mi(sual).com

Khatia grape zu tia Mizoram-a a rawn lar hlut vanglai khan kei chuan Zu pangngai ka in daih tawh a; Zu tak tak in ve ngamlo leh a khap dan kawng zawnga lo phisekte ang chuan grape wine kha ka phulpui ve lova, ka phurpui hlut lem hek lo.

Chumi kum Inthlanpui hma deuh, Suangpuilawn biala MLA candidate-ten drama an chan hma thla ruk velah khan Pu Lalhmingthanga MP (RS) hnungzuiin, Pu John Neihlaia MPS leh Dr. Biakzuala (BZa) te nen Suangpuilawn tlangdung te, Hnahlan lam thleng thleng tlawhin kan zin khawthawng a.

Chutih lai chu a kum ka sawi lovang; Suangpuilawn-a tihdam rawngbawlna vung taka Parmawia’n a kalpui zawh hlimchhawn, a par mawina chuai vel lai tak kha a ni e.

Keini zin ve kha nuam fu ni! Suangpuilawn-ah Ui min talh a, kan puar kher mai. Uisa kan ei vang ringawt hian min hmuh dan ilo nei hmanhmawh ang e.

Mai mai! Korean serial ka en ve ngai lo, mahse an rama uisa man to zia te, an hehzia te ka hr eve bawk. Mizoram tlawhin an thalai rual kohhran hmingin an rawn zin a; kan Veng kohhranin tukthuan ei-ah an lo sawm a. Hawihhawm chhuahin Upa-ten, “Eng sa nge ni ang ?” an va ti dek dek a. An zaipawl zai aia rual zawk mahin “Uisa!” an lo ti asin le!

Kohhran pawisain Uisa lei a ngai a; kohhran choka-ah an chhuang khu laih laih mai mawle. Ka nuphal Pastor pawh Korea ramah zirna sang zawk um-in a han furlough (fawr-lawk tia lam tur emaw ni!) a, Pathian thu bakah Uisa tui zia an han hmuchhuak tel.

Unaute u,heng thu hi in hriat loh ka duh loh avanga Grape Wine chungchang atanga peng duah ka nih hi. Uisa hi zahawm takin, inhaubuai leh rui lungpuam lo pawhin a ei theih tih ka sawi duh mai a ni zawk. Suangpuilawn-a kan Uisa ei pawh hi in rin angina kan rui love.

Chutichuan, khua a lo var a; Zawng-In khaw kalkawng sira nghalpui (khuai) bu chu VC Secretary hovin zanah an lo la diam chu niin! Tukthuan atan Uisa leh arpui tuilai chum leh khuai no chu min han chhawp ta tehreng aaaaaaaaa. Tun thleng pawh hian chawhmeh neih loh apiangin ka ngaihtuah let a, ka chaw lak a la that phah asin!

Khuaino chu kan lo duh tlang a ni ang, a bangnawi a awm lo. Nazareth khuaa Wine tihpun ang vel kha a ni; uisa leh arsa kha chu kan khawih ta mang hlawm awm lo e. An VC Secretary chuan fiamthuin, “In kalna tur kawnga awm a ni si a; zanah kan va la a, an lo kawlh phian a. A zang lian zawk hi a zang te zawkin min um tlan leh thin!” a ti. Dik hmel khawp mai.

Tin, ngaiteh, kan MP sap chuan “Hei doctor thiam hmingthang kan rawn hruai a; a duh apiang tan a thlawnin IB-ah hian a inentir theih ang” tiin a tlangautir pek a. Dr. BZ-a lah chuti tehchiamin lo inring hek lo, damlo lah chu an tam phian mai si a. Fiamthu titak deuh roh hian Dr. BZ-a chuan, “Suangpuilawn-ah te chuan tidamtu Parmawia in nei a ni lo’m ni, damlo in va tam si ve. Ani khan mar dekin natna a hre thei an ti a; chuti a nih chuan khawl engmah a awm si lova, ani’n in mar lo dek se, in natna sawi se, keiin damdawi chawh ila kan rang deuh ang a……” te a ti luam a.

Chuti leh bawk chuan, Vanbawng-ah ni tain ka hria, ruai an siam a. Keia phur pheng khan kan MP-te nupa rawn hauh lovin tlangval rual football pet chu team hnih-ah ka hui then a. MP team leh a nupui U Parte-I team ka vuah a; an inkhel a, Sangkhat ka thap a. MP-te chawi tur vek a ruahman ka nia.

