Vawitam tak lusunna avanga ka thinlung na hi ka lo ziak tawh a. Comment chhiar nuam tak leh min hnem tu te pawh ka chhiar thin. A hlutzia hi ‘Tuartu’ tan lo chuan hriatfiah chi pawh niin ka hrelo a. Tunah pawh hian inthlahrung takin, tuang ti chhah chung tak meuhin ka han share leh duh che u a.
Thinlungin khawhar lunglenna, he hringnuna mahni chauha Nun ram vahvaihna han thlen meuh chuan, hetia han post hian keimahah chuan thui tak min hnem thin miau avangin min lo chhiarsak leh hram turin ka ngen che u a ni e.
October ni 9 chuan ka fapa neihchhun, ka enchimloh leh ka hmangaih, ka duh ngawih ngawih chu a tawng mumal thei ta lo. Phun sep sep, hriat theih tawk tawk hian, “Ka nu, min la chhuak la, inah nangman min enkawl zawk rawh, ka dam dawn a lawm, ka thi tak ngial dawn,” a ti a.
“I thi dawnlo, Doctor kan bia ang a, rem a tih phawt chuan, ka hruai haw ang che,” ka ti a. Doctor chu biak ka tum a. “A lokal dawnlo, meeting an nei dawn” tih kha chhanna ka hmuh a ni chauh si. Damdawiin Bath-room..hing rimchhe lutuk ah ka tlan lut a. Ka Pathian ka au thin a, keimah zawk thih mai te ka dil a.
Chhanna ka hmuh chu-tlailam dar 3 vela ka fapa thaw tawp riai riai lai thlir chu a lo ni ta si.. Aw, Pathian hian, heti zawng kher hian a ni maw min chhan, ka mangan zia leh ka beidawn zia tak kha aw! Hnemtu mipa ka va mamawh tak em khatih lai khan Ka aiawh a a death certificate min laksak tu turte kha ka va duh tak em. Khatih hunlai khan keimahin engkim mai kha ka hmachhawn kha a lo ni tak si a aw.. “Awm zawng zawng an ral hunah.. Awma ka ta a ni” tih hi ka thinlungah a ri reng mai a..
Ka sawichhuak ngam silo, “Lalpa, awm zawng zawng ral chu ka zuam ve hlawl lo” tiin ka thinlung chhungah ka au hi a ni ringawt mai a. A thaw tawp chu tap buai lovin ka thlir reng a, a tawp ta..”Hnam ka len nuam mang e..Hmuh theih se doral ang hian, Awmlai lianin hringnun Parmawi, vullau a thliak mai ta si a” tih hi ka ngaihtuahna leh ka hring nun khan a duhdan a ni ringawt mai a ni.
Huatna, demna in ka khat a. Tun hnu a harhfim a ka ngaihtuah let pawh hian, ka thinlung damlohna hliam tu lian tak, a tira tih nachang ka hriat miahloh thil a awm avangin, ka fapa hming leh a thihna hmun te ka sawilang lo zawk mai a ni.
Ka fapa chu kum 26 lekah Direct in Officer ah a lut a, a training zo, post-a a kal, a hna a join hnu ah thla khat chiah a dam a, Pancreatitis a thi thut a ni a. A training hma khan reitak a lo ngaihsan leh amah hmangaihtu, Maria nen an inru ve a, training a a kalsan a tul nghal si avangin, Mizo danin a man kan hlan hman a. Chu te chu a lo ruaklo hman hlauh a. A pasal, ka fapa in a kalsan a, naute mangang tap ang mai a, raipuar chunga a lungchhe tap ri te hi, kei, nu thinlungah hian a reh thei mawlh lo a ni. Tichuan, Dec 15 chuan an fanu chu a lo piang ve ta a.
