mi(sual).com

“Ka hnenah han la rawh u.” (Matthaia 14:18)

Faten thil harsa manganna khawp thil an neih chuan, anmahnia an nute emaw an pate emaw hnena an thlena an kalpui hmain, an nu emaw an pa emawte chuan, “Ka hnenah han la rawh u” an ti thin a. Chutiang taka kan pa vana miin a tihduhzia kan hriat theihnan ‘A fapa Kristaah chuan thu a rawn sawi a,’ keimahnin kalpui leh thlenna chang kan hriat hmain kan manganna chu min laksak duhin, “ka hnenah han la rawh u,” min ti thin a ni.

He thu kan Lalpan a sawina chhan kha kan ngaihtuah chuan, Baptistu Johana thih thu Isuan a hriatin ‘lawngin thlaler hmunah a kal hrang a, mipuiten khua atangte chuan kea kalin an zui a ni,’ ‘Ani chuan mipui nasa takte chu a hmu a,a khawngaih em em a.’ Chungho ei tur ngaihtuaha zirtirte an buai a,engmah an tithei silo chu a va manganthlak em!
Zirtirte mangang chuan Isua hnenah an ei turte lei tura kal botir turin an rawn sawi ta ngawt mai a, mahse Isuan engtin nge a lo tih? “An kalbo a ngai lo ve,nangmahnin ei tur pe rawh u,”a lo ti ta hlauh mai a. Mipui 5,000 zet ei tur pek chu thlaler hmunah si a va harsa dawn teh reng em! Zirtirte chuan engtin nge an ngaih ang le? Isuan thil tihtur harsate min kawhhmuh fo reng thin ani. Engvangin nge kan tihtheih loh turte titura min tih thin? kan chak lohnate inhria a, Engkimtitheia hnenah kan harsatnate thlenna chang kan hriat nan a ni.

Zitirte chuan, “Hetah Chhangper panga leh Sangha pahnih chauh kan nei a ni,” an ti a. Johana ziak kan en chuan, Philipa hnenah, “Hengho ei tur chhang khawi ata nge kan lei ang?” tiin Isuan a zawt a. (Chung chu amah fiah nan a sawi a ni, a tihtur chu Amahin a hre reng si a). Andria chuan a hnenah, “Chhangper panga leh Sangha pahnih nei mipa naupang pakhat hetah a awm; nimahsela, mi heng zozai zingah hian chung chu eng tham nge ni ang?” a ti a. Isuan, “Ka hnenah han la rawh u.” a ti ta a. He thuah hian thu mawi tak pahnih a awm. Pakhat chu mihring lamah a ni a. Pakhat chu Pathian lamah. Chung chu “Eng tham nge ni ang?” Tih leh, “Ka hnenah han la rawh u” tih a ni.

Kan theihnain a tihtheih lohzia inhre tak meuh va, “ Heng thil titur hian ka theihna leh ka chaknate hi, eng tham nge ni ang?” Rilru tak meuhva kan tih hian Kan Pa chuan, “Ka hnenah han la rawh u,” A ti thin a ni. Aw! Kan Pa Pathian leh kan Lalpa Isua hnena kan chak lohzia inhriaa kan mamawh apiang thlen hi a hlutzia hria ila ka va duh em! Mipui 5,000 zet tan chhangper panga leh sangha pahnih chu eng tham mah a ni lo angin, kan chakna hi Setana, he khawvel Pathian hneh nan te, Khawvel duhna leh hipna nasa tak hneh nante leh, nun hlui Adama hmasa ata kan neih hneh nante chuan eng tham nge ni ang? Eng tham mah a ni lo ve. Mahse kan tana Kraws-a thi a, hnehna ropui nena tho leh a, Thiltihtheihna ding lama awm taa khan, “Ka hnenah han la rawh u,” min ti a ni. He Krista thu hi awiin ka manganna tam tak leh harsatna tam takte chu a hnenah ka kalpui tawh a, min lo chhawk thin a ni. Aw! Kristaa ka unauten, in harsatna zawng zawng chu Krista hnenah a thu ang ngei chuan kalpui ve turin ka sawm che u a ni, a hnar bik lo vang che u.