Tin, ngaiteh, referee ka ni nghal bawk a; ka tlan kual peih loh avangin field a lian lemlo bawka a lai atangin ka ham mai a. Team hnih khan ham lai chu min ti ngawt ang. 2-1 in MP team an chak lova; vantlang interview laklawh lain Rs 1000 ka zuk dil a; hawi he haw chungin min lo p eve mai bawk a.

Thuhmahruai va sei ta ve aw! Wine chungchang changthlan ve lem si; mut a chhuak dawn tawh alawm i ti mai thei. Vawiin chawhnu na na na chu ofis lama ka awl ve lai a nia; inleng titipui tur lah an rawn dikdak hek lo. Ka phur chen chen ka ziak mai dawn a ni ringawt. Kan naupan laia kan perhpawng laih chanchinte kha zep tel tai la, internet-a post tur a ni tho a te ka tih rilruk nak alaiin…..

Tak tak a; Wine chu i han bei chawt tawh mai ang aw. Tawi tek tawkin aw ni ang. Chutichuan, Hnahlan chu kan lut ta a; grape chingtu association-ten min lo dawngsawng a; an grape huante pawh kan fang a. Grape rah chu a lo hmin dumpawl bawr tup tup mai a; ka han vam pap a, a thlum lutuk lem lo. Rai-no tana ha-tim lova puar khawpa ei theih tawk vel a nit a awm e.

Tin, a rah ei tum ka nil ova, a ZET U ZU lai kha ka belhchian duh chu a ni zawk a. Thelret tuizem lian (Sintex) hian an um a; a nei ve phak lo chuan zem chi dang an hmang bawk a. Grape chingtute intelkhawm president in-ah chuan kan thumuang a. “Keini chuan zing thingpui pawh kan inlum ngai tawh mang lo va; hei grape tui hi in ve mai ta che u” tiin rialno hian min rawn sem den den a. Hmana Sap rama ka kal theih tak loh avanga Sap film ka ena an wine in ang khan ka thiante chuan an in a. Kei erawhin wine no khat tih mai mai te chu ka duh khawp teuh lo mai.

“Khawi maw, in tit a sa sa, bucket khan min han chhawp teh u. Aizawl velah khuan parawn awm fu fu hi Hnahlan grape wine a ruih theih tih leh a ruih theih loh tih vel mai mai-ah an inhnial a nia. Ka thlen thlak ve leh chanchinbuah ziah ka duh” ka ti lung lung a. Chutichuan, YMA no nga lai ka in a; zing kaw ruah lai a ni bawk a, ngaihbel pah deuh chung chuang hai chhawlha inhriatna chu ka nei. Chu zawng ai chuan, ka pum a thip a, ka puar hle bawk. Hei hi, keimaha a thawh dan a nia. Rui khawp chuan ka in peih hauh lo tihna a nih chu.

A tawi zawng zelin aw ni taw hang. Aizawl ka thleng a; Mizoram grape wine chungchanga ka thil hmuh, an um dan, an sawngbawl dan leh a kaihhnawihte Vanglaini-ah ka ziak chiam a. Engkim mai hi rui duh tan chuan a ruih theih a; Pathian thu te, politics te, pawisa te, nula te, grape wine te pawh tih ang velin ka tlip tain ka hria. Tin, khap bur rama awm kan nih avangin grape chingtute thlavang kha ka hauh pah duh hrim hrim a.

A tirah chuan an hank hap bur hmanhmawh pek reng kha. Chutiang boruak karah chuan mipui kaihhruai tumna kawng nger sa nei ranin ka ziak a ni. Kan thianpa Lalmuanpuia Punte pek hian Vanglaini vekah min rawn tawng a. “Thianpa Tm-a ruihna khawp hi chu eng Zu pawh ni se, nau bualna khawp hi a ni hrim hrim. Chuvangin grape wine hi Zu a ni” a rawn ti phiar phiar a. Miten Zu heh mi-ah min hmuh phah mah se pawi a ti lo tihna a ni. Zak theilo roh hian.