Ni 10 October ah chuan, he lei a hmu leh tawh ngailo turin ka fapa duhlai chu, lei daiah, vaivut a chang turin ka thlah liam a lo tul ta si a. Aw, ka zantlai tawnmang lo ni se thlafam ngaih chu. Bawhar lungfing ten min tho se, zing engah thang mai teh ila.. kimlai chhungkhat kan awm ngaite khanin, laikhumah lo zal hmun ila, lungchim te’n, hmangaihte’n ka chul leh ang e.. tih te hian ka thinlung hi a luah tlut tlut reng a. Tihtheih engmah neilo ka ni tih ka inhriatna tur a Pathian hmanraw thlan hi kei a hnar chi rual lah a ni si lo a.
A thihcham kum khatna ah chuan, ka pasalin min chhuahsan leh ta si a. ka thinlung na leh hrehawm lutuk chu thla hnih hi tho chhuak peih manglo in, ka kut leh ke te vung vek khawpin ka mu a. Mipa hi ka hua-in tumah hi ka duh lo a, mahse min hnem a, min hmangaih a, min duattu ka mamawh ngawih ngawih tho si a.
Tichuan, ramdanga kan thianpa chuan min khawngaihin min rawn hnem thin a. Pa tak, caring deuh si, frank takin min rawn dawr a. A ko ah min dahin engtik lai maha thlahthlam lovin, nitin min rawn be buai a, ka chungah a zaidamin, ka chakna tawk tur awm tawkin min fuihin min rawn ti thin a.
Chutih lai chuan, ka nuna ka hlauhthawn ber chu- insawi enge maw-ah min ngailo ula, ka la upa lutuk biklo a, mipa a ka innghah a, min lo chhaitu an awm ka hlau a. Bible hi ka kuah reng ringawt mai a, ka chhiar peihloh pawn, zanah te hian ka kut tal zen lutin ka mu thin a.
Kei tluka innnghahna mamawh an awm lo ang – tih tur khawp a thinlung hliam tuara ka rum lai a, vawiin ni min thlentu hi Pathian chauh a ni. “Enge lungngai a kan khah ang, hrehawmna lo thlenin, tih te, i mangan a hnenah thlen la, a nin a lo tanpui zel ang che, tih te, Engkimah Lal Isua ring a, kan tawngtai loh avangin, muanna tamtak kan chan fo a” tihte hi ka thinlung luahtu ah ka thlang thin a. Mi tanpuina tur, Lalpa, hnen a mi a lo thleng-dawngtu ah ka lo tang fo thei ve ta a ni.
Tichuan, nikum June thla laihawl vel khan zing ka tho hi, Thawhlehna thu chiang tak maiin min hrilhtu a awm ta tlat mai a. Benga ka hriat kha thinlung phek a ziaktu thlarau chuan min rawn hrilh ve ta a.
Kan thawhlehna hmahruai a, an zalhna thlan rauhsantu, Lal Isua ang chiah khan, Ropui rapthlak a inthuam a, van chhum atanga vantirhkoh, tawtawrawt ri nen, Lal Isua lo lan hun ah, ka nu leh pa, ka ngaih em em thin te, ka fapa, ka duat leh a bula awm ka la duh ngawih ngawih te, ka nau leh ka u fapa te kha an lo tho leh ang a, Lal Isua naka ser thleng pawh hmuh theih ang chiah khan, ka hmangaihte kha ka hmu leh dawn a ni. Chutih hun nghakhlel chuan ka Nun hi a lo inher ta a. Huaisenna, thinlung na tak hnehna, mi te bula awm ve theihna nun te chhar chhuak lehin, vawiin ni hi min hruai thleng ta a.
Ka fapa thihcham hian, awm ngaihna ka hriatloh avangin ka zinkual thin a. Tunah pawh hei Kolkatta ah ka awm mek a. Ni 9 Oct. ah a boral a, Ni 10 Oct. ah leidaiah kan zalh ta a. He ka Post chhiartu zawng zawngte hian, hemi ni hian in thinlung tawngtainaah ka hringnun damchhung hunte chhiar thiam a, engmah tihtheih neilo ka nih inhria a, ti theitu Pathian ka belh zel theih nan min tawngtaisak turin ka ngen nawn leh tak meuh che u a ni e.