Chhangper panga leh sangha pahnih Isua hnena an pek khan engtin nge lo ni ta le? “Abba,” van lam enin mal a sawm a, a phel a, zirtirte hnenah a pe a. Aw! A hnena I rawn lak chu hnial lovin a lo la ang. “Ka hnenah han la rawh u,” a tih avangin a hnena I rawn pek apiang chu lo lak sak che a hnial ngai lo vang.Harsatna leh buaina leh mangannate chu a lak bo sak ang che, thil tha I rawn lak chu mal a sawmin a tihpun sak ang che, nangmah leh midangte tan malsawmna ropui takah a chantir ang. Kan harsatna zawng zawng hi a hnenah I kalpui zel ang u, tichuan engthawlnaah kan cheng ang.

Kan thu tawpnaah chuan, “An kal bo a ngai lo ve, nangmahnin ei tur pe rawh u,” a tihna chhan hi thuk tak a awm a ni. Isuan amah zuitute hrehawm taka awm tura kal botir hi a duh ngai lo chauh ni lovin, a tithei lo a ni, “An kal bo a ngai lo ve!” Aw! A va mawi em! Kan sawi nawn leh teh ang, “An kal bo a ngai lo ve,” Engvang mahin Krista hnen ata I kal bo a ngai lo ve. Retheih leh tlakchhamna avanga I kal bo a ngai lo va, Hausakna avanga I kal bo pawh a ngai lo ve. I mamawh tihsak turin Isuan vawiin ni thlengin Zirtirte a la nei reng a, in kal bo ai chuan Pastor te, Evangelists te, leh Kohhran enkawltute a nei reng a ni. In kal bo ai chuan, chungho hnenah chuan, “Nangmahnin ei tur pe rawh u,” a ti mai ang. Chungho chuan an pek theih loh che u chuan, “Ka hnenah han la rawh u” a ti mai ang. Aw! Kohhrana Rawngbawltute hian kan kohhran enkawlte puarna leh thanna tura kan chakna hi, “Heng I mite ei tur leh puarna leh thanna tura chakna hi, “Heng I mite ei tur leh puar nan ka chakna hi eng tham nge ni ang, Lalpa?” Thinlung takin kan ti thin em aw? Chutianga kan tih chuan, kan chakna te tak te chu Lalpan, “Ka hnenah han la rawh,” a ti ang a, a hnena kan lak veleh chhangper leh Sangha a laa lawmthu a sawia, mal a sawma, a tipung angin, lawmthu a sawi anga, a tipung ve anga kohhran riltam sang tam tak an tlai hnuah pawh a bang I la nei fo vang.
Kan rilruah Krista Hmangaihna aw nem leh mawi ber, “Ka hnenah han la rawh u,” tih hi ri reng fo sela ka va duh em!

Isu nun nem lo tawng ang che,
I sawi tluk mawi a awm lo;
Thlamuanin i thu a khat e,
Fuihin min tichak thei fo.

Amen.

Similar Posts:

• Tunlai ka mutmawh hnarmawh.
• Pasaltha Zingkela leh Tlangval Bawkkuia by Thanchhunga, BVT
• Thiantha Lal Isua
• I thinlung hawng la
• Thihna hnehin a tho leh ta, Hallelujah!

Recent Posts:

• Mizo Technical Graduates (Architects)
• Hmangaihna 131
• US Sipai tang duh te tana hriat tur pawimawhte
• Izzy.pinetrees
• MIZO SAKHAW BIAK DÂN LEH A TOBUL ~ 1

This entry was posted on Sunday, September 25th, 2011 at 6:00 am and is filed under Religion. You can follow any responses to this entry through the RSS 2.0 feed. You can leave a response, or trackback from your own site.