Amah hian a heh fe zawk – Zu chu; mai mai a. Thu mu hnu mah ni se, ka thinrim thar leh deuh tlat mai ka ti. Tun thleng hian Zu hi ka khilai duh tawh lo. Hman ni-ah pawh Delhi-ah ka awm tih a hria a; inchhung bungrua leh finna lam hawi lehkhabu min chah miah lo. Pu Denga’n thil a tih ang kha min chah a; kei hian chu ‘thil’ chu pianthar vang ni miah lova ka lo bansan lailawk lai (cease-fire lai!) a nih si avangin eng thil mah ka hawn lo. Internet a khawih thiam lo bawka a lo chhiar ve em lovang chu maw!!!!

Awle, tunah chuan hma kan sawn hret. Mizoram grape wine pawh duat taka hming vuahin Zawlaidi kan lo ti ve ta a; sawrkar pawhin ualau taka zawrh phalsakin, chhiahte a hmuh phah ve ta a. A chingtute pawhin Bank atanga loan la-in, tunhma aia thianghlim leh itawm zawkin an chhawpchhuak a; sum hnar ber atan an hmang ta a nih hi.

Tunah a tlangkawmnan, thu-takah ka hruailut tawh ang che u. Nikum leh kum hmasa lamah khan grape wine hi thil thar a ni bawk nen, Zu tak tak kan lo khap bawk nen, mitin khan in chhin leh in tehah khan an neih a. Hralh pawh a kal chur chur hle a ni. Reiek tlanga Anthurium Festival-ah phei kha chuan, anthurium ni lovin grape wine festival ni zawk awma mawiin hralh a kal a. Festive mood-a min awmtirtu a ni a, tangkai tak a ni. Anthurium zawk kha chu kan chu-kha peih vak lo niin a lang.

Chuti taka kum hmasa lama hralh a kal avang chuan Mizoram-a grape chingtute pawhin a aia taima leh uarin Zawlaidi chu sum hnara chantir tumin kuminah tan an han la leh a. Ngaiteh, kum hmasa aiin a rate a hniam a ni awm e; a chingtute leh Zawlaidi siamtute chuan lungawiloh lantir nan hralh chhuah loh an tum tih thawm ka lo hria a.

A rate siamtu ka nil ova, a chingtu ka nih bawk loh avangin an thubuai hi chu kei hian chai ka tum hauh lo. Tin, wine te chu thlai dang ang a nil ova, a inup rei poh leh a tuiin, a to ting mai dawn ni turah ka ngai a; a chingtute tan chiat duaina turah ka lo ngailo pek a. Leiba rulh pung tur chu thu dang daih ni se.

A pawimawh ta ber chu hei hi a ni. Tunlai khawvelah mitin hi thil siamchhuaktu Company hming emaw, an sumdawnna hming BRAND melh vek kan ni tawh a. Entirnan: mobile handset, TV, Fridge, Car, Bike, computer, theitui chu sawi loh tui in-tur (mineral water) etc. thlengin consumer-te min hiptu chu a BRAND a ni.

Zu/Wine ah phei chuan a ni lehzual. Chuvang chuan, ZAWLAIDI hi kan siam chhuak tam zel dawn a nih chuan Mizoram-ah market a hnawng thuai ang. Tuna pang hian grape wine hi kum hnih kal ta ang khan Mizoten kan rui tawh lo niin a lang. Kohhran hian kan Lalpa isua thisen anpuiah an pawm mai hmel loh lehnghal a.

Chuti a nih chuan, grape chingtute leh Zawlaidi siamtute hian Mizoram pawn lamah a hralhna tur an zawn a ngai. Mizoram pawna hralh tur chuan ZAWLAIDI hming (Brand name) hi hnam dangin an hriat hmel loh. An hriat loh chuan an lei lo tawp ang le; tem chhin ve duh hrim hrim lo chuan.

Ei leh in chungthu-ah ngat phei chuan mi an duhtui lehzual tawh a ni. Chuvang chuan, grape hi kan unaute hian an thar belh zel dawn a nih chuan khawvel huap pawha wine lama hmingtha sa Company-te nena inremsiamna thuthlung siam vat a finthlak ang. Chutichuan, Zawlaidi tho hi hming dang – Del Monte etc. emaw hmingin an hralh chur chur tawh mai ang. Grape huan siam, chin, enkawl, lawh, sawngbawl leh a hralh thlenga vaihma reng theih rual a ni dawn lo tih hi ka hmu reng a ni.

BRAND avang bawk hian alawm MIFCO te pawhin Saptheitui te, Lakhuihtheitui te an hralh theih loh a, an pachhiat zawh tak ni. Tunah hian Mizoram sawrkarin Company engemaw nen inthlunzawmtir an tum a ni awm a; a la fuh ngawt ang.