Similar Posts:
- I thinlung hawng la
- Nitin Lalpa nen ( Pathian Ni Pual )
- Pathian Chhandamna Ropui Hi
- Krismas Thuchah
- Pentecost pualin
(B)...
October 9th, 2011 at 9:22 pm
Inpa kher kher pawh chu ..
Report this comment
October 9th, 2011 at 10:12 pm
In vai chungah..a mal te te a type a lawmthusawi ka van chak ngai em..mahse a tamin a thui dawn si a..Vawiin Ni a heti zat min lainat a min hnemtu te..in vai chungah ka lawmin min tawngtaisak naah te ka lawm a..he web-site a ka post hian min ti thawl huai tih hi ka sawi duh bawk a..ka lawm tak meuh meuh a ni..Fb lama min lainatna comment a in sawi te pawh ka chhiar vek e
THIHNA LUI PIAH AH KHAWPUI MAWI TAK CHU A AWM..A ROPUI ZIA SAWI HLEITHEIHLOH KHA..
Report this comment
October 9th, 2011 at 10:59 pm
Kristian-te kan vanneihna chu hetiang thil ah hian beiseina nung kan nei leh thin. Hindu ho te chuan pian nawn lehna beisei mahse eng ransa ah emaw piang tur ah an inngai tawh a, kei Kristian te chu thihna in a hneh theih tawhlohna hmun ah lungduh then takte zawng nen chatuana lendunna hmun kan nei si a.
Mahse thihna natzia hi khawvel awm chhung hian a na chhawkna a awmlo, tawrhna khawvel a ni si a. A tawng tawhte’n a takin an hria a, la tawng velo ten a natzia an hmuthiam bawk.
‘Ringtu ni si thihna a tawrh nat dan em em hi’ tiin tumah indem ngailo ang u.
Report this comment
October 10th, 2011 at 12:21 am
I know how you feel, just remember that you are not alone….will always be there for you…
God be with you
Report this comment
October 10th, 2011 at 12:45 am
mate ainawn a va khawharthlak dawn tak em i dinhmun hi, ka khawngaih hle mai che, may God be with you…
Report this comment
October 10th, 2011 at 1:06 am
Ka chhiar zawngin ka mur uai uai mai. Tlangval luhlul mittui a parawl kuang thei mai. Ainawn, ka tawrhpuiin ka khawngaih ngawt mai che. I tana ka tih theih chu tawngtaina hi a ni mai a, chu chu ka ti dawn a ni.
Report this comment
October 10th, 2011 at 3:01 am
Ka unaunu, ka tawngtai sak che a nia.
Report this comment
October 10th, 2011 at 3:47 am
Ka lo tawngtai sak ve che a nia. I thu ziak a ngaihnawmin i testimony a ropui e. Pathianin a awmpui zel ang che.
Report this comment
October 10th, 2011 at 4:01 am
Ka tawngkam thiam lohna zawng tak a nih avangin ka hel ka hel a. Ka tih ve theih tawk ka tawngtaina ah ka lo hre reng che a nia. Thu leh hla lamah i khawharnate han chhunzawm teh khai. Mi vanduai ber emaw kan in tih lai hian keini aia chan chhe chang hi an lo awm ve zel a nia. Chunglam remruat dan hi hriatthiam a har thin teh a nia. Kan la tawn ve hauh lo tuara i paltlang pui theih kha a puitu che ah chiang la, hmalam hun pawh a eng zawt zawt mai ang.
Report this comment
October 10th, 2011 at 4:36 am
Frank takin sawi ila…thihna hi Pathian khawngaihna avang liau2 in kan chhung hian kan la tawk miah lo a i tawrhna hi ka tawmpui phak kher lo ang che.Mahse hei erawh ka hria…hmeichhia azawng a awmkhauh leh pachang ber te zinga mi i ni tih hi…Tin, he i tawrhna avanga i experience min share hian zirlai min va pe tam em! Midang tan malsawmna ilo ni zawk asin.Lalpa’n heti chen a awmpui tawh che a,a awmpui zel bawk dawn che ani malsawmna ilo ni zel dawn nia.Ka hla duh em2 mai hi Isuan i hnena a sawi ah ngai ta la…
So keep on walking that road and i’ll follow.
