hi.

Khawiah maw i awm?

Zonun Hotel-ah ka lut fel chiah e.

Ka ngaihtuahna a bing ta mup mup mai le!

Zonun Hotel chu ka bul mai building lian tak chu a ni. Zovi hi englai maha ka theihnghilh ngai loh a ni a. A hmel mawi tak, englai maha ka thlir nin ngai loh hmel pu tu; ‘ka ta’ ti-a ka thinlungin a lo pawm tawh thin mihring kha a ni. Kan inneih a rem tak loh avanga be zui duh ta lo mai ka ni. Chu nu chu ka bul maiah hian a awm mek a, ka kalsan mai ang nge? Ka lo lawm ang? Duhthlanna siam thiam a va har ve le..! Bah deuh nuai-in….

A nih chu tak chu mawle… Hei ka tlan laklawh si a, nakinah ka rawn call mai ang che aw…

(a ngawi vang vang a…..)

OK.. Bye phawts..

Bye..

Ka phone chu ka melh vang vang a, ‘Z disconnected’ tih pawh chuan thinlung a kuai raih mai.

Ka bike chu ka han start mai dawn a. Self starter chuan a start thei ta tlat lo! Ka kick a, a nung chuang lo. Ka kick nawn leh pawh chuan a la nung thei lo cheu! Eng ka ti ta nge maw ni le?

Ka rilru a vak kual nasa mai. Ka bul maia Zonun Hotel-ah chuan ka peng mai dawn em ni ang? Han Surprise ta thut ila, Zovi lawm dan tur ka ngaihtuah. Ani mai ni lovin kei ngei pawhin ka la thlahlel ngawih ngawih a, ka hmu chak em em a ni. Zep thu cheng lo, ka ngaih em em thin, khawvelah hian vawikhat tal hun zalen tak ani nen hian tawng dun leh thei ila aw… ti-a ka lo suangtuah thin a ni. Aw… A va har tak em!

Ka rilru duhthlanna chuan in lam haw reng a chak tawh lo. Ka haw kawng chu tihtawp rih mai a, ka bul hnai maia awm ka thlakhlelh em em mai chu ka thinlung chuan pan a duh a ni. A nia sin! Tun hunah hian Zovi hi ka ngai ngawih ngawih a ni. Hun kha leh chen kha ngai em em chungin ka be ngai tawh lova. Ka biak loh hi ka tan a tha tawh zawk a ni tiin ka ngaihtuahna chu ka lo hneh lui tawh thin a. Vawi tam a call hi ka pick up lo tawh a, a beidawng nge? Min call ta ngai lo reng reng a. SMS lamah tuanin vawi za tam hi reply lovin ka lo receive tawh a, a hnu lamah phei chuan chhiar miah lohva Delete hi ka ngah tawh a ni.

Kum khat dawn chu a reh ta! Mahse, zanin hian a lo call leh ta tlat a, ka pick up ta a nih kha! He hun hi hun rangkachak chu a ni mai lawm ni? Mahse, ka nupui ka ngaihtuah lo thei lo. Eng lai maha ka mit tlung lo ngai lo Sangi te nufa ngei mai chu! Ka lei malsawmna dawn ti-a ka lo chhal thin te an ni. Mahse, zanin na na na chu min hrethiam thei mai ang chu maw? Office kan buai pawh ka chhuanlam mai ang chu… tiin thlemna chu ka do zo ta lo a chha chu a ni ta!

Reception Counter-ah chuan nula fel tak mai hi a lo thu a, tun hnai maia lo thleng thar Zoliani thlenna room number chu ka zawt a. Room number 59 a nih thu min hrilh a, muang changin step-ah chuan ka pen chho ta chhat chhat a…

(Awm zel tur…. ti ve khanglang teh ang… )

Similar Posts:

• Nang i ngawih tlat si chuan…!!
• Laklawh
• HOTEL MANAGEMENT hi enge ni….
• Mayfair Hotel,Gangtok
• Mak ka ti thin!

Recent Posts:

• Kut hnathawh leh Khawtlang Nun
• Ngaihtuah chhunzawm atan
• Ka chhun mumang…………..
• Skin cell atangin lungphu!
• Kan nun hlui

This entry was posted on Friday, August 26th, 2011 at 5:00 pm and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.