Khaimah aw…… Kum 2002 khan Pragati Maidan, New Delhi-ah khuan India International Trade Fair-ah Mizoram Pavillion-a Public Relations Officer –ah thla khat zet zawt ka tang a. MIFCO lamin an theitui siam an zuar a; Soil &Water Conservation Dept. lamin an coffee thar an zuar ve bawk a. Kan hralh thei lo, a tirah chuan. “Kha kha eng nge? Eng company siam nge ? MIFCO chu eng nge? Engnge in pawlh ? Mizoram chu kaha hai ?” Aaaaa. Chhan tur leh hrilhfiah tur a tam lutuk. Tih dan thar ka duang a. Korean ho water-filter hi kan lei a; Saptheitui chu kan chhung a.

No paih mai theih ang chi te ber hi kan chhawp teuh a, a thlawnin kan tem chhintir ta zel a. An hmuh laiin kan han in ve zauh zel bawk a. Chumi hnu chuan kan hralh thei ta khawp mai, kan hralh zo ta hialin ka hria. Baibing tin te, rawtuai tin te erawh zahtheihloh chhuaha inhnawn chawt chawt a ngai fo, a ei ve ngailo hnenah chuan. Chutiang bawkin, Coffee pawh chu mawle.

Ka thiam tawkin kan fak tak tak a; Nescafe siam anga chawplehchilha in nghal mai theih (instant coffee) a nih lohzia te, chum so reia a tuina (flavour) lo chhuak a nih thu te kan inhrilh hrep zel a; kan hralh thei leh ta fu bawk. South Indian ho erawh chuan an in than dan a ni bawk a, i-he lovin an rawn lei chat chat mai.

Ka fak ar-ek leh lutuk nge ni, tlai lamah hi chuan tawng tawlhpanal hi a lo thleng tawh thin bawk nen; tum khat chu NESCAFE a an Manager a lokal a; min rawn chhuahchhal a. “Engah nge Nescafe aia tha i tih ? Eng company nge in nih ? In zak lo’m ni?” te min rawn ti tain ka hria. Kei erawh zawngin pa zaidam tih takah, kut zungchal chauh lek kawhin ka fak dan ka han sermon khum a; an coffee leh kan coffee danglamna ka hrilhfiah dan te nen. An pavilion lamah a haw ta a nih kha.

Chu daih kha asin. Mizoram Grape Growers’ Association-te pawh hi thiltithei chuan kawng zawnpui teh u. Chuti lo zawng an thawhrimna hian nakinah beidawnna a siamsak ang tih ka hlau hlel love. Kum tela an thar tam chuan BRAND lar leh rintlak, tumahin tiltipna leh iaina nei miah lova an khiat pap pap ngamna tur thurualpui an mamawh a ni e.

Pepsi, Coca-Cola, Frooti, Bisleri i in dawna i ngaih a tha zan ang chiaha India ram leh khawvel ram zau zawk a kan grape wine te, kan saptheitui te, kan sertui te miten an in ve theihna tur chuan Company lar leh rintlak ni sa hming (Brand) hawh hi I hreh hauh lovang u. Saphun azawngah chuan hnam danga Saphunna hlawk tak, ram leh hnamin a dinchhuahpui theih tur chi a ni ka ti.

Ka peih tawh lo. Mangtha vek ule. Mi zawng zawng ofis an bang vek tawh. In lamah eirawngbawl leh insuk tur ka nei.

Similar Posts:

• Zawlaidi-a ka ngaihdan leh a hriate ngaihdan
• Grape Growers Society VS Excise Dept.
• Grape wine chungchanga tunlai thil awmzia
• Zawlaidi- Kan zu hming thar tur chu!
• Wine is Wine! Grape juice is grape juice!

Recent Posts:

• Breaking News: Lungdai Nu Vai bawngchaw zawngin pawngsualin a sat hlum
• Comedian Search 2012 Fiamthu-2 (Link dik leh thei thei tawh lo veeeee!)
• Ka Mit Laa, Ka Rilru Khawihtute
• mi(sual) member piancham!
• Kal dem dem.

This entry was posted on Thursday, November 3rd, 2011 at 1:00 pm and is filed under Opinion, Zu. You can follow any responses to this entry through the RSS 2.0 feed. You can leave a response, or trackback from your own site.