Keep on callin’ my name i’ll be there…
I tan tih theih nei tam lo mah ila ka tih theih chhun(tlem ber nilo) i tan tawngtai na hun ka lo hmang ve dawn nia.Hei ai hian chakna nasa zawk ala pe ngei ang che tih ka ring tlat.
Report this comment
October 10th, 2011 at 7:42 am
Mahni chanchin/ chanram/rahchin sawi hi thil nuam tak a ni lo a, mahse Misual ka thiante/unaute, mi puitling tak tak bula inbun ruah hawk hawk hi ka tan chuan, a hlu-in a nuam ber a..in tawngtaina thiltihtheihna pawh a taka changtu ka nih ngei ka ring tlat a ni.
Report this comment
October 10th, 2011 at 9:31 pm
ka tawrhpui hle mai che… i post hi ka chhiar hman lawk lova, inleng an awm thin vangin! tlai khawhnu ah ka ron comment ve thei tawk ani. I ziak lungchhiat thlak a, ka mittui a parawl! ka ngaihtuah a, a na dawn em mai… Mahse Pathian neitu i ni a, Pathianin a awmpui zel ang che…
Report this comment
October 10th, 2011 at 10:17 pm
a pawi khop mai..a va na duh dawn em.. Lalpa’n a awmpui tlat ang che nga, thlaphang suh ang che
Report this comment
October 10th, 2011 at 10:57 pm
Ka va han hrethiam the reng em,2005 ah ka pi,min enkawl seiliantu in min thihsan a,2008 ah min hringtu nu in min thihsan leh a,nikum 2010 ah ka pain min kalsan ve leh ta bawk..pianpui unau neilo ka ni leh zel bawk ka pu te 2 leh ka pi pakhat zwk chu an thihin naupang mai ka la ni bawk a,ka hre hman em em lo zawk,.mahse ringtu tan chuan thihna hi nun tak tak zawk bul intanna chiah a ni tih hi Pathian khawngaihna avanga hre chiangtu zingah ka tel ve a,thih ve tawh mai ka chak chang ni hi a va tam ve em!!
Report this comment
October 10th, 2011 at 11:58 pm
I tuar ve hle mai maw. Engemaw chen chu ka hriatthiam pui che in ka ring
thihna awmzia la hrethiamlo rual ni mah ila a reaction hi ka phur zolo lek lek fo ṭhin.
Pathian ngaihsak mi kan nih dawn chuan kan nuna amah aia kan ngaih pawimawh ber leh kan hmangaih ber hi a dah bo daih ṭhin. Chu chu lawm taka kan pawm thiam hi a ngai a ni.
Report this comment
October 11th, 2011 at 8:12 am
Comment lo luh belh a ni maw..Ni e ‘Tuarna” hi fin sawt nan te, Thlarau lam chaw atana kan hmanloh chuan’Thih ve” chakna in ka khat fo thin, in Comment ka chhiar hian min ti lawmin, chawlhna thui tak min pe a ni,..in vai chungah ka lawm em em a ni.
Report this comment
October 11th, 2011 at 10:23 am
I tawrh ang hi mipa tan pawh khawvela tawrh huphurh awm ber thil a ni a, mahse nang hmeichhe chungah a lo tla ta si, i dinhmun tur chu kei Pathian zara mahni rila rah la sun lo tan chuan a nat dan tur chu ka zuk tawp pui phak miah lo ang che. Mahse, i puitling hle mai he tiang ang tawrhna nasa tuar chung pawh hian mipangngai i la ni thei zel hi Pathian vang chauh a ni. Mizo Hmeichhe chhuanawm tak i ni e.
Report this comment